BANG DOH AI HIAM KA TAN???
By ~ Za Ching Paite
Kei ka hihleh ka nu leh pa’n hon neihsun
uh tanu hawm thoh ka na hi a a hon it in a hon duat mahmah uhi. Khosakna
lam ah mi tung a leng zou hikei mah le ung kou hun tawk in nuam ka sa
mahmah ua inkuan kituak tak leng ka hi uh hi. Ka pa bang in a hon duat
khol a ka ngetnget leh ka deihdeuh te a hon subuchin sak louh himhim a
om kei hi.
Huchi in kei leng naupang thumang thei
tak in ka hong khang lian a ka nu leh pa’n hon it in hon hawmthoh mahmah
uh hi. Mi piching sia leh pha thei ka hong hih in ka nu’n a hon itluat
ziak in hon thuhilh gige a, ‘Bawi ka hon itlua ka tanu neihsun na hi a
kon hawmthoh petmah, hiai khovel khelhna khawng ah zaw hong kibual kha
mahmah ken aw. Min a gensek uh ‘TANU HAWMTHOH A ZAWLGAI’
a chih uh zaw hong hih sawm het ken aw” chin deihthoh tak in hon hilh
hiathiat sek hi. Ka nu hon thuhilhna dungzui in ken le pasal ka neih ma
tan ka siangthou na mansuah louh teitei ka tup pi pen ana hi gige hi.
Huchin hun hong pai zel a, nu le pate
deihsaknate a hilou lam a lak louh sawm teitei in ka theihtawp a kikem
siangthou in pan ka la tou zel hi. Huchih hun lai in tangval khat toh
kitheih dan tuam deuh in ka hong kithei ua ka inn khong uah hong hoh zel
in ka kipawl zel ua, a hong hoh man louh chiang in leng fone a kihou in
ka theihlouh kal un kingai petmah ka na hi maimah uhi. Ken bel ka it
petmah a ka pasal d tan hial in leng ka sit kei. Amah ahihleh a zeisa
himhim leng ana hi dia sex neikhom din a hon zawn sek a, kei bel ka ut
het kei hi. Ka nu hon thuhilhna ka theih gige ziak in. A huchih chiang
in ahon hehsan a himahleh ken kitenma a kipolh ahoih louh dan khong
genpih in, huai khong zaw nupa hihchiang a neih pat d ahi. Huai sese lou
a leng kingaih theih luat ahi chi in bang chichi hiam in ka khem
lungdam thei zel hi. Hileleng a tung in bangtan hiam ana nial zou mah
leng a tawp in ka itluat ziak in, ka siangthouna ka na mansuahta. Ka
ngaihtuah a ka nu thuhilhna zuilou a thilhih khial ka hi chih ka kithei
chiang mahmah a kisiik mah leng a kikhelta poi ka sa mahmah hi. Himahleh
a mah ka na itluat ziak in poi leng ka sa zou taktak kei a, min leng
ahihlouh uh lah hituan lou a chi in ka kisiamtan teitei hi. Huchi in
aman leng hon ngaihbawl zaw in leng ka thei a ka kipak tuak mahmah uh
hi. Himahleh ka kipahna in sawt a daih het kei Pathian deihlouh lam sem
kha ka hih ziak a ka tung a gawtna hong tung sak hi din ka gingta a
khat veina kia in nau ka hon paai mawkta hi. Ka lung a buai sim panta a
amah (ka ngaizawng pa) kiang ah lin pipi leh kisuanglah tak mai a ka
gen leh maizennn ! ka kilamet louh bang tak in dawnna ka mu maimah hi.
Ka ngaihtuah chiang in abortion bawl chih
khong khelhna thupi tak hi a ka na ngaih gige ahihziak in ka naupai
lakhe utlou in a kiang ah hon hehpih mahmah inla hoih tak in hiai tuisik
mihing hong suak din hoih tak a ka kepbit theih na di lampi hon bawl
sak mahmah mai in chi in khitui luang zoihzoih in ka ngen ngutngut hi.
Himahleh ngaihsak in ka om kei , kampau hoihlou pipi zat khum in ka om
zaw. Ken zi ka deih nai kei, na lakkhiak ding ahi a sum na deih leh
leng na deih zah kon pe na ding khong a hon chihsan zel a ka beidong
mahmah hi. Ka nu bek hilh ngam leng zaw hon awilouh sasa a leng ka
lungkhamna hon hehnem law ding hiven lah ka hilh ngam mahmah kei , a
deihlouh dan a gamta ka hih ziak in. Kei kia in lungkham mangbatna ka
hon tuak zaw ahaksa tel mai. Huchi teng ka thuak nung in leng ka lung a
ke tuan kei. Pathian kiang ah ka thum kawm kawm in ka ngaihzawng pa ka
houpih zel hi.
Sum deih hilou ing a ka naupai it ka hih
dan ka gen leh huchia lakhe utlou na hih leh nang thu eive, na paai dia
na hon nei dia huai chiang in ka ta hiven ka lak d himai lou d hia ? a
hon chihsan non zel hi. Tu hun tak in zaw kei numeisia maimai in ka hih
theih a tawm tel mai. Kah a khitui nul lel mai ahi ka hih theih omsun.
Ka kingaihtuah zel a lakhe leng kua man hon theihpih kei leleng tung a
Pa’n hon muchiang lua ka chizel a lakhe lou in zawlta neita mawk leng
kei kia gentak louh ka nu le pa tan in minsiat loh d ka chizel huihah !
a haksa tel mai. Amah lah hoihtak a houpih theih leng hi nonlou a khen
chiang in zaw ka hinna suk tawp mai bang ka ut sek himahleh huaitan
tunna hial din hangsanna himhim ka nei kei. Ka nu ka en zel a bawi aw
chi a ahon thuhilh hiathiat laite bang ka mitkha ah hong kilang dundun
mai . A tawp chiang in zaw ka lupna tung ka kidenna zel a kah khiak
huthut bang ka ut a , hileleng hon theihkhak uh ka lauh man in ka kidek
hamham sek hi.
Ka khelhna gah lou zaw ka hita maive !!
Zingkal khat ka thoh in hi chi in ka ngaihtuahna ah hong om hi ka naupai
lah khanih bang ching ding hita a , khat pa lah a chihsa a nungtolh lou
a hihchiang in ken le hiai naungek hong piang ding tagah a hih sese
sang in ka lakhe zaw mai d chi in thupukna ka laguih mawk hi. Huchi in
ka lawm hoih mahmah khat toh ka damsung a ka na hihkhak ngei dia ka
koihlouh leh min a hih chiang ua leng lamdang ka sak mahmah pathian in
leng a deihlouh penpen hih din kong kuanta uhi. Lungsim zaw anaa ngei
mai. Bang ngaihtuah ka hia ? chih leng ka thei zou kei. Sawtlou ka pai
nung un amun ka tung ua, huchi in ka melma leng hilou ka sisan a hong
piang d ka ta ngoihngoih mulkimna bei in khitui luang ngoihngoih in ka
that ta hi. Kei utthu leh kei deihtelna a paithei d hileng zaw kem nuam
lua hing a lah kei thuneihna khat leng omlou zel a…. !
Huchia ka hih d teng ka zoh un innlam
zuan in ka pai nepnep ua ka lawmnu toh a pau zaw sam leng ka om kei uh
hi. Inn ka tun in bangmah leng gen sese lou in ka room ah ka lut suak a
ka lum ngal hi. Gimsim ka hi dia ka theilouh kal in ka na ihmu kha hi.
Ka mang in naungek khat ka na mu a, ka kiang a hong pai in ka mittang
ah hon en kilkel in ka thei a…’nunu bang dia hon ngai lou e, kei na
kiang ah om ut lua kei ve’ hong chi a kei leng thakhat a kiguih in ka
khanglou a ka nak bang a kinoh huthut zezen a ka kho-ul in ka pum kawt
hi. Huchia lungsim nuamlou tak a ka omlai in ka nu ka kiang ah hong pai
a…bawi tulai na omdan kikhek lua ahi, bangchi e? Na natna om hia?
Lungkham gukna nei na hi hia leh ? chi in hon dong tiautiau a, ka
dawnna d leng ka theizou kei.
A leh lam ka ngatsan maimah a ka khitui i
hon tuum hi. Ka kidiik huthut a ka nu’n leng a lohngaihna hon theilou
ahi d ahon pawtkhiak san hi. Ka thilhih zoh nung ka lungsim nuam deuh d
ka sak leh a huchi het kei a, ka puak a gik zaw deuhdeuh hi. Ka mang
lam teng in lah huai naungek hong kilang gige mai .. Aw… ka hinkhua
haksa hina maizen e ! Kipah ni chih himhim ka neithei non kei. Tualthat
ka na hi maimah a kei leh kei kimuhsitna in ka pumdim hi. Thou leng
thou khe ngeilou in lupna tung ah ka lumden mai a , huai leng puan
kilukhuh in khitui nap tui toh ka hinkhua kon zang panta hi. A dik tak
in zaw a khovak himhim leng mungamlou ka hisim mai . Banah ka nu leh pa
mel leng ka en ngam kei. A mau zaw hon muang mahmah in hon
kisaktheihpih mahmah ua chih khong ka ngaihtuah chiang in ka kisiik
petmah a lah bangmah a phatuam non kei thil teng a kikhel ta.
Nidang a ka insung uh kipahna thawm a
dim gige pen tun kei a din kahna ngen a suakta. Ka ngaihtuah zel a huai
thil ana hih khalou hi teitei mai leng misia a zaw sihial sam lou d hing
a…Pathian sang in midang ka zahtak zaw kha chih bang ka phawk khe
thakthak hi. Ka damsung zaw kisiamtan thei ngei nonlou d kei ta ve…
Ngaihtuahna mumal tak leng ka neithei non kei hi. Nidang a ka lawmte
bang kamuh chiang in kei a din kahna lel a suakta. Ka hinkhua ka kining
petmah a ka nu leh pa bang ka melma hile uh kilawm in ka bawl maimah ta
hi. A omlou na lamlam ua om bang ka ut zaw ta hi. Zan khat ka
ngaihtuahna pai khial deuh a hi ding a hiai khovel a gentheitak a hin
sang in sih ka teel zawta.
Huchi in ka thoukhia a hangsan tak in ka tangtawn in lam zuan in ka paita….
TUUN AW LUNG KA MAWL LUAT MAN HIAM ?
ZUA AW THEISIAM KEI VENG…
BANG DOH AI HIAM KA TAN???
Writer’s note:
Hiai tangthu kei mimal thiltuah ahi hetkei. Ka ngaihtuahna maimai kon
gelh ahi. I society sung uah hichibang ana om zeuhzeuh in ka thei a,
puaknat huai ka sa petmah hi. Mi thil hihkhial teng leng amau deihtelna
leh utthu leng ana hikim khollou ahi. Hiai bang ana tuak kha i om
zenzen leleng kingaihsiatna d omlou ahi. Mihing lampam sik-khiallou
omlou , kibawl thak a Pathian lam bel zaw leng hoih d ahi chih man a
kon gelh mawk ahi. A sim kha teng in leng banglam hiam bek ah i
phattuampih ka lam en. Ka kipak.
©Siamsinna leh Vakiangbu
Comments
Post a Comment