EN ZAW ‘VIRGIN’ PIH DI LE MUZOU KHANG EI….!!

Written By : K.Lianthansang @ K Thansang Zomi

February 19, 2014 nitak Electric lah a ngeina bang a hong pailou nawn..! Laa khat in , “ ..Dumde bangmai in Vaakzel in Mitzel…” chi sam zaw hi a, huai sawng(hun) lak teng in bel “Dumde” le a tuk zoukei(Mit den hiven). Mi neih bang a ‘Inverter’ nangawn le nei zoulou kahih man un, ‘candle’ tawn khat ka de vak kiu-kiau ua, a kiang zek ah ka nau te’n(Class-X di leh Class-XII Exam lel-lel) Lehkha sim uhi.

Ka nau-te kiang ah ka nu’n ‘Laizial or Dumzial’ zial a, TUIBUK muamkawm hi. Ka Pa’n a kam(muk) ah Laiziak tep lelaw a, mutheilou sa-sa in tutna neu-te ‘Nylon(New York and London)’ zang(use) in Phan keuhkeuh a, ken leng a kiang ah kizilna dan in adang khat kana phan sam hi. Electric a pailouh chu a ningkitel huai khopmai..” tu nitak zaw a pai nitak, a chih sek uh hi a…” chi namnam kawm in Ka Nu’ kiang ah, “ Nu…thilkhat kon dong aw..?” ka chi hi.

Ka Nu’ kiang ah, “ Nu…SIHNA zuak(sell) le a kikhawng zou diam?” ka chih leh kindeuh in, “ SIHNA zuak le bang di’n a kikhawng zou mawk dia…..Innsung a SIHNA khawng hong tun di lauh ziak a, Damlouh zek chiang bang a sum neih sunsun toh daal theih dandan a ki daal a, neilou sa-sa a Doctor vaki naih a, kuaman SIHNA leinuamlou duh ahi. DAMTHEIHNA zuak le bel kikhawng pah di hi a, SIHNA hial zaw kikhawng zou mahmah lou di ahi…SIHNA kichi ZUAKTHEIH zaat(thil) le ahi tel a hia….?” Chi’n ka nu’n hon dawng hi.

Thumu ka kisa mahmah mai a, ka Nu’ kiang ah, “ Nu…..Kei ngaihdan in bel SIHNA zuak le kikhawng mahmah di’n ka gingta. Suun chiang a ‘TUIBUK’ tep chin a, na tep-lim sa te Pitek-putek te sang in Nungak-tangval lai te’n hong lei tam zaw uh ahi chih kei a na muh dan ahi. Huai kia hilou in, tu’n ‘LAIZIAL’ na zial a, hiai-te le zingkhawng chiang a mi’n hong lei bei nawn pah lou duh maw? TUIBUK, LAIZIAL, PARAS, KHAINI, RAJA, ZU, GALVAN leh a dangdang ZUAK a ki pei te ‘SIHNA ZUAK’ ahi mai uh, hiai te’n awl-awl a(Indirect a) mi that ahih ziak in. Tulai a thil zuak’ laklak a Zuak nop pe’n le hiai-te kan ahikei. A lei te’n lah aman tam in tawm taleh, mi ZUAK na zah-zah a lei top-top ngam maimah uh ahih chiang a,  SIHNA kichi Khotnop tuak sa kahi” ka chi hi.

Ka Nu’ kisuanglah sim ahi diam a, a dai vengveng hi. Ka Nu’n TUIBUK leh LAIZIAL khawng zuak a, mehman di neng leh kou a tate Siamsinna a poimoh-te hon ngaihtuah sak zel ahih ziak in, ka thilgen ka kisuanglah thak mahmah mai…!! Ka nu’n, “ Zawn luat ziak in deihtelna a kinei kei a, SIHNA hi le-le kizuak mai dan ahi. Mihausa te’n bel SIHNA zuaklou a le a neek di uh mumu ahih ziak un: Mihausa-te a DIKTAT ua, NEKGUUK a chiing kei ua, a SIANGTHOU ua, GINNA lam ah le ana HAT deuh uhi. Huaiziak tak le ahi di, tulai a Saptuam leh Khotang a makai dia  Mihausa te I hah zat deuh uh” chi’n hon dawng hi.

Ka Nu’ hon thilgen ‘tawmchik’ himahleh ‘tampi’ genkha hi’n kathei. Ka zawnluat ziak mah un, Khawmpi chiang khawng in Tuailai Lapawl lak ah kana kihel ngeikei..!! Aziak ahihleh a neep tawp a; ‘Lapawl Form’ neih ngai, Kumdang a neihsa te setdet theih hilou, Khawmpi kichi Puansilh-niikte’n te ki lahtuahna’ hun toh kibang, ken Puanhoih leh Kilawm lahkhiat(silhkhiat) di nei zou mawklou, I neih sun-sun toh kikhawm lelah, “thring lua” chih kiloh. Huaiziakin, Khawmpi khawng omchiang in Inn ah ka om a, ‘Live’ a honkhah ua, ‘Light’ a pai leh Lungsim kihong tak in Thugen kana ngaikhesek hi.

Huai nitak chiah in zaw ka ngaihtuahna ah thil tam honglut khop mai. DVD Cassete a Film tampi om’ theih bang in, kei lungsim ah leng thil tuamtuam tampi petmah hong om hi. Paunak khat a, “ A hau te hau denlou dia, a zawng te zawng denlou ding” chi a kigen khawng ka ngaihtuah dundun hi. Kou Innkuan Zawng ki sa mahmah le ung leng, mi’n ahau bang a hon simtel uh ahi ngei dia, “BPL(Below Poverty Line) Card” kichi khawng muhkhak in kanei ngeikei vanglak uhi. Himahleh Vangsiathuaitak in( Solkal Sumbawm ki koppih ka omlouh man un ) Job Card ka na nei kha zenzen uh.

Ka lup tak un, keikia lupna tung ah ka ki lep tuahtuah mai. Vot sim ahi ngei dia, February 17, 2014 a vuah a chiin ngeuhngeuh lai a khaw votdan khawng ka ngaihtuah khe kha thepthup hi. Huaini’n vuah chiin mahleh atam hua-hua kei. Vuah atam hua-hua louh hang in Lamlian lai ah hawktui leh niin bulom hong luang hua-hua thou uhi. Nalla kuak a pan a Bottle hawm tampi hong pawtkhia a, tui in lampi lai khawng a atuah duamduam chiang in, tuikulh gam kituh ziak a Japan longpi te’n tuitung a China gam lam a naihkhop duamduam uh toh kibang kasa a, et-nop vanglak…!!

Ihmut kasawm zoh peuh leh ka ngaihtuahna ah thil tam hong lut deuhdeuh mai. Tuhun( 21st Century) pe’n mi’n ‘Computer Age’ le chi nawnlou a, ‘ Nuclear Age’ a chih lai un eilawi 20th Century lai a om I bang lai uhi. Hiai thu ka ngaihtuah khiat ziak ahihleh, 1990 – 95 kekal a Latualleng kithang mahmah, Chinzakhup in a na Phuah, “….Eite’n vai I hawm chiang in, hawktui in nalla kuak tawn ding a; Mihing in lampi lai tawn in, hawktui leh mihing lampi kituh nawnlou ding….” Chih pen tuni dong, a dik lailai tel ahih ziak ahi. Tuni chiang in eite’n, I MDC leh MLA-te uh tungtawn a vai I hawm taak ziak un, hawktui in apai na di mun ahaih nawnlouh I lam-en a, huai ding a Fund tuamtuam Government apan hongpai te’n leng a paina di mun uh a zot siau-siau taak uh kana lam-en mahmah hi. Huaiziak tak a lungmuang le kahi dia, katheihlouh kal in ka ihmu kha hi.

Zinglam dak 03:00 lak in ka khanglou a, Kha a na vaakpha mahmah. Kha vaak ka lupna kiang a Window(Glass a kibawl) ah honglut in ka lupna bang hon taanvak zou mahmah a, lunglen theibang thousak mahmah hi. Zingthoh lah hun nailou, ihmut lah suak nawnlou zel. Huchia ka om-om leh Valentine’s Day(2014 pen) lai khawng ka ngaihtuah khe dundun a, ‘Projector’ a kapkhiat mahbang in ka mitkha ah thil tuamtuam hong kilang dundun a, huaite lak a nalh kasak mahmah ahihleh, Fb a lawmte( Facebook Friends) chiamnuih hat mahmah khat in, “ Valentine’s Day zatpih di naneih kei leh Aakmul in nabil holh lechin “ a chih ahi. Chiamnuih a agen himah leh etsak tampi nei di’n ka gingta…!!

A dang khat nawn ahihleh Chiamnuih mah ahi a, tulai a thiltung te toh ki zawitawn deuh a hongen hingei dia ka gintak tuh “ Valentine’s Day zatpih di chih phetlouh, hon RAPE di le muzou khang..” chih ahi. Hunpaisa te ka nung etkik zel a, Gamdang a laizil a kakuan ma a Ka nungaknu bang ka ngaihtuah kha thepthup hi. Gamdang ah laizil in Kum 5 sung ka omkhia a, ka nungak nu’n phone a neihlouh ziak in kaki thuzak mengmeng kei uhi. Ka laizil namun a om a, innlam pai ngeilou , Christmas hunkuan chiang a mi’n a innlum chiat uh a zot chiang un, ken Koilam ah kilohna di om dia aw chi in kilohna di zong in kana buai mahmah sek.

Huchia haksatak a College kai na di kiloh tawm zel a kum 5 ka om nung in, Sepna thupilua hikei mahle kon musam ta. Ken le ka Nungaknu kum 6 lam hial mukhalou kahihman in leh Valentine’s Day amah toh zatkhawm ka ut man in, February 12, 2014 ni’n innlam kazuan vengveng hi. Damtak a inn tung in, ka Nungak nu’ Card di lei dia New Bazar lam a kava pai leh Ka nungaknu Vaite khat toh Bazar kawm a Inn(Hotel) apan hongpawt khiat chet uh ka galmuh hi. Hiaihun chiah in Cartoon gelhsiam te’n kamel gelh le uh bang a chi phet(bang mel ka pu phet) diam ka chi sim hi.

Ken le Pawna lua kahihman in kava naihphei a, a kiang uh katun tak in, “ Bang hih uh e, meh di zong uh maw? Kua e na kitonpih Pa ?” ka chih leh Ka Nungak nu’ a kuun dedu a bangmah a genkei. Vaipa’n, “ Zawlpa, kei ka nungaknu toh zan nitak apan a hiai Hotel a giak hita bele, nang’ kou theingei maw zawlpa, kei Lamlian bawl a hong-om kahih ziak a kamin dia ‘Lian Kumar’ chimai bele, huchi’n kei sam lechin kei kipak mama di bele……nang bang bawl maw zawlpa ?” hon chi zatzat a, vanlam ka en a, vaan a sang khopmai….!!. Gen di pen le katheikei, ngaihtuahna mumal le kaneikei, Vaipa’n hon dotna ka dawng kei a, ‘Card’ le leilou in innlam kazuan hi.

Huai nitaklam ann le ka nepeih kei, hichi bang a ka itpen in hon zulhzau san mai zaw thuaksiam ahak ngei mai. Ka lungsim in, “ Hichih di lam thei leng zaw, ka Sepna a Naga Nungak, Duangching leh Melhoih mahmah khat in honngai lua a, a itna thu hon gengen  lai a ana dawng mai di hi’ng a, hiai khawng ziak mahmah hidi eive Eimi pasal te’n Namdang numei-te Zi a aneih khak naak na uh. Nidang in namdang zi a nei te khawng bang hai uh kana sa mahmah a, tu’n ahihleh kathei siamta, kathei siam lawta….” Ka chichi maita hi.

Eimi Nungak khenkhat-te( a vek ua hilou) a Pallut lai ua Namdang te tang ua, a kichai nung chiang ua Eimi Pasal te tang uh hidi’n ka ngaihsun hi (Ka nungaknu’ omdan apan in). Eimi Numei-te lak ah, “ En Zaw ‘Virgin’ Pih Di Le Muzou Khang Ei….!!” Chi vungvung kawm in, Namdang Numei, ‘Vaite Chalak’ a puuk maimai lou leh siangthou te ‘Virgin Pih’ dia zong di leh ZI a nei di’n THUPUKNA kiptak mai ka lata hi.

                                        2001 – KAKIPAK – 2014 

©Siamsinna leh Vakiangbu