TANGTHU KHAT.
By: Liansuanthang Haulai
A thilhihkhelh man thuak tuh ahi peuh mah. A thil hihkhelh pen midang ngoh selou a, "kei hihkhelh mah a hi, ken thuak lel ning" chi tang gemgam ahih man in hangsan kasa mahmah hi.
A innsung uah lut ding in kiman a, zi hoih hih ding tuh a tup pipen hong hita hi. Hunte hong liam zeel in......
A khankhiatna inn sung leh a lut thakna innsung tong-leh-lam in kikhe thei hi.
A pian a pat azil tengteng, a lutna innsung ah a zangthei kei mawk a, a guk in a lungbuai petmah hi. "Ka hih theikei, ken hiai te hih ngeilou", khawng va chihchih di a kisuanglah mahmah a, sep lah ngai teitei ahih man in, hihkhelh tampi neikawm in awl awl in hon sintou hi. A lutma a angaihtuahna ah, "zi feltak hih ding, nu hoih hih ding" chihte a gelfelveksa zaw ahi na a, ama khankhiatna toh a lut thakna kibangloulua ahih man in, a ngaihtuah na leh a lungtup a mualsuah na ding in, a leh-nih, a leh-thum a pan alak hong ngai ta hi. Tawl huai tuh a sa petmah, a mel suak ah le a kilang top.
A lutna inn pen a khankhiatna, a pa innsung bangbang hileh zaw, a lungtup (zi hoih leh nu hoih hih ding) mualsuah zou lotel di hiven.
Nu-pa sapsap le khankhiatna innsung a kikhiat luat leh zaw poilua eive. A neizoulou zaw pen, a neizou zaw ah kituahtou di hileh a poina a lian lo kei a, a kiningching zaw apan a ki ningching louzaw ah kituan suk pen in thil tampi mahmah sukha hi.
A pasal in hoihtak in a en vengveng zel a, haksa asa mahmah thou hi. Nasep leh thildang sep ah a panpih theilo thamtham, a hih hang in a it tak, a zi lungsim a puakgik om a puakpih theikei hi. A kiginlouh laitak ua hichibang hun tuak kha ahih man un, a lung uh a buai mahmah hi. Hihkhial a kisa mahmah ua, "tui bo sa luah kiktheihlouh ahih man in, a kibolou teng bek hoihtak in kembit in, pan thak la ni," chia kihualkhawm utuh hi a. Bang in a kihualna uh phelsawm a hi ta mai a??
Po ngap nawnlou, mohpuakna sahtak in,a-sun, a-zan in delh khum a, a ngak khiatnang le omtuanlou ahih man in, a Pa' innlam ah tawldam ding in hon kisa maita hi.
Pau-leh-ham, neih-leh-lam, innkuan kivaipuakdan, chihte mihing khat a ding in thakhat a va kikhekphut leh thakhat a va kituklutphut thil haksapi hi a, huaikawm kal ah, kizentak a na vasep thil baihsam hong hilou lai hi. A pum a kikhek angaihna in thilhoih a hih theihna ding, hunlem guanlou ahih man in, amah a ding in a kinunghei mai hong awlsam zaw taleh kilawm hi.
A tongchiamsa pel dek chi'n i mohsa ngam diam aw.....
A thilhihkhelh man thuakden hen i chi zaw hiam......
Lainatna toh i en hiam? I Lainatna in koilam thu hon satsak ta dia le??
©Siamsinna leh Vakiangbu
Comments
Post a Comment