KA TEHNA MAH A TEH IN KA OM

By ~ Vz Vualnam

Ka mel tuh Guite Road bangmai in asia a,
Ka ngaihnou’ itna ka kiang ahong tun theihlouh na’ng in,
Kei leh ka ngaihnou’ kikaal ah aphok leplop a
Ka ngaihnou’ itna in huai lampi ahon tawn ngamkei hi.
Ka duang tuh Tuitha lei bangmai in asia a,
Ka ngaihnou’ itna ka kiang ahong galkah theihlouh na’ng in,
Kei leh ka ngaihnou’ kikaal ah akikhung deepdawp a
Ka ngaihnou in huai lei ahon zui ngamkei hi.
Bang ding a ka meel Tuibuang lampi bang himailou ahia?
Hileh ka ngaihnou’ itna ka kiang hong tungta ding hive’n!
Bang ding a ka duang Tuivai lei bang himailou ahia?
Hileh ka ngaihnou’ itna hong galkahta ding hive’n!
Bang hang a itna khenkhat meel in daal sese ahia?
Bang hang a itna khenkhat duang in daal chiitchiat ahia?
Itna lah muhtheih pumpi paikaan a
Lungtang tawng a teeng ding ahi ngal a!
Bang hang a alampi a meel leh puam ana ding sese ahia?
Ah, kua ka mohsa thei dia? Kua ka dem tuan dia?
Kei mahmah in lah meel in ka na pan masa ngal a!
Mel leh puam a ka kikimpih mite nawlkhin in,
Ka kiim leh paam a omte taisan in,
Ka batphaaklouh aleek a om lah ka deih ngal a!
Ka omna munniamzaw apan a,
Asangzaw a kaltouh ding ka kithalawp zahzah in,
A kikimpih mite nawlkhin a, a omna mun sangzaw nawsia a
Mun niamzaw a hong kumsuk ding a thasial samkei dia hia?
Ka tehna mah a teh in ka om a, ka buukzou takei hi.
Kipahna delh a i khosakna leitung ah,
Eimah tehna mah a teh in i om naaknaak hi.
Mite’ hon tehna a i khasiat leh
En bang in i teh masa hiam chih ki-enchian zaw ni!

©Siamsinna leh Vakiangbu