FACEBOOK ITNA GUIKHAU BANG NA TATSAK MAI MAW...

By ~ Paumuanlal Guite BaBs

Kum tampi leng a pai naikei, siamsin khat hisam ka hihman in ka siamsinna maban sunzom ding in Shillong vangkhua ka zuanta hi. Agam pen i Zogam uh bang in mual le guam etlawm thei mahmah a, himahleh khua avot mahmah ziakin ka tun tuung in ka kingeina seh theipah kei hi.

A kha a simbang ka hon om chiang in nuam ka honsa pian mahmahta hi. Ka lawmten a hun awl teng uh Computer mai a zangden ua, kei bel kana lunglut kha vetkei. Facebook chih khawng agen mun mahmah ua, kenbel amik-amak theilou ka hihchian kum le ka kum ngei vetkei hi.

Sawt ka hon om deuhdeuhta a, lawmte computer khoih sung chim theilua ka hihman in atawptawp in na Facebook gengen uh banga? A hihdan hon hilh ua? chi'n ka ngenta hi. Lawmten le account hon bawlsak ua, pasword bang ka mangngilh thithe a, ka khoi siamlouh toh ka lunglut vakkei hi.

Hun awl ka neihchia Facebook ka khoihkhoihta a, a hihdan siam gawpta ka hihmanin ka lunglut deuhdeuh mawk a, ka lawmte nidanga ka nin zawzen te sang in kon uang zaw a, Computer ka zatlouh sung na ngawn ka mobile phone in ka mek touhtouh denta hi.

Hunte hongpaizel a, nikhat nungak Nenem kichi Delhi aom khat tawh ka ki chat kha ua, ataka kithei hilou napi ka hon kingaina deuhdeuh ua, facebook ka khoih nakleh amah a online hiam chih ka en masa a, aman le hucibang mah in honna hih a, ka kihoudenta ua, ka kingai gawpta uhi.

Nikhat relationship a koihni chi'n "in a relationship with" chi in ka min uh ka koihtuakta uhi. Sawtlou nung in Lamka a ka nungaknun ana mukha a, hon hehsan mahmah in hon khen a, ka hihkhelh ahimanin ka pawna lua a, lah thilteng a kikhelta. Facebook ka tawpsanta ding kachi a, lah kal khat le a daih zoukei.

Nenem kia ka thiltuah teng ka genleh ka nungaknu bang a mohsa mahmah a, ka kikhen uh hoihzaw hon chihsan hi. A niteng a hon houpih, hon hehnem den ahimanin ka puak anuam a, Nenem ka ngai deuhdeuh hi. Atawp in fb vuak hilou in atak inle relationship suk ni ka chi ua, mel kimulou, kithei ngeilou a kingai ka hon hita mai uhi.

Kum khat lam bang ka hon kingaihnung un Nenem in Delhi ah hongpai inla i kiteng ding hon chi a, kenle ngai mahmah mawk kahihmanin huailam a sepna khawng zong ding chih paulap in Delhi lam ka zuan vengvengta hi.

Airport ah honna dawn a, kimuhpatna ding ahihmanin ka kithei tuahkei ua, ka phone leh ka kiang mahmah a hon ding a, kinuihsan tuah in taxi hon laakpih a, Munirka a a innluahna ka zuan vengveng uhi. Lamdung ah ka pautam kei ua ka lungsim in, "a lim a amel hoih ahoih, lian hihhiah kasak le neuna teutau e..amel le.." ka chigu sim hi. I theithak le a photos dia Korea lam nungakte khong zang ana hileltak hi.
Kisikthak vachih ding lah hi nawnlou, kei le kilungmuangsak in ngai mahmah bang in ka om a, aman le hon ngai mahmah a, alehlamtaka nuam kasa mahmah uhi. Achang in Facebook omkei leh papi kihi nailou di hia chih peuh ngaihtuah in ka guk nuihzel hi.

Kha 2 bang kise hetlou, nuamtaka nupa hinkhua kon zat nung un nasepna ding ka zong ua, ka nih un kigamla lawlou ah sepna ka hon mutuakta ua, na sem in ka niteng hun uh ka hon zangta ua, ka gimluat tuak ziak un achang bang in kise sim in ka kileh ngat san gaihgaih zel uhi.
Ka sepna mun tuak uah internet free a hun awl tenga khoih theih ahihmanin ka hon khoihtuak ua, ka nungak tangval laituk un Facebook kon hah bawl kha nawn mahmah uhi.
Sawtkhop hichia ka hon om nung un sun chia nasep kawm a facebook khoihtuak, nitak pai chia "nang nungak na hou pih munlua..", "nang tangvalte post, status teng ah nava lut den.." chi'n houchikchik a kon kisepanta uhi.

Ka kisiatna uh hon uang deuhdeuh a, huchihlai in Facebook a ka friend numeite bang in hon call khazel uh, huchibang in amah le tangval khong tawh hong kihou theizel ua, ka kal uh abuai deuhdeuh maita a, ka hihna uh kibangtuak ahihmanin a mawhzaw ding ut omlou in ka kina gige ta uhi.
Ka ki itluat ziak ua kihaza tuah a kisia kahi uh, himahleh a kidek zawsam omlou kahihman un ki it mahmah hinapi in Nenem tawh hon gawmtu Facebook mah hon khentu a suak maimahta hi.

©Siamsinna leh Vakiangbu