PAKPALH BANG LEL

By ~ Lun Khuptong  

Leitung mihing hinna bang lel hi hiam? Zan ah zanmang bang lel hi, A vul ding pak bang lel hi chiin music leh lasiam V. Biaklal in ahon awi ngiahngaih mai hi. Althu leh ala i ngaihsut chiang in La Phuahsiam Lun Thawmte ana phuak fuh hina maizen ei, chia kikoukhiak theih zawzen ding bang hi. Mihing hinkhua hiai i lei taksa kha bang mahlou mai leh vul ding pak bang lel tak ana hi maimah hi. Khatvei vei chiang in mihingte kiphasak in kiliansak mahle hang k liansak thei kihilou leh kisak thiehpih vual ding hilou ahihdan ahon sinsak ka sa mahmah mai hi. Mihing in i siam ziak in i damsung i susau thei kei ua i ut ziak inle i sutom thei kei uhi.

Lei taksa tua hinna nei a i hinpih lel-lel pen den chiang in bang ziak hiam in zan ah zanmang bang lel in ahong mang ding a. Tu lel a, anui themtham i maisuah pen den ni chiang in avul ding pakpalh leltak ana himaimah hi. Bang ziak a kisathei nak i hi ding uah aw chi’n khatvei vei ka na kingaihsun sek hi. Kei mahmah bang leng kisak theihpih ding leh suan ding neilou penpen himahleng kisathei na ing e. Ka chih ni bang a om sam hi. Bang ziak hipentak ding hiam hiai thilte ahon zohsek hi ? Leitung ah bukimlou asiam a om i hih ban ah. Melma apan zekhemna ziak ahi diam ? chih bang in ka ngaihsutna ahong tawp telhtulh maimah sek hi.
Navodaya ah high school ka kailai un ” Slam book ” chih a kithang mahmah hi. Huai ah   “I Hate most ” kichihna mun ah ” PROUD PEOPLE ”  chia kihudim ka slum book ah a tam mahmah mai hi. Tua omdan bel leitung hinkhua a ding a MI KISATHEI  leh KIHISAK chih kha mihing in ei hihna khat himahleh kihaw mahmah ahidan a chiang mahmah mai hi.

Khatvei leng lawmte toh dawr ah van lei dia kuan in,  Van va en-en hi ve ung aw,  A kei pen deihtel sim ka diam ah,  A tuamtuam hon lakhe ve ka chih leh. Na leizou ding ua hia ? Hon chih mawk chu ,,,,,,,,, lungsim ah koilam hiam dotkha vengveng maidan eive !! Lawmte kiah leizou keini hang en hiaite pawt mai ni ka chi uhi. Huai toh kibang mah a khanglam dawr ah ka vakan non ua ka valei uhi. Kampau leh omdan ding leng ahun leh amun ah pilvan ngai petmah ana hi maimah ahi chih ahon phokkhe thak sak semsem hi . A zinglam chiang in , aw huai a, hiai ka ngaihsutna ah hong suak mawk hi. Ka van etna nu’n un hoihtak in a vante hon na etsak hileh zaw huai man ding tham nei sam mah hi veng in, chih phet in a om hi.

Nikhat si ding chiatchiat, neih leh gou hau in zong le hang leng fit guk sung a sial a om ding leh hiai leitung taisan ding i hihna ah, tom kalsung dam ding leh tawmkal sung nungta ding i hihna uah,  Ei mah lam bekbek ah I mihinpihte toh kituak a nuntak sawm teitei ding ahi. Chih hi thupi in nei theile hang deih huai ka sa hi . Kia thamlou in ah, I Mihinpihte I it ding a. Kilaamtou tuak chiat ni hang. Na tulel dinmun ah Nang kingaihtuah in neuchik ahi kha maithei. Himahleh, mimuh a panpihtu hi thei ding dinmun a ding na hihlam kiphok gige ding ahi. Neih leh neihlou in panpihtu hihna a kikhiam kei a. Sum leh pai a panpih pen kia panpih hilou ahi chih leng I theih chet mahmah uh kuul hi. I hihtheih khomkhom a lampi dik leh lampi tang a na lawm na pii pen in amau hinkhua ding in mitam sekkhe zaw ding leh amau a dia lampi dik hilhtu leh kokmuhtu na hih in tuh a damsung un ahon mangngilh ngei non kei ding uhi.

Pakpalh bang lel hinkhua zang himahle hang I Sanggam I painpihte it ni hang in,  Kipanpih tuah chiat ni uh ei. Lungtuak tak in machiang suankhawm sawm ni hang e.

©Siamsinna leh Vakiangbu