KHAPI' THUHILHNA: ITNA DIK A VUALZOU NAAK

By ~ Vz Vualnam

Zanitak in ka hon ngaihluat man in
Ka lung aleng a, ka om maimai theikei hi.
Houlimpih ding mi ka deih a,
Ka lungtang in ahoulimpih ut nang lah
Houlimpih phaak na hi himhimkei.
I, ka kiang a na omlouhziak ahikei.
Gamlapi a na omziak leng ahi samkei.
Lungsim in kinai a utleh,
Taksa a kigamlaatna in adaal zoukei a,
Lungsim in kigamlaat a utleh,
Taksa a kinaina in apanpihkei hi.
Thil teng lah lungput ah kinga ngal a.
Khapi ka en nilouh a, avaak kilawm in ahon tuum hi.
Kei leng keikia ka hi a, khapi leng amah kia ahi a,
Ama’n leng houlimpih ding lawm alunggulh ding e!
Huchi in ka houpihta hi- Nang tungtang ngei.
Na min ka hilh a, ‘Na theingei hiam?’ chi’n ka dong hi.
‘Apian nitak in akahging in ahon phawng a,
Huchi bang aw ka zaak ngeilouhziak in ka thou a,
A tohlet uapan ka en a, nu’ ang a kisial ka mu hi.
Naungeek deihthohhuai tak ahi.
Zan a lupna a asial chiang un,
A tohlet uah ka luut a, ka va don zel hi.
A hong khang a, ka vaak nuai a kimawl chiang in,
Ka enchim theikei hi. Naupang deihthohhuai tak ahi.
Tu in zaw anungakta, Nungak deihthohhuai tak ahi.’
‘Amah eive ka lungtang in a it,’ ka chi a,
Ka hon itdan khapi ka hilhta hi.
‘Himahleh aman ahon it samkei,
Kumteng in ka itna thu ka hilh a,
Kumteng in ahon nial lailai hi.
Ke’n lah itpen leh deihpen ka chi a,
Suun in ka hong a, zaan in ka lunggulh hi.
Himahleh amah ading in lah
Muhtheihlouh huih bang lel ka hi a,
Limsak taaklouh nahpateh huihmut ging bang leltak ka hi.
Kei’ ma in a it a, kei nung in a it a,
Himahleh kei a hon itkei.
Mel leh puam a ka chitlouhdan ka haihkei,
Mihinzia a ka chihlouhdan ka haihkei.
Neih leh lam a ka chitlouhdan ka haihkei.
Himahleh ka na itkha a, ka itlou theitakei hi.
Itna ah lah zumna a omkei a,
Haina leng a omkei a, dawilokna leng a om samkei.
Khapi aw, nang leitung’ kisiamlai mutu in,
Mihing huaizahte ana dontu in,
Hon hilh dih ve, hon hehneem dih ve.
Bang ding a vaante’n hichi bang a hih uh ahia?
Mikhat lungtang a itna koih ngal in,
Khat lungtang ah itna akoih ngalkei ua?”
“Khovel’ pianlai ka mu a, ka inntual a piang ahi.
Khovel kisiam apan sung a piangteng leng ka mu.
Itna ziak a lungngaite, itna ziak a nunnuamte,
Ka vaaknuai a lungzuangtak a vaakvaite,
A hon en ua, a lunggulh uh ahon huau uhi.
Himahleh hiai thuguuk hilh in ka omkei-
Banghang a itna chih kopkim a bawl hilou uh ahia.
Himahleh hiai ka thei hi- Itna dik tuh a vualzou naak.
Itna tak a na it leh na itna avualzou khong ding.
Liingke’n. Pautau ke’n. Dingkip inla, ngakzou in.
Himahleh sawtpi na ngak nung a,
Na it midang in ama a a abawl a,
A damsung ading a alaakleh,
Ka itna a vuallel chi maimah ke’n.
Huaitak tuh na itna’ vualzohna ahi.
Atawppha in hangsantak in na it ngal a!”
Khapi hon vaikhah bang in, aw ka it,
Atawp dong in ka hon it ding a,
Ka hon itna ka vualzohpih ding.
Himahleh atawpna a na itna ka ngahlouh a,
Kum tampi ka ngak nung a na ang ka ngahkei lehleng,
Ka hon itna a vualzou, ka chi veve ding.
Atawppha a hangsantak a ka hon itziak in!
Itna dik in ka hon it chih ka chetziak in!
Ka hon itna haankhuuk tan ka pawlai ding hi.
Nang n’on itziak in ka hon it lah ahikei a,
Ka hon itziak in ka hon it ahizaw ngal a!
 
©Siamsinna leh Vakiangbu