ITNA , AW ITNA

By- L. Khupsonlian Ngaihte

Kho omdan in lungsim leh tha hon nguai sak mahmah hi. Ni 3 (thum) bang akizom a vuah chiin ngilhngelh a om ahihtaak man in. Heisuk-heitouhna ah nuangkaina in hon bawm a, sangkil kan leng lah buan nawi ngenta siksik ngai ahihman in, inn a om in tutna sau ah zanpuan silh in kalum hithet hi. Huchi a lup mai leng hithei lou zel ahihman in, hon maitai sak kha om hiam chi in TV ka en kawm hi. Tuni pentak in etnop leh lunglutna di ka mu hetkei. Ka khek tuahtuah na lam ah ‘Laa Tualleng’ kikhahna mun ka tung kha hi. Huai channel ah, “Lungsiet neilou lah a nuom puoi, lungsiet neihlah gentheihna ahi” chih ana paikha chet hi. A laasa tu pen omdan ka muh chiang in, hi leleuh zozen ahihman in, ka nuih bang za in ka nui heuhau hi. A’ihhang in, a laa thu ka ngaihtuah sau chiang in huai nuihna pen dahna in hon bawm hi: ka tulel dinmun toh kituaklua ahihman in.

Tangval khat ka hihtei man in nungak melhoih tak leh ka it mahmah khat, Thianhoih kichi ka nei hi. Ka ngaih mahmah ziak in, a min ka zak lel in leng lungsim nopna hon guan hi. Mite’n a nungakte uh hiam atangvalte uh Ngaihnou ahihke’h sappau in ‘Dar, Darling, Dear, Love’ chih khong in sam ua, ken bel ka ngaihnou amin mahmah a ka sap pen nuamsa ka hihman in, “Thian” chi in ka sam hi. Ahi a, Thianhoih toh bel kum khat paisa a kingai pan ka na hi uhi. Ka kingaih tung un bel kuamah ka eng kei uh. Niteng in kihou gige mah le ung, gennop hau in maban di khong kikum khom in sawt pipi WhatsApp tungtawn in ka kihou thei uhi. Iitna thute kikum khawm in, ka ngaihdan leh amah ka muh khak hampha ka kisakdan te gen in zansawt zong ka khual kei ua, zan hong sawt chiang bang in i lungsimte hong kihong semsem in kizom mah bang a, sappau in genle’ng Romantic dedeuh hi. Huai teng leng hun sa lou in, a aw mahmah leng ka zaknop man in ka call hun leng atam mahmah.

Himahleh, hunte hong pai in huai dan inbel ka om gige theikei uhi. Hinkhua pen anuam leh deihdan kia a pai theilou hiven, kilemlouhna ka neihchiang un thu omdan kikum khom in ka gen vengthei zel ua, kitheisiam tuah in ki-itna sem hon tun hi’n ka thei hi. A’ihhang in, tu lel a ka omdan uh theisiam haksa ka sa a, ka kal uh bawlhoih sawm in panla le’ng le adik theihlouhna khat om hin ka thei hi. “Ka tung a lungkim louhna nei na mawle, Thian?”, chi a ka dot chiang in lah neilou ahih dan hon hilh hi. Ahih hang in ka lungsim nuam thei tuanlou ahihman in, “om noplouhna nei na maw leh Thian?”, chi a ka dot leuleu chiang in, tulai a om nuamlou a ning kitel ahihdan hon hilh hi. Ken leng huai ziak hi ngei ding in ka gingta a, achite hong nuam a huai chiang a ka kal uh hong hoih ngei ding a kinepna liantak toh ka ngaihnou hun ka pia hi.

Huchi a kal khat bang hun ka piak hang in, ka kal simthu uh hoihlam manoh sang in siatlam manoh hi in ka thei. Kei apat in gamla deuhdeuh ka sa a, alungsim leng kei apat a khak hiaihiai hi in ka thei hi. Huai ban ah, WhatsApp a ka kichat chiang un leng hon thukkikna pen minit 1 minit 2 khong ka ngak hong ngai mokta hi. A bullam in bel buailua hi dia gingta in, “ka na pawtsan phot di o”, chi in hoihtak a atawpna bawl in ka pawtsan zel hi. Himahleh kei out nung inle sawt pipi online lai ahihman in, lamdang sakna ka neita hi.A hong mun luat chiang in bel, “buailua maw Thian?” ahihkei leh, “k’on tangkik hak thei ngei e, Thian”, chih khong ka chi zel hi. Ka lungsim pen lungnop louhna in hon tuam a, ngaihtuah dedu in ka om hi. Hiai te hah ngaihtuah lua in, ka ngaihtuahna a ana gam mang ka hi ngei dia, atak hinkhua pen phawk pha nonlou in ka TV etlam leng ngaihsak kha nonlou ka hihman in ka nu’n, “TV etlouh ding khat suah naak ding hilou eive, sum eive sum”, hong chih chiang in ka khanglou guih a thoukhia in TV ka va off hi. Ka phone la in facebook ka khoih leuleu hi. Facebook ka khoih velvel leh ka classmate te uh khat, a nau toh lim a kilak khomna ka va mu kha hi. Ken leng like in, “wow! na fuh ngei uh e muang”, chi in ka va comment hi. Ahitak azaw, anau nu pen in ka mit hon hip a ka melhoihsak mi ahi hi.

Nitak hong hih in, ka houpih ngeina bang in ka houpih pan hi. Kihou pat tuung bel thu kidong tuah lel khawng hi tangpi a, kihou paithei tatak pahlou hi. Kihou hoihsem sawm in pan ka la hi; himahleh ahi theikei. Hon thukna pen ka ngakzek ngai tangpi ahihman in, “Na buai chi ngei e, Thian..”, ka chi hi.

“Buai moklou e”

“Kua kua toh kihou moleh”

“Nang toh Biaksang himai ahi”

“Biaksang kha kua ale..?”, chi in ka dong hi.

Huchi a ka dot chiang in ah Thianhoih in hon hilhchian hi. "Zanlam a ka hon gen pen ahi. Huai navy pa pen", hon chi hi. Ama lam aleng a hon genlam tak ka theikik hi. Huai pa ahihleh kei toh ka kingaihma ua le ana gen ahi a, himahleh alawmte' lawm ahihman aadawng nuamlouh ahi hi - a lawmpa pen inle Thianhoih deih in a itna thu gen a, anih ua dawng zawk sam ding pen Thianhoih in theilou ahihman in. Huchi a kihou hou uh hon chih chiang in ka lungsim nuam lou dedeuh ahihman in, hichi'n ka dong non hi.

"Kihou hou na hi uh maw huai toh..?"

"Hm, kihou hou mah ung e"

"Nitak WhatsApp a ka pawt nung chiang ale, huai toh maw na kihou zel uh?"

"Ha, huai toh hitang pi", chi a hon dawng chiang in ah ka lungsim pen hi dedu zozen hi. Ka mai bang kimu thei hileng mial in mial thoh leng a kilawm top!

Tha thak la in, "Bang chi uh mawleh huai toh, bang tan tungta uh maw?", chi in kam dam theitawp in ka dong zom hi. Ken kam dam theitawp in dong mah leng, a hon dawngna zaw ana tel mai! "Ken leng ka ngai ahi", hon chi hi. Ka lungtang pen tem a dawt pailet mah abang! Bang pen gen kik a, bang a dawngkik ding ka hi hiam chih leng ka ngaihtuah theikei. Ka chi bang sa hehu in, ka kho-ul bang in hon buak a ka ngaihtuahna zaw amumal theikei.

Huchi himahleh dawnglouh theihlouh a, suk veng ut ka hihman in ah, "Huchi non na hi uh maw...", chi lel in, "Kei toh kal bang chi leng chi na hia le Thian, bang hon chih leng chi na hia?", chi in ka dong kik hi. Huchi a ka chih chiang in ah, "I kilawm thuah phot diam..", hon chi kik hi. Huai hon chih chiang in zaw kei adi'n kinepna om nonkei chih achiang khop mai. Ken ngailua ka hihman in kilawmthuah pih di chi leng kei ka lungsim nuamlou a ka lungtang na gige ding ahihman in, huai zaw kei adia kigawtna lel ahi hi. Ka ngaihman in a itna nget ngutngut bang ka ut hi. Huchi in ngen leng lah bang tan hon daih dia chi'n ka lungsim anuam tuankei zel di. Nget hat thu a hon ngai a kei hon bel di hileh utna tel ing e! Ka hihtheih tawpsuah in khitui luangkawm hit-hit inle ka ngen ngap.A'ihhang in, tun zaw ka hihtheih atawm khop mai. It in ngai tawk mah leng ka hihtheih omsun zaw kihepkhiat himai ahihman in, "Hoihtak in n'ong kingai di uh aw", chi in ka vaikhak a,"Damtak in mangpha..Nang k'on muhkhak hampha ka kisa", chi in ka it mahmah Thianhoih ka kha khe ta hi.

Mihing zaw thil apaikhit nung chiang a kichian pan phet ana kihi hi. Khua amial chiang in vak poimoh dan ithei diak ua, phalbi chiang in nisa i ngaihna mahmah uhi; I niamkiak chiang in sang i na hihlam i phawk phing ua; Huai mah bang in, Thianhoih toh ka kikhen chiang un huchi tuk a ngai ka hihlam ka theichan phet hi. Ka lungsim ah amah kia om in, ngui in ka ngui hi. Huchi himahleh nungkik pen hithei buanglou ahihman in, maban sawn zel ding in pan ka la a 'Hun pen hun ka pia hi'.A hun in zaw hon pokhe zel in, ngaihtuah vang deuh in hong omtheita hi. A'ih hang in, amin hiam alim khong ka muhchiang leh ka ngaihtuah khak chiang lel inleng Hap (lungmul)in hon bit mah abang in ka lungtang bang akin zot zozen hi.

Lungtang i piaksate zaw mangngilh theih ding ahikei a, himahleh poimoh pen a kikoih nonlou ahihman in, hun hong pai chiang in zaw puak siamtheihna piak in i om hi - huai pen angak hak mahmah zel ahiven. Maban sawn tou zel na ah mi tuamtuam tuahtouh zel in om hi. Sunday's School a ka senior pihte numei khat, Hohoih kichi, toh ka kihou thei mahmah uhi. Himahleh ka lawm Suanthang in deihbawl sim bang in hong kinel dedeuh ua, kingai chiah hikei mahle uh thil ka hihkhawm chiang a omkhom tam zaw zel uh ahihman un kei ka kihem khia in ka houpih nonkei hi.

Hun hong pai zel in, Biak' inn ale Piching ka lutta a, siamsinna lam leng Class XII zou in BA pen Churachandpur College ah ka sunzom hi. Huai ah meltheih ka classmate luite uh tamkhop toh ka kaikhawm ua, melthak leng a om bok hi. Huai melthakte lak ah ka classmate te uh, ka mit hip leh ka mi deihdan khat ka mu hi. A min ahihleh Moicy ahi a, mi pau nuam leh houpih nuam mi ahih ban ah mi polhnuam mahmah ahi hi. Classmate khat ka hihban uah ka subject laak uh leng kibang omkha ahihman in ka kithuah mun ua, ka omkhom tam mahmah uhi. Aman phone tawi nailou ahihman in, college a kimuhkhak leh kihou ahilel zel.Ka muh apat leng hoih ka sak ziak mah leng adiam ah, ka thuah tam dedeuh chiang in ka ngaihnatna alian semsem a, ka deihna a uang semsem hi. Himahleh kha khat leng kaikhawm nailou a gen pah lawlaw di pen hi salou in, ka kisel lai hi - aman bel hon theihna chiang om ngei ding in ka gingta veve.

Kha khat ka kaikhom nung uh leh ka kithuah nung un, ka deihdan thu laithon a gelh in ka pia hi. Ka piak nung ale a hon houpih dan tuam tuanlou in, ka kithuahdan mah ua kithuah tou leh kihoutou ka hihman un kinepna liantak ka nei hi. Numei mi pilvang in bel hon deihpen kihi leh leng hon dawng pah lou ding ahihman in kaal khat hun ka pia a, Kiginni' sun in ka lawmte Suanthang leh Muanthang toh a inn uah ka va hoh uhi. Polhnuam ka chih pen ka chikhial hetkei.A inn uah leng a siam mahmah a, kamsiam tak a hon houpih in nuam sa chiat ka hi uh chih haihna ding a omkei. Zongsang huai mahmah leh akilawm hi. Sawt omlou in ka pai ua, ka pai un tuitawi kawm di'n hong pawt khia hi. Kihou kawm in ka kitonsuk ua, a tuitawina di mun tung in ka lawmten ana paisan uhi. Ken leng huai hun lemtang ala in,

"Ka hon lai piak pen non na simsak na hiale Mawi?", ka chi hi.

"Hm, ana sim mah ing e"

"Chih leh na thupukna na hon hilh thei diam le..?"

"Hm,.. ", chi in pau zom pahlou in om a dang awk sim in, "i... i khah... i kha maw ... ka hithei kei di. Hon theisiam in aw", chi in ka kinepna banglou tak in hon dawng daih ahihman in dawng zokna di theilou ka hihman in, "Oo, huchi maw...", chi in ka dawng a, huai ban a dottuak hetlou himahleh, "Bang ziak in maw?", chi in ka dong daih hi.

Huai ka dot leh kei hon enlai anuai lam in hong dai dedu a, sawtlou nung in, "Mi kuapeuh in bel i ngaihtheih mi om amo..", hon chi khia hi. Huai hon chih chiang in bel ami ngaihtheih mi hilou ka hihlam chiang mahmah ahihman in ken leng, "Himah e maw..", chi in ka dawng lel a, bei dong lua in ka tuike nuih vevu kha hi. A mi ngaihtheih achih pen theihnuamna lungtang nei ka hihman in, "Bang chi bang mi maw na ngaihtheih?non hilh thei diam, ahimhim in", chi a ka dot leh a chil bang hon valh masa in, "Bang chi gen di ade o...", hon chi masa in, "I khah... mi lian deuh khong leh kei toh kum 5 lam kho kikhe di mi deuh khong", hon chi khia hi. Kei bel mi sang lolouka hi a, a hon gente kei hihna toh khat leng kituak kha omlou ahihman in, ahi theilou ahihdan ka chian a, ka dot khak bang ka kileh suanlah hi. Himahleh kei mah dot hi a, a lungsim tak mah hon gen ahihman in ka kipahpih a, "Ka kipak e na lungsim bang na hon gen a, kei ching zoulou ka na hi ve maw", chi kawm in ka nui likliak phet hi. Pau non zawsam ding omlou ka hihman un, "Ka na pai di oleh, annek lim aw", chih khak in ka kikhen uhi.

Lam kawina mun a ka lawmte'n ana ngak uh ahih ngei dia, ka galmuh phei pah hi. Ka thuzak pen kipahhuailou ahihman in, ka mai mual ahi ngei dia, "na hong mial phei ngei e", hon na chi uhi. Ken leng thu omdan gen in, "duhthusam dan hilou aihcia maw", ka chi lel hi. Huai ka gen chiang in ka lawmte'n gen di pen theilou ahi ngei ding ua paulou-phunlou in ka pai noknok uhi. Sawtlou nung in Suanthang in ka theihsiamna ding in hon thuhilh a, atawpna ah, "Poi sam amaw..", hon chi laizang hi. Kei leng nui masa zozen in, "Poi sam a maw i chih uhiam poikei maw i chih chiang ua zaw apoi law lam hita eive", ka chih san a huai ban ah, "Kam pau kilawm hilou ahih toh zat chi hetlou eive", ka chih leh Suanthang in, "Na hong serious ngei e", chi in ka liang hon betsak a, kei leng serious lua ka hihlam kithei thak in, ki-entuah in ka nui uhi. Thudang akhek in, kihou kawmkawm in innlam ka zuan vengveng uhi.

Ka lungtup tunglou chuh ka hi peuhmah. Himahleh college khat a kaikhawm ka hihman un ka kimu mun mahmah ua, theisiam thou ka kisak leh abullam bang haksa ka sa sim hi. Ama a kithuah in tua ui-le-keel bat ding pen haihuai sa ka hihman in, ka kal thu uh kitheih mohbawl in ka kituah lemchiang un bel ka houpih khial kei hi; nidang bang in bel ka kithuah nonkei zel uh. Innlam a ka lawmte toh kai khomlou ka hihman in, Moicy te toh kipawl kha dan ka na hi uhi. Tua lem tatak theilou nonlou ahihman in, kei vuak a ka om hun atam mahmah ta. Huchi kawmkal lak ah Class XII a ka classmate te bel ka theihsa ahihman un ka kihouzel ua, huailak ah Biakmuang toh leng nidang sang in ka kimaingal zaw uhi. Class khong la khom ka hihman un, note khong kikan tuahna ding in phone number ka kipetuah uhi. Huchi in college leh WhatsApp khong inle ka kihouzel ua, chiamnuih a kihou tamzaw ka hihna uah kimaingal in Biakmuang ban ah alawmte pen kei lawmte hong hi uhi.

Nitak khat Biakmuang toh ka kihoulai un amah kiang ah, "Thil khat kon dong diam?", ka chih leh, "Awle", chi in hon dawng hi. Kei leng kipan in, "Na nau in WhatsApp khoih hia?", ka chi leh khoih ahihdan hon hilh a, "Bang ziak e?", chi in kon leh kan hi. Ken leng ka lungsim a ommah gen in, "Bang ziak hilou e, hoih ka sa ahi...hihi"

"Hehe.. Koi ah na mukha a eita?"

"Nikum lam a nanau toh lim na kilakna na upload pen a ka muh khak ahi"

"Haha..chiai chiai eive. Na hon genhak ngei e", chi in hon dawng hi.

Ken leng chiamnuih thutak a huailai ale hon gen ka hihdan ka hilh a, ka comment na leng omlai ding ahihdan ka hilh chiang in anuihzat thu hon leh hilh kik in, "Deihsim gaugau mo a number?", chia hon kan chiang in a deihmah ka hihna toh, "Na phal leh hon pe ve maw, ka deih e a number", chi in kamsiam theitawp suah in ka thuk kik hi. Huai ka chih tak in hon pia a, himahleh zansawt dek manta ahihman in huai nitak a houpih pahlou in a number ka save masa hi.

A zingchiang nitak in ka houpih pan hi. Ka msg chiang in, kua hi ka hiam chih hon kan masa pen a, "Ka min Sonlian ahi", chi in hoihtak in ka kigen pah hi. Ken bel amin a u Biakmuang apat thei ngal ka hihman in, ka sap di dan ka leh dot daihleh, "A tangpi in Vungbawi chi in hon sam uh. a khente'n tuh Vung chih chauh in hon sam uh. Nang ut dandan himai ahi", chi in hon hilh kik hi. Ken leng "Vung" chi a hon sam ding ka hi ka chih leh hon 'amen' hi. Huai nitak zaw thu tuamtuam kikan tuahna in ka zangbei ua, hoihtak tak a hon dawng tiautiau ahihman in houpih nuam ka sa hi. Ka kihou tawp dek un, "nang toh kihou nuam ka sa, maban ah leng hon houpih zel ning aw", ka chih leh, "Hi thamtham e", chi in hon thukkik a, huchi'n ka hun sak phot uhi.

Huchi a ka hong kihou tam dedeuh chiang un ngaihnatna ka nei semsem hi. Mel a muh ut ka hihman in ka kihou ni ua pat kaal khat hong chin in hoh di'n ka ngen a, hong hoh in hon chi ahihman in ka va hoh hi. Kei vuak a hoh nuam salou ka hihman in ka lawmte Suanthang leh Muanthang toh ka va hoh uhi. Lawmte adia hoh chiang in bel muangchang deuh in va ki-om thei in va kipau ziahziah thei a, himahleh ei adi hong hih chiang in zumna leh zaktatna kinei mok hi.

Vungbawi' u Biakmuang toh kitheisa ka hihman un zumna bel asel baihlam deuh in hon dawn zangkhai tuan mahmah. A hon etlouh kal in amel hoihtak in ka na vel a, a omdan leh a miziate ka etchiang in ka lung atung mahmah. A hon houpih chiang inle a maitang a enkawm in ka dawng theikei: ka zumna ziak in ka mai bang asa hehu zozen hi. Himahleh azum lou ka kineih a, haksa tak ahi. Dak kal 2 hiam om in ka pai uhi.

Ka pai un ka lawmte gel kiang ah, "Bang chi na sa ua leh i hohna uh?", chi a ka dot leh, "Hiai maw na gengen", chi in Suanthang in hon chiamnuih masa a, "Hoih ka sa ken tuh. Mi polhnuam ding ahi", hon chi a Muanthang in leng, "Na kituak lua uh", chih nui heuhau kawm in hon chi hi.Zak nuam lampang tak za ka hihman in ka lungsim anuam a, lungsim nuamtak in ka paisuk uhi.

Huchi'n ka kihou tou zel ua, kinel dedeuh in ka om uhi. Kal khat a nihvei khong ka va hohzel hi. Kha khat hiam Vungbawi toh ka kihou nung un, ka deihlam theikhin sa hitawk mahleh, ka deihthu leh ka itna simthu ka lel hi. Huchia kha khat bang kihouta himah le ung, amah adin tom lawlai ana hi ngei dia, "Na hon houpih dante nuam ka sa a, ka tung ah leng na hoih hi. Ka mi ngaihtheih chi leng na hi a himahleh hun hon pezek laive maw Uson, kithei sem phot lai ni aw", chi in hon dawng hi. Huchi a hon dawng chiang in lamdang ka sa zozen hi; mi pilvang tak ahihlam haih ding ahikei. A hon dawngdan pen duhthusam bang hikei mahleh lungkiatna om hi'n ka ngaihsun kei. Huai ziak mah in ka theisiam a, "Awle, hi tham e", chi in lungke lou a ngak ding ka hihdan ka hilh zui ngal hi.

Huchi a kithuzak zel leh kihou touzel in ka om uhi. Nitak khat a WhatsApp’dp ah pasal khat toh a kilakna uh hon koih hi. Kingai chiah hikei mahle ung, kihouhou leh amah ngak ka hihman in, ka muh in ka lungtang ana mahmah hi. Awl damtak in, "na dp uah na nalh ngei uh e", ka chih leh, "Huchi hia ka kipak e", chi hon dawng a, ken leng kua hi hiam chih kan dia ka gelh kal in message khat hon khak zui in, "Ka lawmpa ahi aw, lungsim nuamlou khong in non na omkha de", hon chih hi.

Ken leng, "Lungsim nuamlou man ahi", chi in chiamnuih thutak a dawngkik kawm in kua hihiam chih ka kanchet leh Vungbawi in, "Amin maw nang min toh kibang Sonlian mah ahi. Ka lawm pasalte ahi.Mituai sim khat, kipolh a kipolhpih nuam. Huchi lamte hilou ahi", hon chih chiang in bel, "Huiha!", chi zeen a om in lungsim dam huaihuai hi.

Kha 4 valbang ka kihou zoh nung uh a kum non February kha in ka deihdan thu leh ka ngaihdan thu ka gen non hi: Sawtkhop leng kihouta ka hihman un ka kitheichiang mahmah ta ua, thupukna lathei ta ngei ding a ka gingtak man in ah. Ka gingtak bang in thupukna ana lathei ta hi. A zingchiang, tarik ni 7 in, akiang a itna simthu ka leel pen hon na pomsak in, ama a bel "kei' a na hi" chizel mah leng tun bel kei' a tatak ahi ka chithei ta hi.

Hunte hong paitou zel in, ka kinaih semsem chiang un ka kitheisiam dedeuh uhi. I kinaih semsem chiang in bel, kitheih siamlouh hut omkha theimah ahi a, paunak inle "Kam sung a lei-le-ha kikei khathei" chi ahihman in ah, huchi hun chiang in leng kakal uh bawlhoih sawm in pan ka la tuak ua, kimohsa tuahlou in kei mah diklou ka hi chi in nuai nun ka kituh zawk chiang un ka kal simthu uh agen veng baihlam hi. Huai ziak mah ahi diam ah thupi lua a ka kisuk lemlouh lam uh ka theikei a, ka kilemlouh khak chiang unleng sawt daihlou in ani mah in ka kilem zel uhi.

Ki-it a kingai mah ka hi uh chih kithei in ka kimuangtuah uhi - kingaihna aakalbi poimoh pen leng hiven. Huchih ziak mah in, tomchik sung adia ki-enlou in zi-le-pasal adia ka ki-etman un siangthou tak in ka kingai ua, kum khat val bang ka kingaih nung unle ka kawi ding chiang inleng aphalna omlou in ka kawi ngeikei. Kou leh kou leng hunlem kibawl lou in, nitak ka pawtkhom dek zenzen uh leh leng a u Biakmuang toh ka pawt dialdial uhi. Ka kal simthu uh kei sungkuante'n leng a hon theihpih ua, Vungbawite' innkuan in leng hon theihpih bok uh.

Kingaihdan siamtak in, min kingaih khong haksa chimah le uh kou ka kitheihsiam leh ka kimuan mahmah ziak un, haksatna ding a omkei a lungsim nopna leh kipahna hon tuntu ahi hi. Pathian' thu khong kikum khawm in, maban di bang saupi genkhom zel in Khalam ah leng kipanpih tuah in ka om uhi. Huchi ka hihman un Vungbawi kiang ah, "Nang ka hon muh khak hampha hina tel ing e, ka soul mate na hi nang zaw", ka chi hi. Aman leng hampha kisa ahihdan hon gen kik hi.

Hunte hong paizel in, kum 2 val bang ka na kingaitou ta uhi. Kei leng graduate dekta in, ka siamsinna lam ah 6thSemester na ka simlel hi. Ka graduate zoh chiang a kaam hon zong mengmeng di in, huai zoh chiang a kiteeng di tan inle ka kikum khin uhi.

Huchi kawmkal lak ah nidang a naupang Sunday' school ka kailai ua ka senior pih Hohoih in hon houpih hi. Senior ka hih lai uhte hun nuam ahihdante khong kikum in, thu tuamtuam ka genkhom uhi. Huchi a kihouhou na lam uah hon deih ahihdan thu hon genlang hi. Kei bel saan mun muangsa ka hi a, lungkim tak leh midang lunggulh tuanlou ka hihman in, "Huchi a non deih theih hampha ka kisa a ka kipak.Hileh leng ken midang ana neikhin ka hi. Hon theisiam in aw Hoih", chi in kamsiam tak in ka khakhia hi. Numei in hon genhial zaw zum-le-zah khuallou a hon gen ahihman un zahtak huai ka sa mahmah hi.

Huchia a ka gen chiang in ah hon theisiam ahihdan hon hilh a, "Huai mi hampha pen kua ahi de aw, ka theinuam e! Non hilh theidiam?", chi in kamsiam tak in hon dong hi. Kei leng theinuam ahihleh chi in, "Mualkawi te ahi.A min Vungbawi", chi in ka hilh hi. Aman leng theisiam mahmah in, "Hoihtak in na hong kingai di uh aw", chi in hon kha khia hi. Hiai thu bel Vungbawi ka hilh tuankei.

Huchi himahleh akal non in hon houpih non a, huailam thu ah lutkha non uhi. Kei leng hitheilou ding ka hihdan ka gen non hi. Aman leng hon theisiam ahihdan hon gen non in, himahleh hon ngai veve ahihdan toh hon genzui hi. Kisuanlah huai ka sa, lah anei sa ka hihman in midang ah mit ka tusak utkei. Himahleh mi'n hon houpih chiang in hoih dawnglouh ding nuam salou ka hihman in, hon houpih utte bel hon houpih non dah in chih pen haihuai ka sakman in hoihtak ka dawng zel hi; himahleh ka houpih masa ngeikei.

Hon houpih zel mahleh kei bel ka lungsim khek ding ka hikei a, huai nak sang in Vungbawi ka it dedeuh zaw hi. Nikhat a hon houpihna ah a-inn ua khatvei bek hoh ding in hon gen hi. A hon gentung inbel ka utkei: Va hoh maimai leng Vungbawi ginomlouh sanna dan a ka ngaihziak in. Himahleh hon gen nontak in, va nialnial pen kisaktheih huai sa in, Kiginni zan chiang a hoh ding in ka hilh hi. Ahun hong tung in, kei vuak a hoh nuamlou ding ka chihman in ka lawmpa Muanthang ka zawn a, amah toh ka va hoh uhi.

Singpi bang hon bawl in asiam mahmah hi. Ahi a Hohoih pen mi vom mam hinhen, tulai pau a rashi nei achihte uh, leh migawng lolou figure nei khat ahi hi. Electric kal khat bang seta ahihman in, ka va hoh nitak un a inverter uh leng beita hingei dia khawnvak ana de uhi. Khawnvak in aliah chet ah tu a, amel leng ahoih kimuh theihkei hi.Hai ngiat (Chewing gum)na duh uhleh chin in ka nih un khattuak hon pia hi. Thu tuamtuam ka kikup na lam un dak 9 phial un ka pai uhi. Ka pai kuan lam un, Hohoih bang ngou dedeuh hi’n ka mu a, amel bang hoih in hon hip abang zou hi. Ka pai un agate tan un hong kha hi.

Ka pai unMuanthang in, "I hohna nu le ipai kuan lam abang hoih dedeuh abang mok a", chih nui heuhau kawm in hon chi a, ken leng huchi sa ka hih dan ka hilh hi. "Pai kawm in I chewing gum lohtak hai ni maw", kichi tuah in ka hai uhi.

Inn ka tung in ka lumpah a, nidang a ka kihou zel bang un Vungbawi toh ka kihou uhi. Ka hohna pen gen sawm in hilh sawm mah leng, ahon dot khaklouh ziak in zingchiang kho hilh di'n ka chidaih hi. Huai ban ah ka ning kitel ahihman in, sawt kihoulou in ka hutsak pah uhi. Ka ihmut in ka mang ah Ui vom in ana delhdelh uhi. Hon phaklouh di’n tai kawikawi mah leng atawp in hon delhpha ua hon kei gop tak un ka khanglou a, ka kho-ul in ana buak in gim in ka gim hi. Awl-awl a huih bang diik in ka khoisa vungvung hi.

A zingchiang in bel ka gim nonkei a himahleh ka mang pen ka lungsim ah tham den hi. Biakinn khong kai in buaina tuamtuamte ka hon neihchiang in bel ka lungsim ah amang thei hi. Nitak ka lup in Vungbawi toh ka kihou zel mah bang ua ka houpih masak dek chiang in ka lungsim ah utna leh phulna ka neikei mok hi. Huchia ka omkal in aman hon houpih masa a, ken leng ahoih thei pen in bel ka thuk veve.Lamdang ka kisa sim a, himahleh amah kiang a gen tuanlou in atung ah ka kilem chiin thoh hi.Aman leng hon theihna chiang nei ahi ngei dia, "Hutsak phot ni aw, ihmut nuam ni", hon chi in ka hutsak uhi.

Ka kihou zoh un ka kingaihtuah vengveng chiang in kei-leh-kei leng lamdang ka kisa mahmah. "Amel ka muhna asawt kihal sim a ahi di", chi in zingchiang a hoh ding in ka thupuk hi.

Zingchiang hong hih in, ka thupukna bang in, ka va hoh hi. Ka inn ua pat ka kuankhiak in bel kithalawp tak in ka kuankhia a, himahleh a inn uh ka tun kuan in ka ning hong kitel thethu zel hi. Himahleh Vungbawi kiang ah ka va hoh teitei a, amah bel asiam ngei a siam in anuam theitawp di’n kei a lengla ana dawl hi. A'ih hang in, kei lam a lemlouhna khat om hi'n ka lungsim ah om a, ka om lem hetlou in ka ning kitel in kitel hi. Nidang toh ka omdan kibanglou ahihman in Vungbawi in bel hon theipah a, "Bang chi e Uson?na omdan a lem chi kei ngei e", chi in hon kan khong hi.

Kei leng kisel theih vual hilou ahihman in, "Ka om nuamlou sim adiam ah ka om lem hetlou eimah voi", ka chi hi. "Na lu na mawleh?", chi in ka lu bang hon khoihsak a, sa hehu ka hihman in damdawi khat va la in hon nesak hi. Ka nekkhitna sawt nailou in, "Pha tuamlou hi di Vung", ka chih leh, "a huchih pah mok inle ahoihlua ahikha kei dia, ngak zek lechin maw", chi kawm in hon nuihsan hi. Phatuam tatak theilou ahihman in, nidang a ka pai hun sang in ka paibaih zaw hi. Ka pai in Vungbawi in agate tan uh hong kha a, ka ban a hon len kawm in, "hon na dampah in o Uson", chih hon vaikhak in ka paisuk hi.

Ka tha leng gimsim ahihman in awl-awl in ka paisuk a, a veng uh ka khengkuan in ka om noplouhna teng bei in ka chi bang zang a zang thoh abang hi. Lamdang sasim mah leng Vungbawi hon damdawi piak hi ding a gingta daih in ka lungsim pen ahoih kipia in ka khek hi. Inn ka tung in ka kihah khia a, ka nu leng ana lum khinta ahihman in, ka lumpah hi. Ka lup in Vungbawi kiang ah, "Kei tungta ing a lumpah mai Vung", chih ka message hi. Amah bel ana lum nailou hingei ding a, online lou hi. Minit 10 (sawm) hiam nung in hong online in amah leng lum phet ahihdan hon hilh hi. Ka om noplouh nate khong hon dong a, kei leng damta ka hihdan ka hilh zui chiang in kipak leh a lungsim nuam ahihdan hon hilh hi.

Hoihtak a ka kihoulouhna uh leng kaal khat bang ching dek man ahihman in, huai nitak in bel kou banglou tak in dak 10:30 tan phial ka kihou uhi. Sawt ka kihoulouhna ziak uh ahihleh nitak lupkawm a kihou pen mit in lel lua a, huai ban ah 'tunitak lou leng zingchiang hun omlai na' chih ngaihdan neituak ka hihman un; himahleh tomchik ka kihou pen uh bel amanpha theitawp in ka zang zel uhi. Dak 10:30 bang hong gingtak in kihou nuam tawklai mahleh hutsak di chi in, "Ihmut nuam ni aw.. Kon ngailua", chih ka khak leh aman leng, "Ken leng kon ngailua.. Ihmut nuam ni", chi in ka hutsak uhi.

Zingkal hong hih in ka chi gik agik in ka thouzou kei hi. Zan nitak a ka om nuamlou ka chih sang ale nuamlou zaw ahihman in sawtpi ka lup leh ka nu'n dak 8 gingdek in hong phawng hi. Ka thoukhia a, ka chi hi melmul in ka lungsim ah leng bang mah ka ngaihtuah theikei. Kihah khia in, ka man in an ka ne uhi. Ka ankam leng alim kei bok; ka nu'n, "na thoh hak ziak ahi di", hon chi hi. Kei leng huai dia gingta in ka duh zahzah ka ne a, ka kham in tutna sau a ka tu belbul hi. Ka omdan pen lemlou ahihman in ka nu'n ka om nuamlou ahihlam hon thei a, ken leng hong dampah na inte chi in ka hungaih uhi.

Himahleh, sun hong hih dong inleng anuam theikei. Ka lungsim ngaihtuahna bang mai hiaihiai hi'n ka thei. College leng kailou in, inn ah sun nitum in ka om dap top hi. Bang mah a kithalawpna neilou ka hihman in ka phone zong khatvei leng ka khoih kei. Nitak lam annek hut hong hih in ka ne a, ka duhzah ne in, ka lu na bengbung ahihman in damdawi ne in ka lum hi.Ihmut lam bel bawlthei mahmah ka hi dia, ihmu vengveng in, dak 10 lak a zun khatvei non in ka ihmu non leuleu hi.

A zingchiang inle ka om anuam tuankei, zan asang a ka lungsim a sia-le-pha theihna pen mang dedeuh hi in ka thei hi. Huchi a om ka hihman in ka nu toh ka va ki-ensak ua, damdawi ana pia un huai toh ka kik uhi. Ahih hang in, apha tuam tuankei. Ka gamtat-khohei pen fellou dedeuh in, ka mel ah zong nuihmai omlou in, kiim-le-kiang ate leng ngaihsak nopna nei nonlou ka hihman in munkhat khong a tu in ka om maita.

Huai kawmkal ah Vungbawi leng thuzak lou ka hihman in, ka omdan ana zakha in hong hoh hi. Amel ka muh in zong ka luak asuak hi; A mel leng ka mupeih kei a, ka lungtang ah huatna in adim hi. Ka kiang ah hong tu in, "Bang ana chi e Uson?", maimual tak in hong chi hi. Ken leng dawng tuanlou ka kileh heisan leh ka khut hon let phei sak hi. Huaitak in ka lungtang a hehna in hon tuam a, bang teng gen ka hia chih leng theilou in ka omdan ka thei bun nonkei.

Ka lungsim angaihtuah theihna ka neih non in ka lutung ah Pasal khat in akhut ana koih in, thumna ana neih hi. Kei leng thumna nei lai ahih ka theih in ka mitsi non a, aneih zoh in kei leng ka hak samta. Huaitak in, "nong hak theita maw Son", ana chi hi. Ken leng dawng in ka dak kual leh ka nu toh ka nupi leh ka puu te ana om ua, mai mual tak himahle uh hong nui kiukiau phet uhi. Huchi in, hon thumsak pa'n, "N'ong dam denta ding aw Son", chi in paithei ding ka hihdan uh hon hilh a, kou leng kisa in ka pai uhi.

Ka khanloh a ka omdan khong lamdang ka sa a, 'Dam denta ding' a hon chih zawk mah toh lamdang sakna a pum dim hitawk mahleng kan masak di pen leng theilou ka hihman in ka dai khinkhian phot hi. Auto a ka tuan un ka nupi'n hichi'n hon kan hi.

"Non thei hiale Son?"

"Ha, hon thei mah ing e nupi."

"Na om anuam deuhta hia leh?", hon chih chiang in dawng ding dan ka theikei: Aziak bel ka om noplouh na leng theilou ka hih ban ah ka lungsim ah bang mah omlou ahihman in. Huchi ka hihman in, "Ka theikei", chi in ka dawng lel a, "Bang chi dan ahia chih non hilh thei diam?", chih ka leh dot daih hi. Huaitak in, inntung chiang a hon hilh ding chi in hon ngaksak hi.

Inn ka tung un ka kihah khia a, limlang a ka va ki-et leh kei-leh-kei leng ka kilau dek hial. Ka gawng in ka gawng a, ka mai' guh bang dawk gipgep in ka mit' kuak bang athuak kekuih hi. Ka khut ka en a, nidang a sim zohlouh himahleh tun bel nuamtak in ka simthei; ka naak guhte bang leng x-ray kilak selouh a simtheih ding in om hi. Kei leng lamdang kisa in ka pawtkhia a ka nu kiang ah, "Bang chitel ka hia Nu, ka gawng ngei e. Bang tuak kha ka hiam?", chi a ka dot leh ka nu’ mit apan khitui hong luangkhia in, "Bang mah theilou dan na hi maw. Na lungsim hon sukbuai sak dimdem dan mah ana hi maw", hon chih chiang in lamdang ka sa dedeuh a, "Bang in maw ka lungsim hon sukbuai nu?!",chi in lamdang sak chi tak in akiang a va tu in ka dong hi.

Huchi a ka dot chiang in ka nu’n leng ka khut hon letsak phei kawm in, “Numei khat in hon hazat man a hon bum eivoi. Hon bum chauh leng hun salou a, a’ kau a hon keih ziak a hichi gawng a bangmah theilou na hi”, hon chih chiang in lamdang sakna a dim ka hihman in, “Bang thu amaw, bang ziak a hon huchih eita nu?”, chi in ka leh dong non leuleu hi. Huai ka dot non tak in hu bang hon la masa in, hon nak kuaikuai zoh in, “Vungbawi toh na kingaih pen uh hon haza a, hon subuai dan ahi”, hon chi hi. Vungbawi hon genkhak tak in ka lungsim ah Vungbawi toh ka kalthu’n luah dim hi. Bang suak a bang chi ka hi uhiam chih pen ka ngaihsut chiang in ka theibun nonkei hi. Ka lungsim ah ka nu’n hon theihpih ding ahi chih gingta ka hihman in, “Vungbawi toh ka kal uh tua bang chi maw Nu?” chi’n ka dong hi.

Huaitak in ka nu’n, “Vungbawi i inn ua nitak lam khat hong hoh na thei hia leh?”, chi hon dong masa hi. Ken bel theichian non tuanlou ka hihman in theilou ka hihdan ka hilhkik tak in, “Na omdan pen tuam dedeuh ahihman in, Vungbawi leng ngaihsak nonlou na hi ngei dia, nitaklam khat hong hoh hi. Na omdan pen hoihkei mah leh chingdam in na om hi. Himahleh I gate uh a hong gingtak in, na mel gum in hong gum a ka hon houpihna leng na hon dawng nuam nonkei hi. Huai kawmkal a Vungbawi toh pasal khat, a khonung a hon hilhna a amin Sonlian mah ahi achih toh, hong lut uhi. Nang hon muh chiang in na kiang ah hong tu pah hi. Hon houpih chiang in, nang na dawng nuamkei a, na mai gumlua ahihman in kei ka na kisuanglah petmah. Himahleh Vungbawi in, kam neem tak in hon houpih tiautiau veve a, hon ngai ahihdan thu nasan hon genkhia hi. A gen kawmkawm in na khut hon let pheisak tak in, nang pen heh in heh in na hong kitom hi. Lamdang salou kuamah ka omkei uh. Na huchih lam hon mukha leh kon muh khak ngeilouh man un. Huai tak in Vungbawi’ mit apat khitui hong luangkhia in, “Ka uson in zaw hon huchih lou di hia, bang ana chi kha na maimah a Uson”, hon chi kekeuh hi.

Innkiim-innkiangte’n thawm ana za uh ahihman un hon delh ziak ua, thagum in ka hon mantang uhi. Na ki-etsakna a kikapna khat hon piak pen a k’on kap chiang un na hong daithei phet in na hong ihmu hi. Himahleh na hoih ihmut luat chiang in ka hon lunghimoh phing ka hihman un Vungbawi in leng sawtkhop hon ompih hi. Na omdan pen lamdang sa chiat ka hihman un lung hon phawng lua a, lamdang ka sakthu uh kia ka kikum uhi. Himahleh aziak-asan ding pen ka ngaihsun theikei uhi. Ann nek hun ding kuan in hon paisan lel hi.

Apai nung sawtlou in na hong halh non a, na omdan khat leng theilou bang in na om hi. Ken leng ka hon gen ngam tuankei a, na om-om in ka hon omsak hi. Huai nitak bel buaina dang omlou in hun I zangthei hi. Na lawm Suanthang leh Muanthang inleng ana zakha uh ahi ngei dia, hong hoh uhi. Na omdan pen nidang abang kei chihbel achian mahmah ua, a’ih hang in amau toh bel na nuikhom in na houlim the uhi. Huai kawmkal ah, Vungbawi in hon lunghimoh lua ahihman in hon call in nang thu hon kan hi. Zan sang a hoihzaw na hihman in, huchi na hihthu ka hilh hi. Hong phanuam ahihdan hon hilh kik a, himahleh buaina nei ahihman in tuni a hong pha manlou ding a, Hun aneih chiang a hong pha ding ahihdan hon hilh hi.

A chih bang ngei in azingchiang sun in hong pha hi. Sun a ana ihmu lai himah lechin, gate a hong gingtak in na hong thoukhia a, na mai ah hehna khat nei hile chin kilawm in gum in gum hi. Vungbawi hong lut tak in, “Bang hon zongzong e hiai a!”, non na chi gemgam pah mok hi. Sangkil leng kan man nailou ahihman in kongkhak bul ah – mit a khitui vung kikeuh in – ding hi. Hong lut in chi mah leng, innkong lam ah diangpawt kik hi. Ken leng ka va delhzui hi. A unu Biakmuang toh hong hoh uh ahihman un, innkong ah ka hehnem uhi. Kap kawm in, “Hiai zaw ka uson hilou ahi”, hon chi hi. Ken leng namizia pen lamdang ka sakthu ka gen hi. Hong lut nuam mahle uh, nang hon muhchiang kidek zoulou ding ahi chih akitheih man in, hong lut lou in paikik uhi.

Apai un, na kiang atu kawm in ka hon houpih hi. Na omdan pen theisiamlou ka hihdan ka hon hilh a, himahleh kam khat a leng hon dawnglou in nuailam na en dedu hi. Vungbawi in hon ngaih dan k’on kikuppih in, bang dia hichi bawl na hihiam chi a ka hon dot chiang in, na mel hong gum in, “gengen koh, ka za ning!”, na hon chihsan lel hi. Kei leng pau nonlou in ka dai mai hi.

Na mel munuam in hong hoh nuam mahleh, na omdan pen theisiam lou a – a hong hohciang in khitui-naptui toh kikpih zel hi. A hong hoh chiang a na omdan pen hoihlou diak ahihman in, hong hohlou phot ding a ka nget chiang in theisiam lou ahihdan hon hilh a, hichi dan a om hitawk mah lechin leng hon it a hon ngai veve ahihdan hon hilh hi. Huai a hon chih chiang in, nang omdan toh ka hon ngaihtuah leh kisuanglah huai ka sa petmah. Amah' a hi veve na hihdan ka hilh chiang in hon theisiam in, hong hohlou phot ding in ka kithukim uhi. Himahleh niteng in hon call in na tanchin hon kan zelzel hi. A hon kanlouh niinle ken call in ka hilh zel.

Damdawi Inn khong a ki-ensak in, lungsim lam ente khongle ka hon ensak ua, na omdan pen hoihlam nawt hi in ka thei uhi. Himahleh na lungsim pen nidang bang tuanlou in, nitak ann nek kuan chiang bang in na buai diak abang hi. Huai kawmkal ah, gawng dedeuh na hihman in ka lungsim bel anuam tuankei. Nikhat ann duh lou in, nek leng na ne nuamkei. Azingchiang tan ale ne nuamlou a hon pe zoulou ka hihman in, na gim dedeuh a damdawi inn ah ka hon lutpih uhi. Vungbawi ka hilh khak hetlouh uh himahleh ana theikha in, nitak in hong hoh a, giak ngal ding in hong kisa ahihdan hon hilh hi. Thawmhau sim ka hihman in, sel tuanlou in ka pompih hi.

A hong tung tuung inbel non na ihmu hi. Nitak dak 10:30 lak in na hong khanglou a, Vungbawi na muhtak in na hangsan zialzial hi. Amel na muh pheilouh dan khong gen in, na huatdan khong na gen zelzel hi. Ka nih un, khitui luangkhe kekeuh in kon etthoh lel uhi. Kiim-le-kiangte subuai kha na hihman in, nursete hong pai in damdawi in hong kap ua, sawtlou nung in na ihmu non hi.

Na ihmut kal in Vungbawi ka na houpih hi. A hon itdan haih ding vual ahikei. Nang na hong huchih chiang in na kal uh pen ka na pona mahmah in, amah ka hehpih mahmah hi. Huai ka chihziak in, kinepna tak na hihlouh dan genpih in midang zong zaw mai ding a ka kuppih chiang in, za nuamlou ahihdan thu hon gen in, genpih nonlou ding in hon ngen hi. Huaitak in, ken leng ka genpih nonkei hi. Huai nitak bel hoihtak a ihmu charchar na hihman in, kou leng zingkal lam in ka ihmu thei uhi.

Zingkal dak 6 lak in ka thou ua, nang non na ihmu laitak in ka dip bang uh akisai zozen hi. Nak lai mah na hi hiam chi a ka hon velchet ua leh, non na naklai sam hi. Kihahkhia in, Vungbawi a innlam uah apai tou hi. Apai nung sawtlou in na hong khanglou a, zan nitak a thu pen thei hetlou petmah na hi chih na mel ah a kilang. Vungbawi thu bek hon kan dia hon gingta himah leng non kan kei hi. Huai phetlou, damdawi inn ai-omna ziak le theilou bang in, na om-om in na om hi.

Damlou dan ale om tuanlou a ann leng neta na hihman in, azingchiang in hon pawtsak uhi. Damdawi inn apat pawtkhiak ni zingchiang in Vungbawi hong hoh non hi. A hong hoh chiang in, hehna di kia na zong a, na huat thu khong gengen na hihman in, amah adi’n noplouhna na tun hi. Sawt omlou in paipah uhi.A hon it ahi chih ka theihpih man in, kisuanlahna ngen in ka dim hi. A kiang a gen ding pen leng ka theikei. Ka omdan apat hon zetheih ahi ngei dia, nopsak louhna ding omlou ahihdan hon hilh in bang teng hileh le it a ngai veve ahihdan hon hilh a, n’ong dampahna ding a lamen tak a hon na thumpih gige ahihdan hon hilh in hon leh hehnep hi. Huchi’n paitou uhi.

Nang ngaihsaklou in haw mah lechin, kal khat in khatvei bek khong hong phazel hi. Ahihhang in, a hong phak chiang in lungnop louhna non na guan a, hong hoh khak zong kisik tuntun ding in na koih zel hi. Huchi himahleh a hong hohlouh chiang inleng nang thu theinuam in hon kan zelzel hi. Khatvei tei hong hoih non ding na hi chih lametna liantak toh hon na ngak hi.

Huai kawmkal ah, na omdan pen hoihlam lah nawtlou, siatlam leng nawt tuanlou in hong om hi. Himahleh ann pen na nene thei a, meh limlim duh in, tampipi ne mahle chin thauna-maamna in na neituan kei. Huai naksang in na gawng dedeuh zomah hi. Huai ban ah, ahunbi nei deuh a hon pha abang zomah hi. Huchia kha nih valbang hon ki-enkai touta ahihman in, damdawite a damthei lou na hihman in muanmohna khat ka hon nei ta uhi. Na pute khong toh kihou in, “damdawi a damthei chi hilou ding ahi”, chi in ka hon kepdan uh ka khek uhi.

Huchi a na om noplouh chiang in Saptuam' upate khong leh i Pastorte khong sam in hong thumsak zel uhi. A hon thumsak chiang un na omdan pen hong daideuh in na hong chihnuam deuh hi. Ahihhang in, huai pen sawt daihlou in azingchiang khong in hon phazel hi. Huchi ahihman in, na damdet theihna ding ngaihsun a ka kikup ualeh, nang omdan lamte a thum damthei Sielmat lam a om ahi chih ka theikha uhi. Kan chian in, zan Tarik 12 ni in kon va hohpih uhi.

A lamdang mahmah bel, a hon thumsak ma in sathau in hon zut hi. Aman ahon khoih chiang in nasa in na kipek a, himahleh kou ka hon khoih chiang un bang mah na chikei zel. Matheih ahi ngei dia, hon sam in na khut leh na khete hon lensak hi. Huchi in, na lutung a khut nga in hon thumsak chiang in, nang pen nasa in na kipek hi. Bang tan hiam hon thumsak zoh in na hong kipek nonkei. A thumzoh toh kiton in ka sungnim hon chi in, innkong lam ah na diangkhia ngal hi. Ken leng ka hon delh zui a, innkong ah lua in samzang bulom khong law khia na hihman in lamdang ka sa petmah hi.

Na luak zoh in, ka gimlua chi in na lumsuk hi. Patau lua ka hihman in, a hon thumsakpa ka sap leh hong paipah in, “gim ding mah ahi. Hong tawldam phot le maw”, hon chih chiang in ka lungsim nuamlou dedeuh a, bang ziak a gim ding hiam chi a ka dot leh, numei khat in hon bum ahihlam hon hilhchian hi. A gendan in, numei khat Hohoih kichi in 'Zawl-ai' te a hon bum ahihdan hon gen hi. Zawl-ai chauh leng hut sailou in, a kau inle hon kei hizomah ahihdan hon genchiang in lungphawng huai petmah hi. Tua hon bumna pen leh zou a, hon keihna pen hih ding in samlai hi. Himahleh tua gimlua na hihman in, na tang zou nonkei a, zingchiang a hoh thak non ding in hon hilh hi.

Huchi in, inn kon paipih phot uhi. Gim kisa in na lum dildel a, na mit leng ahak zoukei. Sawtkhop na lum a, nitak dak 9 (kua) lak a na hon khanglou in ann na zong in ann na ne ging thuap-thuap mai mah. Ka hon houpih chiang un, et leng hon enlou in na hon ngaihsak kei hi. Na nek zoh in pau tuanlou inna lum non hi. Na omdan pen lamdang petmah ahimai.Himahleh, lametna toh ka khosa ua, zingchiang a damta ngei ding in ka hon gingta uhi.

Zan a hon gen bang in, tuni June ni 13 nitaklam in ka hon hohpih non uhi. Ka tung un hon thumsak pah a, na lutung a khut koih in Jesu' min in hawlkhia hi. Na sung kau lut pen a hon hawlkhiat chiang in, nang pen na tha zoi in na lum dildel hi. Huchi in, thumna hon nei zom a, dawi-le-kau te apat kiveng siam ding leh pilvang ding in hon ngetsak hi. Amau zouthei omsun Pathian’thu ahi chih hon hilh ngal hi. Hiai pen bel nangle na zaak man ka gingta”, chi in ka kiang ah hon hilhchian hi.

Huai teng hon hilhchianmahlehatawpna tanpha in Vungbawi toh ka kal uh hon genchian khalou a ka ngaihsut man in, “Tua kei Vungbawi toh bang chi mawleh, Nu?”, chi in ka dot non leuleu chiang in ka nu’n, “Hon kan zelzel hi a; tukha bul apat hon kan non lou in kithuzak kha nonlou ka hi uh”, hon chi hi. Huai hon chih chiang in ka lungtang ah theihchet nuamna hon pia in kanchet pah ding chi mah leng, tuni a dampan ka hih man in, damsiang vilvel phot a, huai chiang thuzak ding in ka thupuk thak hi.

Anitak in, ka kingaih tuahtuah hi. ‘Bang ziak a kau in hon kei thei adiam?’ chih ka kidong dong mai! Piangthak khin ing a; baptisma leng tang khin zomah ing a; tep-le-muam hihlou a ka omdan lah hoih huntawk hia; huai teng ban a saptuam ale ka hihtheih tawpkhok a kizang ing a chi in ka lungsim abuai petmah hi. Ka kingaihtuah tam dedeuh leh ka lungsim buai dedeuh ahihman in Toupatheichian a hotdamna diktak ka ngaihtheih a, Jesu Kris hondampa a ka sangtheih na ding in Pathian kiang ah ka thum hi.

A zingchiang in, ka tanchin ana thei a ka vai ana zakha ahihman un, ka bial upate leh ka pastor pa uh hong hoh uhi. Thumna khong hon neihsak in, hong houlim pih uhi. Ken leng hun lemtang ala in, zan nitak a ka buaina teng leh ka lungsim a Jesu Kris lunggulh ka hihdan ka genchiang in limtak in hon houlim pih uhi.Dawi-leh-kau in hon bawlsiat theih pen Jesu Kris ka sungteen louh ziak hon chi uhi. Kris ka sungteen hileng dawi-le-kau in hon khoih ngamlou di ua, amau adia mun omlou dingahihman in. Himahleh ka sungteen na ding in hotdamna ka neih ngai hi. Huai Hotdamna pen Pathian thil thawnpiak ahihdan hon hilh ua, nnasep a ngahtheih hilou in, mihoih ziak a lohkhiat zoh ding zong hituan lou hi. Pathian in A hon hehpihna ziak a ginna tungtawn a isang theih leh ingah theih thil thawnpiak ahihdan chiantak in hon hilh uhi. Sawt kuamtak hon houlim pih nung un Hotdamna diktak tang in, Jesu Kris ka hondampa in ka sang hi.

Ka lungsim nuam in, kipahna in ka dim hi.Ka nute’n leng hon kipahpih petmah uhi.Sawt kuamtak damlou in tun ka damta a, huai chauh leng hilou in hotdamna diktak tangta ka hihzawk mah toh ka kipahna zaw genkhiat a genseng ding ahi kei. Vungbawi toh kihoulou a sawtpi om himah le ung, amah houpih a, a tung a ka hihkhelhte ngaihdam ngen a, ka kal uh bawl hoihthak sem ding in lamentak in ka om hi. A nitak in ka houpih hi. Ka msg bang amuh chiang in lungphawng ngei ding in ka gingta. Kei mah ka hi hiam chih hon kan thakthak zozen hi. Genkhom ding leh kikup ding tammah leh, gen masak di pen zong ka theikei zozen. Amah honk ante hoihtak a dawng in ka hihtheih tawp in hilhchian zel hi.Ka omdan pen nitak khat kho theihsiam sak zoh ding hikei mahleh ka hihtheih tawp hilhcian in, akiang ah ngaihdam ka ngen hi.Hun pen tomlua ahihman in, tam le ka kikum mankei ua; kei mahmah leng hatlou lua ka hihman in sawt ka kihou kei uhi.A hon dawng dan apat in zaw hon it a hon ngailai ahi chih achiang mahmah mai.

A zingchiang a va hoh ding ka chih himahleh ka buaina dang om ziak in ka hohman kei hi. Nitak a WhatsApp mah in ka kihou uhi. Nidang bang a kihou thak kik zaw anuam ngei mai. Himahleh Vungbawi pen akidek deuh abang in a kihong law lomlom kei hi – sawtpi ka kihoulouh ziak uh hi ngei ding in ka gingta hi.

A zing, June 16, nitak in ka va hoh hi. Kilawptak a ka lut leh midang khat leng ana hoh in ana tukhawm uhi.A sungkuan ua hon theihsa ahihman un, lamdang ana sa chiat ua hon na dong kheukhou uhi. Va kigen luat dilah amau chauh omlou ahih zawkmah toh zumhuai sasim in ka om a, huai ban a Vungbawi kiang atu pen le kua hihiam chihle theilou ka hihman in, lah hoih tutkhawm law zomah uh, omdan lem hetlou in ka va omkha hi. Atawp in, kua hi hiam chih ka dot leh Vungbawi in, “ka lawmpa nang min toh kibang Sonlian pen eivele, thei nonlou na maw?”,hon chih chiang in nidang a hon gen lamtak ka theikhe thak hi. Huchi a alawm chi mahleh, a omdan ua pat in bel lawm maimai hi nonlou ding in gintakna khat ka nei hi. Huai lungsim ah hong lang mahleh, ka omdan ngei a va om in, inntek tak mah in ka va om a, dak 9 lak in ka pai hi. Ka pai in Sonlian pen tulai a, nidang dan a gate tan bek hong kha ding ka sak leh Vungbawi in kongkhak tan chauh hong kha hi.

A omdan pen kei deihdan toh kituaklou ahihman in, theizen na pi ka theisiam kei a, inn ka tung in ka WhatsApp ah ka houpih hi. Thumvei tan khong kithuktuah pan chih ding in, ka lungsim a ka theihnop om ahihziak in, Sonlian toh kalthu ka kan muat hi. Hon dawng didan zaw haksa sa ahi ngei ding – message sawtpi gelh in, ka na ngak hi. Himahleh message hon khak tak in, “Ana dawng keivoi uson”, chih teng chauh hon khak daih hi. Huai ka muhtak in, ka lungsim ah hehsanna hong om hi; Vungbawi ka mohsa a, bang hang a ana ginom zoulou ahi hiam chih khong genkhiat loihloih ding in ka lungsim ah hong lang hi. Himahleh kidek tenten in, “Oo, huchi non na hi uh maw…’, chi in lungkimlou ka hihna latsakna kawm in huai tengchauh ka khak hi.

Huai ka khak zoh in, number ka theih ngeilouh khat in, “Vungbawi’ lawmpa Sonlian ka hi.Vungbawi toh ka na kingai ua, ahih theihleh hon subuai non keive maw”, chi in hong kikhak keukau hi.Lungsim noplouh toh, huai hong gen zawk mah leh ka lungsim pen kuangzak ding abang mai. Tot heh ding lamlam bang ka lungsim ah hong lang hi. Thuk leng kampau khauhpi zangkha ding ka hihman in, thuklou phot in ka koih hi. Huai kawmkal ah Vungbawi in a dawngna ziak hoihtak a gelh in ana khak hi.

Kha 4 (li) val bang kei buai ka hihna ah, ka na nawlkhin in lungkhamna ka na guan hi. Lungsim ah kipahna ding pelou in mangbatna guan in khitui-naptui toh ana khosa hi. Huai hun a ahehnemtu leh akiang a omtam pen a lawmpa Sonlian hi a, lawmta ahih zawk mah uh toh, theisiam in ana angvan mahmah hi. Huai ziak a a-itna ngetpen zan zek, June ni 13 a ana sangsak ahihdan hon hilh hi. Itna ana sang ni toh kei damkhiak ni kituak chet zomah hi.

Huai hon genchiang in, ka pompih hi. Kei ahehnemtu di pen lungkhamna guan in ka na pang a, a kiang a om di pen anawlkhin in ka na pang hi. Himahleh huai zaw bangmah ka theihlouh ziak leh ka lungsim buaiziak ana hizel hi. Tua ka lungsim hong veng nontak in, amah ka itna pen kiam tuanlou in, huai nak sang in thupi zaw in lianzaw hi in ka thei zomah. Aman leng it ka hi chih a hon theihpih ngei ding a, va gen thakthak zong ka ut nonkei. Huai ziak in, “Huchi dan ahi maw.Kon theisiam. Tua kon leh houpih thak pen bang ngaihdan na nei leh?”, chi in a ngaihdan ka dong hi.

“Ken leng hon ngai mah ka hi. Nang bang a ka it ding ka mu nonkei ding. Kinemtak a hon na ngakngak ka hi. Himahleh tua midang ana dawng khinzel ing amaw…”, chi in kon khak kik hi.

Huai ka muhchiang in zaw ka lungsim ah thupukna hon pia hi’n ka mu top! Ken bel ngai a it mah ka hi. A’ihhang in, hong subuai om ziak in ka lungsim buai a ka nawlkhin kha a hiven. Ka itna va genthak di’n lah amau ki-itna kaal ka zahtak sak a, Vungbawi mahmah leng chitak sa in ka kipahpih hi. Huai ban ah ahon dawndan apat in amah adeih zaw chih achiang hi. Ken bel amah tel ka hi chih achet ngei ka lamen a, himahleh kei teel chauh hutlou in, ama’n leng hon telthuk ngai hi. Huai ziak in, sukbuai louh a kihepkhiat mai ding in thupukna ka bawl hi.

“Hoihtak in na hong kingai ding uh aw Vung”, chi in itna mittui pak niaunuau kawm in ka khak hi.Huai ka khak tak in, ngaihdam hon ngen hi. Ken leng theisiam leh ngaidam ka hihdan hilh kik in, “Nang kipah zawkna ding ahih nak leh bang mah khamlou ding ka hi. Nang kipahna zaw kei kipah semna ahi Vung”, chi toh ka khak hi.

Huai ban ah alawmpa Sonlian kiang ngei ah leng a kingaihlam uh thei pahlou ka hihdan ka hilh a, hoihtak a Vungbawi it-le-ngai ding in ka ngen a, “Ka it mahmah ahi. Kei sang a na it zawk ka thumna ahi”, chih toh ka thuah hi.

Kamdam tak in kha khe mah leng, kei ah thawmhauna om hi. Ka khak khiat hang in itlou leh ngailou hilou ka hihman in ah. Kei a kimohsakna om in, bang chi bang tuak ka tel a chi in ka lungtang a gingden hi. Huai kawmkal ah Pathian leng ka mohsa hi. Bang hang a hiai bang tuak ka hiam? Gitlouhna ka tung ah sungbuak a om in leh gawt in ka na om a, tua ka it mahmah leng tan zomah chih ka ngaihtuah chiang in ka lunglel dimdem in ka lungtang akitam kham a, lametna le ka nei nonkei hi. Pathian mohsa in, akiang ah khitui luangkhe kekeuh kawm in ka thum hi.

Huchi a ka thumthum lai in, ka lungtang ah Bible sim lunggulhna hong lut hi. Kipahna leh hehnepna ka muh ngei lamen ka va sim hi. Tangtak a phen leh Sam ka phen kha a, number 34 ah Pathian’ Hoihna Phatna chih thupi hikha chet zomah hi. Ken leng huai ka sim leh, tang 18na ah “TOUPA tuh mi lunglelte’ kiang nai ah a-om a, lametna tengteng khahsuahte ahondam hi.” chih ka simkhaktak in, a lungtang a lungkhamna tengteng ban a ka ginglehna tengteng leh Amah ka mohsaknate a hon hilhchian vek hi.

Amah ka muhchet theihna ding in dawi-le-kau a soisak in ka na om a; Amah thil thawnpiak hotdamna pen ka tangtheihna ding a lungsim lam buai a sawt kuamtak thuak ka na hilim hi. Tun ah hotdamna ka ngahta hi! Huai teng ban ah, itna ka taan na, ka lungkham leh ka lunglelhte zaw Amah hon naisaktu ana hilim hi. Amah’ itna thupi dan hon kawk muhtu hizaw uhi. Mihing’ itna zaw beithei hi na pi in, thupi veve hi – ken it kha ka hih man in. Himahleh kei itna zaw Amah’ itna toh tehkhin ding vual ahikei. A kiningching, abei theilou tangtawn tangtawn daih ding, a thupi ITNA ahi hi. Ka mihinpih ka it zaw Pathian hon itna hon theichian sak semtu ahihdan ka chiangta a, den a ka mohsaknate Pathian kiang ah ngaihdam ngen in Amah kiang ah Jesu’ min kipahthu ka gen hi.

Puakdan siamtak in ka khosa thei a, Vungbawi ka it khak zong kisik sang in ka kipak zaw hi. Pathian in en i itma nasan aleng hon na it khin ahihman in, ken mi ka it in ka itna athawn bang mahleh lungliapna ding ka neikei! It ding ka muh non hun a itzaw sem ding in hanlung ka chiam thak hi. Huchi hitawk mahleng, ka itna pen a kibang kei di. Itna piaksa lak kik theih ahikei a, i it khakte leng mangngilh theihlouh ahi bok uh. Huai teng ban ah, itna pen piaktam ziak a beithei zong ahi tuankei hi.

Kei leng maban sawn in hinkhua ka zangtou hi. Hou pihpih leng subuai khathei ban a ken ngai dedeuh ding ka hihman in, a number tengle ka delete hi. Huai teng ban ah, a’ u Biakmuang mah leng ka lawm hitawk mahleh ka houpih chia Vungbawi’ mel mu ka hihman in, amah kiang ah hoihtak a genchian in, a number leng ka delete a, ka houpih nonkei hi.

BA zoudek a 6th semester chauh in samlai ahihman in, ka laisimna lam ka sunzom hi. A kum non in ka zou hi. Huai ka zoh in kaam (jobs) lam gelh theihtheih ka gelh tou hi. Hah pan a pang in, a kum non in RBI ah Assistant Officer post ka gelh ching hi. Huai a semtou in, kum 2 bang ka semta hi.

Nikum 2016, December in suty ka nei a innlam ah ka hong pai hi. Sun khat bajar a ka pawt leh Vungbawi leh a’ u Biakmuang New Bajar luttouhna lampi ah ka kituak uhi. Ka muh tung in amau ding leng ka sa kei a, amau leng hon sa ding un ka gingta kei bok. Kinaih mahmah tak in ka kitheichian phet ua, chibai khong kibuk in damzel na hi hiam chihte ka kidong tuah uhi.Sawtpi nung a kimutuah chi in, kihou nuamhuai zek ahihman in hotel ah lutpih in singpi dawnkawm in ka kihou uhi. Thu tuamtuam genkhom a ka kikup laitak un Biakmuang in, “Gen ngamlou na maw?”, Vungbawi kiang ah hon chi hi. Ken leng bang thu amai a chi a ka dot leh Vungbawi in, “Kal non ni 13, thohlehni a pasal nei dek ka hi. Na hong hoh di aw uson.”Hon chi hi.

“Kua toh kiteng di maw?”, chi in ka dot kik leh, “nang min toh kibang Sonlian pen toh”, chi in hon hilh kik hi. Ginom tak a kingai tou uh ahi zaw chih akichian a, himahleh kei bel nungak nei non nailou a khosa tou nilouh ka hi hi. Hong hoh sawm ding ka hihdan hilh in, ka kikhen uhi.

A hon chial dan pen ka ngaihtuah kik chiang in hoh nuam huailou hi in ka ngaihsun hi – aziak bel kimuh ziak maimai hikha thei ka chih man in. Aleh lampang ah ka ngaihtuah kik chiang in, hon chial himhim zong va hoh uthuai ka sakna omzel in ka buai hi. ‘Hoh di maw? Hoh lou di?’ chih ka kidong tuahtuah hi. Huchi a buai ka hihman in ka nu kiang a ka dot leh hichi’n hon dawng hi.

“Nang thu a kinga ahi. Na it na ngai chih kon theihpih hi. Himahleh tangkha lou tuh na hi peuhmahleh. Huchi hitawk mahleh amah vai a na hoh tawpna di le hi di eive”, hon chih chiang in ‘hi’ ka sasim zel hi. Nitak in ka ngaihtuah nilouh kha get hi. Ka lungsim ah hazatna khong om in, hehna in hon tuam in, ki-uangsak tak a va uap ding khong ka lunggulh ban ah angmasialna hong kilang hi. Huaite ka ngaihtuah lai in, Bible a ka theih mahmah I Korinte 13 na a, Iitna thu sim ding in hong kilang hi. Thoukhia a ka va sim hi.

“Iitna in a thuakzou a, amigi hi.Iitna in ahaza kei a, a kisathei kei a, a ki-uangsak saam kei hi. Huhamtak in agamta kei a, amah’ angsung kia akhual kei a, aheh baih kei a, mi’ diklouhna achiamteh kei. Gilou akipahpih kei a, thutak bel akipahpih hi.Bangkim athuak zou a, bangkim agingta a, bangkim alam-en a, bangkim athuak teitei hi.”

Hiai teng ka sim zoh in, ka lungsim ah ka it dan pen ana diklou ahi chih ka chian phet hi.Iitna, hichi ana hi maw, Aw iitna! Huai ziak in, akiteenna ua va hoh ding in thupukna ka la hi.

Zingkal in ka nu kiang ah hoh ding ka hi chih ka hilh a, huai leng amah ngei toh va hoh ding ka hih dan ka gen hi. Avuak a va hoh tel hilou ding ahihman in, bajar ah kiteenna lam thu kigelhna, frame hoihdeuh a kibawl va lei in ka tuun sak hi.

A kiteenna ding uh zingkal dak 10 (sawm) hi a, Mualkawi ahihman in dak 9 (kua) in ka nu toh, nalh thei pen a kivan in, ka nu liangkawi tou heuh-heuh kawm in, ka it mahmah Vungbawi te’ kiteenna uap ding in ka kuantou uhi.

Date: 09-04-2017 ©SonSon NgaihTe @ 2017

©Siamsinna leh Vakiangbu