KAANSA PHEL DING THAZIALKEI NI

By~Vz Vualnam

Lungtangphatna ka paakta a,
Pasalna ahi chi in ka lenkip hi.
‘Hi’ ka chih tuh hi ka chi a,
‘Hilou’ ka chih tuh hilou ka chi hi.
‘I’ chi a thupuukna ka bawl nung,
Thuumna himhim ka ngaikhekei a,
Kahna leng ka limsak samkei.
‘Aw’ ka chih khit nung lah
Ka kisiik ding ka theihkholhlai in leng
Ka khelthak ut bilbelkei hi.
Ka thupuukna kheel a,
Ka kisaipih mite suk kipah sa’ng in,
Ka thupuukna ka lenkip a,
Mite muh a gilou hih ka teelzaw hi.
Lungtangphatna lah haatna in ka sep ngal a.
Ahi, pasal chih in a hinpih ding in hoih ka sa hi.
Nikhat tuh ka niteng hinkhua enkhe ding in,
Ka taksa taisan in ka gal-etta hi.
Ah, ka lenkip lungtang phatna,
Haatna ka na chih nilouh,
Haatlouhna ana hizaw maimah!
Hon bahsaktu ana hizaw maimah!
Kiim leh kiang adia ahoihzawk a,
Ei mahmah ading a ahoihzawk a,
Gitlouhna leh khelh ahihkei peuhleh,
Thupuuksa kheelkiik theih ahoih hi.
Bang ding in apoimohloupi in eimah leh eimah,
I kam a thupawtte in i kikaan dia?
Huai lah pheltheih ahi nawn ngal a.
Eimah i kikaanleh, eimah i kiphelkei dia hia?
Hoihzaw ahon tut ding naakleh,
Kaansa phel thasialkei ni.
Huai tuh haatna ahi ngal a.


©Siamsinna leh Vakiangbu