MELMUHLOUH TONGSAAN PAN…

Written by: Minlun Munluo Zou

31st August 2016 “Tribal Unity Day” Jantar Mantar a ka zatzoh nung un lawmte toh India Gate ka va hoh tei uhi.Hiai Gate thupina leh minthanna mahmah khat hi a ka theih tuh Indian Salpha Singgiat leh sangnih valte min tuanna ahihziak ahi.Himahleh huai a thupina taktak pen va enchian sem a,banghiam va suikhiat thak sawm ka hihlouh ziak un lem kilak leh nopbawlna mah ka pibawl lel uhi.Himahleh hiaibang a ka omlai nangawn unleng ka ngaihtuahna ah Tribal Martyrs 9-te hon kilang petmah ua,gamleitang humbitna dia hinna manphattak ana pia mihangsante min mah tawisan tuak ahidan ka phawsuah thakthak hi.

Inn ka tun a bangtan hiam ka tawldam zoh in ka Phone hong ging lengleng hi.Ka etleh “Ngaihnou”chih ana kigelh hi.Ka ngaihnou mah ahihdan haihlou lawtel ka hihman in kipaktak in ka la pah hi.

“Tuni na hon houpihkei tel a..”hon chipah a ken le hohna ka neih ziak a houpih man pahlou ka hihdan ka hilh hi.Nuikawm in “Aw,na va hihhoih lua uh.Nouteng ziak a Unity Day Programme lawhching tuan mahmah di’n ka ging” hon chi thethup hi.Ka nui heuhau a,a mah le kipaktak in hon nui zom hi.

“Eh..! ana khawl dih,nuihzathuai na sak diak di thu khat k’on gen di aw?” ka chihleh a nuilai hon tawp guih a, “Awle,bang thu e..?”chi’n hon dawng pah hi.

“Jantar Mantar ka hoh zoh ua India Gate ka va hoh ualeh Gate mai a lawmte hong laam unchin chihleh ka kiim-le-kiang ua omte a en dia hong ki-umkual pah uh.Kou le Film ate enton chidan a lawmpa khat toh sum va dong,hehe..kuama’n hon pe mahmah lou uh”chia ka omdan uh ka hilhleh nuih in hon nuihsan hi.Hiaibang a nuamtak a ka omlai un thakhat in a hong dai mawk a,a nuih ging leh a pau gin zak ding bangmah ka nei nawnkei hi.

A Phone koihlou ahihman in lamdang ka sa petmah a,sam sam mahleng a hon dawng tuankei hi.Minute thum khawng dai dide a ka om nung un “Umin” a hon chi a,huaitak in ken leng bangziak a paulou a hon om mawk na hia chi’n ka dong pah hi.A hon dawn pahlouh ziak in nuam ka sa chiahkei a,himahleh thei utlua ka hihman in a nihveina di’n ka dong thak hi.Bang dang gen selou in “Umin k’on ngailua”chihkia a hon gen hi.Hiai hun chet in zaw ka buai mahmah a,ken le ngai ka hihdan hilh zom di ka hiam,ahihkeileh ka thudot mah dong lailai ding ka diam?Bangteng hileh chi’n “Ngaihnou ken le hon ngailua ka hi”chi’n ka dawng zawta hi.

A kidiik ging ka zak ziak in ka dai zek a,a hon houpih masak ding ka ngak hi. “Ka pa zukham inn hong tung in ka nu a vuak sawm ziak a huai khaam dai dia Phone nusia a tailut kha ka hi.K’on lunghimohsak kha a hon ngaidam in aw…”hon chi hi.A awsuah tungtawn in khase mahmah ahihdan haihvual ahikei.A hon pau zom a,a pa omdante thuak haksa sa mahmah ahihdan kidiik hithit kawm in hon hilh hi.A khenchiang a kingaise tuntun a omsek ahihdan a hon gen ban ah zu khamkham khat tanu a ka piankhak sese vangsia kisa petmah ka hi hon chi hi.

A hehnep didan dangtuan theilou ka hihman in nidang a ka hehnep dan ngeimah huai tuh “Nikhat nichiah hong hoih mai di ahi,lungkham ke’n” chihtan kia ka genthei lel hi. “Umin,huai nikhat nichiah na chihsek pen chikchiang a ahide aw maw,ken zaw ka nu mahmah hehpih lawta ka hi”chih hon gen beh hi.

“Himmm,poi mahmah e…”chi a ka puaknatpih dan ka gendek laitak in a hon pautuh a,nui sim kawm in “Umin,bangteng hileh nang ka hinkhua a k’on neihman in ka kipak veve”chi’n hon gen hi.Lungkham mahmah,nui ngel kholou,kingaisia leh mangbang kisa a om ahihdan haihkei mahleng MELMUHLOUH TONGSAN PAN KA NGAIHNOU IN a kipahna awsuah hon zasak ut ahihdan ka phawksuah a,huai in hon kipaksak mahmah hi.

Nui seisai kawm in “Umin,nang a lam-etna lianpi nei ka hi.Lungtup mualsuah di’n kuhkaltak in hong pang inla,tu in leenna tangte dang mahleh khatvei tei dam a mel kimu di’n Sian in hambang hon huai hen..!”hon chi hi.Ka ngaihnou tongluan in ka lungsim teng hon zou petmah a,huai hun chet in zaw ka kam ah “Ngaihnou k’on ngailua”chih kammal lou ngal thumal dang bangmah in mun a tang zoukei hi.

©Siamsinna leh Vakiangbu