NOPLAI NITE
By ~ Ngam Bawm K
# Awle,mi'nle gelhgelh sek uh hiven ciin ken leng tangthu khat kon gelhtei di aw ci in kon kipan khia.
##Disclaimer: Hiai a thu kigelh phuahtawm leh zuau pumlum ahia, A
hun, Amun, ami leh min kibang a omkhak leh a kituakkha zenzen chihna ahi
a, thutak khuut a khuutpih taak ahikei...
1995 kum hi in kathei, pawl VI kasimkum di ahita hi. Ka khua uh
zodawn apan Lamka a tanaute inn pansan a skul kaidin ka nu'n hon kha hi.
Kapa'n kum 2 paisa in hon na omlouh santa hi. Kihailai petmah hidi, I
pate sihni khawng a misi antang dongte khawng jui a buai a kibuai,
kapasih nitak a Pastorpa thugen kamangngilh theihlouh khat-napa si
mahleh sawtlouchik nunga hong hingnawn ding ahi. Keitageet inlah nikhat
-ninih nung ahongthou nawn di dan in kangaihtuah a, dah hetlou in ka
omthei a, a khonung a kangaihtuah in hamphat huai ahihdan ka theisuah
thakthak hi.
Huch'in pawl 6 kon simpanta a nidang a kahih ngeilouh necktie oh lel
leng kei adin thilthak, ka buaipih tham hongsuak hi. Huchi in sappau
haksa sakawm pipi in a kum khatna chu kon palsuah zou khong hi. A kum
nihna di kon hih hial tak in chu admission bang kei le kei ka kibawl
theita a, ka nute kathadawn zouta in ka kithei hi. Asum kia honkhak ua,
ka omnate'n na nu'n sum honkhak a, nangkia in na saifel theil na di hia?
Chi'n hondong ua , kei kia in kava ki-admit thei hi.
Tukum in ka class uah melthak bangzah hiam hong kibehlap ua, huaite
lak ah THIANCHING, mite'n THIANNU chi a, a sap uh ka na guk nuamtuam
mahmah mawk hi. Hunte theihlouh kalin hong pailiam zungzung a, kumkim
bang a hong beimawk hi. Awlawl in ki-classmate tele kon kineel panpan ta
ua, houpih, chiamnuih banah, veng, khua leh inn khawng kon kitheihtuah
ban uah skul kai, kuan leh pai a kiton in nuam konsa mahmah uhi. Keile
Thiannu mai a siamlou leh zum huailua a ka omlouh nadi ci a ka hahpan
nate jiakin kumtawp ekzamna ah a thumna in ka pangpha sam hi. Thiannu
bel a 5na in apang hi. Amau mikhosatheitak ahi ua, apa'n solkalna
liantak sem hiding ahichih AMBASSADOR CAR khat atung a thilbawk san
kithuah apan ka khonung theih hi.
Hunte hong paizel a theihlouh kalin ka na kingaina tuak mah uhi.
Katheihlouh kalin ka na ngai loman a, nikhat a hong kai theihlouh chiang
inle kuamah theih pihlouh in kana thawmhau thei mahmah hi. Nikhat ka
skul te uh mikhat hong si laizang hi. Huaini ka half holiday ua, innlam
pai a kakiton lai un a inn ua baang di'n hon zawn a bangbang hiam
suanlam bawl a kanial nung ale a utlouh tak in kava baang a, karei! A
inn uh thupi hita ven! Chikmah a ka muhngeilouh geyser, aircoditioner,
aquarium, etc te khawng lamdang sa in kabaan dot a, amanle ka mawl dan
theisiam takin hon hilh tiautiau a, a telephone uh bang ka vapakta lua a
amanle a tanau te uh mundang a om te a call a, keitoh hong kihousak hi.
Thiannu toh lawmhoih leh classmate ka hi uh chih teng bak gen di
theikei mahleng telephone a paukha himhim ka hihman in ka kipak mahmah.
Huchia singpi lim takte dawn anuam satak a ka omlai un konglam ah gari
hongging a apa ofis kai hong tawp ana hi a, a driverpa'n gari kongkhak a
honsak ban ah a inn kongkhak uhle a hong honsak nawnsawn lai a, SAAP
kasa mah2 hi. Thiannu inlah lamdang le asakchi hetkei a,,, kei le nuamsa
nawn chiahlou in pai ka sawmpah a, apan 'Nang, Khupthianching' lawm
maw? Kei apa kahi, honghoh jeljel in, nanu-napa kuate a? Katheih ngeipi
khawng ahi kha di uh kachi' chi khawng in hon dong a, nervous tak leh
ahoih theipen a kadawn johin kapaita hi.
KHUPthianCHING in hon kha a lampi ah a hauhsakdan uleh a inn uh thupi
kasakdan kagen khop hi. Ka omnate inntan honkhak a sawm teitei a, ka
utkei, kazum, kachih chiang in a ut deuhdeuh a huchia kisel kawmkawm a
kong pai uleh ka tungpah uhi. Ka omnaten KHUPthianCHING amuh un lamdang
asalua ua, a daak hekhawk zozen uhi. Keile kazum toh ka pindan ah kalut
paisuak a, Khupching (kachi tamai d, amin saulua) in hong zuilut zomah
hi. Keile ka puanphah ui bu bangmai a kijial lenglung lupna kilkhat ah
ka niilkhawm zok a ka tutpih ta hi. Sawtlou nung in ka omna pi in singpi
sipisial tawi in hong dianglut a, nuamsa lah zumtak in ka dawnkhawm
uhi. Khupching painung in ka omna nu (kapi) a hongpai a, Khupching te
hauhsakdan, apa sepna leh amah Khupching pen zi dia deihhuai ahihdante
khawng hon genpih zungzung hi.
Huchi'n hunte theihlouh
kalin ana mualliam zungzung mai a nuam satak leh ki-aam takmai, ki-it
tuahtak lah kuamah in gen masa ngamlou a hun konzat mah uh lehzaw,
kumkhat asawtkei khopmai. Kumtawp ekzam kon zou guihta uhi. Ekzamzou
ihih chia innlam a pai di'n kon kisata hi. Kanu kiang ah hongpi dingin
ka vaikhak ngal a, a nithum ni in hong tungpah a, himahleh ka pi in
vokbuk hong bawlthak pih in achihziak in ni bangzah hiam ka omlai hi. Ka
pi in hong chiamnuihna in Khupching toh hon dem bawl zel a kazum
theilua hi. Khatvei houh annek lai in hon chiamnuih kha a kanu ka zahtak
toh, anne kahia, nelou? Chih nasan katheizoukei.
Huchi a ka kholam ua ka paidek nitak un kapi kholai vak hong tung a,
thu kipahhuailou tak mai hon tun hi. Huai tuh bangdang hilou in
KHUPCHING khophawklou in a puk a, houpih theihlou in,Lamka damdoi inn ah
puaklut ahi a ICU ah etkol in a omlel, daktol ten a khuak a sisan lut
ahi, achi uh. Chihteng toh hongtung hi. Ka dah mahmah, lohngaihna lah ka
theikei, vahoh mawk di lah tangval le kihi nai chiahlou, kanu'n hon
phallouh khak di lah lauzel, kabuai gu mahmah hi. Ka lungkhamlua hih di
dan tuan theilou in bathroom ah kava guk kah hi. Kidik ging ngamlou
phial a ka omlai in kapi te nupa zunbuk a zuntha in khuak a sisan lut
hial zaw damsuah zoulou ding ahi chi a a kihouna uh kaza kha chitchiat.
Huai nitak ka lungkham toh thawmhauna liantak ka neihman in ka nu
kianga giakdin ka kingen a, ama azaw akiang a giakdia hon zotzoh
ngeilouh hi a. Lum panpan ichihleh kanu'n hon ihmutsan pah a. Keilah ka
ihmut asuak mahmah kei. Khupching kia ngaihtuahna in ka lungsim a dimlet
a a baw zoihzoih hi. A khenchiang in a hoihlam kipia in, Khupching in
hoihlam hong manoh dia, a hong dam chiang in ka khua ua pan result endin
ka vazin dia, kana gengen sa bang un amah toh skul a result endia
vahohkhawm ding, pailam chiang a, a inn ua baangnawn di, phone a khatvei
bek paunawn teitei di, chihkhawng.
A khenchiang inlah a setawp kipia in Khupching bang sipaisuak di in
kakoih a, ka nehnou tha hong suak lawguih a, ka khitui bang hong luang
a, ka theihlouh kal in kana kidik kha dutdut nilouh hi. Kanu'n honna
phawk a, Bawm, nakap lah abang a, bang chi e, hon chi a ? Bangmah chi
lou, ka mang asia a hi, chihteng kia in kadawng lel a. Ka kimelh teitei
hi. Sawtlou nungin aak hong khuang pahta hi. Ak masa khuang nung inle
khua a vakzok keilai a, ka lunggim toh khovak di kal kia ka ngaklah hi.
Huchiin banglouteng ngaihtuahkhawm in huaizan chu ihmulou in ka khovak
hithet mai hi.
Ka thoukhe pah a pawt di'n ka kisapah tingteng a, lungsim puakgik a
gik naklai in , kanu'n Bawm, hongpai hak ken aw, tuni a paita ding ihi
honchi malam zomah a, dawngselou in kapawtsan a, Khupching te inn vapha
himhim di chi a pawt chu ka hina a, a inn uh ka galmuh tak in a innkong
khawng ah mi ana tamlua ua, kava paingamkei a, lungsim nuamlou pi in ka
kikta hi. Kapu zingpawt ana tung masa a, kanu kiangah banghiam genchu
ana nei a hingei dia, insung kalut phet in kanu'n 'tuni zaw i omlai
maiding' honna chipah a, anneklai in kapi'n Khupching sihthu honggen khe
phutmawk a, zingkal khovakma deuh a si ahihdan agen a......ankuang leng
ka muchiang nawnkei, ana lua! Ka etna lamlan asan dundun mai a, kapi
thugen AZUAU hileh ka utlua! Ka annek tha le asuak nawnkei! Ka maisuah
leh omdan apan ka thuakdan kuaman theikei le uh kadeih manin duhlou pipi
in an chu kane zeklai a, himahleh limna himhim aneinawnkei! Ka omnaten
le ka thuakdan ana theisiam lua uh a nahi a, kapi'n 'tuni chu ivek un
sigal in iva hoh ding uh' ahong chi a, ka zadah hetkei hi.
A inn uh kava tun un mi ana tam mahmah ua, gate sung a kalut tak un
apa kamupah a, amanle hong naihphei pah gulgul a, ka dip bang akisai
tuan dutdut man hi. Kapi te a chibai khit in keile hon chibai a,
Ngambawm nahi maw, nang? A inn ua khatvei kia kihoh a, kamin le sawt
thei na e! Chih khawng kava ngaihtuah man nemnum leh kadawng khazokkei
a, kapi'n kanung hongdawt sak cheuh leh ka halh khephut a ......Hi,
himah ing e, chi in ka dawng tuan nonouh kha zozen hi. Aman le tulaitak
chu kabuai lolai ua khatvei hong hoh thak in aw, honchi a, tutna di
munlam zuan a ka paiphei lai un a kilkhat ah ka classmate te bangzah
hiam leh ka class teacher pa ana tu ua, ka kizephawk man in akiang uah
kava pai ut kei .
Sivui zoh in Khupching pa'n bangmah genselou in kaban ah honkai a,
kazui dawrhdawrh mai hi. A inn uah hon kailut a, Khupching ka itdan uh
natheih kagingta a. Huchibanga aman nangle hon na it hi didan ahi,
chihleh a drawer a JOY JUNIOR instrument box hong lakhia in hon hong a,
asung a laithon kikhep khat piak honthuah a. Ka utleh paitheita ka
hihdan honhilh hi. Inn katun in kasimpah a ka phelkawm in ka chi bang
aling pulhpulh a....
Ka it,
Chikmah in laithon kagelh ngeikei a, nangtoh I omkhawm chiang a, kam a
kagen ngamlouh gensawm kahi. Nang, banghiam kajak utlamte hon gen di
konsakleh nagen ngeikei a, ken kon gen mai di. Kon ngai taktak hi. Ka
pasal dia hon deih kahi. Nang le na zi dia nondeih leh hehpih takin
honhilh ve, Ngaihlian mah non pesak dia, kuamah kiang a nagen sawnlouh
di aw.
Nang hon ngai
Khupthianching.
[Chih teng kia akigelh hi.]
Ka simkhit in kapi'n nitak anne din hon sam a. Ka anneklai un ka pi'n
Khupchingpa'n bang di hon chi a? Chi in hondong a....... 'bangdi le
honchi tuankei' chi in ka dawng a, anuihdan apan gingta hetlou ahi chih
kathei. Ninih nungin innlam katung ua, ka Ute bang anakipak mahmah ua,
kanaunu kum 10 hipan ading in kanun phulaleen puanaktual khat apuakpen
bang kei leisak di khawng asa a, kitehjel, singrem sung a vakoihjel in
nuam asa mahmah hi. Keichu kakipak theikei, ann kaduhkei a, ka pau tha
le asuakkei, ka pumzoi ahipen mai. Ka sungkuante'n lah kei thuakbang in
honthuakpih theisamkei ua, Khupching ngai a chi na kahihlam jaw a
theisiam sam uhi. Nidang a pau ut thou chi a hon theihpa uh huchia pau
utngellou a ka hong omleh ka lawmte, leh ka khote bang in lungsim lam
buai dikhawng honsa zomahlai uhi. Keilah aphamsa jawlngaih sunglutpi.
Hichia kaal thum sung ding khawng ka kholam ua haimeltak a hun konzat
nungun ka result uh hongsuakta a, kanu heu in kanaunu toh Lamka lam ah
kong kizuikhe nawn laihlaih uhi. Result kava en ua kei a 1na in kapang
a, Khupching pen a 6na pek ana tungsuk a, amin bracket sungah akigelh
chitchiat se a, asihkhit jiaka a hichigelh uh ade aw...chihkhawng ka
ngaihtuah khemkhem a..ka skul uh, a lampi khawng nidang a Khupching toh
ka kitonton na uh kava muhleh amah kangaihna a hongpuang saan hi. Ka pi
thugen chu adikkei khopmai, 'mangngilh pah nadi nahi, pona lechin
le....' kapu'n ka passlopna chi in sa honmehpih hi. Khupchingte inn
vaphak ka utlua a, apa kazahtakna toh ka phakei thak hi. Tuma a
Khupching in a lehkhathon a sihma zan a agelhpen ava muhkhiak a
honpiaklai in a pautam kholkei a, atanu sihna keijiak khawngsa ade aw
chi'n ka kisuanglah gumawk a, huailou leng a laithon pen apa'n le sim
law mahmah di hi a chihkhawng ka ngaihtuah leh ka zumtha asuak tuntun
mai hi.
Hun nuam Khrismas leh Kumthak khawng bangchi chi hiam in konzang
beitou thei a, skul lut hong hun nawnta a, ka kaina lui a kainawn di jaw
ka utnawn hetkei. Hileh le ka nu leh kapu'n a fee ibat theihna, ban ah
1na te admitna athawn di ahihtoh ei migentheite adia hiai kaan omlou
di, na ut a na kingap nak leh pawl le na bohkan di honphal uh ahi' hon
chih chiang un ka nialngam takei hi.
Huchi in pawl 8 taikan/bohkan in pawl 9 ah kon tutou a, himahleh skul
kaina, a lampi, ka pindan, leh adangdangte kei adin lungzuan
honbehlaptu lel ahi uh. Laisim le ka thadah sot mahmah hi, ka omna te
theih a jaw kholak le pawtngeilou, laisim taima, chih hi ing a, hilehle
minit 5 sang a sawtjaw kasim khangeikei, katheihlouh kal in kana
kingaihtuah dedu khasek hi. Ka hong theihkhiak chiang in lah zan sawtpi
ana himanjel a, lupnatung ah lah sawtpipi ihmu lou in kalum khovak
phialphial sek hi. Kha nih khawng hiaibang a hun konzat mahleh jaw, ka
sa in a lel a, laisim lam ah leng ka bah sot mahmah a, test masapen ah
ka failpah dengdong hi. Ka nuten a pona mahmah ua, ka gawng tak toh
khamtheih hih di bangin hon muangmoh uhi. Nikhat ka pu'n a lupna pindan
uah hon samlut a, 'Bangchi e tulai nong gawng hulhul a, lai simsim
ihonsakleh lah non fail maimah a, laisim manlouzen a na hon semsak mah
ka bang ua, nanu mai a kisuanglahlua kahi' honchi hi....a dawn
hakkhopmai, 'khamtheih jaw hihlou kahi, aban kagendek a, ka khawlthak
hi. Kapi'n kagen di teng a theikhin chihleh kei ahon hehpih mahmah chih
a mithah apan kamu hi.
Hun hongpai jel a half yearly examte konzou ua, kumdang bangloutakin
result pen skul lutnawn chiang a suak di a chi sese uhi. Inlam a
painawn di le ka phur lawmlawm kei, suty sungteng kapu te inn a omsuak
ka ut a, kanu'n honphal jiak in ka omdenta. Sunchiang in kapi vok an
zonna khawng ah kazuizel a, achangchang a Khupching thu kagenkhak
jeljiak un kapi ka ngaina hi.
Huchia hunte lungzuang ngoihngoih a konzat lai in, skul khawlsung
ngei in...... kipimang, kithat, kimat chihkhawng hong omta a, nikhat
tuh ka chipih-sapih te bangzah hiamtak aziak bei in thah in hong om ua,
ka KHUPCHING ngaihlam hontheihpihlou in mipi a pumbuai zak uhi. Ani ani
in buaina hong sousang deuhdeuh a, inn kihalsak, kithah, kimat chihte
niteng mai hilou in dakkal teng thiltung ahi ta. Huchi in'kuahiam
kuanding? kuahiam ding ding? I gam ading in' Chih thumal miteng kiang a
dotna poimoh pen ahong hita. Hiai dotna mi tampiten a hinna uh leng
itlou in adawng ua, keileng amaute lak a vatel sam kalunggulh laitakin
ka khua uh melmaten ana haltum dimdem uh ahi chih konza ta a, ka nak
hehlaw mahmah, ka nu leh ka sanggamte, kanaunu naupangchik, ka mitkha ah
honglang dundun ua, lunghihmohna in kadim. Tunchu huai dotna 'a huaise
theipen' in kadawng ta...
Koi veng hiam a Hall sungkhat ah tangval ngen tampi ana kikhawm ua,
keileng lungtang a phuba lak utna lian penpen toh kava luttei ta a,
heutu pa khat in kuan na mun di, kuan didan, gamtat didan, password, leh
thilpoimoh hi a atheihteng hon brief zek a, huaikhit in chu galdou dia
kuan kihimai, sing gophel leh tempawng liandeuh khat ka kengteng mah ka
tawi a, banghiam khat a suanhuai zodeuh khatbek honpiakbeh di uh
kasakleh! Kakuan na mun di uh ka tun un ni a tum khephial ta hi. Awle
huchi in khua hongmial dektak in, kalut ua, amasalam a pang di kachihleh
kalawmpa Joseph in hai law koh, van hoih tawite a masak di uh, en anung
ua I juih di uh, LIGHTER A I pan ngai di ahi , chihleh jerrycan tin
honpiak a thuah gaih a, ka uttuan teuhkei, kei WATERMAN utlou chi in
kapekik nawn pah a, aman 'hi'n leh' chi in a ZIPPO honpia hi. Ka
konvarsezon uh ana ngaih khadeuh ahi dia, ka luzaang hong puakbuk a,
kinuai luailuai kawm a ka et touh leh KOMANDAR a chihpa uh anahi a, mit
gau lelu in singtang lam a khota te le abit khuk om nawn lou ahi a, gam
le nam it, tuailai atamtheilam zoudawn lam a I khua bitlai sunsun te
vengdi poimoh chi in tamkuamtak ka kithrit tou ua, khua ka totkhakna te
uh a kangsa ngen, ui leh ak, vok, bawng khawng a na om vengvung ua, inn
lah khatle omlou, a om sunsun chu Biakinn himai, khasiat tha suakchiat
jaw ahi dia kuamah a paupeih le ka omkei uhi.
Khua, a abitlai khat konlut dek ua, khomual ah duty post ka galmuhta
uhi. Ka lungsim in galte sa in honna kap mawkmawk kha di uh e! chih ka
lauthawng a, ka KOMANDAL pa uh kiang ah kagenkhe khong hi. Aman chu
alauhuaikei di, heutu ten ana hilhkhinta uh, a khosung mahmah ale SET
OPELATOL khat om ahi chia agen in hon lungmuangsak panpan I chihleh
thakhat in ka malam uh metre 150 vel apan BOOM!!
Ka kiguih nasa khopmai, ka ma apai, Josep hong hoiphei duai a kana
man man hamham a hilehle agik toh ka nervous jiak in lenkip zoulou in
kanih un ka puksuk ta uhi. Ka KOMANDAR Pa uh mangbang leh chimoh kisa
in, ''na zangtang mahmah uhia? Bangdia hon na kap uh e? Nou hon huhdia
hong kikuan a'' chi in a kikou phei loiloi hi, Joseph ka phot touhleh
sisan in ana pumtuam a, a liang guh kekhelou chauh in ana liam nak
mahmah hi. Ka dial ka lakhia a ka tuamsak/gaksak lai in ka gaal lam
uapan,' zomi nahih ualeh na thau te uh nusia in hong ki show uah' chi
in hong kikouphei gemgam uhi. Kou le ka thau te uh single barrel 8 leh
adang KOPZA THAU bangjah hiam nusia in ka kishow phei neinai uhi. Ka
lawmpa Joseph lou le midang khat analiam a, duty post ah ka enkol jual
uhi. A thu khonung katheih thak ualeh, ka vapai ding lam uh a na kihilh
chiang khalou ana hi lim ua, huaijiak a mi 50 vual di khawng a kholam uh
juan a kavapai ualeh, melmate di hon na sa ua kiging tak a ana pang a
'puumpi' a hon nakap uh ana hidan hi. Vangphat huaitak in a puumpi uh
ngiim na ana tungpai deuh kha a mi tawmchik kia kaliam kha uhi.
Huchilou hileh tampi mahmah liam di, gentaklouh a si le bangzahiam ka om
ngeingei di uh. A puumpi uh lah, a lawng dia elektrik khuam, a monglang
khatlam khetpek, thauvui 2kg khawng a thun uh, a tang dia sikkilh,
siksia, leh adang sik chi tuamtuan 5kg khawng ana thunkhawm uh ahi a,
lauhuai tham veve hi.
Ka gintaksang in a khua ana lian vanglak a, dispensary khawng a
omjiak in ka liam te uh dressing leh first aid honna hihsak pah ua,
huai DISPENSARY a nurse nu kamuh leh kumkhat phial paita a ka lungtang a
om, ana ihmu dinden pen honphawng tahi. Amel ka muhtung in KHUPCHING
di kasa man a, ka va enhoih thakthak a, a kibang petmah uhi.
Huai nurse nu en kawm a hunpaisate ngaihtuah a kadin dedu lai in ka
nunglam ah 'aw' kazak ngei khat in, 'U u, bangchik a hongpai e?'
hongchi a, kiguihphial in ka kinunghei vut a, ka naunu kum 11 mi lel
puanak hoihlou chik khat silh in ana ding nipnep a, ka en a, ka
paukhethei zok kei, kava pom a ka mittui khamvuallouh in hongluangkhe
zungzung a, huchia naupang khat pom a mittui pak lekluak a ka omlai kha
ka lawmte leh nurse nu ngei in lamdangsa takin honna en heuhou ua. Ka
naunu'n, . . . ka khua uh a kaatlai a taikhia a tua ana omna khua uh ana
bel ahihdan uh honna hilhban ah huai nursenu te inn a kanu toh
tung/kinga uh ahihdan te honna hilh hi.
Ka lawmpa Joseph liamma a tuamkhit un, ka KOMANDAL PA uh kiang ah
vapai in kanute hiai khua a om uh ahihdan leh ka naupang pompen ka nuai a
chet, (ka gintak nawnlouh nungua hongpiang) ahihdante kava hilh a,
amaute mu din kava kingen a, aman le lamdang sa mahmah kawm in,. . . .
Eh huchidan ana hi maw? Keile kongpai di, enle nanu I mu ut vele, chibai
bek I hong buk samkeidia honna chi vanglak hi.
Huai khua akipan in khodang a kisuan khiat ding in order hong paipah
a, ka lawmpa Joseph liamma adam nailouh jiak in kou tegel omden ding in
ka KOMANDALPA un honchi a, ka kipak gusim heuhuau mawkmawk hi.
Kiknawnjual le, huai nursenu kha amin Ngaihching ahi a, a inn ua ka nute
om uh ahihman in amah ka muh ut kawm toh, kava hohmun mahmah uhi. Aman
le hon ngaina hi'n kathei a, kanu leh kanau kiang a kadot chiang in,
afel thu te, mihehpihthei leh zaidam ahihdan agen ua, kanu'n, 'nang
nahongtun nung a siam/fel diak' achi zomah hi. Sun chiang in khosung
tangval/papi laa te duty na khawng ah kava hohzel ua, akhenchiang in
Ngaihching duty na Dispensary ah kava omnitum zel uhi.
Kha khat vel ka omnung un Joseph liamma le hong damsiangta a,
kalawmte uh join dia sapna kamuta uhi. Kapaikhiak dek un Ngaihching leh
kanuten khonawltan honkha ua, lampi ah Ngaihching kiang a kanute ana
ompih jiak ua kipahthu te gen in kisuanlah huai kasakdan khawng kagen a,
aman kisuanlahnadi bangmah omlou ahihdan leh kapa damlai a amau adia
panpihtu ana hihdan te, apa gen apan ana theihte hon gen a,
ahihtheihliai leh akhua uh vapha nawn pah teitei di'n hon ngen hi.
Kanu'n bang dang le genlou in, omnapeuh a Pathian phawk ding, thumna
neih gige ding ahihdan leh, amau le kanau toh abaihtheilam a ka Pute
kianglam a paisawm ahihdan te uh agen hi.
Ka omna di khua uh katun un nitaklam annhuan hun di vel ana hita hi.
Va ki-report pah in, kisil din a LUI lam uh zuan in kalawmta un kakizui
khe naknak uhi. Kisilkhin pan, puanle silh hoihmanlou in kalawmte uh
khat hongtaisuk a, Sir pan kin akin in hongpai uheh achi, honchi a,
koule lungsim nuamlou pi in ka tai thoh zozen uhi. Inn katun un ka
KOMANDALPA un, melmaten hongluh sawm uh, kigin ngai ahi. Chih gen in
kisa ngal din honsawl hi.
RIFLE .303 khat, magazine kithuahsa, atang loose a
saphuklai/polyethene sung a tang 5 sang a tamzaw deuh di honpia ua,
khedap khau ka khih laitak in khokhunglam apan thau hongging pah
petmahta hi. Kouleng ka thau utoh diangkhia in khosung ah posi latou
chatchat kawm in thauging nalam kon naihtou tei ringot uhi. Ka naih
hiaihiai uleh thauging hong ngaih deuhdeuh ta, innkil khat apan thauvui
khu ka galmuh a, kanung a single barrel toh gamlasim apan hongzui
Joseph hon delhpha din ka khut in kasam a, a hongtun touh toh kiton in
huai innkil a ompen kana kap tuuk manta. A thautawi vala ding chi a kal 3
khawng kasuan phei patleh kakhe bul a suang neu chikchikte theh in hong
kitheh phungphung ua, leivui a khu phitphit a, kin a kin in katai kik
a, kalawmpa kiang ah kava bok chat hi. Ka gen ut chu kholuhna a sawtpi
ngim vengveng a kap', chih thil haksa pi ahi. Na ngim dikma a melmaten
nang hoihtak a hon na ngim man di uh ahi chih theichiat le ahoih di.
Melmaten LMG, G3, AK, chihkhawng in hon burst suk phungphung mai ua,
kanunglam ua kadaksuk ualeh ka KOMANDALPA un Ki-Retreat din akhut in
honna sam a kou le ami muchiahkei mahle ung kagintak na munmun ka ban
kap ua, huaizoh in ka taikhe suk ta ua. Khosung a mualsuang kidoh liah
khat ah ka KOMANDALPA uh mi khat toh ana tu keukau ua, naklah zen in
akiang uh ka tungsuk uhi. Sir, bang chi di? Ka chih leh, Amau a van uh
hoihlua ban ah ei sang a tam nei zaw uh, ikihep khiakphot uh ngai', hon
chi a, thau ging vengvung nuai ah awl in khotaw lam ah ka ki hem khesuk
ta uhi. A puaknat huai chu,vanzat neih hoihlouh ziak a ikihepkhiak aleh,
melmaten hong luhzou uh chihna ana hi phiangsan vial hi.
Khotaw lam gamlak a dakkar thum dingkhawng mahmah vuallel tak a kava
kibuk nung un khomial nuai ah khosung kalut nawn naapnaap uhi. Inn kang
di teng ana kangkhinta a, khosung mite le a kibuk namun chiat uapan ana
tungkimnawn ta ua, mi bangzahhiam tak melmaten Hallsung a a khumkhak uh,
a kaplup te uh ana buaipih ua, numeite nakpitak in ana kap uhi.
Mi innkuan, a inn uh kang te, a kanglou te in a a zintung thoh mai
ua, a zingkal khua hongvak in ka KOMANDALPA uh kiang ah, ka mi kapkhak
namun va en him2 le eivele, chi in ka zawn a, kava et ualeh sisan chu
ana om ngei mai a, himahleh thildang bangmah ana om nawntakei. Sun nitum
in Hantou in kabuai ua, nitaklam in duty din sawl in ka om a, Joseph
toh ka kisapah ua, ka thautang 3 kia ana om a, adangteng ka na kapbei
man ana hi maimah hi.
Kha khat phial ka omnung un khodang ah ka kisuan ua, arms leh ammo
kiching deuh ta ahi dia, US carbine bang katawi khata hi. Ka lawmpa
Joseph in ka Rifle a tawi ngal a, akhomite toh bang ka kimeltheih ta
ua, nuam kasa dek panpan uhi. Sa khawng bang hon goh ua, khozangzaang in
ka nekhawm laihlaih ua gallai himahleh a nopna khat a om lehlam vanglak
hi.
Ni khat ka omna khogal uah melmate om uh chihthu ka za ua, om taktak
uhiam chih theichian ding in papi khat khawnvaktui lei di kawm a ka
sawl ualeh ana muanmoh ziak un ana hentang ua, ni nih nung inle
ahongtungkik naikei lai a ka lungsim uh a nuam theikei, a zi leh atate
bang in hon mohsa mahmah ua, a sidia ka sawlkhiak khawng uh a hisak uhi.
Amah pau tuamtuam asiam ziak a kasawl uh chu ahi a. Huchia ahongtun
theihlouh tak in kou le ka pilvang sem ua, ka giahna inn neite uh le inn
dang ah ka giak khe sak ua, sun in le hoihtakin ka duty gige uhi.
Pilvang tawp ikichih chiang ale thil I tuah di te kituak thouthou hive
aw. . .
Zankhat zingkallam khovak kuan in duty ten thau nihvei hon
mekging ua, huaikhit chu ka giahna inn uh hon bukap uhi. Innbang zutna
neng khawng in hongkha zungzung mai a, kindeuh a thoukhia in ka thau uh
leh ka vanteng chiat uh man in innkhang lam a kongkhakneu ah ka
kihenpawt thei vanglak uhi. Ka thau leh atang koihna bag ka na tawikha a
mialnuai ah thaugin nalam kap dotdot kawmin gamlak ah ka kihemkhia uhi.
Sawtlou nung in ka giahna inn uh honhal petmah ua, Rifle tang zakhat
val ka lakmanlouh uh a kang puak vengvung hi. Vangphathuai takin inn
dang halmanlou in amau leng a kihemkhepah uhi.
Azing khua hongvak a, ka omna chiat uapan khosung konnaih khawm ualeh
kana damkim ua, aliam leng ka omlouh man un kakipak mahmah uhi. Duty
apang te le bangmah ana chikei vanglak ua, ana mumasa lou hile uh si di
ahihdan uh uangtakin agen ua, ka misawlpa uh le hon khahkhia ua, hong
zingtun thelthal hi. Kou hi in khomipi te hitaleh akipaklou ka omkei ua,
vok khat in asihloh tave.
Huchin a BUAINA pen hong
veng pianta ahihman in Heutu ten hon samkhawm ua, ka thau chiat uh leh
kavan te uh pua in mi tamkhop kava kimu khawm ua, mimal chiat in gam leh
nam i itna ziak a i nam humbit zou ihi, tun le innlam ah nava paiphot
di ua, a poimoh leh hon kisam nawn di, mansa a nana om di uh chi in hon
khakhia uhi.
Koule mi 8 Lamka lam zuan in bus tung ah kong kisawi suk
natnat uhi. Lampi ah ka houlim suksuk ua leh heutu te khat in ka
paikhiak ma ua kakiang a agen cheuh kava genkhe kha laizang a, tunung
sawtlou a NAM SEPAIH kila pah di ahi na ut ua leh hongpai un' chih kagen
leh kalawmte a ut thei mahmah ua, Joseph bang a phurpen zomah a, hey,
nang, tuma a le sidek tak, lauloumaw? Ka chih leh, 'a tuung a chu lausim
ing a tua chu nop sak a sak thoh ta kahi, chi'n hondawng vanglak hi.
Lamka damtakin ka tung ua, keile koimah a baangtuan se lou in kapu te
inlam kazuan pah a, huai ah kanu kanaunu leh ka ute ana om neinai uhi.
Heutu ten pocket money dia honpiak uh bangzahiam in zinpak din nek
theih ka puak a, ka naunu akipak khopmai, innsung a omkha liaisiah a ban
hawm a, aval teng innveng te nasan ava hawm phaban hi. A zingkal in
lampi a sakhi sa kalei, ka huan ua, kapi'n lim asa lua a, agen mangmoh
hial hi.
Ka pu'n ka kompound uah na inn di uh i bawl di ua, hiai ah
teng un achi a, kanu ut mahleh kisuanglah ahi dia innluah di zong zaw
le la? Achih aleh kapi' ngaihdan ahi hetkei, kanu kiang ah 'hiai ah om
le uchin na buai ni khua ua en hon kipanpih thei di, kou kabuai chang
ua nou hon panpih thei di, innluahman lah hon kila mawkmawk lou di,
huaiban ah hiai i nau neupen uh skul kaiman kasik vek sawm ahi, ahon
chikhia bangjaw. . . . . Kanu khitui a luang maimah hi. . . .kipahluat
jiak in.
Hun bang tan hiam nung in, zinkhiak kasawm a
kanu kahilh leh ''napu dong in, amau hon itlua ua i omna di inn hoihtak
hon bawlsak ua, amau thu lou a na om louh di ahi. Ka pu kiang a zindia
kinget di ka huphulh petmah, ngentel tak a hon dong teitei di, nitak in
lin kawm pipi in kava gen a, ka huphulh lawk bang ngei in chipchiar tak a
hon dot khit in honphal vanglak hi.
Nitaklam dak 3 lakvel in kalawmpa Joseph toh Ngaihching te' khua katung uhi. Lampaina ka tawl tuak mah2 ua, ka vul niilneel zozen uhi. Ngaihching te inn a va zintung di ka ngamlouh manin, tuma lam a Joseph tunnate inn ah keile kava kinga a, nitak in Ngaihchingte inn ah kava pawt ngal ua, Ngaihching te inn a kava pawt un apa kholai vak di toh a inkong uah ka kituak ua, Eh! Chik a hongtung uh e? Chi a hong chibai kawm in a inn uah honglut pih a, Ngaihching ei, hiah na Ubawmte hong hoh uh ei, avan uh ana sang ou, a chi lut la la a, Ngaihching le kavan te sangkhe dia a hong kisakleh a omlou pi ana hi a, bangcik a hong zin uh e? Ubawm, Useph? Na van te uh la? Chi in hon na dong salsal a, ken nuamsa chiahlou ka hihman in, Joseph kiang ah 'dawng in ' chihna dandeuh in ka tong in kaphu zauh a, aman le nuam salou pipi in Vungbawi te inn a hong kinga khin ua. . . Achih pat kiangkiang leh Ngaihching in kindeuh in. . . .bangjiak a hiai a hong kingalou uh e? USEPH, nangchu kon theisiam a ka Ubawm chu hiai a ahong kingak ngei ngei di ahi. . . A pan ana pautuh a' tunitak ka dongtakna ten mou thubuai anei ua kahoh louh theihlouh ahi, Ngambawm, navante vatuah phei unla, keile kava pawt di chi in hong pawtsan ta a, huaitak in Ngaihching in ' pai uale, kuva iva haikawm unna van vala ni uh chi hon pawtpih a kava kijui phei laihlaih uhi.
Joseph a hong omden a, ka paikik lam un Ngaihching in ka khut la in a liang ah hong koihsak kawm in' ash Ubawm, nang hongzin haklua, en hong na ngai law man hang a. . . Chi in ka kawng ah kipdeuh in hon kawitou mai a, kei le kipasalsak kawm leh nervous kawm pi in. . En le hon ngailua hang a, hun lemtang masapenpen a honghoh ihi. . . .chi in aw ling sim pulhpulh kawm in kadawng thei hamham a, bangmah kal paimanlou in a inn uh katung guih tamai ua, inn katun kik tak un kuamah ana omkei a, anu pindan a omdia ka gintakjiak in ka pautam ngamkei a, meikiang a sawtsim paulou a ka tut nung un a nu omna kadot leh a khokiang ua Dorka khawmpi a hoh ahihdan hon hilh hi. Thu tuamtuam gen a sawtkhoptak ka tut nungun......
©Siamsinna leh VakiangbuNitaklam dak 3 lakvel in kalawmpa Joseph toh Ngaihching te' khua katung uhi. Lampaina ka tawl tuak mah2 ua, ka vul niilneel zozen uhi. Ngaihching te inn a va zintung di ka ngamlouh manin, tuma lam a Joseph tunnate inn ah keile kava kinga a, nitak in Ngaihchingte inn ah kava pawt ngal ua, Ngaihching te inn a kava pawt un apa kholai vak di toh a inkong uah ka kituak ua, Eh! Chik a hongtung uh e? Chi a hong chibai kawm in a inn uah honglut pih a, Ngaihching ei, hiah na Ubawmte hong hoh uh ei, avan uh ana sang ou, a chi lut la la a, Ngaihching le kavan te sangkhe dia a hong kisakleh a omlou pi ana hi a, bangcik a hong zin uh e? Ubawm, Useph? Na van te uh la? Chi in hon na dong salsal a, ken nuamsa chiahlou ka hihman in, Joseph kiang ah 'dawng in ' chihna dandeuh in ka tong in kaphu zauh a, aman le nuam salou pipi in Vungbawi te inn a hong kinga khin ua. . . Achih pat kiangkiang leh Ngaihching in kindeuh in. . . .bangjiak a hiai a hong kingalou uh e? USEPH, nangchu kon theisiam a ka Ubawm chu hiai a ahong kingak ngei ngei di ahi. . . A pan ana pautuh a' tunitak ka dongtakna ten mou thubuai anei ua kahoh louh theihlouh ahi, Ngambawm, navante vatuah phei unla, keile kava pawt di chi in hong pawtsan ta a, huaitak in Ngaihching in ' pai uale, kuva iva haikawm unna van vala ni uh chi hon pawtpih a kava kijui phei laihlaih uhi.
Joseph a hong omden a, ka paikik lam un Ngaihching in ka khut la in a liang ah hong koihsak kawm in' ash Ubawm, nang hongzin haklua, en hong na ngai law man hang a. . . Chi in ka kawng ah kipdeuh in hon kawitou mai a, kei le kipasalsak kawm leh nervous kawm pi in. . En le hon ngailua hang a, hun lemtang masapenpen a honghoh ihi. . . .chi in aw ling sim pulhpulh kawm in kadawng thei hamham a, bangmah kal paimanlou in a inn uh katung guih tamai ua, inn katun kik tak un kuamah ana omkei a, anu pindan a omdia ka gintakjiak in ka pautam ngamkei a, meikiang a sawtsim paulou a ka tut nung un a nu omna kadot leh a khokiang ua Dorka khawmpi a hoh ahihdan hon hilh hi. Thu tuamtuam gen a sawtkhoptak ka tut nungun......
Comments
Post a Comment