KELKONG NIHTE

By: Vz Vualnam

"Na pite a sengpi utoh hong tung nailou uhia?" chi'n Kelkong Saknung zaw pen in nidang a a engbawl mah bang in Kelkong Khangnung a engbawl nawn hi. Kelkong Khangnung in bel bangmah in a dawngkei a, Kelkong Saknung tuh kideihkhop tak in a nui veivuai hi.

Kelkong Saknung leh Khangnung tuh Mata a Veng Khang a kelkong nih kizom helhel ahi uhi. Kelkong saknung ahihleh suang khuam leh siik kong nei ahi a, Kelkong Khangnung bel gua tholh thoh a kibawl ahi. Kelkong Saknung in a inn hoih tak, siik leh suang a kibawl, leh a sung a van manpha taktakte veng in muanhuai tak in ding gige hi. Mi neizou leh hitheite' luut leh pawtna ahih toh a hihna kithei in kisathei mahmah a, a khang a Kelkong Khangnung simmoh mahmah in tawng gige hi. Kelkong Khangnung ahihleh mi neizou leng a lut ngeilouhna ahihman in kiniamkhiat tak in om dinden a, huaiziak a kingaisia leh lungkham a leng om tuanlou in ahihna bangbang ah lungkim tak in a omthei hi. Kelkong Saknung in a enghouna leh kounate leng hehna leh lungnatna a neilou in, huih bang in a lengmangsak zel hi. Alou theilou leng ahi him hi. Zadah in heh in lungkimtakei leh bang lohtheih a nei a?

Kelkong Saknung in tua a omna mun a ama' omma a bangchi bang kelkong ana om a, bangchidan a tua amah hong om thei ahia chih a sui ngeikei. Apu-apate' tanchin himhim a kankei a, theih leng a a sawmkei. Bangtan huchia thupitak a dinglai ding ahia chih leng ngaihsut in a nei ngeikei a, tuhun bang a thupi leh muanhuai a ding gige ding in a kikoih hi. A huchikei ding chihna thu leng a omtuankei. 

Kelkong Saknung' huangzawl a tengte ahihleh khosak nuamtak, veng-le-pam englou in a khosa ua, kua mah a phawkkei uhi. A pa uh zingkal a ofis kai dia kuan nitum kuan in a hong tung zel a, a nu uh bel inn ah sep ding himhim neilou in a om thapai zel hi. Tapa nih leh tanu nih a nei ua, pawtna ding khempeuh ah gari in a pawt ua, khe in leng lampi a sikkhakei phial uhi. Nasem ding ompih a nei ua, a tanute uh nungak nuamphialta hinapi in innsung nasepdan himhim a theikei uhi. A tapate un lah tu leh tem nangawn a len theikei uh. Kelkong Khangnung' huang a tengte bel khosak haksa tak ahi ua, huaiziak mah in om maimai na hun a neikei ua, a neupen a pan a lianpen tan in amau sep ding chiat sem in a buai gige ua, a kizen thei mahmah uhi. Huchi kawmpi in a tate uh bang laisim a hahpan thei mahmah ua, amau khom a siamthei huntawk leng ahi uhi.

Hunte hong pai zel a, Kelkong Saknung tuh a kisaktheih bang in a kisathei touzel a, Kelkong Khangnungte' vokbuuk namsiatdan khawng gen in a house zuukzuuk zel hi. A vokte bang uh a kul apan pawt in huangsung khawng ah a ta zel ua, a innkuan un man ding in a kidelh huan ua, huaihun chiang in Kelkong Saknung in Kelkong Khangnung kiang ah, 'Ding maimai lou in va huh tanla,' 'A na kihong inla taipawt sak do, a delh uh muhnop a om e,' chi peuh in chiamnuihbawlna in ana nei zel hi. Tuuk chiang bang in Kelkong Saknungte ahihleh suangdai bittak nei ahihman un tui luut theilou a, hawktui teng Kelkong Khangnungte huangsung ah luanglut zel a, khenchiang in a tuang bang uh tuumthei zel hi. huai chiang in Kelkong Saknung in, 'Ana kizap ou,' chi peuh in a nuihsan zel hi. 

Kum tampi a kivei nung in kum khat tuh pawlsawm gah a hong suak a, Kelkong Saknungte' naupa a lohsam a, Kelkong Khangnungte' naupa bel sangtak a lohching ahihman in a kipahpih nuam tampi Kelkong Khangnung tawn in a hong luut sosouh ua, Kelkong Saknung in ana en giaugiau a, gen ding bel a thei hetkei hi. Huai nung sawtlou in nitak khat tua pawlsawm lohsam valnou pa tuh zukhamsa in Kelkong Saknung a kiluai zen in inn a hong luut a, huai ni apan Kelkong Saknung tuh a lung a nuam hetkei hi. 

Kumte a liam zungzung a, Kelkong Saknung tuh a pau tawm hiai hi. A tapa upapen uh zungol vei in om a, a tapa naupang pen uh khamtheih goih in innsung a lok den a, nidang a innsung leh huangsung a van manphate vengbit ding a kikalh thipthep gige Kelkong Saknung tuh tu in kalh leh kalhlouh leng kibang khop in a omta hi. A innsung leh huangsung uah ven ding bangmah a om nawnkei. A hawm ahita hi. A rongte a kikhokta a, nasatak in a tui-eek a, mun khen khatkhat ah a bal heeihawi hi. Zawngkhal tak leh bahtak in a om a, nidanglai a a thupilai ngai in a lungzuang thei mahmah hi.

Kelkong Khangnungte ahihleh a tate uh lohchinna tuamtuam a lohching touzel in sepna hoih taktak a hon nei uhi. A vokbuk uh a om nawnkei a, a inn uh suanginn hoihtak a hong hisamta a, huaite tengteng Kelkong Saknung in dai dide in ana en zel hi. Amah ahihleh a kolong mahmahta a, huih haattak in nuai leh puukthei ding dinmun a ding leng ahi simta hi. Huihpi hong tun ding ngaklah hetlou in a om a, lah huihpi a hong nai hiaihiai hi. 

Hun in siatlam hon manoh zel a, nidang a milian-mihaute' luut gigena Kelkong Saknung tuh tu in a tate' ziak in khamtheih hihte leh zungolveite' luutna a hong suakta a, huchilou sunsun a va luutte le a atate gamtatna nung a lungkimloute leh leiba siikte khawng ahi uhi.

Khaal a hong tung a, huih a haat mahmah a, Kelkong Saknung tuh khenchiang in saklam ah a awn a, khenchiang in khanglam ah a awn a, a thuumging ngawtngawt phet hi. Gim leh tawltak in a om a, lah a panpih ding kuamah a omkei. Panpih chih naaksang in chikchiang a tuahkhiat a sikse la vaipa' kiang a khot in a om dia chih bang a lunghimohna ahizaw hi. Khaal a hong bei a, a huih leng a thengta hi. Himahleh denchiang in tuuk a hong tung ding a, huihpi-vuahpi'n a hon nuai nawn ding a, nangzou di'n a kigingta nawnkei, a bah mahmahta ngal a.

Hun lah khawl hetlou ahihchiang in tuuk hong tung peetmah ding in a kisa a, mallam a pan meivom a hong kizial suk vuvut hi. Patau tak in a en a, maituah louhngal lah bangmah lohtheih a neikei. A thawmhau a, lah amah hehnem ding bangmah a omkei. Singtehte a ging sesu ua, a awn duamduam ua, huihpi'n hon nawk ngeingei ding ahi chih a thei hi. Khua a hong mial a, a thawmhau semsem a, vasa khat beek a kiang a singkung ah va haam leh chih a lunggulh tuntun hi. Huihpi'n hon pha peetmah ding ahita a, a mitsi a, a hi bangbang tuak ding in a kisakholta hi. Huihpi a nasa ngial a, vuahpi leh gialpi toh a kithuah lai zomah hi. 

Husa vengvung in a phawng a, awl in a hong hakkhia a, puuk deidawi a hihlam a kitheikhia hi. Chik kal a khophawklou a puuk ahia chih a theikei. Ni bangzah sung huchia khophawklou a om ahiam chih leng a theikei. A khuam toh a kizopna naakpipi in a khetsak ua, bang loh sawm uhiam a theikei. A mitsi nawn a, a utut uh a loh ding un a om diindeen hi. A khentol zou khong ua, awl in a zawngphei ua, auto a guang di'n a kisa uhi. Lamka lam a sikse lapa' kia zuak a om dek ahihdan a theita hi. 

Awl in a hong hakkhia a, nidang a a engbawl leh housiat gige Kelkong Khangnung a gal-et a, a muh in a kiguih hial hi. Nidang a go ngam ngimngem a omna kelkong ah tu in ama' lutlai sang a hoihzaw siik leh suang a kibawl kelkong thupitak ana ding veelvual hi. Kipahpih thu kamkhat beek genthei leh a ut mahmah a, lah a aw a om nawnkei. 

Huchia Lamkalam a auto a puak a om a, a kisinsuk nonok lai in thil tam a ngaihsun ngial hi. Ama' kisaktheih ziak a a sungte natan in hiai bang a vangtahna tuak uh ade aw chi bang in a kingaihsun a, kisiikna ngen in a dim hi. Nidang a a thupit lai a ana housiat leh engbawl gige Kelkong Khangnung tu a ama' lutlai sang a hong thupizaw chih bang a ngaihsut chiang in hinkhua zaw kingainiam tak a hin gige ding ahihdan a thei thakthak a, lah a kikheelta hi. Huchi bang a ana engbawl leh simmoh kiang ah ngaihdam ngetna ding hun mukei mahleh tu a ama lutlai sang a thupi zawta chih a theih in khamuanna neuchik a pia hi.

©Siamsinna leh Vakiangbu