CHENNAI TUICHIIM
(Et-Kiikna)
Hiai thil tun hun bel nikum(2015) December kha ahi a,Chennai a ding a kum 114 nung a hiai bang thil tung ahi.A ma in 1901 lak in hiai bang in tui ana tam ngei hi. December kha bul ahi a,Chennai mipi'te lam et bang in vuah chu a chi'in ngitnget ta mai hi.Kei leng nasem ding in vuah nuai pi ah ka kuan khia hi.Lampi ah tui tamsim ahihman in sawt sim tak katai hi.
Nidang a minute 20 ka tai hiai ni in dakkal 1 phial ka tai hi. Huchia ka tai nung in ka sepna mun kawt nipnep in ka tung khong hi.Ka uniform te silh in nasep kaki pan ngal a,singpi lum hithit khong dawn kawm in ka om hi.Mi leng pawt khe ut sam lou ahi ding ua customer bang huchi lua in omlou hi.Keileng inn kong lam ah vuah a theu ta dia aw chi'in kava dak khe zel a, ka pai na ding khong ngaihtuah kawm in vuah zu kava en nilouh hi.Huchia kava om sung in ka lawmte khat ka kiang ah hong pai a ,"dak 10 a khak di,a ut teng pai di,a utlou teng giah di chi uh ahi", chih a hong gen a kei leng ann nelou kahih man in ka nek di tamlou ka bawl a,ka nek khit in pai din ka hong kisa ta hi.Ka kuan lam a le vuah thuak kahih man in ka puante keu lou pi'in kon silh a, vot sa sim kahih man in ka chi bang a li'ing keuhkeuh hi.Ka lawmte'n "pai dah mai in" chi'in hon khou mah le uh ,ki pasal sak deuh kahi ding a ,Pai di'n kahong kisa teitei ta hi.....
Ka lungsim in pailouh thak mai di adia aw chisim mah leng ,paidi chi khin kahih man in ,Ka phone leh sumbawm te sarang(plastic bag) a hoih deuh a tuun in kahong kipan khe ta hi.Lampi teng ah tui dim ahihman in tui tung a Gari tai khong in kaki ngaihsun mawkmawk hi.Gari kisia buai pih toh Aging thei nawn lou buai pih toh mi ka tuak suk vengvung hi.Huchia sawt sim tak ka tai nung in mun khat ah lampi ana khak ua,kuamah tai a phal kei uhi.Keileng pai theih na ding zong in koi lam lam hiam ah ka tai a,mun khat ah tui ana tam sim ziak in ka Gari chu a hong mit ta hi.Keileng ka khoih theih dan teng a khoih in bawlhoih sawm in pan ka la a, ka bawlhoih thei ta kei hi.A lampi omsun chu sawn thoh ahi tamai,kon sawn pan ta a,sawtlou lou sawn pan in gim kaki sa pah ngal hi.
Kholak a va koih a taisan mawk di lah ka ut kei a,ka sawn nilouh ta hi.Huchia sau simtak ka sawn nung in pasal nih ka kiang ah ahong pai ua,vuah zuk ziak a zan nung himahleh Gari bawl a om uh ahih dan ahon hilh uhi.Ken leng ka bawlsak ngal a,asung(Gari sung) a tui tam luat ziak a ging theilou ahih dan ahon hilh uhi.Vuah lah theu siang theilou ahihman in kalung sim in sepna kik mai ahoih zaw dia aw chih khong ka ngaih tuah hi.
Huchih sung in ka Gari ahon bawl hoih sak ua , ken leng a bawl man ka pia a,koi mun a pai ding nahiam" ahon chi ua,ken leng ka pai na di mun ka gen leh "na mailam ah pai ken tui tamlua ahi " ahon chi ua ,ka pai ding dan bang tan hiam (atheih na tan uh) ahon hilh ua ka kipan khe nawn ta hi.Lau sim pi leh diip hawm kawm tak in ka pai a,inn ka tung zou dia aw chih khong ka ngaihtuah hi.Huchia dakkal bangjah hiam ka pai nung in damtak in inn ka tung khong hi.Ni dang a dakkal kimkhat le phalou Hun ka lak tuni dakkal 4 bang ka la a ,gim kaki sa mahmah mai hi.Ka phone ka en a vangphat huai tak in bangmah ana chi kei vanglak hi.
Ka lawmte bang ana ihmu naikei vanglak ua,mei pailou ahih man in candle de kawm in Lehkha den ana kimawl uhi.Keileng kisil khin in ka lum pah ngal hi.Ihmu thei zok lou in sawt pi tak ka om a,khua vak dek sim phial chih din ka Ihmu khong hi.Zing dak 10 lak in ka khang lou a ka phone ka et leh a battery ana bei a,kenleng sepna te ka phone leh sepna khak zek ngai di ahih dan ahon hilh uhi.Kipak gu sim mah leng inn ah Current lah omlou, phone lah a battery omlou hih di lah thei tuan lou a chim huai law khin zel hi.A tawp in keileng zing ann nekhin kholai kava pawt tei hi.
Lampi teng lah tui dim inlam ah lui dung vak mah kibang tui pal vak ngai,sawtlou kava pai nung in ka inn ua pan a buaisiat na deuh,a nai pen kava tung hi.Tui in a inn te uh tu'm ahihman in inntung ah panpihna ngak in a om top ua,kenleng hih theih om sun chi'in Longneu a mi ahon puak khiat te uh ka khut kana khak zel sam a ,lampi lai tui omlouhna ah kana paipih zel hi.Huchia Ka om sung in nitak lam dak 5:30 bang ana ging man a keileng innlum zuan in ka paita hi.
Kar khat sung current lah omlou ,sung kuan te lah phone theilou ,sepna alah kuan theilou in aki om hi.Huchi'n kar khat ki zang kai thei a,dawr te kihong in mahni naa sep kipan nawn siausiau in keileng ka sepna a kuan ding in ka phone battery bei pi toh ka kuan khe ta hi.
©Siamsinna leh Vakiangbu
Comments
Post a Comment