CHIAM PELLOU
Written By : K.Lianthansang @ K Thansang Zomi
BUNG - I
KUM SangNih Leh Sawm Leh Thum (2013),June 22nd. Nitak ann nezou phet,ka Sakhau (Pocket) sung apan, 'Pengpelep'
hong kichi khe kaukau mawk hi. Ringtone dia 'Pengpelep' haam ka koih
ahihziak in, hon Call om ahi chih haih di vual ahikei. Ken leng,ka khut
silsiang zok in, ka nulhul ngal a, ka Phone ka et leh 'Ka DuaT ChingboI'
chi a ka Save pe'n in hon call ana hi maimah hi.
Ka nui heuhau zozen a,'Haro..Haro..' ka chih patpat leh Ka duat Chingboi in AWNEEM tak in,'' U tunitak nong pawt mandiam?'' hon chi hiauhiau hi. A zak anuam khopmai, bangmah dang leng ka ngaihtuah se kei, '' Awle Nau Duat,Kong pawt di'' ka chi a,huai ka chih zohphet in,' Hon ngailua ka hi U' hon chih behlap a, a Phone A Off zuingal hi.
Huai nitak chiah zaw lungleng louh na vual ahi kei. Ki-it leh kingai-te a di'n 'Golden Chance' chihtheih hial leh kilawm hi. Aziak ahihleh,June 22, 2013 Nitak 'SUPER FULL MOON'
di ahi chi a, Facebook tungtawn a agen vengvung uh ka na muhziak in.
Laphuak siam khenkhat in,'Tungsolkha' bang ana zangmun mahmah uhi.
Misiam-te
bawl, baang a ka taak uh sung a, siik neng lepkhawmte lak a
asaupen(Sanapi a Minute Hand) in dak 6:15 pm vel a kawk in, Message hong
lut a,Ka duat Chingboi apan ahi nawn hi. Kindeuh a ka et leh 'Dak 7:30
pm tan Lapawl zil di kahi, Biakinn kong ah ana om lechin aw U' hon chi
hi.
Kei leng kinoh hetlou in, haa khawng ka nawt a, Bang
puan-ak silh a, bang khekol teng di adia aw chih khawng ka ngaihtuah
khemkhem hi. Kichei ngei le hilou pi, huai nitak zet zaw, bang kha tang
ka hi diam, liimlang 'Ka su Luck' zou khopmai. T-Shirt
hoihlua ka hau kei a, ahoih ka neih sun ahihleh ; ZOGAM.COM T-SHIRT toh
ZOGAMonline T-Shirt ahi(PhalvaTimes te’n abawlman louh uh chu poi e).
ZOGAMonline
T-Shirt (Bawlthak pen) kon silh a, Liimlang kiang mah ka va tung zel
hi. Bangteng hileh, hiaipen a thak zaw deuh (bawl nanung deuh) hiven,
kilimsiit henlan, chih toh suah ka thuah a, ZOGAM.COM T-Shirt pen kon
silhthak nawnta hi.
Huchia ka kisak sung in, Dak 7:00 pm bang hong gingtou velval man a,kei leng kindeuh a gamtang in ka naunu 'Fair & Lovely'
kong kinuh puang phitphet zaw ki-ettheih dek sam ve aw..midang mit ah
bang ka chi diam a? Ka Duat Chingboi in,Fair leh Lovely hon na sak diak
na dia zaw, 'Fair & Lovely' ka kinuh hial hiven.
Ka 'God Gift II'
Liim(Ka Khedap) sesim pi toh, khavak eng singseng nuai ah ZOGAM.COM
T-Shirt silhkawm a, Jean khekol teng in kong pawtkhe hauhhauh sam ta hi.
Bangbang hiam ngaihtuah kawm a ka paipai leh Ka duat Chingboi Nuihging
ka za mawk a, ka halh zot zozen hi. Lamdang satak a ka dakphei leh a
Biakinn kong uh tung ka na hi maimah a, amah leng a lawmte numei 3 toh
Gate ah hong pawt chet uhi.
A Lawmte'n leng ki-it kingai
ka hihlam uh theivek ahihman un, kei hon muh utoh kiton in Chingboi kia
mangpha a khak ua, amau hon pailiamsan pah uhi. Chingboi mel nidang sang
in hoih ka sa zaw diak a, ka itna leng a lian deuhdeuh mawk hi. Kha lah
vakpha mahmah mai, mi lah kholak a phe souhsouh. Kou gel in leng kuamah
dang ka eng tuankei ua, khut kilen kawm in, Chingboi te innlam awl in
kon zuan ta uhi.
Chingboi ahihleh tanu neihsun, aneulai a apa 'Kargil War'
a ana sikha ahi hi. Tu'n anu toh mi huangsung ah inn neuchik khat luah
in a khosa lel-lel uhi. A nu'n Sep theihtheih sem in,a khenchiang in
anteh peuh New Bazar a vala sawn a, Damkam Bazar ahihkeileh Dorca Hall
kong a Foothpath tunglou deuhte ah a tutpih zel hi. Chingboi in ahihleh
Suun chiang in a Papi te innlam ah Siam va gaan zel hi (Siamgatna Khawl
in).
Chingboi mi nunnem tak, kamsiam lua hikei mahleh kei
sang a chu kamsiam zaw tham ahi hi. A lungsim a piching mahmah mai a, a
kum toh teh in a gintak huai kei zozen hi. Class-XI ka hih ua ka ki
classmate khak ziak ua awl-awl a kithei a, ka hehpihluat ziak a Itna
simthu ka lelkhak ana hi zomah hi. A haksatnate hon gen zel a, ken leng
sum leh pai in huh zoukei mah leng ka khamuan zel a, ka hihtheih tawp
suah in ka hun neihte ama a di'n ka na pemun mahmah hi.
Bangbang
hiam gen a, awl-awl a pai ka kisak ua leh, a innkong uh ka tung ua,
innsung ka lut ua leh a nu'n ann ana nepan hi. Ken leng anu kiah ' Nu, bang chi e paihak na cia? Tu'n ann na ne pan a?' ka chih leh ' Tuni
Suun tanglai tak a Bandh hong ommawk a, ka meh laksate zuak gai kei
leng segawp mai di chi ing a, a sumpi muhkhak leh chi a ka innzuak leh
paihak kha ka hi, nang la bangmeh nawn meh a?Ann hong nekpih ve?' hon chi hi. Ken leng, '
Nu, ken Gawtuai hou pok gilvah tak a nezou phet a hong pawt ka hi.I gam
uh i theihsa ahi,Bandh bang ut hunhun a bawl phut mawk hang a, nektawm
zongte khualna himhim omlou' ka chih leh hii asa mahmah hi.
Huchia
Chingboi’ nu toh ka kihousung un, Chingboi leng a lazilna a apuante
khengzou in ka kiang ah hong tu tittet hi. Hun sawtlou nung in, a nu'n
an nezou ahihman in anu annekna kuangte a innkong ua Well bul a khavak
singseng pansan in a va sil hi. Ahi tak in bel, innsung a Candle kide
kiukiau sang in khavak pen a vakpha zotham hi.
Chingboi nu le gim kisa sim ahi ding a, 'sawtpi om in aw..'
chi in lupna lam ah hon lutsanta hi. Chingboi in leng Kuang hon silzou
pah a,Candle heksak maimai chi in Kong a singliim nuai ah tutnasau
zawngpawt in kong tuta uhi.
BUNG - II
TUNGSOLKHA in
lah a vaktheihna zahzah a suah phet hilou in nidang sang in Leitung
hong naineh zaw a, nidang a sang in lianzaw hi'n kimu thei hi. Chingboi
te Innkong a singliim nuai a bench (tutna sau) a tu in Khapi singnah kal
neuchikte apan khawng en kawm in bangbang hiam ka genkhawm uhi.
Ka
tutna mun uh khavak in hon salhkha chiah kei, singnuai ahihman in
mundang sang in amial zaw deuh a, himahleh ka Ngaihnou mel bel chiangtak
in ka muthei hi. Ka veilampang a tu ahi a, ka baan ah akhut nih zang in
hon kawi thiintheen hi. Hong kiheiphei cheuh a,' U tuni, na College kaina a nuam hia?'
hon chih laitak in huih hong nung cheuh a, a sam sau ngihngiah huih in a
langtuak ah hong mut leng selsel hi. Hiai hun chet in zaw, a etlawmnate
hong kilangchian khopmai, Vaphual lengkhe dia kisa, akha palhsak selsel
mah abang hi. Ken leng,' Nuam mah ei Nau, nang ka lungtang tawng a om
gige na hih chia' ka chisuk pah hi.
Chingboi, mibang a
dungching hikei mahleh a lungsim leh mel bel gensiatna di ka thei
rengreng kei. Pucca ahi mai hi. Gensau deuh leng, a neulai a 'TB' natna
ana veikhak ziak a, mibang a Duangching zoulou lel ahi. Himahleh a
taksa teng zaw a bukim khopmai. Part tuamtuam a khen a, survey bawl di
hi lele a hoihlouhna zaw kalkhat sung inle kuaman mukhe zou di un ka
gingta kei hi.
Ka khut veilam awl in ka liiktou a, aliangtung a ka ngak kawm in, 'Tuni na siamgatna na gim hia nau?' ka chih leh 'Nang chihdan sekte kon Copy-Paste di, ka lungtang a omden chin a, ka gim lam le ka phawk kei'
chi in a haa ngou sitset hon dawksak a, a biang suum hong kuak kiukiau
bang zaw, ka mit a tai khopmai. Chingboi Chiamnuih hat tak, hilele a
hunphet thei ahi a, chiamnuih leng dawl thei mahmah ahihman in, ken leng
' Copy-Paste va chih sese, midang na lungsim a Copy a, na lungtang a Paste sawmsim maw nau?' ka chih leh ' Zenzen eive U, en nawn Delete di kilau lua a' hon chi a, ka nui nalhnalh uhi.
Huchia
ka houlim sung un, dak 8:30 pm bang ana gingman a, hun a paihat
khopmai, College kai chiang a Minute 50 lel le sawt ka saksak maizen
toh..!. Chingboi in,' U,ZOGAMonline te T-Shirt bawlthak kha, nalh ka sak dan' hon chi a, 'Ken
le Nalh ka sak dan, tu Nitak kon silh dektak hi a, hilele I Lungsim a I
ki 'Online' tuah nak leh chi a, ZOGAM.COM te a pen hon silh keivoi Nau' ka chi duanduan hi.
Chingboi hong nui cheuh a,' Online gige chu kihi phot, tunung chiah non taisan diam a...?' hon chi a, ken le 'huchi chihte omthei sih ven' ka chih kawm in, ka khut taklam in ka Puan-ak aang a Vaphual lu (Head) ka khoih a,'
Enve Nau, Phualva bang a i tong Chiamsate mangngilh mawk lou di ka hi.
Hiai a kigelh en lechin, BRIDGING THE ZOMIS' a kichi a, hiai a ka ang a
Phualva te ki itna bang a ei hon Zomkhwm gige di ahi. Phualva bang a
CHIAM PELLOU in sihtanpha a nang a di'n ka ginom di Nau' ka chi hi.
Huchia
Ka duat Chingboi toh nuam satak a om a, hun tomchik sung zangkhawm pan
ka kisaklai un, dk 9:00 pm bang ana peeltou man mawk hi. Chingboi in
amit vom kilkel a hon en in,'U na tuun leh zuate'n palbang hon nang le uh Non taisan mawk diam?' hon chi hi. Ken leng 'den
in I tongchiamte pellou a Sihtanpha a zui di ka hihdan kon hilh voi
nau, lungkham ngailou ahi. Singdang anglai a loubang na tul di kon
phelkei, kei le nang a lou di'n ka kiphalkei, Sian huaina toh i dam dia,
kumtawn a tengkhawm hun hong tung pah di ahi' ka chi hi.
Chingboi le Second 30 vel hong dai dide a, 'U, Kei zaw bangchi hiam a singdang anglai a zaldia ka om leh Kulsin ah ka zaal zaw di. Hon pi tamai ve?' hon
chih behlap kawm in, ka liang tung ah hong kingai suk hi. A sam kai
ngihngiahte ka huisak a, amel ka et leh a mittui ana vung kiukiau a,
singteh kawm a khavak zung hong lut in Chingboi mittuite hong salkha a, a
te selsel zozen hi. A miitui te nulhul sak in, kiptak in ka pom a,
taisan ngeilou di ka hihdan ka hilh nawn hi.
Tung solkhapi ka ensak a,' Van a tung solkhapi a taan laiteng taisan ngeilou di ka hihdan ka gen hi. Ka gen zomzel a, 'Nau
ka taksa pen na kiang ah om gige kei mahleh, ka laukha na kiang a om
gige a, ka lungtang tengteng luahdimtu nang na hi. Van a Aksi leh khapi
te' a om mun ua vak gige ahi ua, himahleh ni hong suah chiang in a
mangzel ua hiven, tua mah bang in ka itna le omden ahi a, kon itna thute
ka genlouh chiang a le hon it gige ka hi chih ana thei in aw?' ka chi a, Chingboi in le, ' Awle U, hon muang gige ka hi' hon chi hi.
Zan
lah sawt deuhdeuh. Kha lah vak deuhdeuh. Kou lah Kip deuhdeuh ka hih
chiang un, mawk a paikhiat a haksa mahmah mai. Chingboi in a khosak
haksatdan khawng uh hon gen a, aak bang a hing a neektawm zong ahihdan
uh hon hilh lam ka thei lai hi. Amel ka enzel a, ka hehpihna leh itna
alian deuhdeuh mai. Mibang a hausa hileng zaw, a nuta ua Pumvaak a
nuamtak a omsak bang ka ut mai hi.
Chingboi in a lungkham leh
kipahnate ka kiang ah hon tun khial ngeikei hi. A Nu'n lah hon deihsak
mahmah hi'n ka thei a, khatvei anu'n, '' Lai khawng nong siam
dia, kaam khawng hon nei lechin kou kon tangzou nawnkei d'uh. Neih leh
lam alah mi phalou, mibang a kamsiam le hilou ung ua'' hon chih a, ken ' Nu, ken neih leh lam a mi enlou ka hi...' ka chihlam ka thei lai hi.
BUNG - III
KUAMAH englou in kideihkhop tak a itna simthu lel na'n 'Super Full Moon' nitak chu zang ka hi peuhmah phot. Ka itpen kiang a om ka hihman in kuamah ka engkei top hi. Bill Gates in hon Call hen lan, 'Chingboi hon pia in la'n, 20 Billion kon pe di' hon chi lele tulai pau in, 'Hopeless' ana chihsan mai di'n ka kigingta hi. Dak 10:00 hong gin hial chiang in chu ngeina dan zui in Electric hong vaak samta hi.
Kholak
ah mi a tam lai mahmah mai a, naupang khenkhat ngial kongzing neu
chikchikte ah, la play kawm in a kizui kawi ngitngit uhi. Chingboi in, ' U, Innsung ah i lut diam?'
hon chi a, kenle Angels Vision Cable news en nuam ka hihman in ka
lutpihta hi. Innsung a i lut leh Tutna di a om kei, den a kong a ka
tutna pen uh ka zawnglut tat-tat nawn uhi. Huchih sung in Electric
nihvei hong mitman hilhial ve aw..!
A TV uh neusim kiuhkeuh, tulai a te' gendan leh 'Cute a Cute'
tungtawn in, Angels Vision Cable, Local News lunglut tak in kon
enkhawmta uhi. A Nu leng zan zunnawn di'n hong thou a, kong a ava pawt
leh Kha vak salua ahi diam, lamdang a sakdan khawng hon gen a, ken leng 'SUPER FULL MOON' ahihdan chiangtak in ka hilh pah a, 'TUALSUNG THUTHANG' teng hon etpih in, lupna lam ah hon lutsan nawn hi.
News enzou phet channel ka kheng kualkual leh Lengtong Pauno laphuah, 'Ngaih nang toh om leng, munkhempeuh nuam e, kei kiang pan paikhia nawn ken maw Ngaih aw' chih la hong paikha chet zomah a; Chingboi in hon en cheuh in, 'Na thei maw U?' hon chi mawk a, ka ki-entuah ua, ka nui heuhau uhi.
Taikhua
a vak leh vak hen, chih di lah hilou deuh ahihchiang in, pai vai kon
sawmta a, himahleh Ka duat in hon lenkip deuhdeuh a bang hi. Ka kikhelah
mahmah ua, himahleh ni hong suak nawn zel di hiven chi a kihehnem kawm
in khelah pipi in kong ding kheta hi.
Chingboi in le a Gate tan uh hong kha a, 'Kha vak khiatlah huai e maw u?' hon chi siausiau hi. Ken le a khut a len kawm in, ' kha vak sang in nang kon khelah zaw nau'
ka chi thuk a, Message in tong kisang zel ni chi kawm in Zaal mangpha,
huai nitak a di chauh in ka kikhak ua, inn lam ka zuan vengveng ta hi.
Khavak
toh Electric vaak toh, Lamka khopi sung chu huai nitak in London khopi
abang hial hi. Innlam zuan a ka Ngaihnou mel etlawm nate leh a tongdam
khum didi te ngaihtuah a ka pai laitak in, Ui in hon na bauh (nak) a, ka
lungsim in, 'Ka ngaihtuah thei lechin zaw hon BAUH lou di hi chin a maw, nang UI' ka chi a huai kia le deihkhoplou ka hi dia, ngaih lawlou in, 'Gu nailou ka hi' ka chih behlap leh Kei lam manoh a hong pai, Nungak leh Tangval Kop nihte'n a na za chiitchiat ua, hon nuihsan ekh-ekh ua, 'Kou ka guta uh, kou hon bauh ou' ana chi zomah uhi.
Hiai
Super Full Moon nitak (22-06-13) chiah chu pawt ka paihak nipen ahi di e
? Innsung ka lut leh ka U te nih leh Ka nau in Korea Film ana en lai
uhi. A Film nopdan leh melhoihdan khawng uh hon na hilh ua, kei lah
Korea Film himhim ka lung alut kei. Khe khawng ka silkhit in, ' Ei Korea Film a te sang a melhoih zaw enzou a hong kipai eivoi' chih toh ka Room lam a lut ka thuah a, ka Zaalkhun tung ah Sambang ka zaalta hi.
Ihmut pah di chimah leng, 'Facebook'
chi a miteng in a theih un hon kai tuntun hileh kilawm hial in om hi.
Kei leng, ka ngaihnou ngaihtuah heuhheuh kawm a Ka Online leh ka lawmte
khat in, 'Siamsinna leh Vakiangbu' kichi Group a hon na
Add ahihdan ka thei a, a Group lah chu luun mahmah mai, Tangthu leh
Thulou le sim di ana tam mahmah mai a, ka Lawmpa kiah Kipahthu ka gen
top hi.
Tangthu Saulou khat ka sim zual a, ka sim zoh in 'Like' option
Click cheuh a, adangte awl a sim di chi in ka limsiit bawl hi. Van ah
Aksi tam mahleh, a vaakpha deuh bang ana om bang in, Facebook Group tam
mahleh, hiai 'Siamsinna leh Vakiangbu' pen a vakpha lawi hi'n ka koih hi. 'Melsepawl' kichi Group bang ah, ka thuuklut mahmah a, ka hihna tak ahihman in, 'Administrator' bang in hon na domsang uhi. Kei a di'n bel 'The Zong lellel Groups' kichi a hih di a om nawn vak kei. A muang chidan chu ka hih peuhmah phot ziak in.
Huchia Facebook a Group tuamtuam ka vehkual nung in 'DOTCOM'
te lam ka tungkha a, Chiamnuih toh thutak toh thil ki post adim-ahaa in
ana om a, himahleh huai nitak paihaklua ka hihman in leh Zingchiang
College kai nawn di ka hihman in, ka mit vunte utlou pipi in ka ki 'Kiss' sakta mai ve..!
Zingkal Dk 3:00 am a Alarm ka set hong ging a, 'snooze' ka mek pah hi. Alarm a 'Snooze' option
bawlpa bang i kiang ah om leh Rs.10 bek piak di'n hoih ka sa khemkhem
hi. Ka mitte kong hak a, ka Daak vel leh Electric ana pailai zenzen hi.
Kei leng mang lakloh laitak a thou himahleng, ka mang a nop mahmah ziak
in ka nuisim heuhau a, Kisa zokzok in ka Zingkal nna sem ding in siik
sakol san vihveh (Cycle San) tawlkhia in, Office lam ka zuan pah
vengveng hi.
Cycle a hatdeuh a taisuk, Tedim Road Sehnel tung ah
kongtai bang zaw, i khuak kising dolhdolh zozen hi. Ka Ngaihnou mah ka
lungsim a hong lut ahihman in, lampi lai ah ka khawl zozen a, Message ah
'Ching, Xngpha hoyhtq w,na muh pht ciang in hn msg lechn' chi a tulai SMS gelhdan a gelh in ka send pah hi. Ka lungsim in, 'Ching, tukhawng in ihmu hithit mah lechin, ka lungtang a ihmu ngei mahmah lou na hi' ka chichi mai hi.
BUNG - IV
TUNGSUNNI
lenmual dawn ah hong suak nawnta a, Lamka Khopi nisa zung in hon khoh
singseng nawnta hi. Himahleh ka Ngaihnou apan Message bangmah ka mu kei
a, ka Phone hong vaak zek chiang bang in, ka enpah pop-pop a, himahleh
company apan ana hi daih zel hi. Dak 9:00 am bang hong hih hial tak in
ka om thei nawnkei. Ka Call leh a Ring chu apai-pai mai a, himahleh
kuaman a Pick-up kei...!
Lungnuamlou pi in College ka va
kai a, lailam himhim ka lungsim ah a om kha kei. Ka Itpen Chingboi kia
ka lungsim ah omden a, ka Lungtang Kumpinu leng ahi bok hi. Huchia
lungkham meltak a ka omlai in, a innkiangte uh Pasal khat, ka Classmate
te uh a omlam tak ka theikhia a, ka kan bawl leh ' Tuzingkal dak 2 lakvel a Gari khawng a innkong ua khawl abang, buai vengvung uh hileh kilawm ' chih teng in hon dawng a, ka lung noplouhna a kibehlap deuhdeuh ta hi.
College
kai dak 1:00 am in ka tawp ua, ngui tak in innlam ka zuan vengveng a,
inn ka tung in chu ngaihtuahna mumal le ka nei kei. Ka etna ngal ka en
gegum a, munkhat khawng ah ka ding kha dedu naak hi. Anu phone number
nei beek leng zaw call thei di hi'ng a, ka chi a lah neihlouhpi chu
hihtheih a omtuan kei, lungkhamna in chu hon pumtuam ahita mai ve..!
Nitaklam dak 4:30 pm khawng hong gin tak in chu, Ka lung bang aleng mahmah mai a, nitum dekkuan bang ka houpih kha thepthup hi.'Tungsunni lenkawl a na kiak lai ngei in, ka selungzuan zong kiakpih mai ve maw.?' ka chi vungvung sam hi.
Huai
nitaklam chiah zaw, ka ann duhtha le asuak kei, ann le ka nekei top hi.
Lungkham leh mangbang tak a ka omlai in, ka Sakhau apan,'Pengpelep' hong kichi khe kaukau nawn a, kinemtak a ka Phone lakhia a ka et leh 'Ka DuaT ChingboI' chi a ka save ana hi petmah hi. Kin deuh a Pick-up ngal a,'Hallo' ka chih leh ka ngaihnou aw ana hikei zomah hi. Hon call tu'n, '
Chingboi’ Nupi ka hi, tuzing dak 1:30 am vel a, gilna sa a hong
khawphawk lou mawk in chin, Imphal lam a ka puaksuk uh ahi. Himahleh
lungkham ken aw, Doctor te'n hong hoihpah di ahi hon chi ua, tua hong
khawphawk simsim ta ahi' hon chi hi.
Gen di a
vang khopmai. Bangtan hiam ka kihou nung un Denchiah ken kon Call thak
di ka chi a, ka koihta uhi. Super Full Moon nitak bang in Tungsol
khapi'n a vakna hon suah nawn a, Khapi ka en a '' Tung Solkhapi
aw, ka ngaih heina taanvak in lan, Ka It Chingboi kiang ah, lunglai a ka
sial va leel in, Na ngaih in Ka vaak taangnuai pan a, gal hon don gige
ahi'' hon va chihsak ve maw? Chih louh ngal gen di ka thei kei.!
Tungsolkha chu kei a di'n Ka lungzuan Khiitkhiatna hoihpen a suak ta mai,''Aw SOLKHA na lenna sang pan in ka SANNEM lenna Damdawi Inn taanvak in lan, ka lungzuan simthu vallel in o? Chikawm in ka itpen sakmel muh di'ng haibang ngak in, galsial bang dondon veng, simthu zatam ka lelnuam man in.
Ka itpen sakmel ka muh hun ciang in, ''NA DAM MAW?''
ci'n anglai ah ka pom dia, Ngaih toh sawn baan a kai in, nunnuam in
heita ning. Gibang kikhen nawnlou di'n. Ka ngaihnou omna Lamka Damdawi
Inn hi beek le zaw, ka Itpen kiang a va omden di hi'ng a,'Lungkhamna' kichi thumal kei a di mawng mah abang hial hi.
Laisim
di'n ka kisa khempeuh a lah ahithei tuankei, TV ka etdek chiang in lah
ka tu kinken theikei a, Innkong ah Pawt leng lah Khavak in Lungzuan
thelbang hon thousak maimai a bang zel hi. Ka ngaihnou damtak a hong
pawtna di'n thuumna a guuk in ka nei zel a, thuumna ka neih mun deuhdeuh
leh ka lung a muang deuhdeuh mawk hi.
Ka Itpen Chingboi
zaw si di'n ka koih theikei. A aw bek za nuam leng le tu leh tu a
Halhpah di'n ka gingta kei zel hi. Himahleh, om maimai theilou ka hihman
in, ka itpen number ka Dial a leh,'Hallo, U lungkham ken aw, zingchia hong pai di ka hi uh. Kei damta ka hi'
hon chi a, ka thuumna ziak a damna ngah ahi dia aw, ka chi hial
hi.Thuumna i neih chiang a, ginna taktak toh thuum di mah zaw ana hi ka
chi hi. Sawt simtak ka kihou nung un,'Ka tawllua U, hunsak phot ni. Zaalmangpha hoihtak ana man in aw' hon chi a, ken le a nuih cheuh na di'n,'Nang le Mangpha, Best Quality ta aw' chi'n phone ka koih ta hi.
Huai nitak chiah zaw, 'Facebook'
om lamlam le ka phawk kei. Ka ngaihnou kia om hileh kilawm in ka koih
hi. Bangbang hiam ngaihtuah ka kisaklai in, ka ihmu kha a, zingkal dak
3:00 am a ging in, ka Alarm hong ging nawn hi.Hiai hun chiah in zaw, 'Snooze'
option mek zat chihte a om nawn kei. Mek zat lou in, kei kindeuh in ka
thou zat a, kisa mengmeng in ka zing nasep sek sem di'n Office lam ka
zuan nawn leuleu hi.
Zingna a kimkhat, dak 6:00 am lakvel a zou in, inn a bench tung ah thallup iu-iau kawm in Local News te', Lamka Post leh Manipur Express
ka sim hi. Huai zingkal pen, Zingkal dang toh a kibang kei, meipite
hong kai in, Lamka khopi hon pumtuam hi. Himahleh hun sawtlou chik nung
in, meipi kawm ah, nisa dawklah pipi in hong dawk khe chiaichiai hi.
Meipi
te omdan ka etchiang in, ka itpen damlou ahi chih ka theih tuung toh ka
teh a, himahleh nisa meipi kawm a hong dawk liai-liai ka muh in, ka
itpen Chingboi dam ahi chih ka theih a ka omdan toh kibang ka na sa
thepthup hi. Hunte tuibang a luang liamzel ahihman in, ama nitak a ann
nelou zen a ka ngaihnou ngaihtuah ka hihman in ann tampi ka ne a,
College ka va kai hi.
BUNG - V
COLLEGE kong ka tun
in Dak a ging chet a, Gate bul a Security om pa'n gate ana khak dek chet
a, ka lawmpa le huaini ana manlah sam ahi dia, ka nih un Gate a kikhak
ma in,' Tom & Jerry' kidelh bangmai in ka tailut thoh uhi. Huai ni chiah zaw Gate khakman henlan, kilut thei kei leh le poi kisalou hi a...!
Class Room a ka lut dek ua leh ka Teacher pa un min ana lamta (Roll Call bawlta) a, 'May I Come in Sir?' ka chih leh Ka Roll No. a gen kha chet a, 'Present Sir' ka chih zui ngal leh ana omsa ka classmate te a nui zak uhi. Ka Sir pa un, 'Yes Come in'
hon chih tak in chu kindeuh in a last bench lam ka naih pah vengveng a,
himahleh vangtahhuai tak in Lastline ana dim a, First line lam ka tung
vekvok hi.
Ka Subject lak uh ahihleh Geography ahi a, huaini in 'Eskimo' chih topic pansan in ka Sir pa un Lecture hon bawl a, himahleh ka lungsim a, 'Eskimo' sang in 'Chingboi'
a om zaw a, Eskimo kichi thumal hon gen chiang bang in, Chingboi chidan
ngen a za mah ka bang hial hi. Ka taksa Class Room sung ah om mahleh ka
lungsim Chingboi kiang ah a omden hi.
Sana bang ka en-en
a, Pai hun di bang ka hisap-sap mai ta hi. Hun i chih a naak omlou
ahihman in, pai hun chu hong tung khongkhong ta a, kindeuh a Innlam zuan
pah vengveng in, Ka phone Lupna tung a Charging sa a zingkal a ka
nawtsiat la pah a ka et leh ' 2 New Message ' chih ana
kigelh a, Message ka Open leh Ka duat Chingboi apan leh Ka lawmpa
Sanglun, Coimbatore (Tamil Nadu) apan ahi a, bangthu-bangla a dia aw chi
kawm in Ka lawmpa hon Message ka et leh 'Tulai Chingboi toh Na fuh zel uh hia?' hon chi hi. Reply di lam le ka phawk kei a, Chingboi Message mitsi kawm zozen in ka open hi.
Chingboi in, ' U Kou hong tungta, kisuanlah huai sim mah leh Nitak chiah hong pawt ve maw?' chih teng hon na khak hi. Ken le Reply zui pah in,' Kisuanlah na di omlou ahi Nau, nikhat kong muhlouh chiang a le kum kivel bang hial eive.Nitak hong pawt ka sawm sa ahi' ka chi hi. Nitak ka ngaklah khopmai. Ka itpen Sakmel ka muh hun chiang in,' Na dam maw?' chi a anglai pom di ka hihdan khawng Tungsolkhapi ka na hilh lawksa ahi zomah hi.
Ann
Nezou phet kisa mengmeng in ka ngaihnou lenna saulim lam ka zuan pah
vengveng ta hi. A Innkong uh ka tun in, nupi khat in Chingboi kiang a, 'Love Sick neive maw Ching?' chi a achiamnuih leh ' Love Sick lou ing a, Kho-Sick ka hi' chi
a dawng ka za chiitchiat a, dawng awm ka sa mahmah hi. Chingboi
chiamnuih dawlthei tak ahihman in, miteng in chiamnuih pahpah sek uhi.
Midang hile uh, Gilna sa a khophawklou a om, 'Love Sick' va chi le uh Chiamnuih hi lele, hehmawk di un ka gingta hi. Chingboi ka it leh duat ahihziak a ka phatna le ahi tuankei.!!.
Kong
Ka kiuh dek leh Kong hong kihong chet a, Nupi nih (Chingboi Ni toh a
Nuneu) leh Papi khat (A Gang) hong pawt chet uhi. Chingboi ni kiang ah, ' Ni, ei hong kipawt pan a, na pai dek ua !' ka chih leh ' Teh masa Pulh masa eivoi'
hon chi a, hon dawng nalh ka sa lua a, ka nui khekha zozen hi. Innsung
ka lut leh Chingboi Nupi le ana om a, Chingboi leh anu leng ana om ua,
Tutna sau khat ah ka tukhawm depdap uhi.
Chingboi bang ka chibai kha thepthup a, 'Imphal lam toh kingeih na hi di e, nong hoihtuan a bang' chi a ka chiamnuih leh ' Ka Damlouh Lai a Thuumna non neihsakte leh nang hon ngeih ka hi zaw diam maw'
hon chi chiitchiat hi. Gen di ka thei kei top a, Ginna taktak toh thuum
zel di ahihdan ka hilh behlap hi. A diktak a gen in Ginna ziak a
mihingte hing-hing ana kihi dan ahi.
Khapi le nidang sang
in hong suak hakzaw deuh a, himahleh a vakna beisak hituanlou hi.
Chingboi nu ka et leh amel et in hon houpih nuamsim a bang hi. Huchia ka
om laitak un, Electric hong pai mawk a, mak sasim in Candle bang ka
sumit kei zozen uhi. Sawt hong vakluat tak in, a taktak uh hi'n te chi
kawm in Candle ka mutmit ta ua, akhu le veng manlou in Electric in a
ngeina dan zui in leh Dumde bangmai in Vakzel in Mitzel hi.
Chingboi
Nupi'n Chingboi kiang ah, Tu'n chu dam vengveng ta nite, a chih kawm in
keilam hon en a, amittung multe hon tangsak lauh hi. Chingboi' Nupii
gintak sang in a nungaklai mahmah, a ziak ahihleh a pasal in Louna
bangmah semsak lou a, pum a a pumvak khat ahihziak ahi. Tulel in
National Game Village, Imphal ah omlel uhi. Chingboi' nupii mi hounuam
tak ahi a, ta leng Numei leh Pasal khat tuak neisa ahi hi. Ka lungsim
in, a Nungaklai a amelhoih didan khawng ka na hisap khemkhem hi. Ka
ngaihnou kiang a om ka hihman in, lungkhamna di ka thei kei. Ka
lungkimna pen ka It Chingboi ana hi maimah hi.
A Nupi toh Ka
houlim zel ua, ka kimuh masakna uh ahihman in, dot ut ahau khopmai. Ka
School kaina bang, Ka Veng min bang, banah ka Pa min tanpha hon dong hi.
Ki-awi deuh leh 'Medical Check' le hon bawl hial leh kilawm hi. TV khawng enkawm in, Dotnop tuamtuam kong kidong tuah uhi.
A Tawp in chu,''Na Hinkhua (Past and Present life) leh na Innkuan khosakna uh non hilh thei diam?'
Chi a, Awneem tak zak zaw a nuam khopmai, bilkha ah aging ging mai hi.
Chingboi inle a nupi suun a ka lungsim teng hon zou pahpah ahi dia aw ka
chi gusim hi. Ken le, ' Nupi, ka Hinkhua leh Ka khosakna uh na thei nuam a, ka kipak lua a,chiang tak in kon hilh di aw' ka chi hi.
BUNG - VI
CHINGBOI inle TV Remote zang a Channel kheng kawm in, 'U,
i nupi'n hon sawl hial leh chu nial haksa nasa maw? Ken kon sawl ciah
lah paulap di na thei lua a, na kigen khiakhia a, tunitak chu na genlouh
theihlouh ahi' chi kawm a, Channel number '3' a mek leh Robert Minthang in asak '.....Gen in gen in, tuzan in gen in ngaih..........tu'n hon lel aw ngaih, na kiang ah ka om hi....' chih la hong paichet zomah a, Chingboi in hon enphei gaih a, hon haliit khum seih hi.
Phutluih zaw ahi kei, himahleh I itpente Sawlna chu nialvual ahi nawnkei, ka gawl bang 'Ehem...ehem...'
chi a khuah phalhphalh masa zozen in Hon sawl uh gen di'n kong
kithawita hi.Chingboi leh anu banah a nupi'n mit phelou zen a hon en hi
un ka thei hi.
Gensiam thu a gen di hileh zaw ka thil gen di pen 'Mission Impossible
' chih theih di khop a gensiam kingap huailou ahi. Himahleh, i hinkhua a
i na tuah, i na zak leh i phutkhak banah i tuah lel-lel te gen dia kisa
a kihihman in, ka gen teng chu dikvek mai di'n ka koih a, hon soisel a
kiphinna tuamtuam nei a, Police Station buden bangmai a Inn hong buden
om hial dia ka koihlouh man in, thugen kon panta hi.
Ngaih lawlou, lah ka vek ua ka zak chiang di un, ''
Innkuan khosakna lam gen masa zual le, ka Pi leh Ka Pute' genkhak louh a
maih theihvual ahi kei uh. A ziak ahihleh Ka pi leh pu omkei mawk leh
ka pa ana piangkei ding a, kei leng ka piang kei dia, kou Innkuan kichi a
omkei ding uhi. Gen tavet genchiang fokfok mai le, ka PI leh Pu'n ta
Pasal Nih leh Numei Nih anei uhi .A Tate lak ua a lianpe'n ka pa ahi a,
azom ka paneu ahi. Aban a tegel numei tuak chihna ahi mai hi.
Vangtahhuai i chi zaw diam a, Ka pa Kum 11 lek a naupang ahih in ka Pu'n
(a Pa'n) ka pi (a nu) zidang ana neihsan hi.
Ka
Pa-te' unau tagah ahi mai uhi. Ka Pu zinawn ahihleh ka khawte mah uh
ahi a, a kitaipih ua Assam gam lam ah khua va saat in, Hausa in a va
pang thepthup uhi. Ka Pa, School kai nuamlua ahihman in, a naute pawkawm
khawng in va kai zel hi. Ka Pi lah loukuan louh theihlouh ahihman in,
ka pa a di'n chu a mohpuakna a lian khopmai.
Ka
Pu'n Zidang a neihlai in ka Pi'n ka ni (ka pate unau a numei a neupen
ahi) a paai laitak ahi. Ka pa a di'n C-Kul kai chihte manglam ale
matphak di ahi nawn kei. Ka pi Louna sep seppih ngai ahihman in, a
neuchik apan Louna ana sem hi.
Vangsia-Vangpha
chih theih di khop in, ka pu te (Ka pi sanggam pasalte) a siam mahmah
mai ua, Annkhing-tuibuk leh taksap nengneng te in hon huhzel uhi.
Huaiziak le ahi dia, ka pate unau pute inn a khangkhia ana hi taktak ua,
tuni tan in ka pute a ngaina den uhi. Ka pa Tangval nou hunphet ahih
in, Sepaih ana lutsawm ngei hi. Himahleh, ka pi'n a phalkei, aziak
ahihleh ka pi'n, ka pa sepaih pang leh hong sipah kha dia, huaikia leng
hilou in neek leh taak zong di omnawn kei leh bang ne a bang dawnta di
chih a lungkhampih penpen te lak a khat ahihziak ahi leuleu hi.
Genthei
leh liangvaite khotuah a hun gige Pathian in ka pate unau a taisan kei.
Pa neiloute pa ahi a, nu neiloute nu leng ahi bok hi. Sian huaina in ka
Pate' unau hong khanglian vek ua, ka Pi leh Ka pa'n neek leh taak banah
sum zong in anaute Cl-X zoulou a om kei uhi.
A
vangphathuai leh vualzawlna a donna sawnsawn uh ahihleh, ka paneu in
kaam khat hon gelhching zenzen hi. Hunte hong pai zel in, ka paneu in
leng 1997 kum in zi a neita a, tulel in a tate Pasal thum toh Khosa
lellel uhi. (Chingboi nu'n,'a chih leh nou la unau bangzah?' hon na chi gaih a).
Kou ahihleh Pathian vualzawlna in unau 7 ka pha ua, Numei 5 leh Pasal 2
ka hi uhi. Numei 4 in pasal anei zou ua, tu'n numei a a neupen leh Ka U
pasal khat toh kei banah, ka nu leh pa ka om lellel uh'', ka chi hi.
Chingboi nupi'n, ' Na pate'n bang na sem? Banah, Lamka a na omna uh, nou inn hia? Ahihkei leh na luah thoh un?' hon chi a. Ken le dawng pah in,
' ka nu leh pa ahihleh Zoudawn lam a Ka khua uh, Lousau khopi NGAWNBUNG
(Old name of Mualnuam) ah Mualmet High School ah a Sem ngiitnget ua, a
chang in anntang leh meh di khawng hon khak thei zel ua, kizen mahmah
chih di ahi. Tulel a ka omna uh ahihleh, kou inn ahi a, Kei toh ka nau
C-kul kai a om ka hi uh'' ka chi hi.
Chingboi in,
' A chih leh U, na nu leh Pa Zoudawn a Lou nasem, eh! nang chihdan leh
Mualmet C-kul a sem na chi a, bangchi dan a Inn bang neizou uh e, MLA
hoih neih sim uh maw?' hon chi hi. Hiai dotna dawng nuam kisa selua in ka chil bang ka thalh kha zozen hi. Hehehe. . . chi kawm in,'
MLA Zaw kinei sam mah, hilele Gam leh Nam puah dia i telching
ahihchiang un, bang chi'n mimal inn a puahsak di ua, a puahsak pawlpawl
uh le om hia le (?). I gensa mah bang in, Ka pa'n a naute C-kul kaina di
a khualziak a amah kitawp a, a naute chawmtu in ana pang a, a naupa (Ka
paneu ka chih pen) in Kaam hon muh tak in, Innmun alei ua, hun hong pai
zel in ka paneu in tua ka tenna uh a Upa (ka pa leh kou) a dia hon
hihsak theih omsun ahi' ka chi hi.
Ka
pa'n a neulai khawng uh hon gen a, anaute laizilna di sum a
ngaihtuahdan (suktuah dan) khawng hon gen SEK hi. Nitak khat, Mualnuam a
ka inn ua taptung ah, ka pa'n a File kawm a laithem tuamtuam te hon
ensak hi. Lai lui mahmah, sansim gimgem ka et leh 'SUM BATLAAK ZAH LEH NI' chih kigelh ka mu hi.
BUNG - VII
Laithem
khat san gimgem sim zozen,' SUM BATLAAK ZAH LEH NI' chih kigelhna ka
khut a tawi in a nuai a kigelhte ka simsuk a, ka Pa leng ka kiang ah om
hi. Huai nitak bel, Phalbi kipan kuan ahihman in miteng in meilum kingai
ahi ngei dia, taptung ah mei awi in ka ki-umkual pelpal uhi. Gensau
deuh lai le, Thuk tung ah, Ketli lianlou, vom biibiai in tui kisuang hi.
Ka laithem tawi ah,
ka Paneu in Manipur University nuai a BA leh MA a zillai a, ka Pa'n sum
tam loulou a, Ka Pu (Ka pa Nu Sanggampa, ka pa adia le aPu mah ahi.)
kiang a alakte a chiamtehna ahi chih ka thei hi. A taklam vual ah sum
alak zah kigelh a, a veilam ah ahihleh a Laak ni leh kum khawng kigelh
lemluam hi. Tawm chikchik a alak himahleh a guk a ka na gawmsak dan in,
Rs.15000 vel apha keikoi hi. Kum 1980's laikhawng adia i hisap leh tulai
a Lakh khat leh a kim (1.5 Lakhs) toh a value toh kikim thei phial ding
hi.
Hiai teng ka gen zoh in, Chingboi nupi'n,' Napute'n hon na khotuah zou na uh e maw ! Sum huaizah hon zangsak hi ua? Na dinzou thamta d'uh maw?' hon na chi hi. Ken le,'
Ka pute ziak a Ka pa-te' unau hiaitan ana tung uh ahi. Sum huaizah hon
zangsak ahihman un, huai ditna dan le hituanlou in, Innmun Plot khat leh
akim ka hawm uhi. Pathian in zaw, mi zawng leh gentheite maban di
ngaihtuah sak a, maban mong tak a koihlou hi ve aw maw?' ka chih leh hi a sa thei mahmah ua, Chingboi ngial in a lu a na su ngaungau hi.
Kou
Innkuan in ka phak tawp uh chu hiaitan ahi phot mai..! A guuk in bang a
sanapi a taak uh ka en gaugau zel a, Dak 8:00 pm bang hong ging tak in,
Chingboi nu kiah,' Nu ka na paiphot di aw, nasep di ka nei a' ka chih leh 'Zan zan a nasep di chih, bang nna eita na sep zel. Huai semlou a ngawl di le hizenlou khawng' hon chi hi.
Bangmah genlou a ka daih dide leh Chingboi nupi'n, Dak bangzah a nasep panzel e, sawt semzel uh maw?' hon chi a, ' Dak 9-10 kikal a pan in, a khenchiang a Zinglam dak 4:00 tan khawng ahi ka sep uh' chih teng in ka dawng lel hi. Chingboi Nupi'n,'Dak 10:00 pm khawng a nasep pan na hih ua leh, tua dak 8:00 ging dekpan hiven, na Past leh Present Life khawng hon hilh lai ve'
hon chi hi. Kiphatna louh di'n genzual le, a tanu uh Chingboi adia hon
khahsuahlouh teitei a sawm ban uah, ka mihinzia teng hon theihkhiat sawm
uh chu ahi peuhmah hi.
Past Life gen di ka hau vak kei. Himahleh 20th Century bang a ana kipiangkha ahih chiang in chi lungsim kawm in, '
Kum 20 val (7th April,1992 apan sim in) bang leitung gim gentheihnate
ana kipalsam hi a, Kum bangzah hiam sung Dakkal 1 leh 2 sung a genzoh i
sawm himhim kei dua leh' ka chih leh, Chingboi in a chil bang ana valh hileh kilawm hial in ka mu hi.
Gen zel aw leh chi kawm in, thugen ka pan ngal a,''
Kum 1992, April ni 7 ni'n leitung khovak ka na muta hi. Ka pian hun in,
Mangtom di adim-ahaa a louhal na nung a om himahleh, ka nu'n Louma sang
a kei ma di hon awlmoh zaw in, inn ah hon ompih den hi (Ka nu kia ka
dot ahi). Mangvom lai a piang ka hih ziak a vom ka hi diam a, ' ka chih leh Chingboi in,'
Mivomte i ngaihkhak leh ekteh zen a kingai ahi, Sapte'n Black is beauty
a chi ua, mi khenkhat in, but people Choose white chimah leh uh ken
bel, but i choose u ka chidaih' hon chi a, a nuisim heuhau hi. Ken le chiamnuih suk ekh in,' Kei nawn ngaih ziak in na ek na teh khata hia leh Ching?' ka chih leh,' Teh mah kei dia,.........ka neu lai in' hon chi daih a, ka nui nainai uhi.
Bangtan hiam ka nuih zoh un, 'Zoudawn
a piang ka hih mah bang in, Lamka khopi muh chih khawng ei adia thupi
law mahmah, a thupi dan gentawp theih di le hilou phial hi. Lamka a Inn
omte khawng hoihdan, tua Chingboi hoih ka sakdan toh kibang phial di dan
ahi' ka chi sese hi. Ka gen zomzel a, 'Khosakna
haksatak ka hihdan uh theihsa ahihman in, C-kul kaina lam ah leng Fee
toh kisai in haksatna ka tuak zeuhzeuh uhi. Ka khua ua Class-VIII tan
kia ziltheih ahihman in, a ziltheihna tantan zil in, Kumtawp exam hun
in, Lamka a Om Lamka College ah kong exam uhi' Ka chi nawn hi.
Exam
te zou in, Result lah Ngak, Christmas hunte lah ngak in nuamsatak in
Lamka Vangkhua ah ka om hi. Exam a ka omna ahihleh New Lamka mah a Om ka
Pute in ahi chihte chiangtak in ka hilh nawn hi. Dotna bangmah hon na
bawl kei ua, ken leng thoveng tak in ka gen zel hi. Class-VIII
passed ka hih man in, Lamka a Sutzop di chih ahi nawn a, ka Omna ahihleh
ka pute inn mah ahi. Class -IX ahihleh Ebenezer Academy School ah ka
kai a, Class X leng huaimun mah apan zoukhia ka hi.
Ka
hamphatna mahmah leh Pathian in banghiam dia hon deih ahihdan ka chiang
na ahihleh, Class - X ka sim dek kum in Ka khaw lam uah January kha in
ka om a, Louvat a ka giahna lam uah, Malaria Pf kichite ka va kaikhata
hi. Hiai natna pen Ka khuak a alutma in Doctor te'n ka natna mankhia in,
Damdoi hoih penpen te hon gelhsak zoh un Damdawi Inn ah ka lut ua,
hoihtak in Nurse te toh pangkhawm in ka ki-enkolta hi.
Huchibang
khawng a hinkhua zangtou in, ka School Fee tawmchik hilai ahihman in,
ka Nu leh Pa'n anteh neng a zuakman khawng uh hon khak zel uhi. Sian
huaina toh Class XII khawng kon zou a, College dangdang a va tuan sang
in, chi a Class-XII ka zohkhiatna Rayburn College mah ah B.A Sunzom ka
hihdan khawng ka gen hi.
BUNG - VIII
COLLEGE kaina lam khawng kon genkhak tak in, Chingboi in le, anu kiang ah, ' Nu, mibang a laizil ka ut-ut maizen toh, siamthei lua hikei leng le, ka pa'n hon na omlouhsan baihlua a eive maw nu?' a chi ngutngut sam hi. Class-XI a ka ki Class lai khawng uh mitkha ah 'Projector' bangmai in hong kikapkhe zungzung maita hi.
Chingboi
in a nu kiang a khasiatna kahtam khong hon loh hial chiang in, ke'n le
ka haksatna tuahte iim vual ka hi nawn kei. Chingboi lam ngaphei in, '
Ching, lungkham ken kei nang a dia hing ka hi. Himahleh nang a dia ka
hing kawmkawm in, ka nu leh pa adia le hing ka hi chih non theihpih a,
phawkpih det ka kilamen hi.' ka chi hi.
Nu leh
pa Chih khawng kon genkhak sawnsawn leh, khatvei ka nu'n handwriting,
Doctor te a dandan a gelh a lai hon khak ka phawk thepthup hi. Ka nu
handwriting a hoihlouh dan ka gen nopna a, Doctor te a dandan chi sese
ka hi. Himahleh, ka nu ka simmohna ahi kei, ka phatna ahi zaw hi. Ka nu
aneu apan anu leh pa nung ana zui a, C-Kul kichi ana kai kha kei hi.
Himahleh laigelhdan leh simdante awl-awl a a kiziltawm a asiam ahi. Ka
nu bang a nu hoih khovel ah om nawnlou dia, ama angsung kaan a lum kei a
di'n om nawnlou ding hi.
Ka nu'n lai hon khakna a, hon gente a vek in i gen kei ding, himahleh a poimoh diak teng hon gen leng ka chi hi. Ka nu'n ,
' Bawi, Pathian venna a dam a na om uh ka gingta a, hiai lai kon khak
hi. Ka thuak khop in natna thuakthuak mah leng, puukse zenlou a na
semsem peih sam ka hi. Na pa leh na U (Ka U pasal pen ahi a gen) le
tulaitak holhal kawm in, Loulam ah a giak lut ua, ke'n inn a Vok ann
huanna sing di khawng pua in, i gan neih sunsun te uh ka enkol hi. Bawi,
lai hoih taktak in non sim di aw.... Kou bangbang a leilak khuat a nisa
nuai a thousi-thouvai lak a nekzong dia hon phallou ka hi. Kou thuak
bangbang thuak dia hon phallou ka hi aw......Thuumna ah kiphawk chiat
ni' Chi in a thugelh zou hi.
Ka Nu hon laikhak,
Laisim dia ka kipat ma teng in ka simsek a, tha hon guan mahmah hi'n ka
thei hi. Ka nu leh pa hon khualnate ngaihtuah in, mittui a dai mun
mahmah sek hi. Keikia in ka Laisimna dohkan tung ngai in ka kunsuk a,
'Nu-Pa lungkham kei un aw, ken na gentheihna uapan hon hunkhe di ka hi.
Haksatna apan Nopna leh tawldamna a honpi tung ngei di'n Tongchiam ka
bawl a, ka tong CHIAM PELLOU ding in ka kihihhat hi. Huai kawmkawm in,
Pathian kiang ah ka CHIAM PELLOU a ka mualsuah theihna di'n panpihna ka
ngen hi.
A diktak in gen le, Zoudawn lam ah khamkhop di
neek a piang kei, himahleh ka nute'n antang khawng hon lehkhak uhi.
School leh College lam toh kisai a sum sennate bel ka nu leh pa Sumbawm hawmpi ka sawk nuamkei a, kei leh kei ka kitoudelh hi. Huai chiah ahi, den a 'Nitak dak 10 apan zinglam dak 4 tan nasem ka chih.
Huchibang a panglou hileng kei a di'n laizil zoh na di vual ahi kei.
School leh College thunei (a tangpi a Private Institution te) te'n lah
Business bawlna dia zang..! Fee tuamtuam lah tam, a zawngte a di'n
kaizoh vuallou hi. A zawngte a di diak a i koih uh, Government School
lah Bawng-ek bang mai. Kaam zonna a lah Siamna sang a Sum in thu neizaw
mawk ahih cia...!!
Ka nu leh pa kiang a ka CHIAM, PELLOU a
ka suk buchin theihna dia kalbi masa chu, Sum leh pai ei leh ei
kilohsuah a, huai tungtawn a siamsin di chih ahimai hi. Khatvei ka nu
leh pa kiang a, 'Mizawng Innkuan ah ka na piang a, kei moh le
ahi kei a, nou moh le hilou ahi. Himahleh Nu-Pa, na sih chiang ua,
Mizawng mah a na sih ua leh zaw, kei mohna ahi ding a, kei le mizawng
bang a ka sih leh kei moh mah hithou di ahi.' ka chih lam ka mumang theih chiai-chiai a, huai inle thathak hon pia hi'n ka thei hi.
Chingboi
te nuta in ka thugen teng ana ngaikhia a, ana za uh ahihman in, amel
lat uh bang hong tuam zot abang hial hi. Chingboi nu kiang ah, 'Nu, ka pianna Nu leh Pa kiang a ka CHIAM PELLOU di ka hih mahbang in, Chingboi kiang ah Sihtanpha a ginom di ka hihdan ka CHIAM tele PELLOU di ka hi' ka chi hi. A mai ah kipahna mittui hong luang hial hi. Chingboi nu'n a mit langnih a mittui luangsuk zungzung te nulkawm in, 'Ka
tanu, mibang a hoih le hilou, neih leh lam a le kuamah phalou na deih
ziak in ka kipaklua a, ka biang a kipahna mittui luang ahi' hon chi hi.
Gen
beh di tuan ka thei nawnkei, Chingboi lah ka kiang a tu in, ka khut
kiptak in hon len a, ken le kiptak in ka len thuk ta hi. Huchia ka omlai
tak un, ka Phone hong ging a, ka et leh ka sepna a ka seppihte ta ana
hi zomah hi. Ka Pick-up phetphet in, 'Hong kuanta ve, tuni panbaih in zoubaih deuh le chi ka hi uh. Ihmutna di hun tawmlua a, '
hon chi hi. Ken le baang a Sana pi ka et leh Dak 9:00 ana gingchet a,
Chingboi nu kiang ah, ka sepna a ka kuan ngaita ahihdan ka theisak hi.
Chingboi nupi bel lungkim meltak in ka gei uah a tu a, zing meh di belawi a malkawm hi. Hichi'n hon chi hi, 'Makpa
hoihtak kinei di, makpa sungkhum hithei zomah leh kilawm, lungkhamna di
om nawnkei, huaiziak in meh khawng ka na mal maimai di' chi in belawi teh mal zauzau hi.
Ka
nasepna lam a kuansuak ngal di ka hihdan ka hilh a, dingkhiat toh ka
thuah hi. Chingboi in leng a gate uh kalh di kawm in hon zui a, gate bul
ah ngainatak in amuk ah ka 'Kiss' chenchen hi.
Note:
Hiai tangthu ahihleh, ka First Love nu’n Pasal honneisan a, amah ka
ngaihnatna beituanlou ahihziak a kagelh ahi. Aman ka tongchiam uh a pel
hang in ken ka pel kei a, ka nu-le-pa kiang a kachiam le pel nailou kahi
hi.
--Beita--
0910 - KAKIPAK - 2013
©Siamsinna leh Vakiangbu
Comments
Post a Comment