THEIHLUAT LAH THEIHKHELH CHRISTIAN NA; MABAN AH ELECTION MAW, POLITICS?? - I

Written by: MungMung’ pa

I Nam in Tangthupha I Ngahna Kum 100 bang valta mahleh Ei khang pai lellel tulel dinmun apan I et chiang in I Christian hihna uh mihing hihna toh tehkak bang hile I tleirawl lai, kuamah thugen pom theihlouh hunleh ut danteng leh thilteng a dik kisan hun toh kibang mahmah in mu mawk ingh. Ka gen ut tak chuh Tangthupha I ngahna sawtpi chihtheih ta mahleh I Christian na uh ke niam deuhdeuh, a tawphah a om himai chi ut ka hi. Ilak ua Gingtu masa ana hi te zahtakna sangpen Ipiak kawmkawm in Ilak ua thukup honggen theilai dia om hile uh ana muhkholh dan toh kituak asa di uam? Khangzaw hia sezaw, bang ahon gen zaw di ua?

Ei nam mawlchik te'n Tangthupha Ina ngah khak zenzen uh hamphat huai petmah hi. Tangthupha ziak a hiaitan a dopsang leh khangtou a om hi hang. Pianken a Christian sahkhua nuai a piang leh khanlet touh a om Ihi chiat ta uhi. Pathianthu, Hotdamna thu leh Jesu tanchin aneu-alian in Itheih lumlet uh ahita. Tuchiang in, Christian Ihihna uh hamphat pih leh vualzawlpih Ihih lai un tu'n ahi dimah sakna leh vualzawlna I dongte uh siatna ngen in apang ta.

Hotdamna, Gingtu hihna leh Khris nungzui hihna dia poimoh om teng Ithei vek sipsip ta uh abang. Huchi ahih nung na tawm a le bangdia Ilak uah tawlnga lou a Hotdamna chialpi, Crusade, Camp chihte omden ahitel di? Nungzuihna a lampam sik khelh khak hun omthei tham mah e, himahleh a gige a sikkhelh gige chihmawk pen Christian kichih nadia thil hithei hi mahmah lou hi veh aw....! Huaiziak tak a Christian Ihihna ua banghiam akisam a omziak a Chialpi chihte neih gige ngai himai lou di hia maw? Pathian thu leh Izuih di leh dilouh, Bible hon sinsak chihte Ithei vekta ua himahleh kuamah a lamdik a pai ki om nawnlou hitel.

Tangthupha Ingah hamphatna ahi Ichih lailai in hiai Tangthupha zuilou a theih a theih thohna Ineih mawk pen uh vangsiatna ahong hih khak ding pilvang mahmah ni. A theih a theihthoh in I damsung lel le hon daihlou maimah di eive. Tu ahun lai ua Gingtu Ihihna uleh I Hotdamna kibul phuhna I velthak kei ualeh maw, denchia ni tawpni chiang a Christian kichi lah vangam tunglou di adim-aha a om maimah di Ive ua. I mihinpih te lak mahmah a leng mualphouna tuak kitam peuhmah di hiveh aw.

Hotdamna amang thei hilou ahi chihkhawng a ki mawk ngak thil haihuai ahi na nungzuihna in azirh tuankei leh. Hotdamna a thawn a piak ahi khawng chimawk, sut taktak hile ei mimawl ngaih dan maimai a le ana hi hetlou ahihdan aki mu thei. Khelhman a Ithuak di tengteng Pathian in a Tapa Ittak tung ah ngavek hiveh aw. En a thawn dan a ngaizam maimai lai di maw? Ki velthak hun petmah ahita.

Khaile, Chialpi banghial tak in I gen suk ngutngut kha zel a hiven....hilou ahi. Himahleh I Christian hihna uh paidik lou ahih chiang a. Paidik hi leh lah Pathian nei nam telak a khotang siatna leh hoihlouhna te om mawklou dia. Awlmoh thute khawngle gelhgelh ngailou mah di zaw hiven. Pathian thu pum theih lumlet, I omdan leh hihna inlah tawn kha mahmah lou ahihchiang a theih a theih lah theihkhelh himai lou di....!

Tu'n maban gamla hetlou ah, Simleivai a Isik-Itang a hon dinsak di ki teel pina in ahon naineh petmah ta. Khovel a Ihin sungteng Christian hihziak a I maban dileh khosakna di ngaihtuah louh chih hithei mawklou ahi, Ingaihtuah dimah ahi. Huai kawmkal a, ei Pathian ta kichite'n I election uh hi in I simlei vai uh toh kisai hita leh, siat a sesak, hiai sa sezaw thei dia le uphuai nawnlou. Gingtu taktak hile bang ziak a khotaang hichi zahta a sia a, election leh politics toh kisai a ki hel bang khelhna bangtuk hial a ngaih a om thei di adiam? Bangziak a aki khen theilou khalam leh salam en kikhen sak Ihi ua? Bangziak a election chiang a Christian mah hihang a, a teeltu te le hihang a, Itel ching te mah le hi ua, bangziak a kinek siatna, huaiham na, duh-amna, sum-le-pai etlah na leh adang tampi eitoh kituak dia kilawm hetlou te ngen in Ilak ua vaihawm ahi di?

Khovel thupina te leh nopsalna te lah ki taisan ngam mahmah lou. I maban leh I khangsawn di te khual lah kichi ngal hang a, election tankia I lungsim in mupha lel hitel. Politics sai taktak Isawm leh maw, election Ichih khawng a bul pantu hilel veh aw. Election ahong ging a lah I lungsim a eimah metna di, hamphatna di leh khosak theihna di kia ngaihtuah zel. Heutu Itel chingte lah tomlou kal a gen se suk ziarziar zel. En pandik lou pi in mi hoihdia ngaihtuah. Adiktak a zaw, ei leh I heutu te ki netuah hilel vehang. Adik di le ki omtuan kei.

Hun paisa te apan khotang siatna te, I maban bing ahihdan te Ithei chiat di uh. Election ahong tungdia, bang Ichi zel di ua? I maban ua nopsakna I ngah theih di dan uhle Ithei vek ua, himahleh tomchik nopsakna in ahon nawmvalh zel diam? Ei a dia hoih lah thei vek, lah zui thei louzel. Theih a thei, theikhial zel....Ta geet aw......! Thilhoih I theih a, bawlhoih theih ahihlai a bangmah panlaakna I neihkei leh hunhoih in hon pai khengkheng dia, maban I tulel dinmun sah hong mial zaw ngeingei ding. Gingtu Ihihna kivel thak chiat ni, mi ah kinga kenla, nangmah ah kipan thak in. Mahni ki bawlpha chiat le khalam-salam ah nopsakna leh vualzawlna I dong ngeingei ding. Thilhih leh omdan in langsak chiat ni.

©Siamsinna leh Vakiangbu