SUNGKIM IN I HEI NAWN DING

By ~ Hoih Tonsing

Ka simlei nunna ka geel chia’n
Lailung kim maw’ng, selung muang la’ng.
Suangua bang tuailai a tuun aw,
Kulsin daidam na tang mai zaw
Khamkha’n ka veiloh ding bang e.
Sul ah k’on zuita ding bang e.

Hawm a ka taan ka tuun dit aw
Khau bang chiah di’n hon phal la’ng e.
Na nuachiang ham bang vai na vonte’n
Luankhi toh mal bang hon kou ung.
Sulkiik hong heilou ding na hiam?
Haam bang hong huai lailou ding maw?

Sungkim a nunnoplai nite
Sinlai ah vai bang tham ding a
Sunchin-zanchin sial bang suak dia
Ngai in mal bang kou le’ng lah
Sul ah hong hei nawnlou ding a
Simlei gam bang dai denta ding.

Zuapa’n zanchin mal bang hon kou.
Khattang hehneem ding bei zua liang
Vonte’n maimit suanngam lah ung.
Zua’n luankhi nul maimit heemkhiak
Gu bang zen e lai ah na sa’ng
Lawkta bang taupih ngawn ung e.

Tuun nunneem aw kha na pham ni’n
Kou di’n simlei khim in zing e.
Tuun aw lengvan na manoh ni’n
Kou di’n simlei ngui khinzou e.
Machiang khankhua ding geelmoh ung,
Tat na’ng sa bang hawmmoh ung e.

Baanzaal neemnou a n’on huaina
Lung a ngilhni tuangtunglou ding.
Na heina lengvan vangkhomual
Galsial bang na dondon ve aw.
Nikhat khuamual k’ong suak ding ua,
Sungkim in i hei nawn ding aw.

February 1, 2014 at 8:25pm


©Siamsinna leh Vakiangbu