HON NGAIDAM IN AW BAWI..

By ~ Zo Khanthang

Nakoi lak ana a? Puanvot in anatna kon dapsak di aw cin Thangpu kum 4 lel a upa, khosik a nasa tuh anun atalte, agawlte lungngai tak in ah a zut sak a. Atapa akhahsuah ding lau in thumna nei kawm2 in a kem hi. Thangpu pa niteng a nektawm zong a nasem tuh hon tung a. Khoul gim nam hit2 leh agim leng theng nailou in atapa a nu ang a ling keuh2 tuh a delhphei a. Bawi bang ana ci e. Ken nasang ding honpua keive chi'n a khekol cement bang nieuniau sung ah 50/50 sang bawm 1 hon lakhia a. Anun tuilum vasuak in huai sang tuh a nupa un Thangpu nekdin tui ah adiah nipsakta uhi.

Thangpu in tam nethei lou a, lokhe mawk ahihman in apa lunglau in anasepvan mahtoh diangkhia in veng khanglam a nurse a sem khat a nau damlouh ava hilh hi. Huai nurse nun leng damdawi chi 5 tak ana gelhsak a a sum neih sun2 in adaihlouh ziak in akimkhat teng bat in ala a innlam adelh pah tet2 hi. Thangpu in huai damdawi te ne in akhosik hon daita a. Apa leng khomial in lap in anasepvante suah in kisil in annte ne in hon mansiang ta hi. Nitak lup hun ahita. Inkiim inkiang vehtu te apai joh un Thangpu pan khawnvak detsa in apoimoh na a zatpah din a koihta hi. Thangpu tuh a ihmu ta. Himah leh anu leh pa bel a ihmu kei uh. Sun nasep gimlam leng aphawk kei uh. Ata uh hon dam henla. Mita mitu bang in hon pil leh ci vung2 kawm in ata uh alai ua khamuang tak a ihmu hit2 tuh aki melh khel ua. Khua bang hon vak khe hial a. Himah leh Thangpu chisa adaikei. Akhosik sungkhoh toh hon kithuah laidep hi. Dingkhe zoulou ahíh man in azun a ek a nu le apan asiak zel ua, linlou hial in Thangpu tuh akemtou uhi..

Damdawi tampi takte zang in Thangpu tuh hon damsuah ta. Lawm leh vual pawlzou in inkong te ah marble damkol pi in akimawl a. A taksa daang kikeuh te anun a en a. A tapa alawmte toh etkak in hehpih huai sa peuh in ana guk kah zel hi. Neilou sasa himah le uh Thangpu nun zing in mehte zuak a. Apan ann huan in annek zoh a Thangpu skul kai kal in vai tuamchiat ah ana kuan laidep uhi.. anu leh apan a nasep kawm2 un atapa uh hon khanlet dingdan ngaìhtuah kawm2 ua. Apa bang ngial in houh suncia anasep na a puri apiak te uh atapa a di chin zial thinthen a puakzel hi. Anu ngei inleng a loulam ua Tangmai, Kawlsing, lingmin bang duhsaktak in apuak a. Thangpu in lungkim tak a anek amuh chiang bang un anu leh pate lungsim guktak in thangpu sang in kipak zaw uhi...

Thangpu pa sihna..

Lungawi tak leh insung nuamsa leh kideihsak tuahtak a ahon khosak liai2 lai un thangpu pa vang hon keta. Nikhat anasep na uah tau a tuang in azi ata nopsak na ding ngaihtuah kawm2 a teklei bang sangpi a plaster lai in thakhat in atuanna tau tuh hon kichimta. A kiakna sangtak ahi a. Khophawk lou ahih man in a sep pihten damdawi inn tun uhi. Thangpu nu ava hilh ua thangpu ngeileng apa dinmun lauthawng huai ahih man in a skul kaina ah avasam ua. Damdawi inn ah apa nasa a kipek a thum ngoi2 kiang ah ava ding hi. Apa gimse hiai2 a nasa a om a anu chimoh a khitui naptui toh apasal talte khoihsak thangpu in amuh tuh a hinkhua adia vangsiatna masa ahi a. Muh leng amungamkei a.akap maimah a. Anu pang ah ding in ling thil2 kawm in apa a encheuh zel hi.

Thangpu in athuak zoukei. Apa bilbuk ah pa cin ava kap a.apan zaw aza nawnkei. Asou adai ta. Adeihsak leh a iitpen natawm a dawng nawnkei. Aluang inn ah puak in a om a. Khovel ngeina bang in vuiliam mai ahita. Nuta te hinkhua ahaksa tel mai. Thangpu nun apasal sum muhzah lah amu zou kei. Atapa skul kai ding lah a deih a. Khoisa vung2 kawm in bang ci panlak ding. Ka tapak ngak ding kadiam? Ka tapa taisan mai a pasal neimai ding kadiam cihte bang ngaihtuah na ah hon suak khe duan2 sek hi. Thangpu nun atapa a iit zel. Himah leh a itna a sepkhiak zohlouh ding a lauzel. Damthei lua ahihlouh man in a lawm a vual tekiah bang ka cih dia cin a dong kual zel a. Akhen in na tapa ngak in a chi ua, akhen in pasal neimai in a chi ua. Akhen inlah tagah kepna peuh akawk muh mai uhi. Anun leng ngaihtuah den a atawp inzaw tagah kepna a thangpu kep mai a. Huai hun sungteng a sep theih2 sep a hon pawt ciang a sum kana khol te a ki tunding ding cih ngaihdan hon pomkip ta hi..

Nitak lam khat ninem hun a thangpu inkong a suihte kimawl anun asam a. Bawi na utlouh ding ka thei, himahleh napa lou in na hinkhua ahaksat ding kalau. Ut in utkei taleteh home ah om maive aw bawi. Ken nang adia naa hona sem di ing a non poimoh hun2 a hon pe ding kahi cin nemtak in agen a. Amit te ah dahna khitui nulseng louh a luang a. Thangpu in anu maitang a en a. Akap a pindan sung ah atai lut a ava kap hut2 tamai hi. Anun leng genkhial kisa in bawi bang ci e hon gen ve ava cih leh thangpu inleng nu kon ngaihlam nathei voi. Tua kei non sawlmang di ka utkei. Kapa kangai ana citamai hi.. anun leng hilou ahi bawi. Theisiam in .nang maban kakhual na ahi. Tuni in admition kava bol a damleh zingciah nalut angai ding a cita hi.

Nitak khotawn in mitui toh ki hou lou leh ihmu lou tuak in aki nung ngat ua.anun bawi a cih ciah thangpu in dai o a cih buk2 jel hi. Thangpu nu adin a mangbat huaitel. Atapa kingaisia a apaisual ding lah alau a. A loh ding dan atheikei. Huaizan zaw amah a ding in limlang mai a vuaktang a din a bang. Thupi na aneikei. Atapatang neihsun sukipak zoulou leh a hinkhua a ngaihtuah a. Hun paisa a a vangtah na leh vangtah diak aki saknate a phawk khia a. Apasal angaihna toh atapa lungsim ding bawlsak in zingkhovak tan a hun a zangbei ta hi.

Thangpu nu zingkal thoupah in lupna pang ah thumna hon nei hi. Toupa,kei meithai lel, sung leh pu leng neilou. Ka iit ka pasal non laksak ta.tuni in ka tapa kakiang apan kepkhiak in a om ding ahita. Pha nön sakpih ahih leh hon panpih in. Pha non sakpihlouh ahih leh naupang hinkhua nang khut ah om henla kei hinna pephal in ka thupuk na konlan hi. Chin hon thum a, Thangpu inle aza, a ihmukei. Anu leng a vakkhia a voksa ser lang avalei a a huan a amin tan inleng thangpu a thou naikei...

Anu'n Thangpu phawng dia pindan lam anaih lai in pindan sung ah thangpu ki diik hit2 aza a akhasia a himahleh huaibang hun a kidek theih poimoh asak man in aki dek ham2 a bawi hon thou ta ve. Ken voksa huan keive cin thangpu tuh asam a. Thangpu leng gintak louhtak in kun dieudiau in honthou a ankuang hon umta uhi. Thangpu in asa duhpen voksa. Nidang a valh nop asak pen huaizing inza tum khat lele a valh zoukei. Anun leng a ne thei kei a. Kun dedu kawm in a nih un a tu ngetngut uhi. Thangpu hon dingkhia a nu nang non khak di aw a ci a anu akap maimah hi. Gen ding theilou in anun akhut leng sil lou in bawi omdah mai in. Keikia in ka khosa zoukei ding hon chikhe phing a. Thangpu tuh apom ton2 ta hi. Thangpu in hilou e nu, na ngaih tuah kathei, non iit cih leng kathei. Kei a dia na lemgel na ah pathian kiang a na nget bang a tangtung zawmai hen hon chikhe mawk hi. Anih uh akisata ua a omna ding mun zuan a pai kawm in Thangpu tuh a nui heuhau a. Alungsim guktak bel anun atheikei. Home atun un warden in Thangpu room ding ava hilh a anun a lupna ding a bawlsak zoh in apawt a Thangpu in anung delh a anu kiang ah nu kon poimoh cia non hoh jel di nacih mangilh ken aw a chita hi. Anu a pai a Thangpu in tukverh ah anu paitum matan agal et nilouh hi.

Khattang in Thangpu nu..

A nitak hon hi a thangpu inbel akhanvual lak a om ahih man in lungngai man din a omkei. Nuam asa pah a anu a chang in phawk mahleh a phawk tam keihial hi. Thangpu nu bel lunggim tak in zankhua in akap tamai hi. Apasal angai a, a omlouhsan sukpi khat gimthuakna adou joh nung in tun atapa, a hawmthoh a ang a lum gige a omlouh tuh thawmhau na thuahnih in a buah a bangta. A khanglou zel a Thangpu om ding asa a, azawt phei a lah kuamah alum kei. Thawm hau kisa in akal lak ah thumna nei in aki khamuan zel hi. Zingkhua avak chian lah atapa hon thoukhe ling2 a tap kotawng a mei hn awi ding lah a om nawnkei. Ann anne alah amah meh huansa.. akiang a limsak chi takmai a bak phiau2 a mit khup dau2 muh ding leng a om takei, ankam limna, imut nopna leh vaitun cia innlim a ngaklah tak a ana ngak muh ding a om nawnkei.. khovel ama adin thawmhau na ahi a chilou theikei.

Thangpu Hostel hinkhua.

....Thangpu in nuam asa cihlouh gen ding omkei. Achang in mihing ahih na ah nu le pa ngai in kap zel mah leh atan kikimpih te toh khosa ahih man in ki hehnem theituah zel ua. Nuamsa phet hi. Anun ava veh ciah leng kimawl ding mah utzaw in ana houpih mankei zezen hi. Anun kipah nalam in la a a khol khiatsa. Kho ul sisan pal a alohsa sum te va pezel in duat cihtak in vaduat sek hi. Kum 4 bang home a om ahita. Thangpu leng valnou hong hita. Duh leh deih, nek leh dawn ah thupuk na lak haksat hun hon chiam panta hi. Valnou kimuang huntawk leh hinkhua vangtah kisak natoh lawmpolh zil a utdan hon kikhek in achang in hostel apat ki gukhia in zu te, dendrite te peuh va hipsek ta maimah hi... A chang in mite toh vaki sual in, achang in hostel thunei te peuh vua leh mat in hon om hi. Thangpu nu leng chimoh tongkhong nalai hiai thute ajak ciang in a puak gik tun2 sek hi.

Thangpu a hinkhua aki seta. Kinepna anei nawnkei. Ut2 a che in hostel apan taipawt in zumun nopna a bual in hostel adin le zumna tampi semkhe ta hi. Thu deih huailou pi2 anu'n hon zata. Nikhat tuh Thangpu nu om nuamlou chi a inn a a om nitak in a inkong uah gari hon khawl a aman leng ava et leh Thangpu te warden te ana hi maimah uhi. Thangpu nun le bang thu ahia, hong lut un cin ana vaidawn a, warden tele ki entuah gau2 in apasal pen in. Thangpu nu aw, hiaibang thu na zak utpen leh na deihtel pen ahikei ding. Kou mah2 inleng kon deihsak kei uh. Thangpu mi thumang mah2 ka cih lai un a lungsim leh a taksa te hon kikheng in khovel ah phakciam neilou in khelhna tampi ah ana ki bualta. Tuni in hostel ah papi 2 hon hoh ua. Thangpu kici nou mohpuak na hidin ka lamen ua noukiang ah hiaithu kon tun masa ua ana gensawn di na duam ah kou vagen zaw di kahi di uam ah.

Thangpu leh ka tanu nu uh chingpek ana ki gai ua, aki teng kei ualeh pupa dan a indongta vai a kihou angai dia, aki ten uleh bel mouman piak in a vaiveng di hon chi ua bang a na ngaihdan Thangpu nu hon chi tamai uhi. Thangpu nu le adang te hon awk in, a chil valh ding leng ki bansam a, agen ding a ngaihtuah lai in warden pan tua Thangpu vagaih nu pen nuthawi sa ahi. Zuzuak te tanu nu ahi a cihbeh laizomah hi. Thangpu nu zumna kuan a thuakpih a, apasal lah omlou, meithai leh zawng takmai, atapa hawmthoh leh a mou di in huai zuzuak te ta peuh a tel kei hial. Nuthawi hina lai, nial ning chi lelah voktal man ding omlou, nialkei lelah amaban buai ahih man in Thangpu nun leng warden pakiang ah vangtah nalai vangtah kiguan dahmai ni, ka tapa in zi in nei henla. Ka khosak dan2 uh ka khosa khawm ding uh ana chi khong ta hi.

Thangpu te inkuan.

Thangpu inleng deih a ava tel ahikei cih anun athei. A zumit toh et inzaw kilawm huntawk. Itna tak a angaih ahih louh ziak mah ahi ding a Thangpu leng a hinkhua ah thilchin hoihlou te ah uang hiai2 in nitak tebang pai hak in kitom in azi bang vozel hi. Azi bel thil sia leh hinkhua haksa tak ana chiamsa ahih man in kizen leh nute maibiak siam mah2 hi. Apasal potkal bang in anu toh thumkhop na ana nei zel in apasal Thangpu a din thu nget kidek lou hial uhi. Nitak khat Thangpu hong paìhak lua ahih man in azi in anu kiang ah ka uThang bang ci a di hon cikhe guih hi. Anun le patauh pih ahih man in iva zong di. Kholak a mi gilou hiam lamkal a bahsia hiam le hikhathei cin anuta un azong din a kuankhe ta uhi. Zumun teng ava enkual ua amukei uh. Chimoh in inlam hon pai uleh lamkiang ah pau nuanua in amu ua, ava delh ua, aliang bat ua gik sa pi2 in intan a pitung ta uhi.

Thangpu leng akham hon veng a anun bawi napan hicia na om hon muleh khase nancia maw ava cih leh Thangpu leng hon heh mawk a azi vuak hon sawm mawk hi. Anun phal lou in ava phelh nalam ah anu dek singkhuah in ana satsak a anu leng puksuk pah ngal hi..Thangpu in azi khet sawm in anaih phei a himah leh anu atang nawnkei cih amuh in alunghei thak a anu ava phong kangta a alu dom in anu muk phun sisih tuh a bil toh a sutuah a anu "HON NGAIDAM IN AW BAWI" kei chinlah ziak a na hinkhua kisia ahita cihteng genman in akha tuh akhahta. Thangpu leng kisik in anu asam a, anun aza nawnkei. Ngaihdam angen a a phatuam nawnkei. Kapa om hileh ka hinkhua a hici kei ding Thangpu in a cih behlap lai hi.. huci in Thangpu tuh a khanglou a a hinkhua a bawl hoihta. Anun ngaihdam angen man a ama ngaihdam nget anun azaman kei.

Sinlai=
Hiai tangthu apat sinlai bang namu a. Hinkhua ah vangsiatna, omdan hoih leh siat ding ei mohpuak ahi. Asisate, kapa, kanu omleh ka huci kei ding na chi maithei. Nazuau nagen ahi. Sihnung a ki iit, ngaihdam kinget a manna a beita. Hinlai a ki iit ding ahi. Insung buai kici ah mikim in mohna inei vek. Hiai tangthu apan anu le amoh, a mou leng, Thangpu leng, apa asisa bel iva ngoh theikei, asita ua, amangta uh. Adam lai te ki en in atak inlei ki iit ni. Sihnung a buanlei suakmai d sapum iit a kikah khum sang in unau.

Beita.beita.beita.beita.
(tangthu phuahtawm ahi. Mi hinkhua toh kizawi totna nei a kaphuah ahikei)

©Siamsinna leh Vakiangbu