SIAN GAWMLOUH
By ~ Rex Peapy
[beita]
© Siamsinna leh Vakiangbu
"U Lian, hon na ngak ou" cia hong kikou a zak in Thanglian le
kinunghei a a etleh a Puite ana hi a. Aman le ngak in kolez lam zuan in
hong kiton uhi. Puite in le en giau2 zel in a tawp in, "U Lian, ka
thuzak na zakha ta hia?" cia a dot leh Thanglian in le lamdang sak ci
deuh a enkawm in, "bangthu e Pui?" ci'n dongkik hi. "E, zakhalou tak2
maw? Nenem in pasal a nei a ci ua..." cia Puite in a gen bottan in, "kua
Nenem maw na gen? Ei veng a Nenem maw?" ci'n Lian in a dong a, "hilou,
nang Nenem".
A thuzak a tak2 di'n a gingta theikei a, a mitmial gai, a lung-am
muai2 in a thei a, Puite thugen dangte leng bangmah a theibun nawnkei.
Pai hia khawl hia cih nangawn theizou lou in a sa gaivek hi. "U Lian
bangci e?" cia Puite in a khut a khoihsak leh halhkhe guih in, "Pui, na
tak2 hia? Kua e a pasal? Bangcidan a..?" ci'n a dong a, Puite in le,"a
pasal zaw ka theikei a vengte uh a ci ua, kenle lamdang salua ing a.."
cia a kihou sung un kolez hongtung ua, amau room lam tuak manoh in a
kikhen uhi.
Class lak lai nangawn in leng Lian in bangmah dang a ngaihtuah
theikei. A thuzak a manglam himaileh cih khawng a ngaihtuah a, a tawp2
in om zou kisa nawnlou in tawpma in a pai hi. Inn a tunphet in kikhek
lou in lupna tung a kidenna ngal a, Nenem toh a hunluite a mitkha ah a
banban in hong kilang dundun hi...
Skul lutpat ni a hi a, newcomer ahihtoh lawm di le nei nailou in a
tutna ah a tu a, midang him2 numei hi'n pasal hitaleh a mel uh ciangtak a
a et le a omkei uhi. Hucia dakgin ngak a a tutlai in newcomer dang
bangzahhiam honglut ua, huaite lakah numei 1, mit hah dum kilkel, buang
thiuhtheuh honglut in Thanglian' mit a la mah2 mai hi. A hong ki-en
tuah kha guih ua, huainu a hong nui seih a, a biangsum toh a ha
kilawmtak toh Thanglian adi'n paradise ahimai hi. A skul kaipatni a a
nuihsan masapen ahi cih a mangngilh khakding a lau hial hi. Roll call
ciang a a min ana cepteh pah ding in a ngaihtuah a, dakgin kal bang a
ngaklah mah2 mai hi.A lunggulh dawnna haksa hetlou in a hon mu a,
Vungthiannem @nenem ahi cih a theih in a ciamteh pah tinten hi...
Bangmahlou kal in hong kinel simpah mawk ua, room sung bang a a ki-et
uh kituak thei citciat a bang hi. Thanglian lah mi zahkai theitak ahih
zawkmah toh, zahkai him2 ziak hia, a riau dang om ziak hia a ki-et tuah
khak ciang un a mit a taise pah2 a, a sawtlou nung in a enkha zel hi.Nu
leh pa thununna hoihtak nuai a khangkhia Thanglian bel lai leng a
siamthei mah2 a, teacherte leh student dangten leng a min a theipah uhi.
Nenem ahihleh anu leh pate tanu neihsun ahi a, a melhoih dan a theilou
omkei mahle uh lai lam ah bel a siam kholkei hi.
Awl-awl a kinel hiai2 in hong kimu zel ua, Thanglian in bel Nenem
mulou in nikhat leng haksa a sata hi. Kiginni leh pathianni bang tung
mun a sathei mah2 a, Nenem muh utna ziak liau2 in skul kai bang a
kithalawp mah2 hi.Nikhat Lian leng recess a hih dipen theilou, a
tutpihpa lah kailou aihciah skul kong ah amah kia in a tu a, mi'n
nektheih tuam2 khawng lei a a buai celcul hang un amah bel cim kisa in
munkhat a a tu nilouh hi. Hucia a tutlai in Nenem in a kianglam hon zuan
a, "hey, lungleng lua maw? Kua ngaihtuah e?" a va ci sal2 a, kipak
selua a dawng didan pen thei zoklou in, "nang" ci'n nuikawm in a dawng
hi. Hucin hong houlim ua, kua phawkpih louh in nuam a sa mah2 uhi. A
holim kawm2 un Nenem in a khut a Thangleipaak eng cikcek a tawi a vei
lauh2 a, huih in a sam a mutleng sial2 kawm a kisel a mai Thanglian in a
encim thei mah2 kei hi. Nenem in, "na hon en nak ngei ka zum dek voi"
cia a hon gen tak in Lian leng kisuanglah thak in, "na paak tawi hi ka
et, sir ten paak lawh phallou uh hilou maw, kon report di" ci'n nuikawm
in a kizumzel a, "nang adia ka lawh eivoi, na deihkei lelah ka paih mai
dileh" cia Nenem in a gentak in, "deihlua, deihlua" a ci pop2 kha zezen
hi.Hucia a kihou2 lai un dak hong ging a, room a lutdi'n hong kisa ua, a
pai masa di bang hong kinolhtuah zezen uhi. "laziest first hiven le"
ci'n Lian leng a paak kipiak uh a khekol sakhau a kuah in a pai masa hi.
Hong kithuah tam deuh2 uleh a kingaihnatna uh lian deuh2 in, skul a
kithuah lel a deihkhop nawnkei uhi. Nenem in a inn ua pawt di'n a zawn
a, nitak 1 Lian leng Nenem te inn a hawh din hong kisa hi. Zum sim pi2
in ava hawh a, himahleh Nenem ana omkei a, a nu ana om in Lian leng a
vatu pheuphau hi. "Nenem in hon gen2 sek a, na feldan khawng, na laisiam
dan khawng. Ana ngakzek lecin hongpai dekta inteh a pite in a vahoh
zual hi" ci'n Nu Mawi, Nenem' nu'n Lian ana houlimpih a, a siamnate uh
lamdangsa in nuam a va sa mah2 hi.
A hun-awl neihsung teng Lian in Nenemte inn ah a zang ahita mai,
kuaman Lian leh Nem te kikhen thei ding in a gingta kei uhi. Amau gel
kal ah itna a kip deuh2 a, Lian in lungsim siangthou tak a Nenem a
itbang in Nenem inleng a it petmah hi. Kumte hongpai zel in khawhun a
kihei bang in mihingte khosakna leh hinna leng a kikhek zel a. Nenem
leng Nurse zil in vaigam lam ah a va om a, Lian in leng a septheih theih
sem in hong khosatou uhi.
Omna kibanglou, nasep kibanglou nanana tuh kithuzak a hong haksa
hiai2 a, himahleh a omna uah gin-omtak in a om uhi.Nikhat Lian in Nenem a
thuzak sawm ciang in a lohcing ngeikei a, a ni 2,3,4 tan inleng a
lohsam den hi. Hucia lungsim buaitak a a omlai in a innlam uh zuan a
scooter hongtai a mu a, Nenem' pa ahi cih a thei ngal hi. Bangthu om ahi
de aw ci'n a lungsim ah lauhthawngna peuh a om hi. Innkong lam ah a
vatai a, "Pa Mang, bangthu a?" ci'n a vakan pop2 hi. "Nenem damlou in a
om a, sisan unit 3 ka peta uh. Theidia hon gingta lou ing a a hilhdia
hong ka hi. Anu le a zinsuk a, keile zingcia hoh sawm kahi. Lunghimoh
huailua hilou ahi, thum lehang Pathian in damna honpe na di ahi" cia Pa
Mang in a genkhit sawtlou in a paikik hi. Nenem lah hoihlam nawt theilou
in a om a, sisan petu ding nangawn muzou nawnlou a a om nung ua beidong
tak a a omlai un Siampu hongpai a, amah bel a vengte uh ahihmai bakah
sum-le-pai a poimoh hun ua leng a tai theihnate uh ahi a, Nenem
bloodgroup leh amah a ana kituak cet zomah a, sisan pe di'n a hong kuan
hi.
Kha 1 nung in Nenem in leng hoihlam hon nawt hiai2 a, Siampu leng
maingal leh tuitum kisatak in Nenem kiangah a hun tam zaw hon zang hi.A
kum nawn hong hi a, Nenem in leng a zilna zou in innlam ah a hongpai a, a
ngaklah pen a u Lian toh hun zatkhawm ding cih ahih lai in a lamet
banglou tak in khovel ana kihei lamdang ta ! Nenem in a pa lungsim
nidang bang nawnlou ahi cih inn a tun in a theikhe pah hi. Aw, a poitel
mai, a pa'n Thanglian toh a kithuah ding uh a khaam bikbek tamai hi.
Anu'n bel Thanglian mah deihsak tinten mahleh innsung a pa pen thupukna
kuaman a sel ngamkei uhi. A poi mah2 bel huai kum in Thanglian leng ana
zinkhe cet a, kaal 2 khawng kan leng omlou ding himahleh a itpen Nenem
inn tungta ahi cihleng a theikei zomah hi.
Nenem damlouh sung in a pate'n sum tampi a lakh a sim mah2 a ba ua,
khateng a a dit ding ci'n a leitawi ua, a kidaihlouh ziakin a lakbelh
zel ua. Himahleh a innkuan sum laklut un a ditkikna ding daih zou
nawnlou ding a a kilat man in a sum batna uh Pa Thang leng a lung himoh
gusim ta hi.Sum-le-pai a tasam hikei mahle uh Pa Thang in a tapa neihsun
Siampu ading a Nenem ana enlah gu gige ahihzawk mah toh Nenem toh
Siampu a kiteng uleh a bat te uh ngaidam ding in Nenem' pa Pa Mang ana
houpih a, khosakna ngaihtuahna ziak leh a tanu adia leng maban limci zaw
dia a theihman in Pa Mang in leng lem a sapah hi. Nu Mawi in bel ditzoh
theihdan lampi om di ahi ci'n a pang tinten a, ngaihdan kibatlouh
ziakin tamveipi a kinial kha uhi. Himahleh papen thupukna bel Nu Mawi in
leng a dangzou tuankei hi.
Huci'n Nenem hongtun phet ciang a pupa ngeina dan a Siampu toh gawm
ngal ding a hon thupukta ua. Thanglian in a theihma ngei2 a gawmding in
vai hon hawmta uhi. Anne lou, tuidawnlou in Nenem ni bangzahhiam a om a,
himahleh amah ziaka leiba-sangba toh a om det di uh a ngaihtuah ciang
in hithei a sakei zel a, a tawp2 in upate'n "nu leh pa thuman a nahlawh
peek" hiven ci in a nu leh pate vaihawmna mittui tampi toh a pomta hi.
Huci'n inndongta teng theihpih in a hong kipi ta ua, a sumbat teng2 uh
ngaihdam ahita ci'n suaikai in lai a kipia uhi.
Thanglian khualzin tung a zing a kolez kaidia kuan in hiaithu a lawm
hoih mah2 Puite kam apat in a hon thei a, ani-ani in a tha ke huai2 in a
kithei hi. Kolez kaitawp ciang a naupang bangzahhiam tuition a neihpih
zelte nangawn peih nawnlou phetlou in kolez leng kai gina peih nawnlou
in a hong tawp leulou hi.A lungsim teng2 pia a ana itpen, itna siangthou
tak a a it, tua midang ang bel a omta mai cih a ngaihtuah ciang in
kipasal sak zou mah2 lou in a hunteng phial mittui toh a zang a, khatvei
leh amah a kimawhsa a, khatvei leh Nenem a mawhsa zel a. Lawm nangawn
leng thuah utlou in inn ah a kikhum den hi.
Hun hongpai zel in Lian in leng a thuakna hong dan om zawdeuh a,
lawmte toh kithuah in kipahdan hong kisin thak hi. A lehlam ah Nenem te
leng Vaigam lam ah hong khosa ua, khatvei leng a kithuzak nawnkei
uhi.Himahleh sum-le-pai in zaw kipahna leh nopsakna sang in khasiatna
tunzaw ahi ngei ding a, Nenemte nupa a kituah louh hun uh a tam mah2
hi. Lawmte leh deihsaktute thuhilhna tungtawn in Thanglian in leng Nenem
ziaka a thuaknate mangngilh in amah ana theisiam leh ittu ding a hon mu
a, khosak kipan ding in a hong kisa tei uhi.Pathian hoihnate ziakin
nupa hinkhua nuamtak mai Thanglian leh Kimbawi ten zangtou a, gil a gah
goutan nei a a hong omlai un nikhat a lungsim a mang nawnlou di thu Lian
in a hon zata hi.
Kholak pawt a lampi a a hongpai lai in Puite toh hong kimu kha ua.
"dam maw u Lian? Thu khat na kianga gen di kanei a, na zuih leh zuihlouh
bel nangthu ahi. A him2 in Nenem te kikhen na theita hia?" cia Puite in
a hon gen leh Lian leng a dang bang a awk hial a, kingaihtuah dedu in a
tawp in Nenem veina nei nawnlou bang a kilat tei2 tum in, "bang thu na
thei get a e? Hon gen ve" cih teng in a dawng hi."Nenem te a kikhen ua,
amah le tua khua a hongpai ahi. Zan in ka kimukha ua, thu vaikhah khat
hon nei a, na lungsim zaw ahikei di cih ka thei, hon mu ut a hongpha
zual leh honci ahi.""Ken huai ah ka hih di om nawnkei, hiai tan haksatna
leh lunggimna hon tunta, ka hinkhua hon suksiat sak nawnkei hen aci cih
ana gen oh" cia dawngkawm in Lian in a paisan hi.A lungsim guktak in
bel a thugen a kisiamtan kei sim a, Nenem a di'n hithei nawnkei mahleh a
itna leh thilhoih a deihsakna bel a beisiang tuankei hi. Nenem
ngaihtuahlouh tei2 a sawm a, himahleh a hunluite sapkik bangmai in
niteng in a ngaihtuahna ah a lian deuh2 a, a tawp in vaphak him2 a, a
kianga a gen di thute bek va ngaihkhiaksak di a hon sawmta hi. Nitak
sang a sun a vapawt amah adi'n hoihzaw dia a gintak man in zing anne
khin in pawt di'n a hong kisa hi.
Nenem te innkiang a hongtung a, innkong ah nupi khat ana tu a, Lian
in leng vanaih in a kiang a tun leh a theih ngei ahikei a lamdang a sa
sim hi. "Nu Mawii te om nawnlou uhia?" cia a vakan leh "kal masa in a
kituahkhia uh, paitou lecin hiaisak zek ah mi inn a luah uh" ci'n a
dawng a, lamdangsatak in a kinunghei a, nupinu kawkmuhna lam ah a paitou
hi.Mi kianga kan zel in Nenem te innluahna a va tung khong2 hi. Innkong
ah a ding a, mi'n hiai a ka hoh hon mu le uh bang ngaihdan a nei dua aw
cih khawng ngaihtuah in a ding2 a, a tawp2 in kongkhak a hon kiu hi.
Innsung lam a kipan "honglut o" cih aw a zak in kum tamtak a zak
nawnlouh, ana zak cim ngeilouh Nenem' aw ahi cih a theipah a, a ci bang a
hum sung2 hial hi. Innsung a lut leh bench ah Nenem limlak album khat
tawikawm a tu a hon mu a, a pau masa thei zawsam omlou in a ki-en tuah
nilouh uhi. Nidang teng sang mah inle Nenem hoihzaw in a thei a, pom
ton2 bang a ut hial hi. Hicibang lawm2 in Nenem in a lungsim a luahkik
nawn ding cih a gingta kei a, a lungsim a omsak leng ana tum nawnkei
him2 hi. Himahleh bangtan hiam lungsim siangthou tak a ana ki-it a,
thanghuaina leh taksa lel ki-etlahna hilou a ana kithuahsa ading in
kimangngilh tak2 zaw ana om theilou ana hi.
Hucia gendi theilou a minit khat hiam a om dedu lai un room apan Nu
Mawi hong pawtkhia a cibai buk in tudi'n a kisawl uhi. Nidang hileh zaw
Nenem kiang a tu a, angtang leh tuitum tak a om di hiven, tun bel Nenem
kianga leng tu ngamlou in kimaituah in bench khatpen ah a tu hi. Nu
Mawii in kamsiam tak in ana houpih a, a houpihna teng bak uh gen di leng
a theikei hi. Nidang a ciamnuih khawng gen a a ciak nai2 lai khawng uh a
lungsim ah a om dun2 hi. Nu Mawi in leng singpi bawldi'n a dinkhiak san
a, Nenem toh a nih un a nusia hi. Nenem a en giau2 zel a, bang gen
masak a bang gen nanung ding hiam cih a kingaihtuah tuah hi. Nenem lah a
sik lam nga in a mit ah a mittui a vung kiukiau a, Thanglian in huai a
muh in va nulsak mai bang a ut a, pomlai nei ahihlam nangawn leng a
ngaihtuah phakei phial hi.
A tawp in, "Nem, bangci uh e? Ken lah kipak leh nuamtak a khosa di'n
kon gingta a?" cia a dot leh Nenem in leng dawng thei zoklou in a kidiik
a, kidekzou nawn mah2 lou in, "U Lian, non mudah mah di maw!" ci'n a
hong kapkhia hi. Kap kawm2 in a gen zom zel a, "ken kou innkuan maban di
kana lunghimawh lua a, kon itlouh ziak hilou eive. U Lian, na
theihsiamna kon ngen ngamkei, na ngaihdamna le ka kinem kei...oi..ka
hinkhua a haksa lua.."Tun zaw thilteng a kikhelta, nang beek in nupa
hinkhua nuamtak in non zang di aw U Lian.... Nikhat lel leng nang
ngaihtuahlou a ka hun zang ngeilou ing a, tun zaw hicibang thute gen
thei i hinawn kei, himahleh ka hon itlouh ziaka pasal dang nei hilou ka
hi cik teng beek na theih ka ut a, ka kiang a hongkik dia hon zol sawm
hilou kahi aw.
"Siampu toh kiteng keile uh a bat uh din zoulou di ua, a inn nangawn
uh taanlawh ding uh cih ziak a kitenpih ahihdan thute khawng Thanglian a
hilh a, tua leng a kikhen tak ua a kilemna uh palsat a a inn uh suhsak a
om uh ahihdan khawng a hilh hi.Thanglian in a dawng dan di a theizou
kei a, a kun dedu mai hi. A tawp in, "Nem, keileng nang dinmun ah ding
leng hucibang a ka hih mel theihlouh ahi. Na thupukna lak na siamlouhna
omkei, kon mawhsa kei. Itna lam thu ah zaw nang sang mah in leng ka hon
itzaw di, "Himahleh...bang e U Lian?""himahleh kei a loudia hon koih
theilou ing a, mihausa innsung a nuamsa tak a na om di ka ngaihtuah
ciang in ka lungsim khat a muang ve2".
Hucia a houlim lai un Nu Mawi in singpi hong hawm a, singpi dawn kawm
in, "Naupangte a pate'n kem uh maw tua?" ci'n Lian in a dong hi."Kou
nau ka neih louhpi uh, huaiziak tak a U Siam lunglel a numei dang hon
ngaihsan a, keile innlam a hongkik kahi.""Bangteng hileh, sep di dang ka
nei a kana pai phot mai di aw Nem. Nupi-pasal di zaw Pathian in micih
adia ana sehkholhsa om ciat hi di hiven maw, ei ana ki-it in kiteng tei2
ana sawm mah lehang le eigeel zaw Pathian in nupi-pasal di hilou a
lawmta dia hon na sehkholh ahi cia i pom mai ngailou di hia maw. Pathian
in a gawmsa mihing in khenkei hen cih zaw eigeel kikal adia kigen
ngeilou di hita..eilah SIAN GAWMLOUH hi maimah hang a.....Mangpha.!"
[beita]
© Siamsinna leh Vakiangbu
Comments
Post a Comment