VALENTINE'S SPECIAL

By~Nasri Jona Tawmbing

VALENTINE’S SPECIAL ~ I

(Ka edit man kei a, asim a haksa kha sim maithei)Thumapi : Kua a hiai misiangthou ahih, bangziak a Valentine’s Day a iitna ngaithupi sese i hia? I theihchiang mahmah di-ua ka gintaak chu hiai Valentine omna’ khaa (month) Febuary khaa peen kha Romance kha ahih ziak ahi. Kum zabi thum (3)na vel a Rome namte Siampu LalEmperor Claudius II in pasal-te nupi nei a innkuan dit sang in Sepaih a pangsak hoih zaw chiin thupuukna abawl. Huai dan deihlou tu Valentine in hiai Siampu dan bawl kalh in a dodal a, huai dodal ahih dan Clousius-in a theih in Valentine a that. Valentine sihni apat hong kipan ahi chihlam gen i sawm kei.

Valentine suangkulh a ataan lai in a taanpih nungak khat toh a kingaizawng ua, asih dek in laithawn gelh in “From your Valentine” chiin amin a gelh khum hi. Huai ziak in ‘From your Valentine’ chih tuni tan a kizang ahi chih lam le gen kisawm tuanlou nalai.

Valentine’s day ahong kipat dan lam gen sawm i hih louh dan i gen khinta. Gen di hi lele akoi pen gen a, koi pen gintaak huai di ahia, chih i thei kei. Ahong kipat dan hi gen dan atam a, gendan atam mah bang dungzui in nungak tangval hiai hun ana zang khin sate, tua zang lel-lelte leh ahon zang tou zel di-te’ zatdan akibang vek thei diin a gintak huai kei. Azang khinsa te’n i tu leh i ta te, i nuai a hiai ni hon zang tou zel di te bangchiin zang le-uh chih i deih a? Huaimah bang in hiai thu ahle Nepali nungak Alisha leh a tangval pa’n Valentine’s day bang chibang a zang uh ahia chih gen sawm i hi. Midangte zat dan toh akibang hia kibang lou chih chu athu na simsuak vek chiangin na theih mai ka ging. Simphot peuhmah awle.

Kou innkuan ahih leh Pathian hehpihna tang in hiai khawvel khawsakna lam ah kuamah neih eng lou in ka khawsa thei vanglak uh. Ka pa Government department khat a 1st class officer ahi a, ka Nu ahih leh bank maneger khat ahi. Neih-le-lam in a chit ziak le ahi maithei, lawm leh vual ka hau a, hon ngaina taktak a hon pawl nuam toh, hon ngaina taktak lou a hon pawl nuam pawl toh lawm ka hau thei mahmah mai hi.

Nitak khat ka lungsim a bang hong om hiam chih thei lou in ka lup apat dakkal 1 nung inle ka ihmu thei himhim kei a. A bangin hon sia ahia chih ka thei kei. Bangbang hiam ngaihtuah a ka lupna tung a ka kingaihtuah lai in ka lungsim ah “Ka Nu office kai kuan va kha di leh atawp chiang a va pi dia ka pai teng a numei naupang khat kawlzaal kek nimnem kuah a lamgei a kivei naknak ka muh gige peen bang ziak a ngaihsak na chaang ana theilou ka hi dia aw,,,,”Pu hehpih tak in ka theitui zuak hon leisak ve” chia traffic jam kar a ka motor glass apat dak kawm a ahon gente bang ziak a ana leisak mai lou ka hi dia aw, aman tamlua le hilou buuk khat 50 man lel lah hia” chi’n ka kingaihtuah hi.

Zingkhua hong vaak mengmeng henla, huai lam-gei a numei naupang theitui zuak a kiveivei peen bangziak naupang chik hinapi hiai bang a kiveivei ahi dia aw chih kithei mengmeng leh chia ngaihtuah kawm in ka ihmu thei vanglak hi. Ka room kongkhak hong ki ki-u a, ka ompih nu uh singpi tawi kawm in ka room ah ahong luut hi. Zingpha,,, hiai na singpi di,,, chi’n ahon pawtsan hi. Sana ka et leh daak 7 bang ana peelta ahih man in kintak in ka thou a, zannitak a ka ngaihtuahte ka lungsim a hong lut thak zungzung hi. Ngaihtuahna dangle neitheilou in singpi ka dawn a, ka dawn khit in bathroom ah kisil diin ka lut ngal hi.

Sepna nei lou ka hih man in ka Nu office kai kuanlam khaak leh hong pai di va pi zeel pen ka nna sep peen ahimai. Huai nna ka sepna zong kum khat phial mahmah a hita. Ka Nu sepna bank Aizawl SBI main branch (Zodin) ahi. Huai bank naihna lampi (leilawn) a numei naupang ka muh gige pen nitak apat ka lungsim ah ahon luah den mawk hi. Huai numei naupang nu houpih nuam ka hih man in zing ann nekham ka Nu office kaai diin nidang sang a kuan baih zawk ngai ahih daan ka gen a, ka Nu’n leeng bangmah genlou in kintak in ahong kisa pah hi. Nidang a ka hih sek bang in car parking area ah ka khawl ua, ka Nu’n bank-a ahon luut san nung in keile inn lam a paikiik mai lou in naupangnu ka melh bawl ngal hi. Himahleh hichi mai a ka muh phaak a omlou ahih man in, lamdang sa tak in ka daak kualkual mai a. “Zingdang teng inlah tubang hun in hiai mun ah ka mu gige, tuzing bang chidan ahi dia aw,,,,” chi’n ka kingaihtuah hi. Sawt kuam tak ka ngak nung a ahong kilat louh ziak in keile lungkim lou tak in innlam zuan in ka paikiik nawn hi.

Zingkar lam ka kuan teng in leh nitaklam ka tawp chiang un ka zong gige, himahleh lamdang tak in ka mu kha nawn himhim kei. Bangziak a kumkhat phial mahmah a thilzuak leidia ahon nget laia ana leisak mai lou ka hia aw,,,, haksatna banghiam khat nei lou hileh hiai naupang in hiai bang a sum zong mawk lou di hia,,,, ka lungsim a buai petmah mai. Ka kisiik petmah a, lah hihtheih bangmah nei nawn lou ka hih man in ka Nu kha a kuan khiak zong ka thanuam nawn hetkei hi.

Hapta (week) 2 mahmah apai nung in kiginni zingkhat half day ahih ziak in, inn lam a paikiik mai lou in ka Nu sepna bank kong ah ka ngak kawm in numei naupang zong diin ka ding hi. Nidang a ka car parking gige na mun ah ka motor ka park a, lam gei footpath ah ka ding den hi. Dakkar khat mahmah khekham zen a ka din nung in a gal apat numei naupang kawlzaal keek nimnem kuah a hong pai lauhlauh ka mu a, keilam manoh a hong pai ahih ziak in ka dinna mah ah ka ngaak hi. Ahong pai zel a, apai kawm in mite kiang ah athil kuah ahon zuak kawm zel hi. Himahleh a thil zuak kuaman leisak asawm himhi kei ua, leisak nuam lou uh chih thei mahleh lunglel lou in mi atuah khak peuh a zuak zel thou hi.

Sawtlou nung in kho-ul kai niipniap kawm in ka kiang ahong tung a, “Pu, hehpih takin ka Nimbu tui zuak hon leisak ve,,,,, ahong chi hi. “hapta nih mahmah ka ngak nung a amel ka muh theih nawn ziak in ka kipak a, gen masak di peen le thei lou in ka en maimah hi. Leisak lou di honsak ziak in bangmah genlou in, lungliap mel tak in hon pai khiaksan a sawm a, huaitak in kenle akiang ah “bangzah man a,,,,?” chia dong in leisak ka sawm hi. Leisak dek ka hi chih a theih ziak in amel ah kipahna haih vuallouh in ahong lang, akipak mel ka muh chiang in ka lungsim a guuk in ahon khoih mahmah mai hi.

Motor kivei suausuaute kaal ah, a baan ah ka len a, ka car parking na lam ah ka tonpih hi. Leisakdi ka hi chih atheih ziak in khamuang leh kipaak tak in ahon zui a, ka car sung a tu diin ka hilh hi. Car sung a tu dia ka sawl tak in lamdang sak mel tak in ahon en a, “Pu, ka van aak te ninlua ahi, na car seat kon hih nitsak kha di,,,,,, non leisak di leh hon leisak pah inla, adangte le ka zuak ngailai ahih man in ka kin sim a” chi’n pau siamlou sim in ahon gen hi. A paudan apan ka lungsim ah namdang hidia gintaakna lianpi ka nei a, himahleh amah lak a ka lungsim neih bel namdang ahih ziak in a kikheng tuan kei hi.

“Awle, nin lechinle poiloi ahi, na hihnit leh ka sawpsiang nawn mai di,,,, thil dotnop kon nei a, na theitui zuak te toh hong lut aw le,” chia ka gen tak in kisuanglah mel tak in ahon en a, lutdia nihvei mahmah ka sawl nung in a lut pan hi.

Na min bang a?

Kei min chu maw Namita.

Ahihleh school kai nawn lou maw?

Kai nawn lou,,,,,, sum ka zong ngai eivele.

Na nu leh pa’n bang sem uh eita, nang naupang chik sum kizong sak chih mawk?

Hiai thu ka gen tak in amit apat mittui ahong luangkhe ngiaingiai a, ka muhkhak lau hileh kilawm in a khut in anul zeuh hi. A nul khak louhte ahong taak khia a, a phei tung a apawm a thil zuak akuahna kawlzal tung ah ahong tak khia hi. Kidiik feihfeih kawm in “Nu leh Pa ka nei nawn kei.” Chihteng in ahon dawng a, keile kisuanglah ka hih man in “na gil akial hia neek di na duh hia?” chi’n neektheih ka puak ka pia hi. Himahleh a gil kiallou ahih dan ahon gen a, kenle ka pe teitei nuam nawn kei hi.

Ka kaai kuan lam leh pai teng in kon mu a, nidang a ka car limlang a hon daak kawm a na theitui zuakte leisak dia na hon nget chiang in leisak na chang kana thei kei a, kar nih mahmah kon zawng nung in tuni in kon mu nawn pan a, nidang a koi lam a kizuak sek e? Chia ka dot leh.”Ka u a damlouh ziak in keile ka pawt khe thei kei a, thil zuak ut in pawt kheleng ka u enkawl tu di omlou ahih man in keile ka thilzuak khawlsan in ka u damlou ka enkawl hi. Himahleh ka sum muhsa tengteng beita ahih man in ka u damlou taisan in thil zuak diin ka hong kuankhia a. Ka u ka lunghimawh mahmah mai a, kikhawng gai mengmeng henla, kikiik pahleh chih ut huai mahmah aka,,,” chi’n ahon dawng nawn hi.

A thugen apat Nu leh Pa toh om lou uh chih ka thei a, keile pautam sese lou in na thil zuak te bangzah man di a,,, chi’n a man di a gen zah piak ka sawm hi. “Pu na poimoh louh pi kei non hehpih ziak in zaw hon leisak ngai kei. Ka zuak dia, ka khot bei zoh keileh zing khawng chiang in ka zuak thak nawn mai di,,,, chi’n huai naupang kum 12 lel a upa in ahon dawng hi. A hon dawnna paukam ka zaak in ka lungsim ahon zou mahmah mai a, mi kisuanglah mi tak leh mite huat zawng a om lau ahih dan ka theih in ka hehpihna alian deuhdeuh hi.

Namita, hiai sum la inla, na U damlou enkawl din na inn lam uah pai kiik nawn in, kenle ka car in na inn tan uh kong kha di aw,,,chi’n ka en a. Amel ah kipahna ahong lang a, paukam in genkei mahleh kipak ahi chih bel a omdan in a genchiang mahmah hi. Bangmah gen lou in a lu a sing hi. Sawtlou hon ngak zual diin ka gen a, keile ka Nu office lam manoh in kintak in ka tai ngal a. Ka Nu kiang ah hih di poimoh nei ka hih dan leh a pai hun a ka tungman kei leh taxi ana zang mai dia ka gen nung in, ka Nu’n le’ng bangmah dang gen buai lou in ahon phal chih ka thei hi. Ka car omna lam manoh in ka paikiik ngal a. A veng lam ua a gen nalam manoh in ka taai pih hi.

Namita, na tanchin theih ka ut mahmah mai a, hehpih tak in na tanchin non hilh thei diam?

Pu, ka tanchin gen di ka thei kei. Niteng a hiai theitui zuak himai ahi ka nasep pen. Chia ahon dawng tak in keile ka lungssim ah anaupan luat ziak a bangmah gendi theilou eive chi’n thu tam dot ka sawm nawn kei hi. Ka kiang ah kisunglah chih haihvuallouh in a tu a, huih nung zawng in a kho-ul gim ahong nam hiaamhiaam zel hi. A kisuanglah chih ka theih ziak in ahon maingal theih didan bang peen in om ka sawm a, dakkar khat phial mahmah ka taai nung un a inn uh a genna mun ka tung uhi.

A inn luahna tan uh motor tailut thei lou ahih man in ka car lamgei ah ka khawlsak a, Namita toh a inn lam uh manoh in khe in ka paisuk uhi. Assam type kum luui mahmah khat ahon kawk muh a, huai le anuai luah uh ahih dan ahon gen hi. Innsung ka luut dek un zummel tak in ahon en a, “Pu hiai ahi ka innluah uh,,,,, nuam a nuam lou eihkha, hilele non pawt vanglak leh sawtpi na om di aw. Kou inn a kuamah hong pawt omngei nawn lou unchin, ka U le chim kisa thei lua, kenlah ompih man ngeilou ing a,,,,” chi’n ahon gen hi. Awle Namita non ngaih phot leh sawt pi ka om di aw,,, chi’n innsung ka luut uhi.

Van akoihna di tuamle omlou ahih man in innsung a thaang in athaang ningneng a, tutphah zawnsau khat, vom ngimngem, a ngaihna dia kibawlte bangle piteek habal bang mai in a kim nawn kei a, a heek bimbemta hi. Atung lah secondhand van zuakna bangmai in van adim in a-om a. A nuai ah khedap leh chapal lui thei mahmah tamlou a kirem hi. Parda kizaak toh kisi in singrem khat a-om bok a, huai peen bel a tut-tut na uh ahi maithei, van bangmah a tung ah a-om hetkei hi. Huai singrem tung ah ka tu pah a. Namita bel parna a pheen a, room aluut paisuak hi.

Innsung neuchik ahih man in a pauging uh bangkim ka za thei vek a. Namita in Nepali pau in a U ahoupih tautau hi. Nepali pau siam lou dia hon gingta ahi ngeidia, a U kiang ah fel ahon sak thu khong leh peih akisak liai leh keitoh kipawl a thou khe diin a gen hi. Nepali pau siam lua chia gendi hikei mahleng Pune a lai ka zir lai in Nepali-te lawm kana neikha sek a, amau ka thuah ziak in tamlou bel ka thei veve hi. (Ann nekna khop siam chih dan deuh ka hih chu) Namita hong pawt khia a, “Pu singpi kon awm di aw, singpi beek na dawn di aw,,,, ka U le hong thou dek,” chi’n singpi awm diin ahong kisa hi. Namita singpi ka dawn kei di, breakfast nekham hong pawt ka hi a, dawn peih nailou ka hi. Sawtpi pawt di hon chi hilou maw, denlam chiah i dawn na kei dia chi’n a haksat dan uh ka theih ziak in nui kawm in ka gen hi. Namita in zong naupang chihmahtak in a singpi awm di ahon tawpsan a, tutna tung a avan koih thang zeizoite ahon hem hiauhiau hi.

Namita khosakdan ka en a, naupang mai himahleh fel tak akhosak ngaisang mi hiin ka thei. Himahleh a khosak na un salou ahih chiang in huai numei naupang adiin fel tak a gamtat ahaksa chih ka theihpih hi. Namita gamtat dan ka et laiin parda ahong kikeeu hong a, nungak kum 20-25 mi di khawng spect vom bulh. Nungak piannalh mahmah, fit 5.5 di khong a sang, maai zawl lam pang, asam nungzang khenpha asau ahong pawt khia hi. Ka kiang ah ahong pai a, “Pu nang kua e, koi a om, ka Nau toh bangchia hon kithei kha zenzen e,,,?” chi’n nuihmai tak in ahon houpih a, amel nui mahleh a taksa chau ahi chih amel apat alang chiang mahmah hi.

Tangval lailai in Pu kichi lou e maw, chi’n nuikawm in ka dawng a, bangmah a genlouh ziak in kenle ahon dotna ka dawng sunzom nawn hi. Na Nau Namita ka muhna kum khat a ching phialta, himahleh a thilzuak kana leisak kha ngei himhim kei hi. Nitaak khat ka lupna tung a ka lup lai in na Nau ka lungsim ah ahong lang mawk a, lamdang tak in amah theih chiang utna ka lungsim ah ahong lian mahmah mai hi. Himahleh huai zaan apat kar nih mahmah amel himhim ka mu kha nawn kei. Ahihhangin ka lungsim ah lamdang tak in a-om den lailai hi. Kenle amah mitsuan gige ka hih man in tuzing in ka kimu kha nawn zenzen ua. Amah rem sakna a hong pawt ka hi. Chi’n ka omna veng uh ka hilh tel ngal hi.

Na Nau in “ka U damlou ka kep ngai ahih man in kar nih sung mahmah sum zong theilou in ka om” achi a, na bang na a? Gim pipi kei hong pawt ziak a tut khiak sese le ngailou ahi. Na Nau in na tanchin uh tamlou ahon hilh ziak in keile hiai tan hong tung kha mawk ka hi. Ahihziak in Naupang mai ahi a, ka dotna teng kia ahon dawng lelauh zel hi. Innkuan sung thil ahi a. Thei nuam tawk lengle midang pi in kidot le kilawm lou ahih man in kenle thil tam dong sese lou in na inn ua pawt ut ka hihdan ka gen a.

Nui kawm in “Aw ahi maw,,,, kei ka natna peen gendi ka thei chiah kei, ka khawsik a sang luat ziak in ka taksa asa vungvung zel hi. Huaikia hilou in tutak in ka mit langkhat in khua amu thei nawn kei. Lehlam peen ahihleh chiang ngellou in ka muthei lai a, niteng in ka khawmuh akiam hiai hiai mawk hi. Ka hihtheih bang khamkham un ka ki-enkawl ua, ahihziak in neih in daih nawn mahmah lou ahih man in ka thuak top mai hi. Doctor pa’n a gen dan in, “Hoihtak a na ki-etkol kei leh na mit alangnih a del thei ahi.” ahon chia, ka lungkham mahmah mai hi. Himahleh ki-etkol nang bangmah seem khe zoulou, ka mit khua amuh theihlouh kia hileh dan om di hia, ka lung a am a, khua le phawk lou a puuk mawkmawk khong ka thangsak mahmah mai hi. Hichi’n ka Nau in nimbu tuui zuak in a sum muh sunsun te zang in ka neek di uleh ka damdawi di ka leizel ua, kou tan tawk a Pathian hon sehsak hidi’n ka gingta a. Lungkim tak in ka om mai uhi. Lunggkim lou in vuivui mahleng bangmah kaanna lou chih ka theih man in Pathian kianga thumna ka neih chiang bang in bangmah ka phuut kei a, kipahthu kia ka gen zaw hi” chi’n ahon dawng hi.

Lamdang ka sak mahmah kha t a-om a, “Pathian kiang a thumna ka neih chiang in,” a chih pen ken ka theisiam kei hi. Ka lungsim thei hileh kilawm in keilam ahon en a, “Ka thugen theisiam khollou na hi maithei, kou innkuan tanchin gen dek leng hun sawtpi ngai di ahia, hichi mai in na theihsiam diin gen dan ka siam tuan kei. Ahih ziakin ka tanchin uh theinuam a hong pawt na hih leh kon gen dia, sep di poimoh na neih a, pai na ut leh hon hilh mai lechin. Ahih ziak in hiai ka tanchin ka gen ziak in na hehpihna ka lamet ziak leh nang apat a panpihna ka lamet ziak hilou ahi chih hon theihsak masa lechin chih deih ka hi,,” chi’n ahon gen hi.

Hitham e, kiginni ahih toh keile hunawl ka neih ziak a hong pawt ka hi. Na thilgen bangkim ka theisiam aw,,, chia ka dawn khit in, a gawl a thil taang on hileh kilawm in a gawl ahon khuah a, hichiin ahon gen sunzawm hi.

“Ka Nau min bel na thei ta dia Namita ahia, kei min ahihleh Alisha chi’n honsam sek uh. Nepal gam apat Idia hong peem ka hipen du chu, hiai mun a ka omna uh kum 20 lam achingta hi. Ka Pa Nepali ahi a, ka Nu le’ng Nepali nam thou Gorkhali ahi. (Nepali kichi leh Gorkhali kichi hi namkhat ahi ua, himahleh Nepal gama tengte kha Nepali akichi a, India Nepali te kha Gorkhali kichi ahi. Theisiamlou i om khak zenzen leh chi’n kon gelh tel tei maimai) Nepal singtang khua khat ah ka piang a, ka Nu leh Pa’n mi leilet (tuilou) enkol in a sem sek uhi. Ka naute Namit leh anau ahih leh hiai mun a piang ahi uh.”

“Kum 5 ka phak in khosak olsam zawk khak leh chi’n hiai lam ah ahon peem pih ua, huai lai in ka naute apiang nai kei tuaktuak uhi. Hiailam kon tun nung un Kristian gam chih mahtakin kihehpihna atam a, kou innkuan mahmah le mite hehpihna ziak in haksa lou chik in ka khosa thei uhi. Mi bawng enkawl in ka om ua. Nepal a ka omlai utoh teh in ka kipak un, nuamle ka sa mahmah uhi. Kum 13 ka hih in tua ka Nau Namita ahong piang a, Namita pian nung kum 2 nung in ka sanggam pa uh ahong piang nawn hi.

Kum 5 ka om nung un lamdang tak in ka Pa lungsim ahong kikheng a, ut leh utlouh gen thei ka hih louh man un ka innkuan un Kristian sahkhua kana zui uhi. Kristian a ka kipiak uapat in ama teng saang in ka innkuan uh ka kipak zaw ua, ka khosak na un le’ngng ma asawn mahmah mai hi. Keile lawm khawng nei in school ka kai tei a, siamthei lua chia gendi hikei mahleng vual pawl pha in ka pang tei hamham sek hi.

Pathian vulajawlna tang in class XII bang ka pass tei hi. Huai kum in Nepal a ka Pu-te’n ka innkuan ua Nepal a zin diin ahon thukhaak uhi. Himahleh hiai lam ah bawng hunkhop vuul ka hih man un innkuan a zin chihdan omlou chiin ka Pa’n ka Nau Namita toh inn ngak diin ahon chi a, amau ka Nu toh ka nau neupeen utoh Nepal a ka Pu-te kiang lam ah ahon zinsan uhi. Innkuan kikhen na di ahi chih thei hile ung bel kuamah ka ziansak kei dia, ahih kei lelah amau toh dinmun khat a ding diing in kou unau leng ka zin ngei diing uh. Himahleh mihing in i mailam hun a thil tung di bangmah akitheih louh ziak in hichi ka suak maimah uhi.

Nepal a ka Pu-te’n, kou inkuan Kristian a kipia ka hih man un ka pa te va zin leng naak tak in ana khem ua, Hindu sahkhua a kipe kiik diin naktak in ana zol uhi. Himahleh ka Pa piangthak hoih, Jesu Krist hondampa dia kip tak a pom khinta ahih man in hichi mai in a lungsim a khem zou hetkei ua. Ka Pa lungsim khauh lua ahi chih atheih man un, khemkhe zou diin akigingta nawn kei ua, ka Nu le Pa toh ka sanggam pasal naupang peen uh ahon thah sak uhi.

Himahleh kou lak a agen dan un Leilet a nnasem dia akua lai un sai (elephant) sual in phillum dan in ahon gen uhi. A luang uh nangawn ka muh uh phallou in Nepal lam ah ahal ua, asih nung kha khat nung in ahon theisak pan uhi. A tuung lam in koule ginlelh na dan himhim ka thei kei uh. Hun leh nite hongliam zel a, ka Pu in Nepal lam a om diin hong pi a sawm hi. Kou unauu numei tuak ka hih man un kenle ka Pu-te kiang lam a om mah hoihsak na lianpi ka nei a, ka Pu kou hon pi dia hong kuan zuui diin ka hong kisa uhi.

Ka innsung van nengneng uh avan a puak buaihuai chiin zuak theihtheih zuak diin ka hong kisa ua, himahleh hichi mai a ka khot theih louh ziak un ka ut sang ua sawt zaw ka om uh a ngai hi. Nitak khat mumang lamdang tak ka nei a, ka pa-te’ sih dan ka mang in kana mangmat mawk hi. Ka mang in ka Nu leh Pa leh ka sanggam pasal te uh van bangmah aa lou (vuaktang) in keilam manoh in ahong pai ua, ka kiang ahong tun dek un ka Nu leh ka Nau ka mu nawn kei. Himahleh ka Pa keilam manoh in ahong pai a, naaktak a soisak nung a tui a sawnkia uh ahih dan bangkim ahon hilh mawk hi.

Lamdang ka sa a, himahleh mumang maimai chi’n bangmah genkhe lou in ka om hi. Ka innsung vante uh khawng beita ka hih man un zingkhua hong vaak leh Nepal lam zuan a kisak sawm ka hi uh. Lamdang takmai in van ka kisak lai khawng un Bible chaang khat ######”Na hinna diing in taikhia in,,,,,,,” chih ahong lang den a, ka lup nung nangawn in ka ngaihtuah na ah amang thei kei hi. Ih le ihmu theilou in huai Bible chaang ka lungsim ah ahong lut den a, thildang ngaihtuah ka sawm haang in thildang in ka lungsim ah mun atang kei hi.

Kenle a tawp in dohkan a Bible kikoih ka la a, simdiin ka hong kisa hi. Bible ka simkhit in Pathian kiang ah thumna ka nei a, bang ziak a tu nitak a hiai thu ka lungsim ahong omden ahi dia aw,,,, Toupa ka kiang a gen nop nei na hihleh hehpih takin na thugen di, kei theih dia na deih om ahih leh hon theisak in,,,,” chiin ka thum a, himahleh bangmah huchibang dawnna himhim ka mu kei hi.

Zingkhua hong vaak a, ziing ann nekham ka kisak lai un Namita lamdang tak in a gil ahong na mawk hi. Nidang a hichi ngeilou ahih man in lamdang sakna in ka pum dim a. Pathian in ka lak au vai ahawm dan banghiam thil khat om hi diin ka gingta hial hi. Namita gilna le damdawi khawng nesak mahle ung hoih lam a manoh thei kei a, agil na sa in lupna tung ah ahong kipek teptep mai hi. Huai tak in ka Pu le beidong kisa in damdawiinn naihpih ahon sawm a. Ka Sum neih sunsunte tawi in damdawi inn ah ka taai pih ngal uhi. Namita in hoihlam manoh theilou ahih man in ahon Admit ua, hapta khat ka om nung un ka sum neih sunsunte uzong ka Nau damdawi man in ahong bei phial hi. Huai Ziak in ka Pu’n ka sum neih louh dan uh thei in, “i vek ua pai chihdan omkei maw, kei kana pai maidia, hun remchang ah nou pi diin ka hong zin nawn zaw mai di,,,” chi’n ahon paisan hi.

Ka Pu hon bawldan ah ka thang apai mahmah mai a. Sum tamlou beek le ahon nawtsiat hetkei mawk hi. Ken lah bangmah gen ngamlou ka hih chiah ka Pu thu ka sel ngam si kei a. Ka neih tengteng ulah kizuak bei vekta, a sumte lah damdawi man a kizang bei ta. Tua aman hon paisan zel, bangchiin ka khosa ta di ua,,,chiin ka lungbuai mahmah mai hi. Himahleh kou unau tung ah Pathian in ahoihna mite tung tawn in leh a Saptuamte tungtawn in ahon lang sak a, ann huan di nou khat lel gen louh, ahuan naang bel leh zan puanthuah natan neih khatle neilou a damdawiinn apat ka pawtkhiak lai un, kou unau adiin numei pawl in ann ana huansak ua, huai kia hilou in ka zanpuan du leh ann bel, mehbel di tanpha ana ngaihtuah sak ua. Mittui pawt zoihzoih kawm a thum in Patthian kiang ah kipahthu ka gen hial hi.

VALENTINE’S SPECIAL ~ II

Huchiin khosakna bul ka hon pat thak nawn uh ahong ngai a, ka Nau Namita damlouhna le hun sawt lou nung in etkol sutzop ngai lou in ahon damsiang pah vanglak hi. Namita lah naupang lawlai ahih man in school kailou a a-om di ka ngaingam kei a, ken ka septheih zawngzawng sem in mi puansawp, inn hahsiang khawng in ka kilawh zel hi. Pathian hoihna leh mite hon deihsak ziak in ngawllouin ka om hamham ua, nidang bang in ka innsung neih leh lam kiningching hikei mahleh neukhah in ka khawsakna uh ahong kaang hiai-hiai hi.

Nu leh Pa tellou a khawsak ahaksat dan ka thei a, nidang a ka deihdeih ngen a, ka duhduh neek ka sawm lai khawng ka ngaihtuah na ah ahong lang lou thei kei hi. Huai chiang in ka lungsim ah, huai hunlai a ka Nu leh Pa lungkham didan khawng ka ngaihtuah na ah ahong lang a, ka Nu leh Pa hon dampih lai a kipaak saktu hilou a lungkhamsak tu mai ka hih dan ka theih thakthak chiang in siam ka kitangsak thei mahmah kei. Tamvei pi ka Nu leh Pa ka zahtaak luat ziak in a kha beek un ana zaak khak leh chiin thumna bang ka nei sek hi. Huchihlai in ka Nau Namita ahihleh kei hon suun lou tak in a-om thei vanglak a, ka haksat dan bangkim thei in thil bangmah ahon ngen ngei kei hi.

A omdan ka muh chiang in kipah ziak hia, khasiat ziak chih theisiamlouh khop in ka khitui ahong luang sek a. Nikhat houh a thugen in ka lungsim ahon khoih mahmah mai hi. Christmas lah nai mahmah ta, alawm te’n vanthak bangkim neivek uh ahih man in ka ann nek lai un ka kiang ah “U vanthak ka deih tei e,,,,” chiin ahon gen vungvung hi. Huai tak in kenle ka haksat dan ukhong leh ka sepna lawh ka laak theih leh leisak diin ka gen hi. Huai kia hilou in “U i Nu leh i Pa toh ka Nau damlai leu-zaw, hon subuai lou di ing a, i Pa’n hon leisak mai di hia maw,,,,” ka dawng thei nawn kei. Ka mittui pawtlai amuh di ka lauh ziak in room ah ka lutsan a. Room ah kap kawm in Pathian kiang ah thumna ka va nei hial hi.

Ka omdan hon theisiam in room ah ahong luut tei a, ka kiang a khuukdin in “U kei ziak a kap maw,,,, tuban bangmah kon ngen nawn kei di aw” ahon chih tak in keile kisum zoulou in ka Nu leh Pa-te sihdan bangkim ka hilh vek hi. Namita kiang ah bangmah ka hilh ngeikei, hilh le sawm khollou mah ka hi. Himahleh denchiang a ahon theihkhiak hun om thouthou dia ka gintaak ziak in ka hilh vek hi. Huaithu a zaak tak in Namita in “U Pathian kiang ah bangkim genvek di aw,,,,, amau chu vaan-gam le kaai lou di ua, hilele ei Pa-te chu tua vaan-gam a om uh mawle…..” bangmah ka gen thei nawn kei. Ka Nau Namita kawi in kisuum zoulou in ka kapkhe zoihzoih mai hi.

Pathian phawk mite adiin taksap chih himhim a omkei chih kou unau tung ah ahong taangtung biik mahmah hi. Ka nnasepna a ka lawh sunte ne’k leh dawn man a beizel ahih man in Christmas van lei naang koilak mah a muh ka kilamet louh lai in, zing khat ka zing thou, innkong a ka pawt leh parcel liansim khat ana om mawk hi. Lamdang ka sak man in ka hong ngam zawk kei a, a gaal apat ka et leh ka min ana kigelh mawk hi. Huchiin kenle innsung ah ka pawm luut a, ka hong leh a sung ah kou unau van di tampi ana om mawk hi. Huai kia hilou in envlope san khat ana om tel a huai ah Christmas chibai chih kigelh in, ka hong leh a sung ah Rs.2000 ana om zawmah lai hi.

Kou unau hon theichiang mahmahte thil hih ahi chih haihvual ahi kei. Aziak bel ka van ak hun di geihgeih uh ana om ziak ahi. Ka nau lupna a ihmu a naak hithit lai ka phawng a, ahong thwh khiak phet in kenle huai vante ka lak pah hi. Huai zingkar a kou unau kipah dan paukam inle a gen fiah siam diin ka um kei hial hi. Ka nau kiang ah “Bawi nang na siam bangbang Pathian kiang ah kipahthu gen thumna na hon nei diam?” ka chih leh thumang tak in hichiin thumna ahon nei hi.

“Toupa Mas van thak di non piak ziak in ka kipak, ka U adi na piak ziak inle ka kipak. Toupa hon liansak mengmeng inla, huchia kenle Mite ka panpih thei naang in. Toupa Jesu min in kon thum hi…..” chiin ahon nei hi. Naupang chik himahleh a lungsim a piching ka sa mahmah mai a, a thumna neih dan in zong ka lungsim ahon khoih mahmah mai hi.

Hun leh kumte hong liam zel a, lamzang tak a om tou zel di ka kisak lai un ka gintaak louh thil ka tung uah ahong tung hi. Ka taksa gensiam louh khat a nuamlou in ahong om a, ka khua ahong sik a, ka lu ahong na sek hi. Ka natna in ahon phak chiang in na law peetmah ahih man in lawh didan ka thei kei. Ka nau kiang ah na hihtheih bang khamkham in ka tal hon meek sak aw chiin ka sawl zel, kho-ul luang zoihzoih in ka nau in ka dam naang ahih lamen in ahon mek sek hi.

Huai natna ka thuak apat in ka taksa akeniam hiaihiai a, huchiin ka mit in ahon thuak nawn kei, tuun ka mit langkat in khua amuthei nawn kei a. Huai natna ka thuak tuung in ka Nau kum 11 ching pan lel ahi. Keilah na sem a kuankhe zou lou, inveng te fel un siam tawk leule panpih gige haksa ahih man in ahon panpih zou gige saam kei uh. Huai tak in ka khawsak dan uh hon theihsiam pih in, hiai sak a Pu Muana te’n a nimbu tuui uh ka nau zuak sawn diin ahon pezel ua, ka nau in a theih bang khamkham in school le kaai lou in huai thei tui zuak in kei ahon chawm hi. Huai ka natna ka thuak nung khatvei mah thildang ka sem thei kei a, ka nau chawmsa in kum 2 phial mahmah hichiin inn ah ka kibukhum mai hi,,” chiin mittui paak liikliak kawm in ahon gen hi.

Namita nitaklam neek bawl dia hong kisa ka muh in nitaklam hita ahi chih ka thei, sana ka etleh nitkalam dak 4 ana ging phial hi. Alisha bangteng hileh ka inn lam uah ka va pai phot dia, ka hun remchang tengin hong phak kon sawm di aw,,, chia ka gen leh. Awle na man chiang in non pawt zel di aw, kou inn khawng bang ah na hong pawt ut a kipahhuai lua, huai kia hilou ka Nau thilzuak ni 3/4 ale akhot bei louh di pi nang non hehpih ziak in nana leisak, Pathian in atam zaw in hon vualzawl heh aw,,, chiin ahon gen hi. Inn kong ah ka pawt, Namita in ahon zuui pawt a, Pu hong pawt zelzel in aw,,, chiin maitai tak in mangpha ahon khak hi.

Hichi tuka nungak melhoih leh piannalh amit sia a, mitdel a a-om mai di khong leh a inn kuan khawsakna himhim uh ka ngaihtuah chiang in hehpihna apung deuhdeuh mai. Himahleh ken bangmah sep neilou, ka Nu le Pa sepsuahsa ging a hingteei maimai in bangmah panpih theihna ka nei kei chih lah ka tal ka theihchiang tuk in ka theichiang ngal a. Bangteng hileh a tanchin uh ka nu leh pa kiang a hilh himhim ka sawm hi.

Gen di hia ka hih gen lou di chia ka kingaihtuah lai in ka lungsim ah gen ziak a bangmah apoina om in ka thei kei. Nitaklam ann ka nek lai un ka sungte kiang ah Alisha-te uanau tanchin bangkim ka genkhe vek. Ka gen tung lam in hon limbawl kei mahle uh ka gengen leh ka Nu’n bang ka gensa te khawng a hon dong thak zawzen a. Kenle huai hun remchang a la in neih remchang bangbang a panpih ka ut thu ka gen hi. Huai kia hilou in a Nau Namita ka lungsim a ahong lat dan tengteng ka gen tak in ka Pa’n zong muh a ut thu khong ahon gen hial hi. Kenle hun remchang aneih masak pen a hohpih diin ka gen hi.

Kei ahihleh ka Nu office-a ka khak khit chiang in Alisha mu diin niteng in ka paisuak gige chileng akhia lawmlawm din ka ging kei. Buaina dang nei ka hihkei naak leh ka pha gige. Damlou gimlua ahih louh ziak in aman le hoih taktak in ahon kithuahpih peih a, kou gel kia a ka om chiang bang un lehlam tak a lungsim guuk in nuam ka sathei mahmah mai hi. Namita in zong hon ngaina ngawp ahi peen di chu, nidang a Pu chia hon samsek himahleh ka hilh bang in U chiin ahon sam ta hi. Nikhat houh a thilzuak nitaklam a hong paipan ahih zel ziak in, ka gintak louh pi un suun tanglai in inn ah ahong luut mawk hi. Ahong luut lai in kou Alisha toh kinai chik a ana tu ka hih man un lamdang sak mel tak in ahon en a, sawt simtak ahon et nung in “Ujo, ka U hong dam mengmeng henla, kiteng leuchin na kilawm mah du maw,,,, chiin ahon gen mawk hi.

“Namita na hai ngei e maw,,, mi’n ei i gentheih ziak a hon hehpih a, i inn hoih lou chik le musit lou a ahong pawt ut lai ua, nang huai dan a na ngaih mawk in” chiin ahong nuikhe buabua hi. Poilou pi naupang ahi lai ua, thil gen dia kilawm leh kilawm lou le khen siam nai sam lou ei voi chiin kana kum pah hi. Ahitak in Alisha a gentheih ziak leh tagah ahih ziak a hehpih mai hilou in ka kithei. Ka lungsim bangchi hiam a hon zohna khat nei hileh kilawm in a-om mawk hi. Bangteng hileh kenbel khawk sakna ka nei kei. Himahleh genkhe hial diin bel ka ngam nai samkei a. Niteng a kimu ka hih man un kingaihnat na chiang chu ka nei uh chih ka thei, aman le ahon haw emem biik kei. Himahleh asuanlam bawl di peen chiangtak a theihsa ahih ziak in bangmah ka gen ut kei mai ahi.

Zingkar khat ka om a noplouh sim ziak in ka Nu ka khaak zoh in inn lam a pai kiik ka sawm hi. Nidang a Namita theitui zuak mu gige ka hih man in Namita kiang ah ka pawt peih louh thu gen a, a U Alisha ana hilh dia gen tup ka hi. Himahleh huai zing kar dak 11 tan ka ngak nung inle Namita mel di himhim ka mu het kei a. Huai tak in inn lam a pai kiik sawm himah leng ka ngaih a phat vaklouh ziak in Alisha te inn lam manoh in ka taai ngal charchar hi. Lungsim nuam lou kawm in Alisha -te inn ah ka luut ngal hi.

Inn neuchik ahih ziak in a thawm uh ka za ngal, bangmah gen lou in thawm omna lam, a room uah ka luut paisuak hi. Namita in a U tal ah puan kawt in ana dep a, kei hon muh phet in ammel ah kipahna ahong lang ngal hi. “Ujo, na hong hoh ka kipak lua, zanniatak apat ka U in khua le phawk lou a om, kuamha le hon panpih dia chial ngam si lou inga” chiin ana gen pah tautau hi. Alisha taksa ka khoih leh a sat in asa vengveng mai hi. Huaiziak in kenle lawh ngaihna ka thei kei a, damdawi-inn a hohpih diin ka hong kisa uhi.

Damdawiinn ka tung ua et ngaiteng a et zoh un a khawsik sanglua ahih man in leh natna tuamtuam aneih muangmawh ziak in ahon admit zawmah lai uhi. Namita kiang ah inn lam a a U van poimohte la diin ka sawl a, ken Alisha om pih in ka buai mahmah mai hi.

Nitaklam dak 3 apelh nung inle Namita ahong tungkiik thei himhim kei, ka ngaih pha nawn lou ahih man in Nurse-te kiang ah thil omdan gen in Namita zong diin damdawiinn apat ka pawt khe nawn hi. A inn lam uh manoh in ka pai zel a, a inn uh ka tun in ka pawt khiak dek ua a kikalh dan mah in ana kikalh lai hi. Lungkham tak a kiik dia ka kisak lai in Namita step a hong tawm suk lauhlauh ka mu a, ka kipah hang in ka hehtha asuak petmah. Ka kiang ahong tun phet in ka lungkham dan leh ahon sukbuai dan ka gen pah hi. Namita in kisuanglah mel tak in ahon en a, “Ujo, ka U adia hihtheih bangmah lah neilou ka hih chiang in ka hih theih om sun chiin Biakinn a thumna nei ka hi. Ka pa’n a damlai in i lungkham ni leh dahni a panpihtu nai om gige ahi chih ahon hilh, ka thumna Pathian in a zaak chiang in chu ka U a dam ngeingei di” chiin ahon dawng hi.

Namita thugen in ka lungsim ahon khoih mahmah mai, ka heh ziak a taai ek di ka chih hang in tai ka sawmna tengteng a bei zou vek hial hi. Namita kongkak hong inla, kintak in na U van di i la dia, i paikiik pah ngai ahi. Na thumna zaw Pathian in tua le za khin tham ta ahi. Aman rem asak hunhun a na U damna pe mahmah di ahi,,,, chi’n in sung ah ka lut uhi.

Damdawiin ka tunkiik nung unle Alisha in khua bangmah ana phawk naikei, khua phawk lou ahi chih anau Namita in amuh chiang in alunglelh mel mahmah mai. Namita mel ka muh chiang in beidong ahi chih achiang mahmah mai a, akiang ah “Namita, lungkham keive, na U hong dam nawn mahmah di ahi. Pathian in hun asa naikei maimai a ahi. Chiin ka siam bangbang in ka neem sam hi.

Ka phone ahong ging a, ka et leh ka Nu’n pai utta ahih dan ahon gen a, himahleh ka buaidan bangkim ka hilh nung in, “Taxi in kana pai mai di aw leh” chiin ahon dawng hi. Alisha in hoihlam manoh theilou ahih man in kenle paisan ka sawm kei. Anau Namita kum 12 mi lel etkawl di chih ka ngaihtuah chiang in a damlou Alisha sang mah in a nau Namita ka hehpihna alian zaw hial hi.

Nitak dak 7 in ka Pa’n ahon phone nawn a, damlouh dan leh a omdan ka gen tak in ka Nu tawh damdawiinn ahong pai sawm ahih dan uh ahon hilh hi. Bangdang gen nawn tuan lou in ka koih a, ka Pa te hong tung tak un Doctor ward visit hunle ngak man lou in Doctor mu diin ka kizui phei uhi. Vangphat huai tak in Doctor fel tak mai duty lai ka tuakkha vanglak ua, aman ka haksat dan uh thei in a damlouh dan bangkim ahon hilh hi. Huaitak in ka Pate’n ka kiang ah hichi mai a taisan zaw kilawm lou hiveh aw maw, thei gegu in taisan teitei mawk le Pathian deih dan bangle hilou thei ahi, i neih bangbang seeng a ngaih lele i seng mai di ua, amit ziak a natna thuak gige a a damsung hun azat sang in, neih bangbang seeng in amit i kheksak mai di ua, ei ziak a damna ahon neih theih zenzen leh hiai kaan a missionary nnasep a-om tuan dia hia.

Mi tampi te’n mahni in lum taisan a, gamla taktak a diang khia in gammial ka vei ahi, non-Christiante Christian a ki piaksak a piangthak sak ka sawm chiin bei sek mahle uh. Amau Pathian in azat taktak louh chiang in a lawhsam thouthou uhi. Amau kipiak zawhna ka soisel chihna ahi zenzen kei. Ahoih lua, mi tampi hih theih louh ahih ziak in. Himahleh enle i inlum taisan sese lou a missionary-te nnasep bangbang kisem thei ahi. Huaiziak in hiai na lawm nu tung a sum leh paai sen a kuul bangbang en i seeng ding ua, ahong dam di leh dam lou di peen ei khut a om hilou in Pathian khut a om ahi chih pen i theih kha hoih ahi,,,” chiin ka Pa’n ahon gen hi.

Mi khat kaan in damlou ompih phallou uh ahih man in ka Nu te kiang ah inn lam ah ana pai phot unla, ken ka ompih phot dia, banghiam buaina a-om leh ka hon hilh thak zel mai di. Huai chiang in hiai anau Namita ahi, ei inn lam ah ana ompih phot unla, a U om lou a amah kia a inn a a-om di zaw naupang law lai ahi,,,” chia Namita lam ka et phei leh lungliap mel tak in ahon en hi. “U jo hilou ahi, ka U ken ka giahpih dia, nou zaw hona paisan mai ua, hiai teng a non panpih na ule kipah huai lua.” chiin ahon gen hi.

Namita zankhua a onpih ngai ahih man in ana pai phot inla, bangtan om ngai di a hia chih le kithei lou, hiah na Pi te ana zui phot inla, na U ahong dam ma chu kou inn lam ah na om dia, huai ah nang hon duattu di le om uh ahi” chia ka gen leh, “Hilou ahi, nang tuzan na ompih di thouthou leh kei kou inn lam ah ka giak mai di, ka inn ua kuamah giak lou di ahih chiang a, chiin ahon dawng hi. Nang kia a huai veng nawl hizawmah giah chihdan omlou ahi. “Pathian in hon ompih dia, bang mah chilou di ka hi. Ka U toh ka om chiang uale thawm lamdang taktak za sek ing ua, hilele Pathian kiang a thumna ka neih chiang ua amah dai vengveng zel,” chiin ahon dawng hi.

Thawm lamdang taktak chih ahon gen tak in ka lungsim ah thil khat ngaihtuah khiak ka nei mawk. Tuma lam a hiai veeng a inn khat laang om achih uh, kuaman aluah ngam louh uh Alisha-te unau in, inn luah di dang amuh louh ziak ua luah uh ahi chih ka thei. Pi-le-pu hun apat Kristian kichi tamtak teen dawi leh sikha lau a a-om lai ua zan zek a Kristian a hong kipia in Pathian amuan ziak ua Kristiante lauh le laute’ilou a a-om peen uh ettawn huai ka sa petmah.

Ka Nu’n Namit baan ah len in akiang ah a kaai phei a, “Kou kiang ah hong pai phot in aw, damdawiinn alah om thei lou di na hih chiah, zing lam chiang in na U hong dam dia amah toh na inn ua om nawn na di na hi uh” chia akhem tak in Namita inle thumang tak in ka Nu te azui vanglak hi. Damdawiin kong a lamlian tan kha diin ka kizui pawt ua, ka pa’n “Hiai ka ATM kol inla, banghiam chia poimohna a-om leh na lakhe zel mai di,,,, ahih ziak in poimoh lou pi in zaw sum hon zang khol kei lechin. A mit aat (operation)hun di pen a genchiang thei naikei ua, zing khawng chiang in ahon hilh mai du. Ka hong pha man nawn lou ahih lele chanchin na hon hilh zel di” chiin ahon paisan hi.

Damdawiinn a kar khat leh ni 4 ka om nung un, a hriselna tuamtuam check a afit leh Nilaini a aat di chih ahon hilh uh, sum ngai di zah bangkim ahon hhilh bok ua. Sum tampi ngai ahih man in ka Pa le ka hilh ngam zok kei a, ka Pa’n ahon dot tak in alou pen a ngai di Doctor-te gen zah ka hilh hi. Ka Pa’n bangmah agen louh ziak in kenle bangmah dang gen lou in ka dai mai hi.

Alisha le hoihlam manoh zel ahih man in aat ni di chia ahun chiam ni ua aat thei dia lamet ahi. Lupna tungkia a hun zanglou in a peih dandan in Damdawiinn kong khong ah ka kivei pih zel. Thildang ka gen chiang inle aman kipahthu ngen a gen den sek hi. “Ka tung a na hoinate uh chikmah chiang in ka hon din zou si kei dia, hithei hileh na hon panpihna tengteng uh aleh tampi a hon dit ka ut mahmah,,,,,” chiin a ki-aat ma apat ahon gen den hi. Himahleh huai lam thu ngaikhe peihlou ka hihdan ka gen mun luat ziak in aman le a gengen nawn sam kei. A aat hun chiang ua anat didan khong ka gen lauh pih chiang in kiheh lemsak dan in ahong om sek a, huai chiang in ken amel hoih dan kan en den zel hi.

Zingkar khat dak 10 lak vel a nilum awi a damdawi-inn kong a ka tut lai un nungak tangval 100 pawl di khong ahong kizui dumdum mawk uhi. Lamdang sa tak a en in, banghiam siatna tuak om uh hi diin ka gingta hi. Huchia a hih du peen thei lou a ka et lai un, anunglam ah ka lawmpa khat le ahong tel tei hi. Mipi lak a taiphei in ka lawmpa kiang ah bangthu bangla om ahia chia ka dot leh ka dotna le hon dawng masa lou in damdawi-inn in a ka omna ziak ahon dong mawk hi.

Alisha lam kawk in amah ompih ka hih dan ka hilh a, Alisha tutna lam manoh in ka kizuui phei uhi. Ka tut fel nung un a hong hoh na ziak ka dot leh hichiin ahon dawng hi. “Tuni Valentine’s day ahih ziak in Association for Voluntary Blood Donation (AVBD) pawl te’n a poimoh te adiin sisan piak a hon sawm ua, kou le hiai hun a sisan piak sawma hong hoh ka hi uh” chiin ahon dawng hi. Huai tak in Valentine’s day ahi chih ka thei khe pan phet a. Huchiin ka lawm pa’n zong a gen ut tuamtuam a gen khit in a lawmte omna lam ah ahon paisan nawn hi.

Ka lawmpa pai khit in Alisha in “Jo, Valentine’s day nangawn kei ziak a hichia damdawi-inn a zang kon chih chiah kisuanlah huai ka salua, nangle iit leh ngaih na nei sam dia, hiai hun bangle amah toh zat khawm ut sam di hi chin ua maw. Ngaih louh lam in ngai ken la, tuni chu hon paisan maive maw,,,,, non ngai poimoh chih ka thei, hiai hun na va zang khawm di ua, azoh chiah na hong pai nawn na kei dia,,, na hong kilang nawn lou ahih a, ka maban a ki-aat di ka sunzawm thei lou ahih lele hiai teng na hon panpihna uale kipak law mahmah ka hi” chi’n ahon gen hi.

Alisha, huchidan bangmah omlou ahi, ngaihzong nei hileng bangmah hon im lou a gen vek di ka hi. Im nadi ziak le bangmah om lou ahih chia neilou ka chih leh nei lou ka himai. A himhimthu in hiai ni khong thupi leh nuamtak a zat di chih pen kei ka ngaihdan hi sese lou hiveh aw, nang damlou a om china, damlou buaipih a hiai Valentine’s day ka zangthei pen Pathian lemgel hiin ka ngai. Ka kipak veve,,,,,” chiin ka dawng hi. Huai thu ka gen ziak le ahi maithei, a romol luisim tak khat hon lakia in a spect ahon tawl a, amit apat tui hong luang khe di ka theih lau kawm tak in ahon nuul hi.

Alisha, non dam dia, hiai khong chu kum nawn chiale hong thugn zel di eivoi, huai chiang in chu nang toh i zangkhawm ta dia, tua ka lawmte a iit leh ngaih peen te toh hiai mun a apoimohte adia sisan apiak bang un enle nangtoh i pekhawm lai keidia maw,,,chi’n a khut len kawm in ka gen hi. Akhut ka let ziak a liing hia ahih thildang ziak chih ka thei kei. “Jo, hitham e, kei toh huai hun zat na ut phot in chu, na thugen taktak ahi hia chih ka thei kei, zuau leh chiamnuih a na gen hi lele ken chu zuau leh chiamnuih diin ka gingta phal kei. Huai ziak in thutak mah a hon dawng sawm ka hi,, chi’n zum mel tak in keilam ahon en a.

Ka taktak mah ahi ka gen, hithei hileh nangtoh hiai hun kia hilou a damsung hun zatkhawm ahi ka ut Alisha,,,” a hon letna liing kekeuh mahleh ahon lenkip mahmah ahi chih ka thei, ahon let dan apat khah mai asawm kei chihle ka thei chiang. A taksa liing ziak in a aw nangawn ahong vuang a, aw vuang pepep kawm in, “Jo, ka mit ahoih kei, ka mit hoih kei mahleh na hoihna leh na felna te ka mulou tuan kei. Ka mit mial mah leh Na hoihna leh felna te mu diin ka mit a vaak veve hi. Ka inn ua na hong pawt masak pen ni apat ka lungsim tengteng na luah mawk hi lamdang ka satawp thei kei.”

“Ka Nau kiang ah na tanchin ka dong sek a, himahleh aman le ahon hilh thei biik kei. Ka omkhawm chiang un nang tanchin ngen ka gen ua, sawt lou chik na mel mulou a ka om chiang bang in haksa ka sa thei petmah hi. Himahleh ka hon muhdan apat na khawsak na uh sang mahmah diin ka gingta a, ka gintak bang ngei in na sang uh ahi chih tuun ka thei. Huaiziak in ka kizumpih a, akhen chiang bang in genkhe kei mahleng zumtheilou ka kisak ziak in kei le kei bang ka kihaw tuntun sek hi. Iitna i chih in a zawng ahau khen lou chisek mahle uh kou toh nang chu bang chibang teng a hitheilou di i hi chih ka thei chiang a. Huai ziak in ka kiang a om gige dia ka hon deih haangin hon paisa le chin chih le ka deih sek. Huaiziak mah a vuai tampi hon ngaihsak lou dia na kiang gen sek mah ka hi.” A pau kawm a akhut liing zungzung te leh a mit apan mittui hong pawtte seel vual ahi nawn kei.

Mittui luang zoih kawm in ahong kidiik a, “Jo, ka thumna Pathian in hon dawng hiin ka thei. Ka Nu leh Pa’ hon sihsan tuung in ka thuaksiam kei mahmah mai hi. ‘Sihna zaw a thuak kha nailoute adiin theihsiam ahaksa’ chiin ana gensek mahle uh kenzaw ka pawm siam kei. Ei tung a ahong tung leh theihsiam haksa zaw tham ahi’ chiin ka lungliap dedu hi. Ka theih tawp a pang in Pathian kiang ah thumna ah ka ngen zel a, huchiin ka thumna hon dawng in ahong om a, athuak dan ka siam pan hi. Himahleh kou uanau adia kipahna ni suak nawn lou ahi dia aw chih theih khop in natna hiaibang thuak in ka taksa ah natna in ahon boh nawn a. Himahleh tuun nang kon tuahkhaak, mihing apat hilou in Pathian hon piak liauliau hiin ka thei. Hehpih takin hiai ka gen ziak in numei thulimlou dan in hon ngai ken la, zumna neilou na hon chi ahih lele kon iitna ziak a zumna neilou ka himai. Himahleh numei thulim lou ka hikei aw ‘kon it,,,,’ chiin gen sunzawm thei nawn lou in ahong kap hi.

VALENTINE’S SPECIAL ~ III

Alisha, hiai thu na kiang ah gen diin ka kisa sek, himahleh na hon dawng didan ka lungsim in a ngaihtuah chiang in ka hon gen ngam kei hi. A diktak in ken le kon iit a, ka gensa mah bang in ka damsung a tulpih dia hon deih ka hi,,, chi’n ka gen hi. A dam toh, adamloute ompih toh damdawi inn kong ah mi kivei zungzungte khong omlou uh hile bel deihtawk a kawi in iit takin ka tawp vongvong ngei diin ka kiging hial hi. Himahahleh huaibang hih di hial in ka sisan in angam kei deuh, akhut a ka letna zong khah tuan lou in a omna ward lam manoh in khut kileen in ka kizui phei uhi.

Tukum a Valentine’s day i zat dan ahih leh mihing te deihthusam hilou in Pathian lemgel ahi chih i pomsiam phot ngai ahi. Hun leh nite ahong thak dia, kumnawn chu nangtoh hiai ni i zang khawm dia, i gensa mah bang a hiai damdawi inn ngei a eigel in Valentine’s day min a sisan, a poimohte adia pe di i ka hia,,,, lametna hoihtak nei in hun zang tou peuhmah phot le hang chiin ka gen hi.

Doctor-te’n aat ni di achih ni uh ahong tung a, kenle kei kia a buaipih a haksat khaak leh chiin ka Nu kiang ah a rem chang penpen khat in hong panpih diin ka gen hi. Sunnung dak 1 lak a aat di chih ahih man in a kinhuai lawmlawm kei chih ka thei. Hon aat khin le uh bang hong tung di ahia chih ka theih louh ziak in Alisha le hih buai lou in tawldam diin ka hilh a. Amel ah huphurhna anei chih alang chiang mahmah mai, himahleh kihta thei dinmun a ding ahih louh dan bel kuamah gen ngailou in amah zong akitheichiang mahmah thou hi.

Ka ompih uh nungaknu toh Namita ahong tung ua, Namita le ka Nu te’n van thak a leisak uh ahi ngei dia, nalh tak leh siangthou tak in ahong kichei hi. Ka mel ahon muh phet in nui kawm in “Ujo, na chauta mah di maw,,, kon tunghak lua uhia, nana ngaklah man sim du e,,,, chin ahon houpih masa pah hi, pau zauzau kawm in a U lupna lam ah ahon luut san zui ngal a. Nekdi tuamtuam ahon puakte uh ne diin ka hong kisa a, himahleh Doctor-te’n Alisha bangmah aneek di phallou uh ahih man in kenle pe sese lou in kei kia’n kam limlou kawm pi’n ka ne hi.

Dak 1 aging naikei. Minutes 15 vel omta chih in Alisha opretion room ah a thawlh luut ua, koule hihtheih dang bangmah nei lou ka hih man un, a kong ah damna lamen kawm tak in ka ngak mai uh. Huai ka hihtheih omsun uh ahi. Namita mel ka et chiang in, kei ana ngaihbel ziak hia chih ka thei kei, banghiam khat lungliapna nei hileh kilawm in ka thei mawk hi. Ka kiang ah ka sam phei a, bangmah lungkham naang omlou ahih dan khong, dam naang a chu hichibang ahih uh ngai ahi chiin ka siam bangbang in ka neem hi. Bangmah genlou in a tutna apat ahong ding khia a, bathroom lam manoh in kintak in adiang phei mawk hi.

Namita omdan diklou khat om hi a ka theih ziak in a hon muhphaklouh in a nung ah ka delhzuui a, bathroom a luut in kongkhak akikalh khum hi. Kenle daileng di hinte chiin kiiksan ka sawm a, himahleh phun-ging bulbul ka zak tak in bathroom kongkhak bul ah thawm ngaikhia in ka ding thak nawn hi. Ka thawm zaak in ka lungsim ahon zou ngei mai. Namita in a U damna’ng in Pathian kiang ah thumna anei chih ka thei, sawt simtak ahong khol vengveng dan in leh a aw ging apat in akap chihle chiang tak in ka theisiam pah mai. Sawt simtak ka om nung ale ahong pawt khiaak zok louh ziak in kenle a hong pawt khiak ma in ka paikhiak san hi.

Operation room a alut uapat dakkar khat bei nung in bangmah khua phawk lou in Nurse-te’n ahon nawr pawt nawn ua, bangmah thu ahon gen louh ziak un koule hoih dia gingta in ngaihpha tak in ka om ua, bangmah le ka kan sese kei uhi. Sawtlou nung in Doctor khat ahong luut a, dakkar khat nung a khua hon phawk pan di ahih dan leh amit le lohching tak a aat a, adang akheek ahih dan ahon gen hi. Gendi peen le thei lou in ka thum ua ki-en in ka kinuihsan maimah uhi.

Alisha a aat nung uh kar khat ahong ching in damdawiinn apat pawtkhe thei ka hih dan uh hon hilh ua, kou le kipak tak in damdawiinn ka pawtsan uhi. Ka Pa’n “bangteng hileh ei inn lam ah hong om phot uhenla, a taksa khong ahong hoih a, ahong dam deuh chiang in amau inn lam ah i paisak nawn mai di,” ahon chih ziak in kenle kou inn lam ah paipih ka sawm hi. Himahleh Alisha a ut hetkei mawk hi. Khem chih theih teng a ka khem nung ale a aut louh ziak in amau inn lam mah ah ka kipaw pai uhi.

Damdawiinn a ka omlai un a omna vengte leh a omna Saptuam te’n zong ahon veh naak mahmah mai ua, kutvuak a hong kuan mai lou in sum-le-pai aneih remchang bangbang khong uh ahon tawikhawm sek uh. Huai kia hilou in kou innkuan bang ka hih louhna tantan ua hon phat in, zumhuai khopkhop in ahon phat zawzen sek uhi. A inn uh ka tung kiik uh chih atheih phet un le innveng a te ahong pungkhawm hat mahmah mai ua, Alisha-te unau inn luah neuchik le sawtlou kaal in ahong dim ngal hi.

Huaikia hilou in kipahpih na hia, damlou vehna chih le theih louh khop in thilpiak thupi taktak ahon tawikhawm ua, Alisha khut a piak asawm chiang un sang nuam lou in ka Pa kiang a pe diin ana gen zel hi. A theisiam lou te’n lamdang sasim mahle uh ka Pa tung a kipahna alatsak na khat hiin ka ngai a, ka Pa’n le huai theisiam ahi ngei dia thilpiak hon tawi khawmte uh kipak tak in ana saan sak zel hi.

A kipak chih bel kuamah a theilou ka om kei uh. Himahleh thil nuamlou pi khat a-om sek hi. Mittui pawt zoihzoih kawm in mite mai ah kou innkuan tung ah kipahthu ahon gen a, huai kia hilou in innveng louvengte tung ah leh abiik taka a-omna Saptuamte tung khwng ah kipahthu a gen naak mahmah mai hi. Huai thu a zaak nuam mah leh ngaihkhiak bel ahaksa mahmah zel. “Alisha kipak tak in nui kawm in hun i zang khawm ta di uh, tua mittui naptui toh hun zat hun hi nawn lou ahi. Kou kiang a kipahthu gengen le a kuulna om lou, Pathian in panpih thei dia ahon bawl ziak maimai ahon panpih thei ka hih man un, akua-kua inle Pathian tung a kipahthu gen i bat hizaw ahi,,,” chia ka Pa’n ahon gen tak in, “Ahi mahve maw, ka mang lam ale ka mangmat phak louh hiai dinmun a ding thei chih ka ngaihtuah chiang in ka kipak lua a, ka kipahna gen dan lah siam lou ka hih chiang in kilawm lou tak in ka om chih ka kithei.

Tunung chiang in bel Pathian leh nou innkuan leh kei hon lainat tute tengteng ziak liauliau in ka ut-ut seem in ka ut nana ah ah ka hoh thei dia, ka muh nopnop ka muthei ta di. Huaiziak in tuni hun bek zaw ka omdan hon dem kei unla, ka omdan peuh ka kipahziak ahi chiin hon pomsak le-uchin chih deih ka hi. Numei hai ka hih ziak in kilawm pi a ka omkhak lele hon theisiam mai un aw,,, chiin ahon gen hi.

Namita le, a U kipah ziak a kap amuh chiang in kisum zoulou in ana kinul tei zel a. Naupang kum 12 mi himahleh naupang dang tamtakte phak vuallouh hiin ka thei. Nitak khua hong mial mai di ahih ziak in kou inn kuan in paisan ka sawm uhi. Mi phatuamngaite’n a nitak ann nek di khong bawlsa in ahon tawikhawm ua, hiai ni na-na-na chu chikmah a Alisha te unau tung a thil tung ngeilou tung ahih man in kuapeuh in a theisiam ua, a-omdan peuh pomsiam hileh kilawm in a-om thei uhi.

Hun leh nite ahong liam zel a, Alisha toh ka kal simthu uzong a hoih tou zel hi. Amit ahong hoih a, natna neuhneuh a thuak sekte om nawn lou ahih man in a taksa ahong maam in ahong nalh nawn mahmah mai hi. Himahleh akhen chiang a lungam a puuk mawkmawk a thangsak a, Doctor a ki-check sak chiang inle a ziak di himhima mukhe zou kei uh. Himahleh om gige lou ahih man in lungkham pih naang omlou chiin Doctor te’n ahon dawng ua, amah ngei le huaiziak in ngaihpha tak in a-om thei hi. Kei lak ah gen sese kei lele thil om didan ka ngihtuah siam veve a. Kholai a ka pawtkhawm chiang bang un tangval hawn in a mu nuam thei mahmah mai ua, akhen in paukam kilawm lou simsim a achiamnuih khawng uh ka za panpan hi. Huai thute za sek mahleng Alisha omdan bangmah kilamdang lou ahi chih ka theih ziak in ka ngai poimoh ut kei. Bang chi teng in thawh in hou sek mahle uh kei adia ginom tak a om di ahi chih ka theichiang hi.

A fel a, a hihtheih bang khamkham a Saptuam a akizat khawng ziak leh a mel mahmah le selou ahih man in deihsaktu ahau chih kenle ka theipih. Himahleh kei lak a a-omdan ka theihchiang mahmah ziak in thiik sim sek mahleng muanmohna lungsim ka nei tuan kei. Kha nih (2) lel paipan chih in ka Pa’n a Alisha bangmah sep nei lou a ahuchi om sang in ka office uah clark nna khat awng a-om a, huai ah khum dan kingaihtuah leh bang achi di? Chi’n ahon dong hi. Kenle ka Pa ngaihdan hoih ka sakpih thu ka gen tak in ka Pa’n le huai a aseptheih naang in ahon buaipih ngal hi. Senior officer hita ahih man in haksa lawmlawm lou in kar khat sung in ahon saifel thei pah a, Alisha inle huai ka Pa-te office ah buaina omlou in asem thei ngal hi.

Kha teng a lawh nei ahih man in tuma a a inn luah pen ubel chihdan om nawn mahmah lou ahi chiin huaisang a hoih zaw, huai veng mah a inn hoihsim khat ahon luah ua. Namita zong nidang a, nisa hiin vuahzu hita leh khok sak gen thei lou a nimbu tui zuak a kivei gige himahleh a U in sepna hon neih taak ziak in school a azirna ahon sunzawm thei nawn hi. A inn ua ka vapawt chiang bang in ahon ngaina siam thei mahmah mai ua, tup louH pi in sawt pipi ka om kha sek hi.

Office-a sem ahih man in ka ut hun un ka kimu thei kei ua, ka ut hunhun ua ka kimuh theih louh hang un kou mau chiat ah ka ginom mahmah thou uh. Ut hunhun ka kimuh theih louh hang ung kiginni khong in chu nilengleng in ka kipawl sek ua. Himahleh Alisha bel numei dang banglou tak in mundang dainawl leh restautant khawng a kimuh tuam chihte a ut ngei louh ziak in amau inn khawng mah ah ka kipawl zel uhi.

Hunte hong bei zel a, Christmas leh kumthak khong kuadang ngai lou in ka zang khawm uhi. Ka Nu leh Pa’n zong a vangkim in Alisha toh kiteng din ahon sawl sek uh. Himahleh ama kiang a ka gen chiang in anau Namita ngaihtuahna ziak in ahon nial sek, himahleh ahon it louziak hilou ahih dan khong ahon gen a, kiteng dia ka zot teng in ka zotna a zahtak thu leh ahihtheih nailouh ziak a poi asak thu gen in a mittui khong ahong pawt hial sek hi. Ken kiteng dia ka zot nate ziak a vuaitampi a mittui nul a khase sek ahih man in kenle ahihtheih hun ngak a ginom tak a om tuak diin ka hilh zel hi.

Hunte hong bei in theih louh kar in kumthak kha nih (2)na bang ahong tung man zel hi. Kum masa a damdawiinn a nungak tangval te’n Valentine’s day a sisan apiak ni ule hong tung nawn di ahih ziak in kou le huai hun a sisan pia a kuan ngei sawm in ka genkhawm den uh. Himahleh ki-aat pi tuak a, kum khat lel paipan a sisan piak bangle hoih lou thei chih khong ka ngaihtuahna ah ahong piang sek hi. Huaikia hilou in a vangkim a phungzawl dan a om a kipuuk mawkmawk achiin ziak in a piak theih ka gingta lawmlawm kei. Himahleh aman chu a taksa ah bangmah dang soiselna aneih louh thu ahon gen zel hi.

Huai thu hon gen sek mahleh ka ngaih pha theilou ahih man in ki-check-up diin nikhat private clinic ah ka hoh pih hi. Himahleh a result ah bangmah lauhuai omlou ahih dan leh sisan pe dia ataksa fit ahih dan ahon gen a, koule lungmuang tak in ka pawt khia ua, inkawng ah tut tawldam kawm in ka kihoulim uhi. “Jo ka ngaklah ta e, ka damlouh lai a sisan pe dia hong kuante ka muh a ka lungsim a hong om chu maw,,,, kidam mengmeng hen la, huai damdawiinn kong a tutna tung a tangval selou deuhmai khat ka tut pih toh hiai damdawi inn ngei ah sisan pia in ki-tel tei leh chih eikha,,, “lampi a motor kivei zungzungte en kawm a thildang ka ngaihtuah laitak ahih man in ka lungsim ana pe kha lou deuh ka himaithei, a thugen ka theichiang kei a, ngaihtuah sese lou in “Kua eita na kiang a pasal tu na chih,,” chia ka dot leh, lehlam nga in ahong dai vengveng hi.

Bangchi e, ka dotna za lou maw,,,, chi’n ka veilam a tu Alisha ka houpih a, himahleh ahon dawng tuan kei. Kuun kawm a amai ka et leh heh mel tak in ahon en a. “Kumkhat pai pan a tua mangngilh chih himhim,,, na ut leh hon mangngilh aw,,, hilele ken chu hon mangngilh ngei lou di,,, chiin ahon gen hi. A thugen ka ngaihtuah thakthak leh kei hon genna ahi chih ka thei khia a, nui phaphal kkawm a ka gen leh amah le hong nui khe tei hi. Huchiin Valentine’s day a sisan pethei di chia doctor in fit ahi achih ziak in kipak tak in, inn lam manoh in ka kiik uhi. Lampi ale thildang genlou in huai ni a ngaklah thu ngen ahon gen pih hi.

Alisha akilawp dan lamdang ka sa hial a. Ken le ka siam bangbang in ahon gente ka kum tei zel a, sawt lou in a inn uh ka tung ua. Singpi khong dawn a ka kihoulim in ka kiang ah ahong tu hi. Ka liangkou a hong kingai in ka king a a-om chiang a lungmuang vengveng ahih dan khawng, ahun teng kei ngaihtuah na dia azat bei dan khong ahon gen a. Ka khut ka zan khia a, a khabe a dawm in a muuk a tawp diin kong kisa hi. A zum ziak hia, a ut louh ziak chih ka thei kei, amit ahak nawn kei. Ka muk toh amuk kisutuah dektak a a-om lai in kongkhak ahong kihong a, Namita school uniform silh in ahong nui luut seusau hi.

Namita in ka omdan uh theisiam ahi ngei dia, bangmah gen lou in a bedroom ah ahon lut san ngal a. Koule kingai a tu himah le ung kuamah hilh ngai lou in ka kikhiin khe tuak uh. Ki-en tuah in ka nui ua, hong phawk tu naupang mai himahleh gen di chu avaang ut khopmai. Sawtlou nung in room apat Namita ahong pawt khia a “Kon hih buai kha hia,,,,, ka lawmte inn ah hih di ka nei a, ka va pawt zual di aw,,, Ujo kon pai kiik ma nana om di aw,,,,” chiin ahon pawtsan hi. Namita teutuau le pauthei na mahmah e, apawt ut lele pawt na di gen hen le pawt leh himai aka, ka chih leh Alisha in Ahon chiamnuihna maimai hi. Kou gel kia ka om chiang uale hichidan meinei taktak a pau thang a thangsak hiveh,,,” chiin ahon dawng hi.

Nitaklam kaaita chia keile pai dia kisak bawl ka hi chih Alisha in atheih ziak in, Namita hon ngetna ngai poimoh kei na chia, aman ahon ngaihngaih maizen toh, akhen chia bang kei sang ale nang hon ngaizaw bang sasek keive. Hong pai phial ta di,,, ngaklai vanglak aw” ahon chih ziak in keile ka tu kiik nawn hi. Nna poimoh ka neih di ziak a ni nih (2) sung pawt manlou di ka hih dan ka gen a, a ni 3 ni Valentine’s day-a amah toh damdawiinn lam a sisan pe dia kimuh ka sawm thu ka gen a. Aman le ka buaina ka gente theisiam in lin kawm tak in ahon Amen hi. Innkongkhak ahong ki-kiu a, midangdi sa a Alisha in “hongluut ou” achih kaaukaau leh Namita nui kawm in hong lut hi. “Namita sek mahmah, na hichihleh hoih lou di ahi aw,,,” chia Alisha in a gen leh, “U nangle na hichih leh hoih lou di ahi aw,,,” chi teng in a dawng hi.

Namita, nangle hong paita na hihleh keile kana pai phot di aw, chiin ka pawt khiak san ka sawm hi. “U jo, na fellua, ka U gen kia ngaipoimoh di kon sak leh kei gente le nana ngaipoimoh saam a,” chiin ahong nui phaphalh hi. Namita, ken nang kaan a ngaihpoimoh ka neih louh pi, nang chu fel si chin a, thumang zawmah na hih chia, hon ngai lou di i chih sim chia le hithei mahmah lou hi, na U hoih taktak in nana houpih ta di aw,,,,innkong tan ahon kha ua, “Ujo, nong pawt nawn chia chu kon subuai nawn kei di,,,, Bye aw” lamtawn in Namit paukam ka ngaihtuah a, motor sung bang ah ka bengngong nuih phutphut mai hi.

Inn ka tung in nitak ann nek hun nailou ahih man in ka kihahsiang a, kihahsiang khin ann nek ngak in tv khong en in ka tu maimai hi. Ann nek ahong hun a, ann nekham koimah a pawt khe sese lou in lum diin ka kisa ngal a. Ka omdan ka ngaihtuah sek a, Alisha hichi khop a ka ngaih mawk lamdang ka sa. Tulai tuailaite lak ah abiik tak in numei te’n namdang tangval akop chiang un kei ngei in le a guuk in kana dem thei mahmah hi. Himahleh kana dem sekte toh dinmun khat a ding ta ka hih man in demthei ka hi nawn kei chih ka kithei.

Kei leh kei ka kimawhsa a, Pathian in mihingte lak a athil thawnpiak manpha penpente lak khat ‘Iitna’ kichi pen, kua kiang peuh ah anei tuun apiak theih ahi, namdang chih ziak a iitna piak moh ahih louh dan ka thei khia a, hiai daan naaktak a soisel tute ka muhdan khong ka ngaihtuah chiang in lah, nam a iit na ziak uh, namdang lak a mangthang a i-om mai di alauh ziak uh hiin ka thei zel si a, lupna tung ah lungbuai ziak a ihmu thei lou in ka kileplep hi.

Ni nih (2) sung sepdi poimih ka neihte ka sep sung in Alisha kiang va pha thei kei mahleng ka hun awl neih chiang leh zan lupdek chiang in chu ka telephone tungtawn in ka houpih den hi. A aw ka zak chiang in ka kipak a, huchi mah bang in Alisha inle kei aw a zak chiang in kei kipahna sang mah in a kipak siam zaw in ka thei hial hi. Zan ihmut hun chiang a kimangpha khak na dia Alisha paukam zat tam mahmah khat “Kimu nawn dia mangpha kikhak zaw nuam maw, hilele kimun nawn lou dia mangpha kikhak angaih hun lah chikni chiang hiam a hong tung di hi a, huai hun di ka ngaihtuah chiang a zaw ka mulsi bang thou sungsung zou hial ahi. Hilele tunitaka diin chu kimuh nawn pah lametna toh mangpha kon khak ahi. Mangpha ihmutlim” chiin ahon khaak sek hi. Hiai paukam Alisha in azat tam ziak thei kei mah le’ng, ka maban ua thil hong tung di theihtheih na khat nei hi diin ka gingta a, tukhawnung tanpha in ka ngaihtuahna aluah den hi.

Ka sepdi poimoh bangbang semkhin a ni nih (2) mahmah Alisha mel mulou a hun ka zat nung in nitak hun in, zingkhua hong vak leh Alisha toh kimu nawn di chih ngaihtuah in phur tak in huai nitak huun ka zang hi. Tv khong en in lup hun ngak in ka tu a, huchia tv en a ka tut maimai lai in TV screen nuai ah theihsakna hong kigelh ka mu a, huai phet in Alisha toh damdawi-inn a kimuh ka sawm pen uh hitheilou di ahi chih ka thei, Association for Voluntary Blood Donation (AVBD) pawl te’n kingaak-khawm na’ng a agen na mun uh mundang ahih ziak in huai mun a vapai ngai ahi chih ka thei hi.

Huai thu Alisha hilh di’n ka hong kisa a. Himahleh lup hun a a aw zanuam a ka houpih thou ngai di ahih man in kenle lup khit chiang a houpihna hun remchang himai chiin ka ngak thak hi. Ka sungte zong sunlam nna asepna uh chau kisa deuh uh ahi dia, nidang a dak 10 lam a lumpan himah le ung huai nitak in dak 8 pelh zek in ahon lupsan uhi. Keile keikia a tut sang in chiin ka lupna ah kuamah koilumdi omkei mah leh Blancket kawi in CRP style a lum diin ka laikhun ka zuan hi.

Ka cell phone zatsiam balck&white a keypad le a luui luat ziak a gulha’ zusa valh bangmai a puak keukou ka lukham apat ka dok khia a, mahni piankum le chiamteh theilou himah leng ka damsung a ka mangngilh nawn louh di Phone no digit 10 tak ka type zauzau hi. Huchiin a anuailam veilam kil a rong hing (green) ka me’k nawn keuh a. Nidang a aw ka zaak gige ahih ziak in lamdang sakna ka neikei. “Tuzan hon phone baih na vanglak chia, man baih maw, na nasepna agim mah di maw,,,,? “Hon houpih peih chi kei na chia, en na aw zakkar kingaklah a banghiam kibang zawzen a”. “Jo, chiamnuih gen lou di, i mailam a bang thil hong tung di chih le kithei lou, thutak gen di, tuzan na-na-na chu romantic deuh tak mai in aw,,, gen di na theih kei leh ana dai inla ken kon gen dia, ana ngaikhia aw chiin kei pau nang hun omlou khop in kipak tak in hon iitna thu leh ahon ngaihna thu ahon gen zauzau hi.

Sawt kuam tak kihou ta ka hih man un ka Nu leh Pa sepsuah sa a phone tui ka thun zong bei kuan ahih man in kihoupih lai ut mahleng koih ahong ngai hi, numei sepsuahsa enlah a, hon call back lamen hileng bel hon call nang khop zaw nei mahmah sam inteh, hilele huai diin ka phut kei himhim. “Zingchiang a kingakkhawm naang a genna mun uh kheek thak uh ahih man in na inn uah ana ngak mai in la, nang pi diin ka hong kuan mai di,,” chiin ka hilh hi. Amanle ka gen theisiam in. “Na mit siing inla, himahleh siing den mai lou in, na etlawmna leh na sisan gui te khawl tawldamsak phot in aw! Himahleh kumkhua a di hilou in, MANGPHA chih kon khak pen tuzan adi kia ahi aw,,,, Mangpha ihmutlim….. Chiin mangpha ka kikhak uhi.

Zing ann nekham ka kisa a, Alisha toh sisan pe di chih ka ngaihtuah thak chiang in ka phur mahmah mai hi. Ka van neih sunsunte lak a ka neih hoih penpen lakhia in ka kithuam mengmeng a, perfume kikaap namtui vengveng in, ka Nu kiang ah ka pawt na’ng bangkim ka hilh hi. Ka Nun le hon theisiam mahmah vanglak a, pawtkhe dia ka kisak lai in hichiin ahon gen hi. “Hiai hun khawng nungak tangval in chu zat di mah ahi. Himahleh kilawm lou tak a na zat khaak di uh a lauhuai a, pilvang tak in na om di ua, sisan na piak khit chiang unle koimah a pawt kawi lou in, Alisha-te unau na hon pawtpih dia, ken amau toh i neek khawm du’n inn ah nek kana bawl di. Nuam tak hiai hun zang di i hi uh.” chiin ahon gen hi. Ka Nu thu gen kam khat inle ka kum kei, ka car chahbi ka la a, pawtkhiak ka sawm hi.

Varanda ka pawt khiak nung in ka Nu’n hon sam kiik a, keile bangmah gen lou in innsung ah ka luut kiik hi. “Valentine’s present di bangmah lei lou maw?” Bangmah lei lou ka hih dan leh ngaihtuah kha himhim lou ka hih dan ka gen tak in ka Nu’n, “Thil himhim phur luat ziak a hih thot-thot di hisek lou ahi, na thil hih di himhim na hihma a sawtpi na kingaihtuah masak di, huai hun in bang hih leng a kilawm dia, hiai ni’n mite’n bang ahih sek ua,,,,,, Bangteng hileh va kuan phot inla, ken thil hoih a hoih amah na piak di kana ngaihtuahsak mai di…. Hiai ni khawng thupi in thupi sese kei lele thil piak i kipiak kha manpha biik mahmah ahi. Ahihziak in mi’ thil na vapiak ziak in amau lak a bangmah lamen kiik tuan kenla, deihsak a hon pia uh ahih lelah kipaksiam tak in na saan sak di” chi’n ahon gen hi. Awle aw Nu, thil hoih deuh, se maimai lou di. Hoih hitop mai ka deih chu, nalh deuh tak in na tuamsak bok dia maw,,, aman zaw bangmah hon pe kei lele poi ka sa kei. Ahih leh ka kuan aw Bye,,, chin, Alishate inn lam manoh in ka taikhia hi.

Traffic a jam naak luat ziak in ka ut bang in ka kinthei kei, khe in pai lengle ka tungkhalh ka kigingta hial hi. A tawp in traffic jam nak law mahmah ahih ziak in, hunchiam a tung man louh di lau in Alisha kiang ah a peih dandan a khe a hong paitou dia hilh ka sawm hi.

Nidang a ka call chiang a pic-up pahpah gige hia, hiai ni sese bangchi dan ahi dia aw, ka kinohnoh maizen toh. Thumvei mahmah ka call nung inle a pic-up thei himhim kei. Ka lungsim akinawh toh ka hehtha bang asuak maimah hi. Huchih sungin keile Alisha-te inn tung suk dek ka hihlam ka kithei a. A inn kiang uah mipi omkhawm laihlaih ka gal muh hi. Innkong ah cilpaulin hing kizak ka galmuh hi. Bangthu bangla om ahia chih ka thei kei. Alisha-te unau tung a banghiam thil hoih lou khat tung hi diin ka gingta mawk hi. Car apat ka kumkhia a, khe a ka pai kawm in inn chhawng 3 a kilam hia, innkuan dang le aluah om thou uh hiven, midang tung a tung hi zaw inte chiin, angmasial na lungsim ahong piang a, huai thu in kei leh kei kinem kawm in ka paisuk zel hi.

A inn uh ka tung a Alisha-te inn mahmah ahi til omdan ka theisiam, diip kisai didip kawm in inn sung ah ka lut a, mipi lengkhawm dupdupte le ka zahtak zou nawn kei. Bedroom kongkhak kilakhia ahih man in bedroom sunglam le akimu paisuak vek hi. Lupna tung a puan kikhuh, a lu kia adawksak uh mu lou di chimahleng ka mu lou thei kei, atal a sum siik (coin) kikoih ka muh chiaang luat ziak in lungsim mumal ka neithei nawn kei. Kintak in ka naih phei a, Lupna bawh a kuun diide Namita mit vuung thiing theeng a om hong daakkhia ka mu chiang mahmah zawmah zel hi. Namita kiang ah ka tu a, Namita in ahon muh phet in ka ngawng a hon kawi in “Ujo, hehpih tak in hon ngaidam in aw, keiziak ahi. Mite bang a piching lungsim nei hileng ka U hichiin a-om het kei di. Himahleh ka kihamhaih luat ziak in hih masak di leh hih naknung di ka thei kei ahi. Chiin hong kap keuhkeuh mai hi.

Namita bang thu bangla om ahia oi, na U la koi a bang chi,,,,,,? Pasal mah hileng thil omdan ka theihsiam ziak in ka kisum zou nawn kei, ka mittui hong luangkhete ka dangzou kei a. Namita in lupna tung a bangmah phawk nawnlou a lum a U kawk in “Ka U hiai ah om, ka sapsap haang in ahon dawng nawn kei. Ujo, nang sam lechin na aw za dia hon dawng di ahi,,,” bangmah gendi ka theih louh ziak in Alisha ruang en in ka tu maimah hi. Huchih lai in Namita in, ka nungzang a hon tuum sawisawi kawm in “Ujo, mawh,,, ka gen za lou maw, nang ka U ngai tei lou maw, khat vei beek amin in sam ve, na aw za leh hon dawng di ahi,,,” chiin kap zoihzoih kawm in ahon gen hi.

Namita toh ka omdan uh mu in mipite le kisum zou a-om nawn kei ua, lasa gina thei le om lou khop in amau tutna mun ah ana kinul supsup mai uhi. Namita na U bang chi e,,,,,,? Ka gen sunzom thei kei, ka gendi pen le ka thei kei. “Ujo, ka U in nidang a ahih sek dan in, tu zingkar thouphet Biakinn ah devotion hoh di akuan hi. Himahleh kei chu ka thou naikei, thou nailou hiphet lou in ka U thoh lam le ka thei kei. Anatna, lungam in pha ahi ngei dia, step a apai lai lungam in akipuuk a, ataksa zoulou in step ah atuuk hi. Saupi tuuk chu ahi ngei dia, aharh suah in ka min in naktaktak in ahon sam chiin ka invengte un ana za uhi. Himahleh kei ka ihmut lim luat ziak in ka U hon sap ging ka zah hetkei hi.”

“Innveng a athawm ana za kha te’n ahon delh ua, keile ka insung ua ahon zawnglut nung un ka ihmu ka harh pan hi. Ka harh khiak in ka U ana om nawn kei a, houpih lengle hon dawng thei nawn lou ahi,,,” chiin ahong kap zel hi. Gendi tampi ka thei a, himahleh genkhe diin ka aw asuak khe zou kei a. Bang chiin omleng ahoih dia, pasal khat kihi ngal ahiai bang a om akilawm di hia chih lam ngaihtuah na ah alang kei, ka omdan penle tuni tan in ka ngaihtuah khe zou kei lai hi.

“Kingai tak in i kimu a, kikhelah kawm leh kimuhnawn lamen in i kikhen sek. Himahleh tua i kikhen dan theisiam theilou ka hi. Ka tung a bang lungsim nei a hunlou tak a hon paisan na hia awi Alisha, na omdan theisiam theilou ka hi. hiai bang a om di bang Bangziak a zannitak a i kihou lai a hon hilh pah lou e,,,lungkim thei lou ka hi,,,,, kon houpihna hon dawng ve maw,,, khatvei beek hon dawng thak ve, khamuang tak a ka omtheih saam naang in,,

Samsam in thu dongdong mah leng ka sapna hon dawng di mipi hichi zah lak ah kuamah a-om kei ua, ka dotna hon dawng thei kuamah a-om tuan sam kei uh. Ka kiang a lusun nem a mipi hong paikhawmte le maizah thei ka hi kei. Amaute’n zong ahon thuakpih sam di un ka gingta hi. Hankhuk ah kumtawn a kikhen diin Alisha taksa ahon vui liam sak ua, ngaiin samsam mahleng kiik di simthu a le’l nawn kei, mittui naptui toh Alisha kumkhua adiin kikhen mahle’ng kumkhua sang a sawt zaw tangtawn tangtawn a kikhen nawn lou diin na muan Pathian aang sung ah ana ngak in aw! Kou hiai lei a nang hon iit-te leh nang hon ngai te’n na mohpuak, na sep khitlouhte sem in na nung ka hon zui diing ua. Hiai lei a ka nna uh ka zoh chiang un nangtoh tangtawn tangtawn a tengkhawm diin ka hong pai saam diing uh.

Na kiang ka hong tun theih sam naang un kou adiin mun nana bawlsak inla, huai mun kon tun chiang un kikhen nawn lou in na iit na ngaihte leh nang hon iit, hon ngaite toh tengkhawmta di i hi.

Nungak tangval-te nang a diin zaw tuni kipah na ni ahimaithei, himahleh kei hon iit bang a hon iit pih tu-te adiin zaw hiai khovel haksa leh mangbatna thuak nawn lou dia na iit na ngaihte na taisan ni, mittui luanna ni asuak ta. Hiamahleh hiai ni ahong tun chiang in nang adia ka hihtheih om sun chiin, piallei thuahgiat nuai a na zaal na haan ah ka pai dia, na damlai a na ngaihnat pe’n-pe’n paak ka koih gige di. Ka damsung in nang adia ka hihtheih om sun chin ka koih zel lai di chih kon chiam ahi. Alisha tu adiin hiai kon mangpha khakna leh nang adia ka hihtheih nanung peen hiphot ahi chiin, suangtang khat a hankhuk a khia in damsung a kimu nawn lou diin ka paisan ta hi.

~Beita~

©Siamsinna leh Vakiangbu