INDONGTA COURT vs GOVERNMENT COURT:

By ~K.Lianthansang@K Thansang Zomi

Zosuante lak a kisukkhelhna om chiang a, Police leh Sorkar Court a kipilut lou a, Indongta Court leh Pupa tawndan pansan a i kisukveng tuahna tungtang uah, chik hiam apan houlimna tuamtuam tamtak om hi. Khenkhat ngaihdan in, buaina a om nawnlouh na dia, khutkhial tu gamtatdan toh kituak a gawt ding chih ahih lai in, khenkhat ngaihdan in, Khristian leh Zosuan khat i hihna toh kituak a, Indongta level a kisukveng a, kingaihdam ding chih ahi.

Ei Zosuante lak ah, khelhna khawk taktak a om chang om mahleh, ki ittuah dan, kihehpih tuahdan, kipanpuh tuahdan, pupa hun apan i na chiin touh uh, i koihkhiat theihlouh uh ahi. Vaigam khawng a tuahsiatna (rape, thah, soisak) tuak a om chiang in, khutkhial a ngoh a om ding lauhziak in mi tangpi kisubuai nuamlou uhi. Himahleh eilak ah bel, kholak a buaina tuakte huchi mai a nutsiat hilou ua, khutkhelhna leh kisukkhakna om chiang bang in leng, namdang leh gamdang in a neihlouh uh 'Indongta' vai in kisuveng a, hun tamtak ah i kingaidam sek uhi.

Ei lakah i paidan uh hoihtak om mahleh, 'mi'n gilou a hon bawl leh gilou a thuk ding, i tung a mi a khutkhelh uleh, akituak bang gawtna piak ngeingei ding, mi ngaihdam cih khawg mihai leh mi dawilokte omdan ahi' cih ngaihdan nei tulai in kitam mahmah hi. Mi'n hon sukkhelh uleh, hon lauhtheih ding bang pen ua om a, kimaingal sak louh ding, et gemgam a, awkhauh leh thagum thatang a kinawkpih ding cih mi tamtak ngaihdan ahi.

Tulai i khovel kidemna, chalak a kibeihna, thahat leh poisak neilou deuhte vual zohna, sum hau deuhte vualzohna, ha sik in ha, mit sik in mit, chih paidan hisimta hi. Jesu'n amah nungzuite om dingdan a sinsak dan toh 'kikelki hilhel' hi. Khristian te i kithah tuahtuah chiang ua, Unau Meiteite'n agen uh bang a?' Jesu leh Jesu kidou (Khristian te mah kidou)' chih hitel ahi.

Ei Khristian tamtakte'n i ginna uh taisan a, khovel paidan a vualjoh i sawmlai un, khenkhat ei pupa ngeina dan in kingaidam uhi. Athuak tute leh khutkhialte kingaihdamnate thupi mahmah hi. 'Ka zi, ka pasal, ka ta, ka nau' a hon huchih sak uh, ka thuak bangbang thuak sam uh hen', chi a mi khenkhat a omlai ua, 'Khutkhelh theih mah ahi, thupha toi a nongpaina uh, kon sansak uh, kon ngaidam ua, bangmah ka la kei d'uh' ci leng om zel hi. Khristian dan toh koi a kituak pen dia? Jesu'n eite leng bangmah lak hon neilou a hon ngaidam ahi chih mangngilh kei ni.

‘Na lak ua buaina a om chiang a, thukhenna nei ding a gingloute na zot uh, na lak ua gingtu, thukhen thei heutu neilou na hi uh hiam? ' chi'n Sawltak Paul in a gen hi. India in Judicial system hoihtak neimah leh, buaina sukvengna ding a hun sawtpi lut, sum tampi bei, case sukvenglouh a lakh a sim om ahihman in, thudik in vai a hawmlouh huntam mahmah hi. Hichi bang dinmun ah, ei Zosuante'n Indongta, pupa, Nam Pawlpi leh Pathian min suang a i kingaihdamnate uh phattham ching mahmah hi.

Tua bang kal ah, theihtuak mahmah ahihleh, Indongtate kingaihdamna in, khutkhialte tung ah kipahna leh kisuanlahna thupitak om in, siam kituhna thupitak in a zui a, himahleh, tupmawng a kithah leh kikhoih chihte, Indongta vai a genveng ahih chiang in hoih mahmah bangmah leh, Migilou pen sukha zoulou ahihman in, Indongta vai leh Indongta vailou dingte khensiam poimoh mahmah hi.

                                              0910-----KAKIPAK-----2013

©Siamsinna leh Vakiangbu