SELUNG LIAP LOU AW...

By ~ Paumuanlal Guite BaBs

Seenchiil hunlai pan a simthu houlung ka kuppih, gual englou a nunnuam laitual leng a ka kholhpih Mawite tawh anbang itna simthu khaubang ka suutkhawm kei zong un, ka lunglaigil uah itna tuibang thuk in mualsing bang ana sang mahmah khinta hi.

Muikhua hong zing a, tung si-al te hong taang in solkhapi'n lungzuan puanbang thaksak mahmah a, kei zong ka sauliim pan Mawite siang ah laitual ngabang kava leeng hi. Lunggel khen ah singdang laitual ana leenlouh man un lunga katup ka lunggel, ka itna simthu tong kava luan a, Mawite in zong khen ding simthu hon leel kiik ken maw ngaih chi'n tongdam naubang honna sang a, nihgel nun bang nuam in ka sinlailung uh adam mahmah mai hi.

Hunte tuibang hong luangliam zel a, sunkhua zankhua in Mawite tawh chimlou in nihgel itna khuambang kipsak din simthu chiam in nunnuam ka kholhkhawm den uhi. Lawmvual lai ah ka chiam simthu uh lawibang thang mahmah mai hi.

Mawite tawh dohtam lenkawl sang tung ah tuibang gawm ding lung a ka geel lai un, ka lenna vangkhua uah Doctor Mangpu sakmel hong langta hi. Doctor pan ka lungdeih Mawite tawh ka kal simthu uh gui khaubang tatsak sawm in ma loubang hon panta hi.

Doctor pa tawh teh din kei ka nunna tualniam lua ahichian ka lunggel puaksing bang gik in ka sinlai ana mahmah maita hi. Sunni atum chian Doctor pu Mawite te saulim zuanden ahimanin Mawite toh houlungkupna ding hun ka neithei takei ua ka sinlai nat a puang semsem hi.

Zankhat Mawite sianga laitual kava leeng a, Doctor pu zong lailungmuangtakin ana tu hi. Simthu lengvelte houlung kum a ka omlai un, "Muan, na neklouh ding vonggah keikei nawnken la, khaubang na chiah mai in.." chi'n simthu Doctor pan hon leel a, zehbang ka zumluat tawh ka lunggel ngaihsutna khuaibang hanglua ahimanin vuak bang ka lunggulh mahmah a, ahitazongin vuallai ah tualniam lua kahihmanin "Awle.." chi'n sianglam zot ding ka sawm hi. Mawite lah a luankhi tawh omden a, akal in ka hehpih a, ahizong zalai ah hon gup ngamlo pen kei din thuaksiam ahak mahmah mai hi.

Lungzuan zatam sial ka tan ahita a, senvualten heh hon nem zong un vailak zunthak abangta. Ka hinkhua aw haksa hina e, kei tang lelliang vual eng a, kumsawt loubang tul ding hita ka hiam? Kei din lailung nopna ding kawlni hong suak ding a hiam aw?

Vangkholai ka leenchian lah senvualte a lungdeih tawh nuam a leengkhawm diamdiam te ka eng mahmah a, Mawite sianga leng ding chi leng lah ei ki sanggah lua. Ka senlai hunte gua bang a dawnthak thei hile ka utlua, ahizong in tui bawsa lah luahkik thei ahitakei hi.

Lungkia mangbang in sunkhua zankhua in sambang zal zongleng maimit sing mawh hial in giakmawh vabang a ka hun le nite tuibang luang liam zungzung a aomlai in, ka lunggel hetlouh in Mawite leh a tunnu ka saulim ah hong leng ua, ka zalmang hiam aw kachi zozen hi.

Mawite leh Doctor pa tuibang gawm ding simthu hong leel ngei ding uh chi'n lunglai ka gel hi. Mawite lah a sakmel zong hong lak ngamkei a, Mawite sianglam maimit ka suan chian ka hehpih a, ka luankhi in tuibang hon tuum a, simthu houlung ka kum theita kei hi.

Mawite tunnu'n lailung gel pel lam ah hichi'n simthupha honglel hi, "Muan aw, ka vondeih Mawite nanglou a kumsawt guabang hing zoulou ding ahihmanin tu in nang toh khabang pham dong tuibang luangkhawm den ding in na saulim ah kon kha.." hon chi a, gintak a huaikei mai. Ahizongin tak simthu ahi a, lailung dam in lambang pak in ka sinlai natna teng zong vabang aleng mang hial hi'n ka thei hi...
Mawite ka sianga hong pai a, Umuan chin singdang kuaman a phel zoh nawnlouh a, kumsawt a khen nawnlou din anglai naubang ka kipomta uhi....

©Siamsinna leh Vakiangbu