JESU NUNGZUIHNA

Marka.8:34,35

Written by ~ Tha Suante

Nungzuihna thu pen Khristiante a dingin nisim,hunsim a kisam den thu ahih manin,kihilh kikkik in, gen kikkik in, kiphawksak kikkik ding thu ahi hi.

Zui cih kammal pen a theilo i om phial zawngin, a theilo i om ding ka um kei hi. Jesu nungzui icih leh lampai lai a nung a zui icih kibang lo hi.

Leitung vai ah zong makai khat, pawl khat i zuih ciangin atup leh gimte thukimpih, a deih bang deih pih,sep leh bawl ding a om bang bang sema bawl ding,znau tawh kipawl cihna hi. jesu nungzuihna zong tua mah bang ahi hi.

A HAKSATNA :- Leitung makai leh pawl khatpeuhin amau zui ding tam deih ciatin, tam neihna dingin genin sem ciat uhi. Jesu in zong amah zui ding tam deih hi. Leitung makaite tawh a zawnzia kibang lo leuleu hi. A haksat ding leh gimhuaizia ding in loin genkhia hi. Kuamah khem bawl ngeilo hi. Leitung nate a hamphat na dingin zang ngeilo hi. Leitung makaite in mi khem thei zel uh hi. Hitler in mi tampi na khem zo hi

Jesu in tua bang hi lo hi. Ama deihna zui loin, a Singlamteh kisuan in hong zui ding hi, cin mi cial hi. A kisap leh a nuntakna sup loh ding leh hong dong tangsak ahih leh leitung na hoih pen- inn kuante, neih leh lam,sum leh paite nutsiat ding ahi hi. Amah leh a thu zumpih lo dingin hong cial hi. A mah leh athu deih man a hilo a, a zuih sawm mite kiangah,"Ngiate in lupna ding kua nei uh a, vasate in zong giahna ding bu nei uh hi. Mihing Tapa in a lup theihna ding mun koimah ah neilo hi,"cin na nial hi.

Leitung toh aneih khop sawm mite kiangah,"Bawng lo khawhna len kawmin a nunglam a en mi pen Pasian ukna tawh kituak lo hi,"cin na dawng hi. Hih leitung a nutsiat ding ciang a nungzuite tuah ding a gente zong haksatna, lauhhuaina leh thuakna ding bek mah na gen hi. Amah leh athu bek deihte,nuntakna sum ngam mite bek a zong hi.

Tua bang hi napi a tung panin lam et dang nei a zui na omden in, tuhun in zong om toto lai hi. A nungzui ding hong cialna thei khial ihi hiam,ei deihna in hong uk zozaw hiam? Lungsim a khen satna kician neih masak ding ahih na-Innsa ding leh gal do ding thu na gen hi.(Luka.14:28-30) Jesu i zuihna ah," Hi takpi mah hen," ci in i zui takpi hiam?

A PHATTUAMNA:- jesu in amah zui mite hamphatna ding a gente kha nuntakna a ngah ding na hizaw deuh hi. Jesu hang hi kei leh uphuai lo hi. Sawltakte in zong Penticost ni in na tel pan hi. Ama ngah bangbang a ngah ding ihih manin tua bang a manpha zaw om lo hi. Leitung a ngah/muh ding hamphatnate igen zaw deuh ding hi.

Jesu zuite Kha Siangthoin ompih ahih manin lungdamna,khamuan na nei uh hi."Kei ma neih bang lungnopna ka hong pia hi. (Joh.4:27)"Note hangin kei ka lungdam theihna ding leh note lungdamna a cingtak a suah theih na dingin hih thute a hong gen ka hi hi,"(Joh.15:11) Jesu zuite in a nuntakna ningngei lo hi. A sep zawh,ahih theih zahin ama nasep nuam sa uh hi.

Kha Siangtho in ompih a hih lam kiphawk ahih manin,leitung nuntak nuamsa uhi."Nuntak leh Khris a hi-a, sihpen metna hi,"cih thei uhi.

Na khempeuh sum ngam a zui mite in,leitung ah aleh zakhat leh hun hong tung ding ah tawntung nuntakna hong ciam hi. (Marka.10:28-30) I nutsiat zahzah leh za hi loim,a nutsiat a leh za mudingahi. Bawlsiatnate zong lungsamna in sang thei cihna hi. Mite pahtak ngahin, niamkiat lo in,sanpih zaw ding hi. A nuntakna hangin midangte lungsim ah Pasian gam hong piang ding acih na ahi hi.

Pasian ukna leh ama deihna zuih ding thupi ngaihsut masate kiangah a kisapna bangbang piak ding thu na ciam hi. A deih zahzah. Adeih bangbang na cilo hi. Tua pen hoihlo ding cih thei hi. I kisap nate hong phawk pihin hong pia hi.

Jesu zuihna hangin pilna ngahin, leitung thupha ngahin, khangto uhi.

A KIMUH THEIHNA:- Jesu in amah zui mite leitungin a theihna ding a gente sang mahmah in, a kampau ding niam mahmah leuleu hi. A mah zui mite kitheihna ding thu kibang gen dan tuamtuam tawh na gen hi. A tangpi in lungsim siantho na,gamtatpha, nasep hoih lam hi deuh hi. Mite ki-it in, pum khat suakin,a galte it in,amau bawlsiate thungetsak uh leh mite in a nungzuite ahih lam thei ding na ci hi.(Joh.13:34,35. Math.5:44) Mite hoih na dingin, "ci" thutak leh taklo kitelsak,"khuavak"bang a nuntak,mite muhtheih ding,"apha bawl,"ahi hi. Tua bang mite,"gah tampin gah," ding hi. Hih bang a nungta,gamta mite in mite lungsim zo uhi,

THUKHITNA:- Jesu nung i zuihna hangin hih leitung thupjate bek ngah ding hileng zuihtak nasa hiam? Leitung thupha,vantung thupha i ngah theihna dingin ama hong hilhna bangin Jesu zui ciat ni. Tua hileh mite in Pasian min phatin mainawt ciat ding uh hi.

©Siamsinna leh Vakiangbu