MAN NA BEI PA MAH PHATUAM PEN EE..!

By ~ Chin za. 

Nikhat kei kia in inn ah ka om hi.
Sungkuan te'n lah khual hon zin san vek uh ahih man in ka thawmhau sim mahmah hi.
Pawt khiak mawk dia lah inn ngak dia hon nutsiat uh ahih jiak in ka Pawt khe theikei hi.
Innkim innkiang te light vaak phengphung mah leh kou a bel electric pailouh ni mahbang in mial in a mial maimah hi. Bangdang jiak hilou in a sum sunlouh jiak ahih dan zong ka haih tuankei thei mahleng sum omlou chu bangloh tuan di..??

Huai nitak sum ka neihlouh jiak in vaak in hon taisan a mial hon leengla hi. Ei zong vaak zoukei mah leng 'Vaaktate' a ki hih himhim jiak in khomial toh omkhawm nuamsa lou in ka lupsan geih hi.
Huai nitak chiah chu electric kichi kei a di'n MAN NA BEI taktak ahi. 

Electric vaak lou himhim hi leh bel thutuam midang a vaak a kou a vaak lou tuamse ngoh ding dang om tuan lou sesum semsum tung ah ngohna mulkim Huai pen in ka ngoh suk maive.
A diktak in zaw huai electric ngolh jiak a sum pentak va ngoh na ding thu zong a om kholkei.. Hi mah leh bangmah thei lou a a dikna nangawn a ki siamtan na chaang thei lou te mah ki maingal deuh mah hi ve'n maw..!?

Kei zong sawtlou ka lup nung in kongkhak hon ki kiu a, ja pah mahleng kua hi hiam chih ka theih louh man in ka ngaihsak pahkei hi. A den deuh chiang in ka min in honsam a 'Chihza.. Ihmuta maw..! Kongkhak hon hong in' hon chi hi. 
A aw ka jak a kipan in ka lawmpa ahih dan ka thei ngal a kei zong thoupah in kongkhak ka va hong ta hi.
"Bangchi e? Bangthu om e? Tu nungnung a nong Pawt.. "

'Bangthu hi kholkei ee.. Na ngawn a giak di chih kon ngaihtuah leh thawmhau dia hon gingta ing a agiak ding a hon kuan ka hi.. Hehe' 

Kei zong lawm ding om chi in ka ki lungmuang sak mahmah a hi mah leh alungsim a bang hiam buaina nei hi ding in ka muangmoh tinten hi.
Candle khawng de vaak in ka tu jek ua huchi in ka lawmpan zong a sungkuan te toh a ki hehsat jiak ua hon jaantai ahih dan hon gen ta - "Exam na ah ka fail jiak in ka nu'n (anu nawn ahi) hon heh san a hon tai jial jial hi. Zatna beipa chia hon kou jel na zong a khat veina ahi nawn kei. Huai jiak a innsung a Zatna bei ka hih hial leh ka sih zong hoih zaw in teh..!" chi in a khasiat na thu teng hon gen hi.
Ken zong a loh ding dan thei tuan lou ka hih man in
'Na nu'n zong aheh luat man a hon chihkhak hi ding hi ve'n bang teng hi leh tujan giak le chin amah zong lungdam pah na ve.. Khawmmial toh lumphot ni... '
Ka chih leh aman
"Na mei uh bang chi ee"
' A balance bei hi veh'
"Loan in la suk lel ve"

'Loan a lak theih maw?' 

"Lak theih ee.. Hi leh zong na thun nawn chiang a ki cut di"
Chi kawm a munkhat hon mek leh hon vaak petmah hi. 

Kare nuam na ee.. En theilou i voi tomkhat tulai mai ni chi in ka tu jek uhi.
Ka lungsim ah "MAN NA BEI PA MAH PHATUAM PEN EE" ka chi hi. 

Sawtlou ka tut zoh un lum mai ding in ka kisa ta uhi.
Ka lawmpa Ihmu pah mah leh ka ihmu thei mahmah kei hi. Ka lungsim ah "Zatna bei pa" ki chi hon gingging mai a
Huchih lai in a taktak a thiltung hilou kei leh kei ka lungsim in Hiai bang in ka ki ngaihtuah hi-

"Hun khat lai in kei zong khawvel a kungfu siam pen ka na hi ngei hi. Ki thupi sak leh hat kisa a ka om dungzui in mite ngaihsang zong kana loh ngei a midang te bang mah in ka ngai kei hi.
Huai Hun lai in nikhat gamsung a thunei pen kumpi pa'n a gamsung a siamna tuamtuam nei te pahtawi na ding programe khat hon sai hi. A ni leh a hunbi te hon kimin ta a kou zong kumpi pa programe uap ding leh ki pahman sang ding in guun lui lam ka zuan ta uhi.
Huai a kuan te ka hih ualeh siamna tuamtuam nei khenkhat te, kungfu siam, khenkhat te lasak siam, laisiam leh mipil, ki mawlsiam taktak te ngen ka hi uhi. Luigaal a kumpi pa ngak a ka om kheukhou lai un kipahman pe ding in luilai ah kumpi pa long in hon tai tahi.
Kou lawi zong ki thalawp tak in kana ding khe sauhsauh ta uhi.
Huchia kipahman sang ding ki lamen tak a kumpipa ka et kheukhou lai un thakhat in kumpipa tuanna long hon ki sia a tuikhang in kumpipa a tai suk ta hi. Panpih Tu ding zong in kumpipa hong ki kou khia a hi mahleh kou Lak ah kumpipa Panpih thei kuamah ka om kei uhi. Hi mah leh a khang lam deuh a ngabeng a om papi tuisiam khat in ana mukha a ahun khe thei hamham hi.
Huai tak in kumpi pan 'Ka gamsung a Siamna sang taktak neite kisual siam, lasiam, laisiam, leh ki mawlsiam pen pen te sang in hiai mun a kuamah theihkhak louh ngabeng a nekzong tuisiam pa kei a ding in a phatuam pen hi" chi in kou kipahman ding taang teng huai ngaman mi kiang ah a pe daihmai a, kou ka hih na chiat ua siam kisa a ki deihkhop mahmah te kuamah kipahman sang omlou in ka thawn kiik hiau uhi... "

A taktak a thiltung zong hilou ka zan khang lunggeel na in mihing te ngeina khat hon phawksak hi.
Sing leh gua nangawn a Zatna ding om a siamtu in a bawl ngal leh a mah bat pih a abawl mihing te 'zatna bei' in hon bawl lou ding hi.
Mihing khat in siam na tuambiik kuamah in hon koppih theihlouh Ki nei chiat hi.
Tuni in BA/MA i zou a siamsinna lam ah sangpi tung mah le hang ABC theilou te zong musit a simmoh ding in i siamna leh pilna in hon daih naikei hi. Siamna sang taktak nei in bangchituk in siamsuk siamtou mah le hang thilteng theivek i hih louh jiak in. 

Ei a omsa i theihna leh i siam na te a Hun leh amun toh kituak a i zatsiam poimoh mahmah hi ta ee...!
Cl-X/XII. fail jiak in Zatna bei dan in Ki ngaihtuah in Ki ngaise Ken, i damsung teng kuamah zatna bei i om kei hah pan in pang ou........!!

©Siamsinna leh Vakiangbu