SIHNA LEH ITNA

By ~ Vz Vualnam

Dak zekai ahong ging nawnta,
A zatu tengteng a ding a lungliapna!
Ah, kholai a minautang a ding in bang ahia?
Sisuun innkuante a ding in bel
Bilbuuk a khet bang in angaih ding hi.
Sisuunte innlam ka va naih a,
A inn uh ka muhma nangawn in leng,
Lungkham-lungngaihna thawm ka za hi.
Ka va luut a, khitui nuullou himhim a omkei uh.
Tuang a beng ua, a khe uh atat ua,
A awm uh a tuum ua, tuanglai ah akizial ua,
‘Ka ut mahmah kei,’ achi ua, ‘Hong kiik ve nu,’ achi ua,
‘Nu ei, khatvei beek hon dawng lai ve,’ achi uh.
Hehnep zoh ding himhim ahikei ua,
Zum leh zah himhim akhual zoukei uh.
A nu uh alai ah alum dildel a,
Zan khawng a a atate’n awlchik a asapna nangawn uh,
Kithalawp tak a dawng ding nu hinapi in,
Tu in kapkawm a asapna uh nangawn leng,
Dawng nawn himhim talou ding in,
Kisathei tak in puandum in akikhuhta hi.
Mikhual hong tung masa tung nanung lah
Khitui kesa in ahong tung ua,
Kahna leh mauna thawm a dai ngeikei hi.
Zingni-thaini ahong hi dia,
Innsung-huangsung a akhutma lah,
A ngeingei in ana om ding a,
Chikchiang in a mittui uh ahul dia?
Sihna hichitel in anaa maw?
Hichitel in mite a bumhai maw?
Athuaktu loungal in anatdan theikei.
Huchi’n ka diangkhia a, hanlam ah ka hohta hi.
Han ka tunma nangawn in mi nuihging ka za hi.
Tangvalte hantou in a om ua,
Nungakte’n tuisik ahawm vialvial uh.
Huchia han atoh kawmkawm un,
Chiamnuih a gen ua, anui keek zuazua uhi.
Hiai munlou koimun dang ah,
Vualnopna nuamzaw a om a?
A hankhuk toh uh chihlouhngal
Sihna omlam taaklang ding,
Thildang himhim a omkei hi.
Nungak leh tangval khenkhatte lah,
Hichi bang hun manpha amuh uh aam in,
Paam deuh khawng ah atukhawm tittet uhi.
Sihna’ natdan zaw ateelte kia loungal in
Theihsiam zoh ding ahi himhimkei hi.
Ah, itna! Sihna bang mai ahi!
A ittulou a ding in theihsiam theih ahi himhimkei.
Ke’n lah amah ka itna ka bahpih a,
Sunkhua in ka nguipih a, zankhua in ka kahpih hi.
Himahleh kei a ding a itna himhim neilou,
Nungaknu’ a ding in ka itna bang phet ahia?
Zankhua a ka kahna bang leltak ahia?
Chiamnuih leltak loungal bang ding in ahoih a?
A gaal a hon ente a ding in nuihza bawlna leltak loungal,
Bang ding in mahmah in aphatuam a ahia?
Ka lungkhamna tung a nuihna ding a muh ua,
Ka khituite’ ziak a vualnopna amuh un leng,
Aw, ka it nungak, hon nuihsan mah lechin,
Ka hon itna zaw kei ding in itna ahi peetpeet a,
Ka bahpihlou theikei a,
Ka nguipihlou theikei a,
Ka kahpihlou theikei a,
Zum leh zah himhim ka khual zoukei hi!
Itna hichitel in anaa maw!
Hichitel in a bumhai maw!
Ka lungtang ah lah na mel leh aw kilawmte,
Ahi bangbang in a omden ding ua,
Chikchiang in ka khitui ahul mahmah dia!
Chikchiang in ka natna adam mahmah dia!

©Siamsinna leh Vakiangbu