MI A KHEM HILO IN PASIAN KHEM NA HI (Sawltak. 5:1-11)

Written by: Tha Suante

Hih thupian hun laitakin thu umte innkuan khat bang na om uhi. Kuamah in amau neihsate kei a tuam cilo in,aneih khempeuh uh neikhawm uhi. Mi khempeuh a lungsim uh leh ngaihsutna uh kikhat in om uhi. Mi khempeuh tungah a kisapna bang ciatun na hawm uhi. Tua bangin sawt na om khawm thei sam lo hi.

Pawlpi hong piangcil tangthu zaknop mahmah isim laitakin hih thupiang isim ciangin,lungsim hong sukha om mawk hi. Tua pen a lamdang lua hilo hi. Tua hun pan tuni dawng hih bang thupiang a omden,a om zel ding ahi hi. Setan in lut lahn, tunzoh lohna nei peuh mah lo hi. Aman a hun hoih mawk beisak ngei lo hi. Tua bang hiding cih i Jesu in na gen khin zo hi.

Pawlpi in a mite kepna ding,kihutna ding ngeina zuih ding hoihpipi bawlin,zong phatuam mahmah hi. Ahih hangin ze etna i nasep na pen lungsim ahih manin tua in hong huzo lo hi. Lungsimah ze etna hong om ciangin nolh ding haksa kisa in,hawlkhiat ding kiphal lo thei zel hi.

Tua hih manin eite zong Peter in, "Bang hang setan thu a gamta na hi hiam?a hong cih ding lauhuai hi. Srtan a ding hunpha a bawlsak ihi kha hiam? Pawlpi hi in, Khristiante lakah mawhna bawl, minsiatna bawl a om ciangin Setan kihuh zawtawntung thei hi. A hoih lam gen sangin asia lam kithanuam zaw in, i kigensia ngei ngai thei hi. Tua in Setan na huh mahmah hi.

A mawhna uh bang hi hiam? A lo zuak kei leh kuaman mawhsak lo ding hi. Midangte bangin mite pahtak,phat ding ut in,mi hih banga hih ding pammaih sa in, zuau gen uhi. A bulpi bel ahihna uh sekin kineih khem ahi hi. Hih pen a kisel mahmah mawhna ahi hi. Mihingin thangtatna, guktaknate sangin ineu koihzawk hangin, Pasianin na neu koih peuh mah lo hi. Jesu in Farisaite a mawhsakna pen ahi hi. A kisel mahmah mawhna a zong isim loh ahi hi.

A thu Luka in na khinlo hi ding hiam? Kha Siangtho in Peter na hilh lo hiding hiam? Peter in," Ananias aw, bang hangin Setan thu in gamta a.

Piter in,"Ananias aw, bang hang in Setan thu in gamta a,....mite a khem hi loin, Pasian a khem na hi hi,"cih a hilh ciangin pukin si pah hi. Tua zoh nai thum ciangin bang thupiang om hiam cih theilopi in,Safira hong pai hi. A ngaihsutna ah a pasal toh phat leh pahtawina ngah ding,lungdam taka om ding ci hi kha ding hi. Ahih hangin Peter in,"Bang dingin na nupa un Topa Kha Siangtho ze et ding thukim khawm na hi uh hiam?..a cih leh amah zong si leuleu hi. A lamet uh a bang hetlo ding ahi hi. A thuah uh lianlua nasa hiam? A mau mawhna toh kibang igamtat tam mahmah kha ding hi. I hihna sela kineih khem pen zuau gen khiat leh khiat loh a vekin kibang khin hi. Tua banga gamta mite Ananiaste thuak bangin minsiatna tuak loin, leitung ah na paisuak suak thei uhi.

Tun zong hih bang om zel hi cih zangin, Kei ka hi hiam?cin kitel et thei ding deihhuai hi. Ei leh ei kiphawk ding,kitel ding baih hetlo hi.

David zong Nathan in a khial hiteh acih bekin khial himah ing ci thei pah hi. A diklohna hilhpa tungah heh loin,thangpai lo hi. Pasian kiangah mawhmai ding gen pah lel hi. Pasian deihsakna thupha ngah kik leuleu hi. Ih hihna bang bang kitel taka kigen khia hileh a kisel mawhna neilo bang zah i om ding hiam? Min hong thei in thei kei ta se leh Pasian in hong tellua mahmah hi. Tua ahih man David gamtatzia mah ahoih pen ahi hi.

Pasian na isep ibawl na khempeuh ah mi hong phat ding, pahtawi ding ut man leh sum leh pai lunggulhna ahih loh ding ahi hi. Hong bawlpa, gumpa ahih man ama na asem abawl ihih ding ahi hi. Mihing maiah i kineih khem theih hangin,Pasian mai kineih tawm cih om theilo ding hi. Mite mai i kiselsim theih hang,Pasian mai kisel sim theilo ding ihi hi. Pasian ze et kha kei ni. Mi a khem i kisak lai in Pasian a khem ihih ding lauhuai hi.

©Siamsinna leh Vakiangbu