LAWM IT

By ~ Lalkhuptong Lalk

Achiil uapan un Muanpu leh Tuangpu lawmta kingai leh ki-it mahmah ahi ua, sep leh bawl ah hitaleh akikhah suah ngeikei uhi, (akin di lamlam delh na in kon short cut di aw). Hun leh kumte hon mualliam jel in Tangval etlah huaitak in hon khangkhe tuaktuak uhi, numei gentak louh akhosung mipin hoih asa thei mahmah ua, kho lianlou chik ahihman in Muanpu leh Tuangpu a theilou a om kei uhi, zilna lah sanglou pawl 12 tuak zou khe hamham in, anu apa uh ahuh theih bangbang un huh chiat uhi.

A khosak na uh haksa mah leh Muanpu leh Tuangpu in bel nopsak in sakthoh hi. Kial hon tungin zo amau khua kia loungal a bitna om kei himahleh sawt bit dile ahi nawn takei hi. Huchih lai in Muanpu in Tuangpu kiangah "Lawm it tuang ei Mumbai ah NGO ah sepna di om eive huah iva pai dia hiai kial hunsung iva sem dia achih leh Tuangpu'n Muan hihial dah heh I khopihte tuak leh thuak bangbang I thuak khawm dia inu ipate tuak inle hon phal din ka gingta kei hon chi a, Muanpu in zong Tuang ei na gen adik mah himahleh ei hiai ah om denle I maban di ngaihtuah hetlou in hiah om den lehang I tu I tate le hiai mun mah ah hon khanglian dua, ei sepgim teng hon sem nawn leuleu di ua I khang I khang a hiai munmah ah tang denkha di ihi, khopi lam ah pai a tulai khovel paidan toh kibulh tuah a I hing kul ding ahi lawm ei, I khamkhop zaw kimu gige na a, khopi a paiziak a I khamval va mu di chihna hilou in himahleh ei khang adia hoihna leh tulai khovel toh kibulh tuah theih nadi azong nuamzo leh awlsam zaw a nek leh tak di I zon theih khak leh chizo hi inga achihleh Tuangpu'n zong dik sa lua in bangcik chiah I zinkhe diale achih leh Muanpu'n zong jingchiang jingkal in kipan le chiin anih tuak un innlam hon zuanta uhi.

Zingkal baihtak in lawmta tegel hon kipan kheta ua, bangmah buaina omlou in Lamka sawt louchik in hon tungpah uhi, Lamka ah tawlnga man louin phailam manoh pah in phai apan Guwahatti zuan ding motor ah anih un hon tuangnawn leuleu uhi, Guwahti atun tak un alawmta un thupi in lamdang sa mahmah ua, inn sawng, lampi leh thilchi tuamtuam te amit uh taisak mahmah uhi, Lamka guest house ah hong tawldam ua, anih un hong kihoulim ta uhi, Muanpu in lawm I tungna di mun I tunchiangin a nop awm maw, lungke lou in I ma ah haksatna te I phutou jel di aw chi hi. Tuangpu'n zong awle Muan I nih in pangkhawm denle I zawhlouh di pakhat le omlou ahi...chiin dak 2.30 bang hon gintak in amau le a khualzinna uh sunzom din hon pawt kheta uhi.

Muanpu leh Tuangpu zong nidanga amuh ngeihet louh uh Rail te bang hon muta ua lamdang sakna toh anih un kamka zen in ki-en tuah hekhawk uhi. Apai hun lah hita amaugel a khatvei na chihmahtak buai petmah ua, atawp in TC pa kiangah a ticket lak in a tutna mun du muthei hamham uhi. Huchiin Guwahti hon nuse ta ua, a khualzinna uh hon sunzom tou nawn uhi. Ni 3 vel a tuang nung un Mumbai khopi hon tungta ngei ua, koi mun ah zuan di, kua kiah om di, chih te tuh a lungsim guktaka abuai na pen uh himahleh a khopi etlawm dan te in a mit uh sutai mahmah in mit pheman lou zen in dak lehleh uhi. CST (rail station) gei ah hon pawt khiak a sawm pah uh himah leh a pawtna di kong a muh a haksa khop mai a hoh patna uh ahihman in, a pawtna di a zongzong nalam un a kholui te uh khat va maikha uhi. Muanpu inle, Eh! Sangi lah nana hi a, 'koi ah' bang hih' bang chidana achih leh aaaa Umuan leh Utuang, oi bangchi dan a nougel hiai lak ah chih toh thuah ngal hi.

Tuangpu in zong Sangi kiah 'hehe nang mudia hon hoh keive uai chia nuisim phiphelh kawm in hon chiamnuih a, Sangi in zong kei maw hiai ah ka omna sawtsim ta huai mautam kum a kou kapa tetoh Lamka ah kipem unga chihleh kapan sepna nidang a try pen hon mu zenzen a hiai ah kipem lunglung nawn kahi uh hon chi a, Muanpu'n le aw huchidan ana hi maw mang vengveng kon chih mahtak achihleh tua koi ah hoh dek e a hon chizom a, Sangi in zong paidek ta kahi, hon zui un khua le na theinai keidi ua, kou inn ah ipai phot di uh hon chi a, lawmta tegel inle huai na chihkal eivoi ka ngaklah uh' koi veng ah om uh e chiin Muanpu'n zong dot beh lai a, Sangi inle kou maw eimi veng a chih uh Santa cruze ah teng kahi uh, chiin Church gate (Rail station for west) lam hon zuan ua hon paita uhi. Station apan hon kum khia ua, Bus a sawng neite bang hon muh chiang un a tum matan a pai ut kei uh a en koi veng2 ua, Sangi a guk nuih zel hi. Sangi te inn hon tung ua, anihtuak un tutna ale tupeih a om kei ua a kizan pahngal uhi. Muanpu in ziinling amaw lawm, ka lingling ka chi hon chih ualeh Sangi inle Train ah hon tuang na hih chiangua hon sawi lailai di eivoi, nikhat bang hon sawi dendi ahi achihleh aw chiin hon mitsi uhi sawt lou chik a mitsit sungin Sangi in a inn luah na di uh pamzek ah mu ahihlam gen in huai lam ah hon pai ua, a tawp in chu a tung khongkhong uhi.

Sangi inle inn neite houpih in kou kiangah sum tamlou deposit di hon ngen a koule ka pia uhi, nitaklam dak 6.30 bang gingta ahihman in Sangi le ann huan hun dek ta chiin pai din kisa a, Muanpu inle ana khol dih singpi bek I dawn kei dua chiin khou a Tuangpu in " hahahaha eileh lawm ei nang singpi hon awm olem achihleh Muanpu le kamsiam man en kithuak loh zel hotel ah dawn suk ni uh hiai mun ah zaw koi kil ah bang kikoih a, huailam ah bang om ahia chihle kithei nailou ahihchia maw chiin a vek un hon pawtkhe nainai nawn uhi, singpi dawnna ah Sangi in nou ahimhim a bang hih dia hon hoh uh e, hon chih leh Muanpu in zong hon miss lua hanga hon zin khemkhem ivele a chih leh Sangi inle oi hiai mipa chiin tumphei ek a, Tuangpu'n kou I kholam ua thuthang khat za unga huai ahihleh NGO a sepna awng om chih ahi a huai a sem dia hon pai kahi uh, a hon chihleh, aw, a awng laitak eimahve zingchiah kon va phak pih di aw achihleh Muanpu in keila chiin Sangi in zong nang maw inn ngak di chiin hon kichiamnuih uhi. Singpi dawm zou Sangi zong innlam chiahta in lawmta nih tele inn luah na lam zuan a hon pai uleh.....Anih un a inn luahna du mangnglih in manggop dek in kin a kin in Sangi va sam kik uhi. Sangi le nuihsan chemcham a va hilhkik nawn a, huchi-in, huaini chu buaina khukpi ah luttuk in akingai uhi.

Zingkal dak 8 vel in Sangi in va tawn a, a thum un hong kuankheta uhi. Khopi sung ahihlouh man in dakkal 1 leh chih a bus leh local train te ah a tuang nung un hon tung kongkong ta uhi. Sangi inle va ngakpih zek in, Tuangpu pen hon pawt khe pah in Sangi kiah hichiin hon gen tahi, Sang ei post awng mi khat adi chouh ahi a, ka lawm it Muanpu toh tam veipi ka kisel nung un aman lem hon sakpih a amah hiai mun a sem din guan ahita achih leh Sangi kipak lua in Tuangpu koi phei mawk hi. Muanpu le sawt lou kal in honpawt khe nawn thilthil a, dahmel tak in zingchianga sem pah di ahihdan gen hi. Muanpu bel aheh mahmah a, a lawm it Tuangpu toh kizui thei nawn lou a amah vuak a sep di pen lit chih tak in lin petmah in Tuangpu bang hehsan mahmah hi. hong kiklam un site seeing dan in Sangi inle Gate way of India khong etpih in tuikulh a om Elephanta ave khawng va etpih in Muanpu leh Tuangpu a mittai petmah hi. A kiklam un Sangi inle pai didan khawng hilh in Mumbai map khawng leisak hi, huchiin innlam hon tungkik ta ua, Muanpu in bel Tuangpu a houpih hetkei.

Tuangpu inle a jiak thei lotel ahihman in hichiin hon gen hi, Muan ei hiai jiak a hoh ihi a maw nang na chinnak leh keizo kipak lotel kahi kenle company khawng a bangbang septheih om hia chih ka zong tei dia, inih in I semtuak thei thou dia innlam atele sum ikhak theithou di a hon chihleh, Tuang sum thu ahikei ka buaina ei lawmta chik mah ale kikhen ngei lou sep leh bawl a hitaleh kitaisan ngeilou tua hiai khopi ah ilut takin maw, iki khen khak di kenle huai NGO apen ka sem kei di chi tinten a, Tuangpu'n le hilou e Muan eimah thuthu a pai theilou ihi hiai khopi ah zaw Sangi chouh phial ahi eigel lawmta ihih lam hon thei, huaijiak lawmit aw I sep nana a I lungkimdan I siam a hon siamtu pahtawi zawkdi ahi, nang huah sem kei leteh midang vaite khawng tangmai dua hi kasakei deuh, hon semjel inla post a awng nawn chiah nang kiangmah ah hong sem di kahi lunglau ken chiin khamuan a Muanpu'n le diksa hileh kilawmtak in a lusungau a, huchiin hon lum thei khongkhong ta uhi.

Ani nawn in zaw peih lou pipi in Muanpu tuh hong kisa ngeita a, Tuangpu inle amun tan vakha in huchiin a hun te uh hon zang bei zel ua kha khat divel huchia a hunte uh a hon zat nung un, Sangi inle bangthu leh laa a omta a chin kan din va hoh a anih un ana om geihchet uhi. Sangi in Muanpu kiang ah a sepna khawng leh adangdang dongkual vek in kihou lim tiptip lai, Sangi in eh! Utuang nang 12 pass na hih leh kou a ah hon apply sin himhim ve post khat awng eive hon chih leh Muanpu in zong, lawm hih pah ziang di himai zingchiah va en khia inla keile kei mah in ka kuan theithou a chi'n gena Tuangpu inle lem sa in, kam awng pen chu hon mungei ta hi. Innlam tele thu leh laa teng hilh suak vek in kipak tak in a om na chiat uah nuih mel belh vek hi.

Tuangpu inle a sepna hon join ta ngei a a gintak khel a nuamzo ahih lam a theih in kipak petmah a, Sangi kiang bang ah kipahthu gen2 mai hi. Niteng a kuan khom gige leh kihou na uh pai hoih zelzel ahi ngei dia amau gel kikal ah itna lamdangtak in hon piangkhe maimah tamai hi. Alawmpa theih di lau ahihman in im chihtak in Tuangpu leh Sangi in im bikbek a kingailou dan bangin om siam mahmah uhi. Muanpu le a sepna apan kaisang zelzel in khovel ah sum mah hon buaipih piansim tahi.

Huci a hunte in hon mualliam san zungzung lai in Muanpu leh Tuangpu a lawmta hih na kal uh haih vuallou in kigamla hiaihiai hi. Adiak in Muanpu in alawmpa Tuangpu hon simmawh pian simta a, hih na lampouh a sel in kinak pih sawm teitei hi. Himahleh Tuangpu in alawmpa a it bang in it gige a, unau khat bang a kikoih na pen uh tat sak ngeilou hi. Muanpu'n a khen chiangin inn ah a lawm thak te tonpih sek in zu leh sa mehkhawm nadi khawng in zang zel a Tuangpu a pau ngeikei, Muanpu'n a kham tatak chiangin Tuangpu engbawl jel in kei loh toh nang lawh koi a tamzo diale Tuang, Sangi toh bangjah vei na lumkhawm khata uale chih khawng in kou zialzial in enghoujel mahleh Tuangpun bangmah achihkei. Hun lem a muh chiang in Tuangpu'n a lawm it mahmah thuhilh jel a, himahleh a ngeingaih kei, huai ah uite, kholak ah inn neilou te va thuhilh oh, ka status non suniam chihsan gige hi. Sangi inle tuathute thei milmial in Tuangpu kiah dong zihzeh mahleh Tuangpu in hilh ut hetkei hi. Kou lawmta kikal ahi nang theih angaikei kon itnak leh nang buaipih a kul kei chihsan jel hi. Innlam apan phone a hongpai chiangin nou lawmta na hoihtou jel na uh maw a chih chiang un zaw Tuangpu'n gen di a theizok kei, innlamte Muanpu hichituk a kikhek lam theisak ut lou ahihman in ki-awi lou pipi in zuau khawng phuah tawm jel hi.

Tuangpu in Muanpu kiangah lawm it bangjiak a hiai ah pai kha ihi mahmah a, hichituk a na om dilam thei khawl himaizen lengzaw hon paipih mahmah lou di hi'nga, kua vangtah jiak hiam? Muan ei, innlam ah kik nawn mai ni hon chi a, Muanpu'n le nang eivele hiailam ah pai di honchi kei moh na sa maw? Nang na utleh kik lalaih ou na pi leh na pu toh, zingchiang apat ka office toh kinai deuh ah inn ka luah sawm nang toh omom le bangmah a piangkei di, nek leh tak di lah kei sum ngen silh leh ten di lah kei sum ngen ah kinga a hon chih chiangin Tuangpu'n hi zenzen lou e Muan I pai nana ah pai khawm a I teen nana ah teng khawm di ihi chia I kichiamna ngilhta na hiam? Chiampel sak kei ni lawm aw, a chil apan a hichibang thu na kam apan pawt din le ka gingkei koi lam zinmang hiam, na lungtang hon hei kawi, lawm aw khatvei bek geel thak himhim dih ve chiin neem tak in hon chi ngutngut a, himahleh Muanpu bil vang hukbing mah bangin bangmah a lut zou kei, abang kichiamna ahia na gengen huai lai toh tulai hun kibang nawn sa na maw, huai lai a hichutuk a sum hau hilou kahi aw, bangmah gen nawn koh kaza ning kidiktat sak zomahlai, nengchik ale hon panpih nailou neive paupau nawn koh na aw ging mahmah le za ning ka hi, ka bil ah le lut thei nawnkei na panpihna ka poimawh kei mangpha chinn room dang ah lut san maimah hi.

Tuangpu le khasia kisa in a nunlui te khawng hon ngaihtuah kikthak hi. Innlam ah amau gel ihmut kal chih louh a kikhah suah ngeilou hinapi hichituk a hon ompen maksa mahmah a, nek leh tak silh leh teen lah amah sik vek himahleh aman kei hih chinuam duai lou hi. Muanpu'n lah a sum muhsuah sa te zu man khamtheih man in beivek jel a, huaite khawng a ngaihtuah chiangin lunggim pih mahmah hi. Muanpu omdan lah inn lam ten theilou ahihman un Tuangpu'n innlam te sum a khak di chiang in Muanpu kiah genjel a himahleh Muanpu'n a deih ualeh hon kilak maikei dua chihsan jel a huchih chiangin iplah mahmah mahleh bangmah gen tuanlou in a sum khak dite kikim hawm in Muanpu sungkuan toh amah sungkuan adi, a lawh tawmchik hinapi in khak khawm tiptip jel hi.

Zingkhua hong vak phiphelh in Tuangpu le office kuandin kisa a, Sangi tawnphei in office lam manoh uhi. Huchih lai in Muanpu le kin thei lamin hon kisa vivit in a van tengteng leh Tuangpu'n inn lam te khak dia a lawh tamlou chik a book kal a asel ana la in, laithem neuchik khat tak vevauh in Tuangpu gamlat san din manmoh tak in hong kisingsa hi. Sangi leh Tuangpu le office kai tawp inn ah hon lut uleh inn thaang zeizui a hon mu ua Tuangpu mit chu a dong khop mai, a khasiat na mittui hong tak khe keuhkeuh te Sangi in hehnem kawm in nulsak jel hi, huchih laitak in phone hon ginga, Muanpu ana hi a hichin hon gen ta hi.

Tuangpu mah nahi na maw, innlam ten ka thu a hon dot khak zenzen ualeh nang toh om khawm den dan in na gen di aw, nang toh om khawm ka ning gop a pawt khia ka hi kon paikik nawn ka tum himhim kei, huai banah ka omna le ka hon hilh kei dia, hon zong le hon zong kei un, lawmta ihih na thu himhim a gui neng jam om tengteng le a mang vekta chi'n Tuangpu pausak man lou in koih vat maimah hi. Tuangpu a khase petmah mai, a lawm it mahmah in taisan ahih man in thawmhau kisa leh a khen chiangin amah moh kisa in, kingaise vungvung jel hi. Hong kipese dedeuh in laithon khat hichin hon gelh hi.

"Mumbai vangkhua aw, a khua leh tui in na etlawm nate hon jem kimvel hi. Kei mi liangvai tak bang doh ai tanga hiai na etlawmna te ka mit ah a belh louh, bang siktui dawn kha a hiai mun ah ka lawm it na bualna gamlei ah non tan sak mai, ka selung mawl man hiam, gamlei gimnam dik louh man hiam, seenchiil ka mom lai ua pan a ka kizoppih ka lawm it, bangjiak a hichibang lungsim nei na hiam, lawm it aw hon kik nawn in. Ka kiang lam hon naih in" chiin kap kekeuh kawm in hon gelh a baan gelh a zop dek chiangin a khut ling toh a kah na toh gelh zou nawn mahmah lou in mangpha cih gelh in, khauhual hon la in Fan kibat na ah hon bat in panmun di bawl a, kikhai hon sawmta hi, a gawl a puanthem hon koih in huai puantungah a khau hon koih in kap kekeuh kawm in, a dingna table siktal in hon kikhai leh Sangi le va hoh kha chet in kong sunglam ah kikilh hi. Kong kuihkuih napi in kua man honglou ahihman in kong vangah a etguk leh Tuangpu kisat lai a khe kang veivei hon mu a kin a kin in inn neite sam in va hon kheman hamham uhi.

Dakkal thum divel mawngmawng khophawk lou a om nung in Tuangpu le hon harh khia in, Sangi a kianga kidiik keuhkeuh hon mu a, Tuangpu'n le Sang ei hon ngaidam in aw achih leh Sangi inle bangdang gen lou boh phei in kawi tinten in Utuang nang tellou a hiai leitung ah ka bangchi khosak dila, ka it masak nahi a, a tawpna dile nahi hichibang lungsimte nawlkhin inla, na lawmpa hon phawk nawn kei leh kei ka om na vele Utuang chi'n kidiik huthut kawm in gentheih gen mawh in hon gen hi. Tuangpu'n le Sang ei ka chiil ua pan a kitaisan tuah ngeilouh uhleh haksak nopna leh dahna a hon thuakpih ka lawm it ahihman in hichibang thil hon tung mawk pen ka posiam kei a huaijiak a hichibang haihuai thutanna lakha kahi hon ngaidam in aw nau chi'n hong kap tuak uhi. Tua zoh in inn neitele hon pai in hiai in na luah thei nawn kei du, kou hichibang mite deih louh kin leh buang in na van te hemkhia unla innluah na di dang va zong un hon chi a, huchi kawmkal ah Sangi inle Utuang kou inn ah hon pai phot in aw, inn luahna di dang na muhma hon chi a, huchiin Tuangpu leh Sangi tuh innluah na apat hong pai khia ua, Sangi te inn ah room lian lou cik khat ah hon kinawn lut uhi. Huchi komkal ah Muanpu le a siat dan ngeingei in se tou lai dep hi. Tuangpu bel hampha kisa lotel in Sangi a itna hon lian hiaihiai in, nidang Sangin hon ngai zaw ta a, amah tellou a kalkhat suan khiak dile peih nawn lou in hon omta hi.

Hun leh nite hon pai zel in december kha bang hon tungta a Tuangpu'n le Sangi kiang ah, kare, Sang ei hiai lam khovot lah chikmah chiah om ngei lou dia masi (x-mas) zang din innlam iva pai diam a chih leh Sangi in kou innlam ah inn le ka nei nawn sam ua. Utuang hon pi maive, Utuang hiai lam ah om le ka ning, nang toh om khawm ka ut lota, Utuang kon ngailua hon chi a, Tuangpu'n le keile ka ut lua, kenle kon ngai lotel Sang himahleh a hun hon tung hi in ka um naikei a maban ah I nopsak nadi leh maban ah mite I eng louh na dia pan I lak ngai ahi hon chi a, Sangi inle dik sa mahmah in, hilele, a Utuang ngailua ahihman in hau leh zawng hilele amah toh a om khawm di ahih nak leh neizou kei lele khawk salou hi, ahihziak in bangdang gen ngam lou in a Utuang gengen zui din kipan babalh jel hi.

December kha hon tung petmah ta in Tuangpu le office ah suti alak sawm leh hi theilou in innlam paithei lou di din mun in hon om hi. Akhat lampang ah Sangi bel kipak in ana nui gu chemcham lel hi. Tuangpu'n le a nuih lam thei ahihman in keukou teh chi'n mitsik in en vengvang velval maimah hi. Inn hon tun tak un, Sangi pa dahmel tak in ana om tuh hon muta ua, Tuangpu'n le Pathang bangchi e, na om nuam lou hia achih leh Tuang innlam ah na pa damlou gimtak a om ahi chih hon hilh ua, sawt le daih nawn khollo di ahi hon chi ua huai kha nanglah suti ngah theilou zomah china kei ana lungbuai lua ka hi daih in, achihleh, Sangi le apa leh Tuangpu kiangah Innlam pai din ikisa du sepna pen zaw a det ahi kei na a kik lamchiah i zong thak nawn zel mai du Pathian ima ah pai gige hiven maw sepna poimawh pen ahikei a, sepna chu tam petmah himahleh Pa khat chouh ahih man in ikisa dua I kuan du hon chi a, Tuangpu'n le ana khol dih uh ka lawm ittak Muanpu le I hilhsam louh un chia a dailed dek leh Sangi in Utuang hon zui tuanlou di khawng zaw maw achih leh hon zui lotel di ahi ka pa'n a deihsak petmah ahi, kei sang inle a deihsak zawk phial ahi chi'n a no. hon dailed a, pick up chu pik up ngei a, Tuangpu pau le pau man lou phial in hichin aw ging hon zata hi.

Tuangpu kua tu, kua ta kisa a hon phone e zum lou maw, kapai inle hon phone nawn ken kachi hilou maw, sum deih maw, bangjah a na deih aihkeh innluah na di zong maw, kou a awng lou nang bang mi chil kenkon te ka ngaikei uh chia phone koih khum dek leh Tuangpu'n eh lawm it, ka gen ut pen kon gen khin phot di ana ngai zual ou hehpih tak in chi'n ngen kuutkuut a gen kin hun ka nei nelnol kei, ka hun nang adin a pamaih chih beh lai zomah hi. Tuangpu'n le apa sih ngak a om ahih dan hon hilh leh Tuangpu gingtak khel a dawnna a ngah pen khasiat huai mahmah hi. Huaipen ahihleh Siktui na hih apan kapa inn sung ah hon nuam taal china na duhduh na deihdeih hon leisak unga tua nang Pa bangmah le hilou ka phattuam nale khatle om lou bangjiak a ka tungah a min hon lou na hia, a sih lehleh hoih zaw inteh chi'n phone koihsan zat hi.

Tuangpu le pautam lou in pai uale kipan kheni uh achih zot leh Sangi pa kiguih zozen in bang e Tuang bang hon gen a achih leh, Eh! Bang genkei, office nna a lou theilou a om di jiak in hon pai theikei dek achih leh Sangi a guk a ngaikhia in chu Muanpu genteng thei hi awm tak in amittui te ana guk luang hi. Huchi'n hon kipan kheta ua Juhu lam zuan in hon tai kheta uhi. Airport mun a hon tuntak un tua pai di flight pen ana hih louh jiak in amun ah dakkal 5 khawng a ngak ngai ahih man un amau le va kisu fresh di chi'n Juhu beach ah vahoh uhi. Avek un kipak bang in om mah le uh a lungsim guktak uh zaw a dah khopmai, huai bangah inn ah a nutsiat uh Sangi nu leh anaupa a ngaihtuah mahmah uhi. Huchia kisuharhzou hong paikik nawn ua pai hun ahimai ticket mantam lele la thou in, huchiin hon lengkheta uhi. A hon pai tung ua lawmta 2 ki-ittak a kiton khawm tiptip himahle uh kik lam in zaw Thanghou leh Liando tangthu a tungcing in a azi te a tup mang bangmai ahi. Calcutta hon boh tak un tuh suun nisa in a salh vakna te a vaak khop mai himahleh tua teng thum zaw bang chituk in mihing itna in sal lele vak din a gin huai kei, flight dang ah hong tuang nawn ua imphal sawt lou chik in hon tung uhi.

Huchiin lamka lam hon naih ua a huphulh pen ahih leh Lamka apat khe a pai touh di pen ahi a a guk lit mahmah hi. Lamka hon tuntak un khua mial sim phiphelh ta a himah leh a Apa hinkhua a khuamial di pen ngaingam lou in amel bek kilat sak tei sawm in, ma hon sawn ualeh amau kholam motor paita ahih lam hon thei a hon tuang ta uhi. Huchia khe a apai lai khawng uh ngaihtuah zel in a mitkha khoh lang dundun mai a Tuangpu tuh lungzuang ahi mai a lawm it mahmah in taisan, apan le taisan nawn di ahihman in a hehpih huai khop mai, chimawh beidong kisa in Sangi bang koi thepthup hi. Sangi pan le theisiam lua ahih man in a theilou lem kineih in ihmu lem peuh kineih zaih hi. A khua uh hon tung dek geigei a motor pen lutsuak lou ahih man in khe a pai ngai a, khe in hon pai ua inn uh gal muh in huchiin hon naih dedeuh ualeh mi tam khop ana om ua amau le beita hinteh chiin va diang lut ua chihleh ana bei nailou deuh ahihman in apa kiangah va tusuk pah in apan muthei sim lah chiang chiah lou in Tuangpu na hon dam maw... Damtak a na hon tungna.....dia ana hah thum mahmah ........ka hi....na lawmpa lah a hon chih leh Tuanpu le kap khe-ek in Pa amah a sepna ah thilsai di tuamtuam a om jiak a hon jui man lou a ana dampah heh achi Pa hon chi a, huai a hon chih leh a kiang ah om teng aza liai tengin maksa mahmah in kihou supsup in mak na e hiai tegel hichia hon kikhen theih hilhial mawk uh. Apa a heh mah di khawng chi ua, Apa'n ka khut lik zou hina ngeingei leng chiang la a hon sat ek di hiveng maw bawi bangjiak a amah chouh huai a nawm taisan ahia, kon thuhilh na theilou maw chi ngutngut a, Sangi pan le Tuangpu pa aw theisiam mai in kou kiah le a hon gensa ahi achih leh. Eh! Apa chin noulah nana hi ua, kon chibai ut na e achih leh, a ngaituan kei di na tapapa'n hon ngaihtuah lotel petmah ahi, huaibanah thu kipah huai kon tun a, ka tanu na tanu din hon pomsak in chi'n Sangi pan hon gena Tuangpu pa le lungkimtak nuih phempham hi.

Tuangpu leh Sangi te kiteen di lam hon ngaihven uhi, thuthang in vai hon hawm panpan a, a lawmpa Muanpu inle hiai thu a zak tak in heh petmah hi, kin a kin in Tuangpu a phone aleh unreachable kici den a a hehna kal sang zo sem hi, huchiin anu phone in Sangi leh Tuangpu kiteen dek thu nawn hilh a ka it mahmah ka lawmpa in hon simmawh lotel ahi nu ka it ka ngaih Sangi toh ka kiteen louh du zaw ka ngaingam kei nu, ka ki ngai petmah ua aman le a hon ngai mahmah. Tuangpu pa a sih dek a kei tang ah Sangi leh apa ka sawl ahi chih khawng in anu fuihsia a, huchiin Muanpu nule Tuangpu te inn ah thuthei loupi in va hang lut balbal a, Tuangpu inle kare Piching bang thu ahi maizen a hon chi a, Muanpu nu'n le nou bang kisa uh e ka tapapa hichibang a na bawl gentheih nang thu om a maw, Sangi toh bangchik a kingai uh e, Tuangpu nang zumlou maw tagah meithai lubawk ta na hih lam kiphawk lou maw, na lawmpa hichituk a na bawl gentheih amah jiak a hinghing a nek di leh tak di nei hilou na maw, na lawmte hih na uh na suktan kia hilou a tua a it mahmah Sangi le tuh sak lai zomah chi in khosung mipi zak dia kikou mah bang in a aw bang ngaih thei tawp in kou zialzial hi. Mipi teng le kipun khawm vek man ahihman un Tuangpu le zum lua in bangmah genlou in ding bembam maimah a, Tuangpu nu hon pai in anu Ching kou ka hih khial ua hi hon ngaidam in hon chi a, Muanpu nu'n le sakhi api asan leh a nou san achih uh zaw dik mah e chi'n paisan vengveng hi.

Khosung mipi ten maksa mahmah ua nidang a Tuangpu leh Muanpu lawmta kia le hilou unau bang a ana kipol tiptipte tua a kal uh mit mai ahih pen uh maksa mahmah in khosung leh veng sung te kihou na bulpi pen hon suakta. Sangi bangle jum petmah in lupna tungah ah ana kap hial hi. A Utuang ava pai in kap lou dan in om mah leh kithei khe thouthou hi. Itluat Sang kei nawn it a non ngai a ka kipak mahmah ahi, kenle kon it mahmah a na khasiat di ka deihkei a, Muanpu na kiteen pih mai diam? A hon chih leh, Eh! Utuang nang huchi dan a thil na paipih mawk in, hon ngailou na hih lam thei hileng zaw maw, I kichiamnate louhing bang a vuai thei mawk dia hia chiin Sangi hong kap a, ka kisik lua Utuang nang bang migina lou kon ngaihkhak, banga nang adia ka chit zohlouh na, bang hih khelh nei ka hia Utuang ei, bang hih leng na ang sung na itna tang zou nawn di ka hia,.... Utuang hiai mun ah huai lam thu gen di bang bang jiak a Mumbai ah hon gen lou na hia chiin kap hiphip mai hi. Tuangpu'n le Sang ei huchi dan tan a na ngaihtuah di ahi kei, kon itluat jiak a kon gen ahi. Sang kon ngai lotel petmah, midang adin zaw kon phalkei, itluat jiak a gen khelh a om leh hon ngaidam inla, ka lawm ittak in ka siat na di kia bawl hileh ka ngaidam thei dia himahleh nang tanpha a hon suk khak jiak in poikasa hichi tuk khop a lungsim a khek theih lamdang kasa, poile kasa lua, amah adia lampi dang ngaihtuah a ngai di achih leh Utuang huai eive kon ngaihna tak, nang mi care china nang adia sia bawl tele nang thuk tuanlou china a lampi dang ngaihtuah pih zomah chia hon kikawi uleh Muanpu nu'n mukha chitchiat zomah in, kam uang chih mah tak, a aw neih tawp suah in, Nu ka dah lua hiai tegel sun leh jan le khen tellou in aki tawp uh chi'n hong kikou zuazua leh inn khangte tanu nu teirol khat in Nuching na mit le gamla mu na e achih leh Muanpu nu le dai vengven in pai bambam maimah hi. Sangi leh Tuangpu chu kipak himai, innkhang nu kiah nang omlou hileteh hon sumual phou di hia ka kipak lotel anawn chiah zaw ka thil gente uh hon ngaikhe nawn ken aw chiin Tuangpu in nuih phiphel kawm in gen hi.

Muanpu leh anu theihtawp suah apan unle Tuangpu leh Sangi itna zaw tuiluang inle abuah mitzoh di vual ahi nawn kei, adaltu a hat leh amau itna khang saktu ana himaimah hi. A itna khaugui uh tatsak lou in hon kiteng ngeita ua, Tuangpu leh a sungkuan te bel khasiat na mittui nul seng lou in pumbuah tamai hi. Napa damlai hileh zaw hiai sanga thupi zaw di hia maw, hon kipahpih na mai bangle thupi lotel di hia maw chi'n hon kap ngutngut maimah hi. Sangi panle Pathian lampi zaw zuih haksa a himahleh ei a dia a hoihzaw di lam etna jiak a tawldam sak ahihjiak in kipah na mittui I nul mai di chi'n hehnem hi. Tuangpu te nupa leh apa te pai hun ding lah nai dedeuh amau lah a khua uh nopsa panpan ahihna ah dah mahmah uhi. Tuangpunu'n bawi Muanpu toh naki kal uh bang chi ahia, bangmah thu lah nawn hilh kei a achihleh, bangmah thu lua le omkei Nu khatvei kakina kha ua huaijiak hi. Tuangpu na pa'n hon thuhilh na te mangnglih ta maw, bangjiak a mitoh nava kinak e, na tun chiah ngaihdam na ngen di aw chiin hon ki thu hilh tautau uhi. Sangi inle ana za gu ahihman in ana guk kah a nu thei himaizen leteh hoih di hia maw na tapapa chitdan, amah om kei leh zaw lawmpa bang achi phet diam maw chiin a lungsim ah gen zauzau hi.

Apai di ni uh lah hon tung ahi chihtheih ahimai, kikhelah in kingai tawk le uhle apai louh theih louh uh ahih man in apaisan uh ngai hi. Huchi'n in ki-ittak leh kingaina tak in hon kikha kheta ua, Mumbai tual hon boh nawn ua, inn le tuan ngai nawn lou inn luah dile zong ngai nawn se lou in nuam tak in hon khosa ta uhi. Huchia a sepna te uh hon join nawn ua, Tuangpu le a siamsinna correspondent ah ahih te hin zou khia a, a kam try te lak ah khat ah hong awk kha petmah a huai ahih leh Income Tax ah Inspector ahihman in kipak mahmah in a sungte bang hilh thalawp petmah in hon phone leh anun bawi akipah huai lua, himahleh na lawmpa hichituk a na simmawh zaw hoih kasa kei hon chimawk hi. Tuangpu le khase petmah in nu ngaihdam ka ngen di aw, nu sum kon khak te na khol hoihna uh maw achih leh hi ka khol ua inn bawl pen le ka sunzom tou nawn ua nawn pai chiang un chu a vek a zohsiang ahita di hon chi a, kipahna ngen a dim ahih man un sawt le kihou lou in koih pah uhi.

Tuangpu'n le Muanpu phone tou incin a sepna muh te khawng hilh in Muanpun thulak louh pipi leh thulim lou pipi in houpih khum ekek mai chu Tuangpu bil sit bing theih leh achih huai khopmai. Lawm it Muan nawn huat lele hehpih tak in a jiak hon gen ve maw a chih leh a phone koihsan vat hi. Huchia a lungsim kimkhat kipak leh kimkhat nuamloupi in ann hon ne ua, Sangi nu'n Tuang na lawmpa le huai lam na om lai ua hong hoh incin Tuangpu in Rs.10,000/- hon bat hon pia in hon chi a kenle kon phone dek leh ka houpih khin ana la heh hon chi a, ana pesuk mai keive a achih leh Sangi panle huai khawng ana piak louh di eivele nabang dia, phone masak di eivoi, chia hon gen gemgam leh eh Pa ka bat ahi mah chiin zuau gen ut lou pipi in anu toh apa huai jiak a akisel khak du a lauh jiak in amah kipe maimah jel hi.

Muanpu le a omdan se deuhdeuh in a heutu lian pa un le dukdak sa nawn lou in a sepna ah pan tawp sak a, sum lah nei lou, a inn luahna lah bahara pe zou nawn lou a huchia court case khawng tampi hon neita, nidanga a lawmte a zuu dawnpih a khamtheih hihpihte kiangah ava tai chianga lah suan lam tuamtuam bawlkhum in kinepna khatle neilou a kholak ah sa kang dikdek amel lah ngou henhon zungeih hia, aihkeh adang te ngeih hia chih theih louh khop hial in melsia a, a sungten lah phone khethei lou uh, lampi nawl khawngah giak in vakvai tak in om a nidang ah Tuangpu toh a kithuah a akichiamnate khawng ngaihtuah sek a kisik petmah a ahoupih dan khawng leh zuau genna sum leh thil chituam tuam ah a khem khawng bang kisik tuntun mahmah hi. Panpihna va nget di achih chiah lah ngamlou in lampi nawl khawngah hon khosa tou a, khatvei a inn luah naten mukha in a bat va sik ua neilou ahih man in vo ekek maimah uhi. Muanpu le tha neilou a, alungsim chouh hat ahih man in pangzou mahmah lou in hon kap a hon vua ua, hon vo lai ua, vuaktak mah kahi, hon vo ekek ua, hon vo nailou na om ualeh ka lal lai a kon hihdante ngaihtuah unla kihehsak unla hon vo ekek ua, chi'n lampi nawl niin paihna kiangah si bang neunuau kawm in ki kou khe loiloi hi. Alehlam ah a simmawh a lawmpa bang mah ale a muhlouh Tuangpu tuh nuamsa tak in om a gil a gah goutan tapa deihthoh mahmah toh kidon nilouh uhi. Huchia Pathian ni zingkhat phone hon ging a Tuangpu'n le tu zing khangkang a kuan hon phone ahia, chia a etleh Muanpu nu ana hi a, aman le kin deuh a pick up in, Eh! Piching bang thu ahia zing khangkhang a achih leh Tuang, Muanpu lah ka phone khe zou mahmah kei ua, kha 5 bang paita himah leh phone but ahikei a, bangchi a, sum chu hon kikhak khak sek a himah leh amah phone khe thei mahmah lou kahi uh achih leh Tuangpu a kiguih zot zawzen in, Eh! training khawng ah gamdang ah hoh adiam maw chi'n hehnem ah huchia kihou zoh tak un phone koih hi.

Tua thute in Tuangpu lungtang suna mahmah a, koi ah a om dia aw, zuu kham a mi toh akisuk buai jiak a jail ah tang houh ahi dia aw, chi'n a gintak teng ngaihtuah kenkun a om lai in azi le hon thou a bangchi e Utuang achih leh thil om dan teng hilh vek hi, azin le a Utuang a lungbuai didan nak theihhoih lua ahih man in taisan lou in om pih den hi. A lehlam ah Muanpu le a guk in train ah hon guk tuan thei zenzen thepthup hi. TCpa hon pai chiangin ana kibusek a, nitak ahih chiang in van guk di zong in boggie tuamtuam ah diang zazat zel hi. Huchia nithum vel di khawng a hon tuang nung in Dimapur hon tung ta hi. Train ah a tuang sung in sum bangjah hiam gu khe man ahih man in inn lam apai na di chu nei veve hi. Innlam pai dia kisa bus ah hon Tuang leh a sungna in hon phanawn get a, bus pute theisak in kin leh buangin hospital naihpi ua, doctor pan damdawi kap in dakkal thum di vel khophawk lou a om nung in hon halhsuah guih a, aki-etsak man ava piak dek leh bus ah a tuangpih te eimi te khat in ana piaksak khin a theih in kipak mahmah a, kei bang lel tak ittu ana neilai kei leltak vele maw maizen chi'n kipak mahmah hi. Hon pai khe nawn a, inn lam manoh in hon paita hi, a tha chau leh bah mahleh kal suan teitei in Lamka hon tung thei khongkhong hi. A khua uh naih na di sum tamlou toh a khut a plastik bag se nimnem a puan tamlou a tawi chih louh ngal bangmah dang puak zoh le anei kei, motor ah hon kisawi tou ninilh ua, Tuangpu toh a pai lai bang uh phawk in khase petmah a, bang hang a ken hichitel a ka lawm ittak aziak omlou a hua a, pampaih ka hi mahmah a, kichiamna ka gente lakik thei himai leng maw chi'n in motor sungah, kap ging ut lou ahihman in, ihmu dan kineih in kap kekeuh a, a lungsim ah bangdang a om kei, Tuangpu a bawl gentheih dan kia a lungsim leh mitkha ah alang gige.

Hucia a akingaihtuah sung in a khua uh hon tung a lamdangsa mahmah in kho nawl ah hon pai dadalh ta hi. A dakphei a mawltual a en vengveng a, amitkha a Tuangpu toh akimawl lai khawng hong lang mai zaw khitui a kang mawh hial, hong pai zel a, a hun paisate ngen in ana dim a, kisik na pun beh semsem hi. Tuangpu te inn bang building thupi tak ahih man in Mumbai ah a vek ua om uh adua aw midang teng uh ahi di chi'n ngaihsun hi. Hon paitou zel a mi a muh pouh in kua ahia? hiai mipa daang na kekkuak e, si le nei lou mah abang chi'n kihougu sosouh uhi. Hong kisawi tou nilhnilh nawn a amau inn mun a tun tak in, ahaih a, amau inn di asa kei, building hoihpi mah ana kitung venvon ahihman in maksa in paipel dia akisak lai in, Muanpu nu'n "Muan, chia gintak mellou tak a sap kau leh, ana hi a, kileh kik thak in Nu chi'n hon kikawi ua Muanpu hon kap huphup a, 'Nu hon ngaidam in Nu,.... Kei na tapa mi dukdak lou mikhem hat khamtheih haipa kahi Nu, hon ngaidam in chia hon kap kekeuh chu ahehpih huai kei chih theivual ahi kei, a hehpih huai khopmai a nu'n, "bawi bangmah na hihkhial kei, kei nanu ka om na voi bawi pai lutni chi'n building inn ah lut pih sawm leh,,, Nu hiai ei inn amaw, ana thupi na e bang chidan a, achih leh, a nu'n mihai nang hon sum khakte a kilam eivele achih leh, Muanpu'n maksa mahmah in, chimawk, Nu ken khatvei le sum kon khak ngeikei achihleh, a nu'n hahaha bawi mi chiamnuih na siam lua, achihleh Nu chiamnuih ahi kei khatvei le kon khak ngeikei, bangjah hon kikhak zel a achihleh, a nu'n ahi zah a genleh a khak tu chuh akilang ahi mai, aw kei mipa sitak kahi Nu, ka lawm it Tuangpu ka simmawh mahmah in hon khak zel ahi di Nu, ken bangchin ka thukkikzou dia ka simmoh na a sang dedeuh leh, hon ngaihna a sang dedeuh a kenlah ka na theisiam kei a Nu kei natapa mi khemhat, bangmah ah zattak louh, ka hong kik a nata bang in nawn pom thei lai diam chi'n khuk din hial in anu kiah a thum leh apa hon pawt khia a, hilou e bawi thou inla va kihah siang inla, ka hon ngaihdam khitna uh sawt lota, bawi hong pai in i lut di, chi'n inn sungah hon lutta uhi.

Alehlam ah Tuangpu lah buai sem angaihtuah na a lah a lawm it Muanpu kia om den koi ah a om dia aw, chi den in a phone a try chiang a lah switch off kichi den, police te hilh lelah a case hon lian lozel dia, innlam te hilh lelah amah sanga lunggim zo du ahih chiang a, buai petmah in buai a, a tawp in ahi nawn mahnah kei zuau genle ahunta innlam te phone dia akisak chet leh phone hon ginga, Tuang ei achih patpat leh, Tuangpu'n Muan koi ah om na hia, nitak inlah ka ihmu theikei, na sungte pumbuai gop ahi. Zuau gen le ka khop ta Muan hon pai in kei kiangah achih leh kidiik huphup kawm in, Lawm it Tuang na dohzawh nate, na thuak zoh nate kei din dit seng louh ahi, iki lawmtatna kal ka sutat kha a, hon ngaidam in, na hoihna te jiak in kei hampha ka suak a lawm hoih gin om na hih man in kakipak petmah, inn lam tung zou hamham in ka om a, na hoihna te jiak in ka inn uh bang ka haih a, kei lam di hinapi in khosung leh innkuan sung minsiat nadi na khual ziak in innlam na khak di sum te kikim hawm zen ah nana khak thupi kasa, hon pai in innlam ah Tuang navek un kon mu nuam lua achih leh Tuangpu'n a phone koih in kahna mittuite luang in luang khe zungzung a, tunglam dak tou in Toupa ka thumnate na hon ngaihkhiak sak a ka lawmit gammang muhphak nawn louh di bang ka khebul ah nawn kun sak a kakipak chiin kah chihtak in kap a aphone hon ging nawn a, Muan ei a heh kahi kei kakipak lua, bangmah gen thei lou kahih man in ka koih kha, awle ka hong pai du aw Muan ana ngak in aw kata te toh Sangi toh aw, Muan chi'n phone hon koih kheta hi.

Sangi inle tua thu te a zak phet in kipak mahmah a anu leh apa bang hilh kal ngaklah petmah hi, huchia kipak tak a a om lai un, office a pat thutun lianlou khah hon pai a, a etleh posting na lettet mu a deih na munmun tel theih di ahih man in Manipur hon tel tahi. Huchin kisuan din hon kisa ua, a vek un Mumbai a lawm ittak a chan na mun hon nuse ta uhi. Phai hong tung uh chu nidang abang kei uh, a halh mahmah ua, innlam tun kal bang ngaklah mahmah uhi. Gari tuansung bang sawt sa petmah ua, a khua uh tuh hon tung ngeita uhi. Tuangpu'n a lawm it tak Muanpu'n pi di asak sim leh ana dawn lou ahih man poisa sim a hon pai toutou uhi. Inn le pha masa zozen lou in Muanpu te inn baang phei malam ua, alawmpa ava muh in koi lak ah inn kong tan pai dile haksa di khop hial in ana gawng petmah a, bangthu gen manlou in Tuangpun kawi suk a, lawm na bualna kawkhuk apan nawn pawtkhe thei a kakipak lua, achihleh Muanpu'n lawm nawn delh lum kha di chi'n in nak lah pipi in hon gen kaukau leh mi akiangah a veh teng kah nuih phaphalh uhi.

Lawm it ken nang adia maw van tampi hon puak kahi, chi'n parcel dim khat ngut pua in, Muanpu'n zahtakna mit toh en kilkel in, kei nang adia bang ka hia? Hichituk a nawn it lawm ei, nang hon sumin setu lel ka hi, lawm nang tuk in mi hoih ana hikha leng zaw maw na lunggimna leh na thawmhauna teng bei dia hiai tan phet tung lou di hichina maw, lawm ngaihdam tak le kahi nawn kei, hon ngaidam inle kon chikei di, kei misual kahi a na chiampellouh nate ka muh chiangin zaw ka kisuanglah tuntun a sih ka ut mai, himahleh nang kia'h kipahthu gen di bat tampi ka neih jiak in ka si thei kei a, tunzaw muangtak inle ka si thei di hon chi chu, Tuangpu a hehkhop mai, Eh! nang kei hon sihsan sawn nana hidan neivele maw, bangjiak a kei om inga nawn sihsan sawm e, huchi nawn lou in lawm kon ngaidam vek ta, lungnuam takin om in aw, kava pai phot dia den chia'h Sangi tetoh kon hawh nawn du chi'n paisan phot hi.

Huchia nitak lam ann nekhin hon kisa ua, Tuangpu te sungkuan va hoh uhi. Muanpu le sa kang dildel sa in ann bak khat bak nih hiam nelel in Tuangpu te kiang hon naih a, Tuangpun lawm enve ka tapapa achih leh, Eh! maizen lian man na e, bawi napa bang in hon khanglian inla keizaw hon bang ken aw, achih leh Tuangpu nehnoh teh chi'n, Tuangpu'n bangchi e lawm na taksa lah hichimai, na etlawm na himhim omlou a, achihleh Muanpu'n himah e lawm kataksa in a etlawm na aman suah a, na thumang hileng zaw maw, nang kon taisan apat in nuam kasa mahmah a lawmte toh zuu khawng leh khamtheih chi tuamtuam ah kong kibual ua..... Tuangpu in lawm Muanpu aw kingaihsiat nading awm kei mihing in lamtuang I sikkhel hunzong awmthei hi mihing in nakhel nate hong ngai damjou keimah le nang hong ngaidam nuam Toupa Jesu Khris in honit lailai hi lawmit aw, tua kikhel nailou hi. Muanpu in lawm o ken sumlepai khovel nopna kana itzo kha a nang ka lawm hoitak nangtoh kithuah den hilejo kahi chih kaki gingta kei lawm. Tuangpu in lawm kikhasiat ngaikei thudang imaban a bang chi khosak ding hiam chih ngaihtuah joni. Muanpu'n leng hunpaisa, a kikhen nung thu uh hon suut ta hi.

Office ah a lian lam kon hih zawk mah leh kei apan kisaktheihna leh kiletsakna khat ka hon nei a, lawm ka hon hauh dungzui in ka hih bang kon khek mun mahmah a, atawp in ka heutu ten ka ginat louh lam hon theih in sem thei nawn lou din hon koih ua, ka heh mahmah a himahleh ka hihtheih dang om tuanlou a hih man in, ka sum neihsa te zang in kon nop tal a himahleh sawt a daih tuankei, ka sum a bei a, ka inn luah naten lah ka sum neihlouh lam hon thei ahihman un bahara pe din hon sawlsawl ua, jankhat thu in a guk in ka taikhia a, ka lawm teh kava giak hi, ni 2 khawng ka lawmpa inn ah ka om nung in sum neilou ka hih man in suanlam tuamtuam zong in hon paikhe sak a, huai ni apat chu nang kon phawk ni akipan ahimai, nang nawn it lailai toh huai banah ka thilhihte kisik in ka hon om a, khatvei santacruz ah ka hong vak leh ka hon galmuh a hong paiphei a hon sap di ka cih chiangin lah ka ki en a, nang mudia chitna hoihna him ka baang nawn kei a, ka pai mai hi.

Ka hon eng mahmah a himahleh tuibosa luahkik theihlouh ahihman in ka thilhihte ka duh hun hon tun chiangin bangmah le ka ngaihtuah pha kei, ka chi a thak a, ka sisan gui zam te a sou mah a bang a ka vun sung a thak mahmah a, ka hih leh, ka kop a tam luat jiak in bang pen in hon nesia a chih le ka theizou kei hi, huchia nikhat tuh mi van kava guk leh hon mankhe dektak in ka hah tai e, gimsegop ka hih man in Kanjurmarg train station ah ka khawl hi. Mi hong paipouh ka et chiang in hon man di mah bang in ka thei a ka om a muang kei a amun kawm zodeuh naih ka kichih nalam ah ka inn luah na ten hon mukha in hon vo gop uhi. Huai hun laitak in nang om hilechin le nawn vo ut din ka gingta, huchia hon vuak zohtak un khophawk lou in ka om a, ka khanloh nawn in si kai neunuau sa in kana om a, ka chimul bang a thou sengsung maimah hi. Ka hong kisawi tou a, Mumbai centre (train station) ka hong tungmawk a kenle signboardte ka etleh Mumbai to Guwahati cih ka muh phet a toilet ah lut in ka kihah sianga huciin motor meisau te ah kon tuanga, inn kon tungthei phet hi.

Kisiamtanzou mahmah lou kahi di a maw, Tuang kon phone dek inle bang ka gen dia aw, phone hoih koihsan vat dia aw chih lungsim teng in dapkual petmah kahi mai, himahleh ka taksa lah chau ahihman in, taksa ah kimuh tawp na bangle ahi maithei chi'n ka hon phone leh nidanga ka lawm ittak Tuangpu mah nahi lai a, Mumbai huihkhi hoihlou ten lungsim tuamna nang sungah a lutzou kei a kakipak mahmah. Himahleh gendi katasam mahmah a hon sam kahi top mai, lawm ittak in hon nial ngeilou di ahihman in, nang mah in nawn nial louhjiak in kakipak lotel, tuang non vanpuakte nidang a na lawmit Muanpu pen gawng ta ka hih lam na theikei a tuale konggak panpih na in nang muh di lamen kawm a tual lehleng teng teitei mai kahi chi'n nuikhe liahliah, a guk a room ah ana ngaikhia anu chu mittui vum zen in a omkei ichi lou theikei, a kap gugu mai hi, tapa neihsun ahih banah innsung kingak napen ahi a, huaijiak in a khase mahmah hi.

Tuangpu'n le Muan tua na thilchiinte bang na loh ta a, hih touzel lai nahi hia, achihleh, ka hih touh louh jiak mah tak a ka thachau ahi, hih lengzo ka taksa le a hat dia himahleh lampi hoih zuih ka ut a, khemna bang chi tuk in hat in hon jem mahleh tua ka ginna pen zaw tatsat nawn kasawm himhim kei, ka nunlui hoihlou tak ah zaw ka kik nawn himhim kei di, ka lungmawk/ka hai lai nite zaw sul hon hei nawn kei peuhmah leh chih utzaw ka hi. Khamasa lam in biakinn ah camp om a tel ka ut petmah a himahleh ka thate zoi in ka khua khawng sik mawk a himahleh ka utna zaw huai damlou na inle hon tuun (cover) zouken teh chiin kihalhsak in ka nu leh kanau Chiching toh Muani toh kapan hon zawng ua huchia camp ah telthei kahi, camp ah ka omlai inle khemna hatlou ka chi thei kei, a hat a ka camp lutpihte khat in damdawi tang a nekkhop di hon pua a, ka duhna a bei kei, ka muh chiang in ka duh hon uanga, ka sa teng kising petmah a, ka gawl a thak petmah mai, a thuaknop na damdawi hon kap ua huchiin ka kimanage thei pan chouh hi.

Ani nih in zaw, thugen pan ka tanchin theivek mah abang hial in, a thugente kei hon kawkkha tampi om a kana ki-ip cheichui mai hi. Huai zoh in zaw Pathian apan hatna thak ka mu a, Pathian a muanhuai dan leh Pathian in I mangbat lai a hon huh gige ahihdan ka thei a, ka kipak lua a, anitak in kah chihtak in ka kapmai, kei jiak mah ahi dia ka luppih ten hon am sim ua lah ka khawl thei kei, kipah na thak ka muhjiak in leh kei bang leltak a ta banga a hon pom jiak mah in kakipak petmah a, huai nitak zaw kuamah ihmu thei a omkei, kenzaw kha toh kipawl kahih man in poi kasa kholkei a ka kipak mahmah mai. Kong pianthak zoh in zaw nang hon muh di leng poi kasa nawn kei a, hon ngaidam kei leteh leng tung a kapa Van a om in hon ngaidam thou kachi a ka lungsim kipahna ngen in adim hon chi hi. Sangi inle oi Umuan, hamphat huai e khai, Utuang bangle maw hehpih huai himai, khatvei kingaise lua adiam ah ana awk lum dek eive, kei sang inle hon ngaizaw a akhen chiah kei bangle ka pichinna in hon zou lou dedek in huai nang lawmpa dukdak lou sepna a neihtak a hon taisan pa khawng bangjiak a hichituk a na vei khawng ka chih ut ton om sek hi.

Himah leh ka ki dek hamham a hon ngai petmah a, aman chu maw Umuan hichia chi, ka lawmpa'n hon taisan lele kenzaw ka taisan kei di, bang teng tuak lengle hon hua in hon that lele ka nak a hu a bei ma zaw ka lawmpa ka it gige di, amah kei jiak a hichi ahi cia kingoh tinten mawk a, a khenciah ag zaw hai kasa mahmah uh, a kha loh te bang hahaha kidaih ngei lou incin ka et khiak leh nou toh amah sungte a kim tuak a ana khak zel dan ana hi hahahaha, Utuang kha phatuamngai lua a akhen chia zaw buai huai sim pi ahi hehehe.. Muanpu'n a hai natak khat ahi chi'n hong nuikhe zuazua uhi. Tuangpu'n gen di le ka theikei, lampi dik ah nong kiknawn ka kipak lotel zingchiah ann I ne khawm du aw chi hi. Hun inlah mi ngak lou ahih chiah kou paivai kana sawm phot du awleh Muan hon chi a, Eh!, aw huchi di hia, nou na om ualeh naknop lua kei bang harh tuan ka kisa a hon tu-ngap ka hi lawm ei, omlai leuteh hoih di hia, taikhau a vak lele poilou pi chi'n nui kauhkauh in mangpha kikhak uhi.

Tuangpute le hong pai khia in azi Sangi toh hon kihou ua, Sang bangchi nasa a sawt a hon daihdiam achih leh Sangi inle tudin mun a hon bat leh zaw sawt le daih kei di, ka hehpih lua Umuan kha ami hoih khiak dek patpat leh hichi a, a thuakhat ziak mah a damsawt ahi zaw, hikei leh asi khin thamtham ta di, achihleh huaizaw eimah ve. Ash poina e maw Muanpu hon hichih lawmlawm, tunzaw ka kipak lota pause louh in hon sihsan lele nuamtak in ka khah khethei tadi chi'n inn hon tung ua, lum din akisa ngal uhi.

Huchi in zankim lai chih di vel in si dak hon kikhen ging kongkong hi. Tuangpu'n le henui ngaihna e, chi'n kua adia aw chi in a lungsim ah bel Muanpu ahi ngeingei ding chih ngaihtuah na thupi tak in nei a, aman le azi phawng in tua sidak kikhen pen kua hihiam chih kava en di chi'n, a pawt kia a sidak khen te ava dot leh a gintak pen ana hilou in a naak bang dam huai a, veng saklamte putek khat ana hi a, amah le kinleh buang in kisa a va kuan tou langlang a, Sangi in bel ata te ana om pih hi.

Zing ninou te hon suak in, misi om jiak in amau programme di pen cancel thak ua hun lem dangah suan di chi'n gen thak leuleu uhi. Ani sim in Muanpu bel hat tou hiaihiai in muh theih a, Tuangpu le guk kipah mahmah a, ann nekkhawm na hon sai ua, kipak tak in ann kuang hon um khawm uhi. Lawmta tegel bang a om na lamlam uah akizui tutulh sek ua Tuangpu'n bang azi omlam thei lou mah bang zozen sek hi. Muanpu'n nidang sangin Tuangpu ngaina mahmah a, niteng phial in a inn uah va hoh gige hi. Kha te bang hon bei kuan ahita a Tuangpu te sung kuan le pai hun nawn ahihman in, Muanpu dah mahmah a himahleh ahihtheih dang a om tuan louh jiak in a melput kipak sak teitei maimah hi. Mittui kang lou hial in hon kikha uh chu khovel ah kimunon lou di mah abang uh. A mittui te uh nulnul mah leh a kang theituan kei awl-awl in kihehnem tuah in hon kikhen khe thei khongkhong uhi.

Hun hon pai zel in Muanpu'n le zi bang hon nei tei ta a, sep theihtheih khawng hon sem in nuam tak in hon khosa uhi, nikhat tuh a gil nasa vungvung in nna le sem peihlou in lupna ngak in hon om a, nidang khole gil nasa gige himah leh tuapen bel haksa sa mahmah in ek khawng bang teh hial hi. Huchia damdawi chituam tuam te zang mahleh ana reh thei tuan kei. Azi bei dong in a kiangah, Umuan na kiangah om gige kahi hon taisan lou ka hi aw, chi'n a khut lenkip tinten a, a adamdoi nekten nnasem hih tuak in awlawl in hon mitsi suk diaidiai hi. Hon halh tak in azi a kiangah lusu ngaungau amuh leh kipak lua in Siami, hong lum phei in acih leh khatnu le a Umuan harh khia amuh in kipak petmah in hon kitawp chonchon maimah uhi.

Huchia Muanpu le gina lou dedeuh in atha te bang hat zou kisa nawn lou in Siami kiangah itluat kei lah sawt kon dampih nawn kei dia I tate hoihtak in hon kem tou inla maw Siam, Thathang pen ka lawm it mahmah Tuangpu kia'h om sak le chi hiveng aw ka kichiam na uh ken sutang tung zou lou ka hih man in Thathang bek in, kapa, kapu khang hon domsang leh ka chi, hon chih leh Siami inle hilua heh aw Umuan nang thuthu hihen hon chi a, Muanpu'n le Tuangpu phone a huchibang in hon gen hi. Tuangpu'n le hi e zenzen e, ka ta bang in ka na kem dia, ka lam pial sak kei di chi'nn phone koih san hi.

Nikhat Muanpu lou a kuan na ah a gilna hon sa nawn get a panpih di neilou amah kia a kuan ni ahih man in a hehpi huai khop mai, pai lah pipi in inn hon tungzou hamham a, Siami inle a muh phet in delh phei a lupna ah sial pah hi. Huchi'n hon gimse dedeuh in a kha a hon khah ta mai hi. A itluat a zi leh ata te zaw a hehpih huai petmah uh, a kiang uah hong kap chulchul ua, a ngaihnop hetkei, kin leh buang in anu'n Tuangpu phone a, Tuangpu'n le tua thu a zak phet in kiguih hial a, office ah suti la, Sangi phone in, bus station ah kimu tuah ua a kholam uh zuan in hon pai uhi. Nitak a hong hihtak in zaw a kap tele gim gop uh ahi dia, a hong khawl thei hamham uh hi.

Tuangpu tele zingkal baihtak in hon tungtou ua, Muanpu kisial nadi luang ana kibawl a gal muh in a mittui a luang mai, Sangi le taisan di khop in kintak in hong pai a, Sangi in a delh pha zou kei. Tuangpu tuh Muanpu te gate ah ding in "Muanpu ka hong tung uh ei honna dawn ve aw, lawm ei, chi'n hong kap ngutngut a, Muanpu nu hon pai khia in bawi na lawmpa hon en in na ki-awi lua chi'n hon kap khia a, Tuangpu le kap lut in Muanpu lupna ah kisial dildel tang lah tang lou hon muh in zaw, zum nadi le theilou khop in a hon kap khia maimah hi. Hon naih phei in..... Lawm it na ki-awi lua maw, kei nang tellou a bangchi hing di hon sa nahia le, bangjiak a kei hon ngak lou na hia, hon ngai nawn lou neivele maw Muanpu. Muanpu hong thoukik ve khatbei bek, kei hong paita kahi, chi'n hon kap ek-ek a, Sangi le hong lut khonung in hong kap lut ngal hi.

Amau hong kap tak un zaw adang tenle Tuangpu hehpih na kawm in hogn kap chulchul uhi. Muanpu gaal atam mahmah a milian khat si bang tuk in min a gaal hoih mahmah uhi. Huchia Muanpu luang vui khit a om in, khohar kisa Tuangpu bel ahih di athei kei, bangmah le ngaihtuah na a nei kei, Muanpu tate neu chikchikte a muh chiah a hehpih mahmah a, a kahtha kia a suak mai hi. A lawm ittak Muanpu in taisan ahihlam a mangngilh thei ngeikei. Mumbai lam a hong pai dek ua Muanpu gen mah bang in Tuangpu'n le ata upa pen Thathang tonpih din guai a, himahleh Thathang a ut kei, Tuangpu ngaihdan in bel Siami toh atate teng tonpih di chih himahleh, mi ngaihdan ahihlouh di jiak in Muanpu chihdan a Thathang tonpih sawm a hi hi. Hon khem hon khem a, atawp in zaw a ut khong a, Tuangpu leh a innkuante toh Thathang telin imphal lam hon pai nawn ta uhi.

~BEITA~  

© Siamsinna leh Vakiangbu