TAWP KIK ZEL

Written by ~ Tha Suante

Khristian za ah za cih theihin i omta hi. Pasian thupha ngahin camp,compaign,crusade cihte kumsim inei hi. Kumsim piangthak kibehlap den ihih manin lungdam huai hi. Ahih hangin a tawp kik tamlua ihih manin i kim leh kiang a Khristian dangte hong theih dingin kilawm lo a, a kilawm loh ciangin zumhuai a, a zumhuai ciangin a hoih om ngei lo hi. Mihing muhna ah zumhuai ahih leh Pasian hong muhna ah hoih lawmlawm dingin uphuai lo hi.

Tua ahih manin bangin Khris itna tawh hong kikhensakzo ding ahi hiam? Haksatna, lungkhamna, bawlsiatna, gilkialna, zawnna, lauhhuaina, sihnate khat peuhpeuh in hong khen zo ding ahi hiam?cih i mu hi. Hong khen zohloh ding bek hilo in, a gualzo dingte ihihna zong hong hilh lai hi. Hih haksatna kigente a tuak kha tuhun Khristiante sung zong leng kitam muh lo ding hi. Mi khat peuh a pianthak ciangin pawlpi mite in kilungdampih zel mah hilo hiam? Khris itna pan i tawp kik zel Khris itna telkhial kha ihi hiam?

Rome sung mahah sihna, nuntakna,vantung mite,vantung vangletnate,tuhun nate leh a hong tungding nate,leitunga om nate,leinuai a om nate, Pasian bawlsa nate na khat peuhpeuh in i Topa Khris Jesu hangin Pasian itna tawh hong khen zohloh ding hong hilh hi. Tua bang upna, muanna ineih ding na hi mawk hi. Topa a muang mite a ling ngeilo Zion mual toh kibang ahih lam phawk ni. Leitung nate ah i lungsim koih loin,tunglam ah i lungsim koih zaw ni. Leitung nate in i muanna hong lak mangsak zel na hizaw hi.

Leitung i nuntakna ding a Pasian in thupha a hong piakte buaipih in,thupha a hong pia Pa i mang ngilh thei hi. Mihing theihna,pilna, hatna tawh Jesu nung zuihzoh ding hilo hi. Tua hi a,eite a hong gakcip mawhna leh khialnate khempeuh paikhia-in,i mai ah a om taina ding lampi a mong dong in lungsim kiptakin tai ni. Eite hong makai in i upna a hong cing taksak Jesu mitsuan in nei ni. (Heb.12:1-2 )

I thutawpna ah, Jesu mitsuan in nei ni,ici hi. Thuman,thutak i theih khit ciangin mawhna ibawl hamtang laileh i mawhna a kimaisak na dingin biak piakna dang omnawn lo a, a kihtakhuai thukhenna leh Pasian thu anial mite a kangtum ding mei kuangpi bek om lai hi. Thuman,thutak a thei lo i om hiam? Athei lo om nawn sam kei hang maw? Eite pen a theilo hi loin, a zui nuam lo, a tawpkik zelte ihi zaw hi. Thei a zui nuam lote sangin,zuikhin napi a tawp kikte thuak ding lauhhuai zaw kha ding hi. A nungkik uh leh a kisik kikna dinguh lampi om nawn lo hi. Pasian hehna meikuangpi ngaka nungta ihih ding lauhuai hi. Eite bel a tawp kik sate thokik zelin, pawlpi milip sangin piangthak tamzaw cin kigen mawk veh aw. Dahhuai in zumhuai lua hi. I thuman lohna cihtak lohna, ei leh ei a kikhem ihi hi. Pasianin piak dingin a hong ciam thu muangngamin, i lamet thu kiptakin len ni. Khat leh khat ki-itin a hoih apha isep na dingin kihantawn tuah ciat ni.

I thutawp ah, khat leh khat kihan thawn tuah ciat ni, ici hi.

A Tapa itlo a hongpia Pa nung izuihna i tawp kikkik lohna dingin thaloptakin om in, thungen tawn tung ni. Hat i kisak laitak en itheih loh hangin i tha nem laitak hizaw thei a,hatlo i kisak laitak i thakhauh laitak na hi thei bilbel hi. Tua hi a, galvan namkim loin, Jesu lam en tawntung ni. Mi pawl khatte hih bangin kikhopnate pel loin kihanthawn zaw ni. Pasian thu ikhe a dingin meivak,lampi a ding khuavak ahih thei in. Lai Iangtho sim den ni.

Khris itna sung ka om tawntung hiam cin eimah ciat ki-en phapha ni in, kung ciang i tun ma tengin tai zel ni. Kha thu ah a khangham eite in hih bang lungsim pua ciat ni. Hih bang lungsim a neilo i om khak leh zong, Pasianin a kitel takin hong kilangsak ding hi. Khris sunga sanggamte aw, bangbang ahi ta zongin i tun na ciangciang panin mainawt ciat ni.

©Siamsinna leh Vakiangbu