AW ANA E

By ~ Palemtheilou Papektawl

Thumapi : SIAMSINNA LEH VAKIANGBU Hi VEN MO. BANGPEUH SINLOUH A SIAM OM LAH HILOU A KISINNA IN KON GELH HIMHIM AWLEH . SIAM LEH SIAM LOUH BEL THU TUAM.

Ka pu ka pa khang-gui ua pan in migenthei mahmah ka hihman un, mite simmohna leh engbawlna ka tuak mun mahmah mai hi. Mite neih bang nei zoulou a mite nekbang ne zoulou a gentheitak a hinkhua zang inkuan ka hihman uh siamsinna lam ah leng sum leh pai taksap ziak in pawl 5 tan chouh ka na kai zou hamham hi. Tuni zaw khua a nuam kei lua, inn om ni ; a gimhuai a, Tuni zaw inn-om ni chithei di vual ka hi louh man in niteng in Lou ka kuan zel hi. A khen chiang bang in ann nek di nei zoulou in ka om sek ua, innvengte a batlak di chih lah hon pe ut kuamah a om louh ziak un, annne lou a ka naute school kai a akuan nikhua uh bang atam mahmah mai hi. Niteng ann nek ding nei zoulou ka hihman un, akhen chiang bang in ann nelou in school kai lou di chih khong peuh in ahon nuak lai zaw mah ua, ann nek di ka neih zoh ni un leng meh limlou lua . Bang ziak a hiai bang na huan a? Ka duh kei vokpi’n le duh ken teh , chi in ahon hehsan sek uh hi. Numei himahleng upen hihna zal in kamkhat in leng ka dawng kei a, aguk tak in lah ka heh thei mahmah hi. Nu leh pa te bek in hon dampih lai le uh zaw genthei le ung le hichi tel lou di hi ung a maw ! Nu, pa, kon ngai lua ! Bang ziak a hon paisan pah na hi ua? Ka chih hun a tam hi.

Ka nu leh pa ngai in kapkap leng le tuibawsa luahkik theihlouh ahihman in ka kitheih mohbawl sek a. Himahleh lungsim guk in bel mangngilh ni ka nei kei himhim hi. A khen chiang in ka kingaihtuah a sih suk mai bang ka sawm zel a, kei upen hi ing a , kei si leng ka naute bang chi khosak di? chih ka ngaihtuah chiang in haksa sa mah leng, ka thuak hamham zel hi. Kei chouh in nasem a nek di toh naute school fee di toh niteng poimoh tuamtuam te leina di in sum leh pai ka muh zohlouh man in, ka naupa, kei nuai chet apa school kai ka tawp sak mai hi. Naupang chik himahle ung insung nu leh pa dinmun a ding in sep theihtheih sem in gentheitak a hinkhua ka hon zat touhtouh kal un , hun leh nite mualliam zel ahihman in theihlouh kal in kum 20 bang ka hong hita hi. Tangval ngaihguk bang ka hon nei panpan ta a, himahleh migenthei ka hihman in kua mah in amit hem un leng ahon en nuam kei ua, ka kingaihsiat hun bang atam thei mahmah mai hi. Pathian vualzawlna toh ka nau laisim te bang leng asiamlua hi kei mah le uh kum tawp exam na ah fail hun anei kei himhim uh hi.

Khuavak zel, mial zel, Nisuak zel , tum zel ahihman ni kum 1995 ahong hita hi. Hiai kum, kumbul ahihman in sep leh bawl awlmoh lua di a om kei a, kou innkuan adi’n gentheina lel ahi mai mah hi. A ziak chu sum muhna di dang om tuanlou, nek leh dawn di lah neih beh tuanlou in, ka om ngei un ka omtouh zel mai uh a ngai hi. Siamsinna lam leng kipat nawn hun ahihman in, naute leng kai zom sak ka ut man un, ka naupa louvat a kiloh in akuan zel a, ken leng hihtheih omsun singpua in adeih a om leh zuak in kua theihpih louh in ka guk lunggim thei mahmah uhi. School a semtu di te bang leng a post tan khakna lam chiat uh zuan a a om lai tak un, kou khua ah leng bang zah hiam a hong tung uhi chih thu ka za a, himahleh muhkhak ka nei kei hi. Naute zing chiang a school lutta di ahihmah un zingkal thohbaih ngai di chi in nitak ka lumpah uhi.

Lumpah ka hihman un dak 9 vel in kongkhak ahong ging a, ken leng mang lam theih in ka thou a kong ka vahong leh ka thei ngeilouh pasal nih a na ding ua, Kim damzel uh maw ? chi in chibai hon buk mawk a. Dam mah ung ei, bang chi sim uh e ? Hong lut ua, chi in innsung ah ka lutpih hi. Thei kha ngeilou ka hihman in ka lau gu sim hi. Nou koi a hong kipan uh e ? Bang chi sim na hi ua ? chi a ka dot leh , “Kim kou midang hilou ka hi uh , na hon thei kei maithei himahleh tuni tak a thil poimoh mahmah hihnop nei ka hi uh ” chih teng in hon dawng ua, ka pau nawn ma in, khat ahong pau nawn hi. Kim tagahte panpihna dia Government apan kha teng a sangthum hong paizel pen na mu zel na uh hia ? hon chimawk a. lamdang ka sa mahmah mai hi. ” U te kou huchi dan di mukha lou hive ung aw ! Thei le thei khalou ka hi uh, ” chi in ka dong hi. Khat hong pau nawn a, “na nu leh pa hon paisan zoh uh kha 4 hiam zoh a kipan a hong pai hita lou maw ? Tua kum nih bang paita a, theih khaklouh chih mawk ; bang chi dan a ? Hichi mawk thil hithei hilou ahi. Mukhalou, theih lah thei khalou na hih ua leh kua hiam ang sung ah lut hi di ahi. Kim lungkham kei un aw . Kou hon saisak mahmah di ka hi uh. Bang teng hileh ka na paiphot di ua, dam leh zingkal chiah ka hong hohthak di uh aw ” chi in manpha kikhak in ka kikhenta uh hi. Kei leng ka lumkik nawn a, ka lungsim in ka ngaihtuah a , den a hong hoh te’n ahon thil saisak dek uh ka kipak mahmah hi.

Himahleh, alehlam tak in lah ka khopihte hon muhdahna di lel ahi kha dia aw ! chih ka lau zel a , ka lungsim a guk gim mahmah zel hi. A chih mah bang un zingkal in ahong hoh nawn ua, lehkha (laidal) tuipuan a hoih tak a kitun khat ahon pia uhi. Tua kipan khateng in tam kei mah leh government apan vaidangka sangthum na mu thei ta di uh. Hiai lehkha hoih tak in na kem inla, sum ahon piak dek chiang un ana ensak zel in ahong chi mawk ua, ka kipak petmah a, ka khasiat ha bang a hong suak a, ka mitui alung hial hi. Ken leng Ute aw , khovel a kou hon it tu di omlou di ka sak lai un na hon khotuah ua, ka kipak lua uh ka chi hi. Hiai thil pen kum nih paisa apan ana om ta himahleh tua nou hehpihna ziak in ka mukhapan ua, kou muhma a koi a om a ? Kuan ana la zel a ? chih thei ut ka hihman in ka dong ta hi. Amau leng, ” hiai pen nou na muh louh hang un, kha teng in ahong paizel a, himahleh na hausapa uh ana ne/la zel dan ahi ” ahon chi hi. AW A NA E ! ! !Khovel ana hichi dan ahi maw ! Amah nopsakna di ahih nak leh migenthei leh liangvaite thuak gimna poisalou i gam ah tam lawta ahi maw ! ! Thil teng ahon saifel sak zoh nung un, ahon paisanta uhi.

Ka gintak mah bang in ahon thil saisak ziak un ka kho hausapa uh sum muhna laksak ka suah ziak un khosung mipi’n hon muhdahna uh alian semsem hi. Khosung taisan di in vauna ka tuak muh mahmah ziak un, ka nau pa’n khosung pawtsan di thu ahon gen mai hi. Ken bel bang chituk in haksa lehle i nu leh pa luphumna taisan lou di chih ka lungsim ahi hi. Ka nau himahleh athu ka sel ngamkei a, nikhat chu khosung apan pawt di’n ka hong kisa ta uhi. Ka van uh toh gari ngak in lampi kiang ah ka om lai un, khosung tangval bangzah hiam in ka vante khong uh ahon paih zak sak ua, engbawl in ahon kou ek-ek lai zawmah uh hi. Khitui naptui toh bang tan hiam ka ngak nung un TATA khat ahong pai a, huai ah tuang dia ka nget uleh ahon phal vang lak uhi. Ka nu ka pa luphumna, banah, ka pianna khua ka hon tai santa hi. Sawt khop ka tai nung un nitak lam dak nih vel in Lamka khopi chu ka hong tung khongkhong uh hi. Meltheih kuamah lah neilou, innluah di lah muh mawk kinep huai lou, koilam a pai di chih leng theilou a lungkham tak a ka om lai un, ka nunglam apan Kim chi in sapna ‘aw ging’ ka za a, kihei a ka et phei leh ka gintak louhpi in government apan panpihna ka muh theihna di uh hon saisakte gel ana hi ua, koi lam phadek uh e? A hon chipah ngal uhi. Ken leng thil omdante khong gen in, tua paina di thei nawnlou ka hihdante uh ka hilh leh, amau gel ahong kiguk hou in, ” hiah na om zual un aw ” chi in ahon paisan uh hi.

Kou leng paina di thei tuanlou ka hihman un ka na om om mai uh hi. Sawt kuam tak ka ngak nung un ahong paikik nawn ua, inn luah di hon vangaihtuah sak ahi ding ua, lungkham kei un na innluah di uh om ahi. Huai ah kong kha di uh chih toh auto khat a hon la ua, innluahna di lam zuan in ka hong dai nawn uhi. Sawtlou ka tai nung un innluahna di mun ka tung uhi. A khat pen in, hiai ah na om di ua, a inn ahih leh kei a mah ahih ziak in, nou leng nu leh pa neilou na hih ziak uh khateng in Rs 500 in na luah di uh hon chi a, a hon paisan nawn uhi.

Chikmah a khopi a leng hohkha ngeilou ka hihman un mibang chi khosak a hi ua, chih le ka theihlouh ziak un, bangchi khosak ding chih ka guk buai mahmah hi. Kisilna di tui lah omlou inn kiang teng ka zong a tuitoi theina di ka muhlouh ziak in ka lung akham gu mahmah mai hi. Lungkham tak a ka omlai in nungak nou khat tuibel toh ka inn sakte inn huangsung a lut ka mu a, huai ah tui tawitheih hi in teh chi in tuibel toh ka valut tei sam hi. Himahleh tui koi a lak di chih ka thei kei lai zawmah hi. Innkong a tuibel toh ka ding ni louh mai hi. Naupang khat in, ” U, tuitawi dek maw ? Hiai ah well a khai aw ” ahon chi a, ken leng tui chu ka hon tawithei sam hi. Tui chu a lak zelna di thei ka hi phot hi. Anntang lah omlou koi a lei di ? Bang a huan di ? chih ka theihlouh man un , ka tun nitak uh chu nek theih khong ne in ka om maimah uhi. Gim thei sim ka hi di ua khomial zul in ka lum pah uhi. Theihlouh kal in khua ahong vak nawn hi.

Zing thou ann nek di bang chi ngaihtuah di chih lah kitheilou ahihman in, kisuanglah kawm pipi in ka innsaknu uh nek leh taak di hon ngaihtuah sak dia ka vagen leh, ka gintak banglou tak in ana vei mahmah a, aman leng hon theisiam mahmah vang lak hi. A hon ngaihtuah sakpah a, amau vang in gilvah tak a om theita ka hih man un, ka kipak petmah a, kipahthu ka gen chiang bang in amah ana kisuahlah thei mahmah zel hi. Kalkhat bang ka hong om chiang un innsak inn khangte toh ka hong kinel panpan ta uhi. Innkhangpa cement work a kuan zel ahihman in, ken leng ka nau in a zuih theih khak leh chi in ka vagen leh lem ahon sakpih a, ka nau cement work a kuan zel in, kei leng siamgat dan kizil in, innsung khosakna di buaipih in buai chih tak in ka hong buai kal un, naute school kaina di bang ngaihtuah ahong ngai non zel a hi. Ken lah ngaihtuah theilou di ka himan in, innkiangte mah ka hon dot kualkual leh vangphat huaitak in innkhangnu tate tuni test a hoh dek uh huaite zuisak di lemtang bang ahong om vanglak hi. A test na pen uh ahihleh a ching uleh huai ah a free a kai thei di ahi zawmah uhi. Hong ching le uh khosakna neuchik hong nuam tuam di chih khong ka ngaihtuah a, ka naute hong ching theihna di un thumna toh ka naute ka delhzui zel hi.

Ka thumnate Pathian in a hon dawng a, Chingte leh Mangboi a hong ching ua Lianpu bel a ching kei hi. Himahleh, school dang ah ka admit veve hi. Hunte khawllou a paizel ahihman in om pan ka kisek uleh kha 2 bang ana ching man hi. Kha 2 bang ka hong om hial chiang un saptuam lam leh ZYA lam ah kipiaklut nate bang nei in, saptuam lam hi in ZYA lam hi tah leh ka hih theih zahzah un ka hong kizat touh chiang un, vengsung ah leng ka hong inntek panpan ta uhi. A chang in nungak lai ka hihman in tangval lengla bang ka hon nei thei samta hi. Mi hong pawt chiang un ka na kisuanglah thei mahmah a, aziak ahihleh electric lah kila zoulou candle vak maimai toh ki omlai ahihman in nuamlou asak di bang uh ka na guk lauh thei mahmah hi. Ka nau sum muh sunsun te toh kei muhte leh government apan panpihna hong paizelte toh innsung khosakna neuchik nuam ka hon sa zaw deuh uhi. Mi bang a nei hi kei mah le ung kou khom in nuam ka sa tuan mahmmah mai uh hi.

Nikhat chu varendah a siamgan a ka om lai in naute school kai ahong pai ua uKim hiai na letter di chi in ahon pia hi. Ken leng bang thu om atai mai zen a, akua hi peuhmah di hiam ? chi in ka en pah ngalleh hi chi in na ki geih hi . A sung ah hichin ana kigelh hi. . . .

Muhchil pan lunglai a thamden Kim aw,

Tuni in na kiang a ka gen di pen na lungsim lou lam ahihleh ngaihdam aw. Awle, Kim kon itna simthu na siang ah gen khiatlouh ka ut mahmah a , himahleh itna simthu selung suang ah tui bang kihawt in, zehzum khual zoulou in tuni in ka hon gen hi. Kim sanmun muangsa na hih kei leh na sinlai dongkot kei a di’n hong hon ve maw ? Liapal mi zatamlai ah tangsang gah lailung damna pen nang bek hi chia….. Hehpihtak in na lung-gel hon thei kik sak in aw. 

Laikhak nang a kinem Piapiak. 

Lamdang ka sa mahmah a, khovel a kei hon it tu di omlou ka sak lai a, hon na it om chu nial vual ka sak louhman in, Hon it hon ngai taktak mah in teh chih muang in dawnna chu ka peta hi. Ka uPiak ahihleh laisiam ahihman in nitak a hong pawt chiang bang in ka naute lai a theilouhte uh bang ahilh zel a, kei sang mah in leng ka naute toh a kipawl tam zaw kha sek uh hi. Nitak teng a hong pawt ahihman in ka nau te’n leng a ngai thei mahmah uhi. Nikhat chu damlouhna ziak in a hong pawt kei a, ka naute’n uKim uPiak hong pawt kei a , bang chi a ? chi in ahon dotdot man un ken leng damlou a hong pawt ngaplou ka chi hi. Amau le hon chiamnuih ua uKim vaveh le teh a dampah diam maw ? Nang ngai a damlou hi maithei eive ? ahon chi ua, anui nainai uhi. Kei lah ka na zum gu mahmah mai hi. Hinkhua nuamtak a ka uPiak toh ka zatkhom nung uh kum kim bang ahong ching thei sam hi. Ken leng ka ngai mahmah a, aman leng hon ngai mahmah chih ka thei hi . Himahleh kiteng nailou a nupa hinkhua zang di’n ahon zon sek a, huchi bang thilte utlou ka hihman in ka nial chiang in na hon it kei . Na hon ngai taktak kei , ahon chih khum zel hi. Ken lah ngailaw mahmah ka hihman in nial zoulou in tawp in chu ka utlouh tanpha itna ziak in ka hon tuakta maimah hi. A chang in kiteng di thu ahon sawm zel a, kei lah ka naute pasal neihsan thei nai mawk di ka hihlouh ziak in hon ngaklai zek di’n ka gen chiang in a hon hehsan zel hi. A tung a hichih di lam thei hi leng zaw maw ! ! Ka chi sek alah hun paisa lah lakkik theih ngal kei a, ka lungkham na di lel a suak maimah hi.

Nikhat chu ka uPiak toh kimu di’n ka hong kihou ua, ka kihou mah bang un nitak in ka hong kimuta uhi. Nidang bang lou tak in a dah mel mahmah a, bang chi hiam chih ka dotdot leh a tawp in AW ling kawm pelpelh in ahon gen khong hi.

Kim, Hehna in le ana laken la, ka hon itlouh ziak leng hilou in, nang toh kiteng theilou di dinmun a ka om ziak in poi ka sa mahmah mai . Himahleh kei thuthu a om theilou ka hihman in hon ngaidam in aw….. hon chiphut mawk hi.

Ngam leh khat a hiai bang thu ka zaktak in , ka lungsim a naa petmah mai. Kiteng theilou di’n eigel kal kua’n hon hal a ? Tun kiteng di chi leleng kiteng thei i ve le ? A tung a zong ken kon pat hiloupi . Nang kon ngai na chih ziak a hiai tan kitung a. Bang dia tua hichi mai abei di itna hon pia na hia? Heh law mahmah ka hihman in khauh deuh in ka dong suk pah ngal hi. Kim aw , kei mivangsia hi ing. Nikhat ni chiang in mihehpih huai ka hihlam thei di na hi. Na kimpih siang ana zuan mai in aw. Kei zaw nang a di’n chitna khat le ka nei nawn kei . Mangpha chi in ahon pai santa hi. Upiak ken na damsung a di a hon it hon na sa ing a, ka sianthouna tanpha hon pia ing a , bang dia tua hichi maimah na hia? Genthei tung tuan bang ka kisa a lah ka hihthei omlou ahihman in , Sian laitan louh hi in teh chi in ka kikhamuan a, kei leng innlam zuan in ka hong paita hi.

Inn ka tun in sana ka et leh dak 10 bang ana gingta a, ka lumpah ngal hi. Lumpah mah leng ihmu theilou in ka uPiak chouh ka ngaihtuah hi. A khen chiang bang in ka mohsa sek a, lah kei tagah it tu di neilou toh kiteng a utlouh man a amah moh kitan a hon khen hia ? Ahih kei leh hon enlah maimai hia ? A gen a taktak mah hia ? Chih khong ngaihtuah a lunggim tak a ka om kal in, khua vak di’n ahong ki sa hi. Ihmu thei tuanlou ka hihman in ka thou a, kihahsiang in ann huan dia ka kisak leh ka naute a hong thoukhia ua, ka dah mel ka naute mai ah akilat di ka lau a, kipah mel tak a om ka sawm chiang in lungsim in hon phal thei mahmah lou ahi dia, ka kisel zou tuan kei hi. Ann huan zou ann ka hon nek tak un, ka nau te’n ahon en tuantuan ua atawp in Chingte in, ” uKim bang lung noplouhna nei e? I nu leh pa’n lah hon dampih nawnlou ua. Ka u uh himah lechin leng nang chu NU bang a kon ngaih uh na hihman in na dah mel mu theilou ka hi uh. Bang chi na hia , hon hilh in ? ” ahon chi phut mawk hi. Ken le ka naute ka khem a, ” bawite bang mah ka chi kei. Pathian in ima te uh ahonpi a nidang toh teh in i innkuan sung uh anuam lua a , kipak a kap hi zaw ka hi , lungkham kei un aw.. Ann ne mengmeng unla’n kuanpah ua , na zekai kha di uh, ” chi in thudang daih ka genpih hi.

Haksa mah leh niteng hun teng a ka uPiak toh nuam tak a ka lenlai nite uh mangngilh ka kisin tou zel hi. Kha khat bang ahong chin hial tak in chu ka lungsim ah amang deuhta hi. Himahleh ka sianthouna hon laksak kia ahihlouh ban ah, tulai pau hi leh ka first love ah hihziak in ka mangngilh taktak thei tuan kei hi. Ka uPiak in ” mihehpih huai ka hihlam nikhat ni chiang in na hon thei di ” a chih bang ziak a de aw, chi’n ka ngaih tuahtuah mai hi. A hinkhua bang chi bang hihiam chih suizui di’n pan kon la ta hi. Hun bang tan hiam ka suizoh in leng ka thei zou mahmah kei a , mi vadot hial di’n lah ka kisuanglah man in ka dong ngam kei zel hi.

Nikhat chu inn a kei chouh ka om leh ka inn khang nu uh ahong pawt a, thu tuamtuam kihoulim a ka omlai un, Eh ! Kim nang na uPiak toh kikhenta uh maw ? ahon chi phut mawk hi. Ken le hi kikhenta mah ung e. Nikhat ni chiang in mihehpih huai ka hihlam na hon thei di , ahon chi a , huai didan a ahinkhua thei zoulou ka hi. Ka innveng nu un a theih kinem ka hihman in thil saupi ka gen suk pah ngal hi. Na uPiak ahinkhua maw  tapa neih sun ahihman in anu leh pate’n adaihthoh mahmah uhi . Mihausata ahiziak in tapa neihsun chih mah tak a nu leh pa’n a suklungkham khak di uh alau ua a ut dandan a a om sak uleh, aman a nu leh pa deihsakna theisiamlou in..khamtheihte a kibual in nungak leh tangval kal a thang tak a ahinkhua bangtan hiam a zatzoh nung in, zanlam deuh in Pathian adi’n a kipekheta. A hun paisa a athilchiin hoihloute atawpsan leh ataksa in zoulou in damlou in a om hi. Zanhal a aki-etsak leh doctor ten H I V vei na hi a, asawt pen in tukum kaan damlou di na hi achi ua, na kikhen uleh nang adia ahoih aw ahi , ” ahon chi hi. Kei leng ka kiguih zot zezen hi. Ka lungsim in ka uPiak HIV vei ahi leh kei leh avei di’n muanmohna ka kineipah ngal hi. Aw..ka uPiak ana huchi dan ahi maw ? chih louh kaan gen di tuan ka theikei.

Sawtlou chik kihou ka kisak kal un annhuan ahun man hi. Kim ka na paiphot di aw, annhuan leh hunta, hon chi hi. Awle, huan nuam awleh , chi in ka hong kikhenta uhi. Kei leng annhuan di a ka kisak leh meh di lei nailou ka hihlam ka kithei a, kintak a meh leidi’n bazar lam zuan in auto ah ka tuang sukpah ngal hi.Meh di tuamtuam ka lei zoh in auto mah in ka hong tuang touh nawn a, sawtlou nung in inn ka tung hi.

Ka naute school kai ana tawp man ua, ken innkalh ka hihman in, innkong ah ngaklah chitak mai in ahon na ngak neinai uhi. Ann ka huan kal in ka naute’n innkiim ana hahsiang uhi. Ka huan zoh in tuitawi in naute ka kisil sak hi. A hong man siang vektak un khua a mial sim man a, ann ka ne ngal uhi. Ann nezou sawtlou ka tawldam ua ka unau teng un chiamnuih khong gen a nuamsatak a ka om kal un nitak dak 6 bang ana ging man hial tak in, laisim di’n ka sawl a, thumang tak in laisim di’n room lam ah ahon lutsan pah ngal uhi. Hih di neilou ka hihman in zing meh di mal a kei chouh ka omlai tak in, veng tangvalte bangzah hiam ahong pawt ua, thu tuamtuam gen a ka hou limlim uleh theilouh kal in dak 9 bang aging man a lenglate toh mangpha kikhak in ka hong kikhenta uhi.

Kei leng ka lumpah ngal a, lumpah mahleng imu theilou in bang ka chi dia aw ? Ken le HIV vei hi maimah leng ka naute bang chi in akhosa di ua ? chih ngaihtuah a lungkhamtak a ka kingaih tuahtuah leh theilouh kal in ka imu mai mah hi.

Zingkhua ahong vak a, ka lungkham na lah bei tuanlou ahihman in zing ann nezou ka man siang tak in doctor te sisan test sak di’n sum neih sunsun toh ka kuan khong hi. Ka sisan test sak a result nitak lam chaih suak di ahon chi ua, kei le inn a pai in sep theihtheih sem a ka buai kal in nitaklam dak 2 ahong hihtak in, kei leng ka result thei di in ka hong kuanta hi.

Sawtlou ka painung in hospital chu ka hong tung petmah a ka result kan di in doctor pa room lam ah ka paisuak ngal hi. Vangphat huai tak in ka sisan a saing chih doctor pa apan ka zak in kal auh mahmah H I V natna veilou ka hihman in kipaktak in innlam zuan in ka hong kik nawnta hi. Thihlouh kal in hunte ana pai hat mahmah a Lamka ah ka om uh kum 1 bang a ching thei dek man hi.

Nikhat chu ‘Thanglian’ (Thanglian ka chih ka nau kei nuai chit apa ka chi pen min ahi) in amah panpihtu di’n nungak melhoih tak mai Lianching zi in ahon nei hi.Nu leh pa om nawn louh nung a insung kiam lam mannoh lou a punlam manoh ahi chih ka theih ziak in ka kipak petmah mai hi. Kei leng naute bang in zi nei theita ken leng pasal nei theita di chih ka ngaihtuah chiang in ka kipahna alian semsem hi. Pasal neih sawm mah leng ka kum lam ana upat tak ziak in lengkul dan in ahon koih ua kuamah it tu di ka mu zou kei hi. Hun bang tan hiam nung in vai mahajon tangval khat in hon na ngai ahihdan thute khong ahon gen a , ka lungsim ah ka mipih ka sapih tangval omlou le hilou, nam dang a din ka kiphal kei hi. Himahleh ka mipih ka sapihte’n lah ka upat ziak a hon deih nawnlou ua, Pasal neilou a ka om sang in chih lungsim nei kawm in kiphallou himahleng namdang tangval ka hon neita hi. Ka kal uh itna alian deuhdeuh a kuamah en vuallouh damsung adi itna kipia ka hihman un ka hong kitengta ua, namdang pasal anei chuh ka hong suakta maimah hi. Namdang pasal in kon neih leh ahon gense di leh hon dem di ka mipih ka sapih tangval atam mahmah mai hi.

"Beita “ 

Writer’s Note : Hiai story houchik a kiphuaktawm himahleh lunglut tak a hon na sim suaksakte banah hon na doc sak tu unau pa Lalkhuptong Lalk tung ah kipahthu ka hon gen hi.

©Siamsinna leh Vakiangbu