KA VA DONG DING

By~Vz Vualnam

A lu a kelsam pou pa’ kiang ah ka hoh ding a,
Huai tanvei a khete’n apuak nung un,
Tu in atutna ah bang lungkimna anei a,
Tu in alupna mun ah bang kisiikna anei a,
Ka va dong ding.Kei leng nikhat ni chiang in,
Ka khete’n ahon pozou nawntakei ding ua,
Ka tutmun a kisiik a ka omlouh na’ng in.
Tu in ka tuailai a, ka tha ahaat a,
Ka tuailai’ lungsim in hoih leh dik hi a atheihte ka zui a,
Ka tuailai’ lungsim in adeihte ka kaikhawm a,
Adeihte ka zongkhia a, muhtheih leh muhtheihlouhte,
Ka batphaak peuhmah ka kaikhawm zel hi.
Ka deih thilte’n ahon gamlaat lai un leng,
Lungkelou leh tawlngalou in ka delh a,
Tawl himhim khawk salou in ka zong hi.
Haina leh zahlaakna ka khualkei a, ka deih tuh ka naih gulgul hi.
Thuum nguutnguut poi ka sakei a, khuukdin ka thasial samkei.
Ka deih ngahna ding in thasial himhim ka neikei hi.
Huan nite ahong kikheek a, teek hun in ahon phaak a,
Hiai khovel hinkhua a tawlpih taak leh taaklou
Ka hon theihkhen hun chiang in,
Ka haatlai a ka tawlpih tengtengte’n
Khamuanna leh lungkimna ahon guan ding uam?
‘Ka tha leh zung ka na sengthawnkei na,’ ka chi diam?
Ahihkaleh hinkho tawpkuan a,
Khamuang tak a tawldam hiithiat hun a,
Khamuanna hon suh a tawlna hon guantu
A hong hizaw maimah ding uam?
Tha leh zung tamtak seng a haksapi a ka ngah,
Ka pahtak leh deihthoh mahmah thilte,
Kisiik a awm hon tumsaktu ahi maimah ding uam?
Tuailai hun a lungkimna tampite’ sang in lah,
Sihkuan hun tomchik sung a lungkimna amanphazaw ngal a!
Hinkhua ah bang i zong dia, bang i delh dia?
A lu a kelsam poupa’ kiang ah ka va hoh ding a,
Tu a atutna ah bang lungkimna anei a,
Tu a alupna ah bang kisiikna anei a,Ka va dong ding hi.

©Siamsinna leh Vakiangbu