HIAI HOUH KA VAANG HIA?

By~Vz Vualnam

Ka nasepna dohkan a tu a,
Mite’ poimoh nate ka sepsak zellai in,
Vai nungaknou khat ka ma ah ahong ding hi.
A skul puannak toh ahong ding a,
Innkuan hausa apan ahikei chih akithei hi.
A vom hiuhiau a, melhoih bel ahikei hial.
Pawl kua khawng ahi ding, eh, sawm khawng.
A hih ut ahon gen a, ka hihsak a,
Huchi in apaita hi. Khatvei ahong kinunghei.
Nitamlou nung in ahong hoh nawn a,
Ahih ngeimah ahong hih nawn hi.
Huchi’n avangkim in ahong kilaak a,
Ahon gennawn ngailou in,
Ahih ding tuh ka na hihsak zel hi.
A skul puannak ngen toh ahong hoh.
Sawtkum tak huchi bang a om nung in,
Nikhat tuh ka ma ah ahong ding a,
Ka muh in ka kiguih hi-
Sari abaat a, dangka-eng khi a ok a,
A tal anuhsan a, nupi ahita hi!
Zan khawng a skul naupang hi a,
Tuni in nupi ahong hita maimah a!
Ahon kingaihsun sak dedu hi.
Huai nung tuh a skul puannak ahon silh nawntakei.
A vangkim a hong hoh atawpsan keilai hi.
Hunte ahong kivei a, tuuk leh khaal ahong kikheng zel hi.
Nikhat tuh ka ma ah ahong ding nawn a,
A khut a awng nawntakei! Naungeek apomta hi.
Hiai tengteng ka mai ah atung a, ka mit in ka mu hi.
Mite naupang ahih ua, a itte utoh hong kiten ua,
Naungeekte ahon pom sung un,
Ke’n ka it nungak ka delh ka delh a,
Himahleh huaisung teng in leng ka delhphakei lai hi.
Bangchidan a mite’n a itte’ uh lungtang ngahzel ahi ua?
Ke’n lah huaitan ka biak nung in leng,
Ngah ding gim himhim anam naikei lai hi.
Bangchidan a mite’n a itte’ uh anglum tangzou zel ahi ua?
Tanzohlouh dingte kimangngilhsak a,Tanzoh dingte a delhzel ziak uh hia?
A vaang uh pomsiamdan akizil ziak uh hia?
Ke’n ka vaang chikchiah ka pomsiam dia?
Ka delhphaaklouh ding chikchiah ka khawlsan dia?
Ahihke’h hiai houh ka vaang hia-
Delhphaaklouh ding delh nilouh a hun beisak!


©Siamsinna leh Vakiangbu