KEI HON IT PENPEN KA NU HI !!!

By ~ Greeny Lun Paite

Singtang khua khat ah kon na piang a, ka pupa khang ua pat konna khosa uhi. Pathian vualzawlna in unau lampang ahihleh mizah ka na pha thou uhi. Ka neu ua pat in ka nu’n itna lianpi toh honna kem tou gige a, innsung ah hoihtak in Pathian thu in honna sinsak ngitnget hi. Haksapi in ka unau un skul hon na kaisak vek uhi. Ka nu’n bel laisiamna hon na ngai poimoh mahmah a, lai ka siam di uh hon deihsak mahmah hi. Haksa tawp khawk in leng fee ba zenzen in Skul hon na kaisak uhi. Ka Pa’n ahihleh khosakna haksat toh nasep ding in hon deih zaw a, laisiamna leng na ngai poimoh khollou a, Skul kai tawpsuk uh heh hon chih ni a tamthei mahmah hi. Ahihhang in ka Nu’n bel hon phal tuan kei a, tunung chiang a na lawm leh vual te uh lai hong siam ding ua, khanvual eng a na om khak ding uh kon phal kei chi in hon kaisak teitei hi.

Skul ka kai tung apat in kei a ding a salam khalam a sinsaktu muanhuai pen ka Nu ahi. Ka nu’n ka homework te hon hih pih gige a, lai hon simpih gige hi. Class A, B khong ka hih lai in A B C Tumble Down D book a poem teng ka nu’n hon simpih lai khong ka thei den lai hi. Class ah kei chauh khong in ka byheart zel a, ka sinsaktute’n ka classmate te hon hilh sak lai khong ka thei lai hi. Lai byheart lou in skul kon na kuan ngei kei himhim hi. Ka Nu ziak in Class topper te bang in kana pang tou den hi.

Ka neulai un, ka nu’n ka lup chiang bang un Bible changte hon na sinsak gige a, Bible a tangthute hon hilh khak louh leng omlou phial ding in ka gingta hi. Bible a Mosi, David leh Goliath, Samson, Jesu, Samuel , Joseph leh adangdang tangthu tampi petmah hon hilh gige hi. Hunbi tuamtuam i nazat zelte uh: Chrismas, Kumlui leh Kumthak, haithak, Naupangte Ni, Nute ni,Pate ni, Good Friday, Easter Sunday, Palm Sunday nite ah huai ni toh kituak ding Bible changte ka unau un Biakinn a kikhopna ah hon na gensak gige hi. Tate kepna leh sinsakna lam ah ka Nu’n demna ding ka thei kei. Pathian thu mah in hon sinsak a, Saptuam sung ah leng kizang mahmah hi. Sunday chiang in annkuang kikhopna hon neihpih gige a, Bible te hon sim a, kisinsakna hoih pipi hon nei gige hi. Thumna hon neih chiang in ka unau un ka min uh a banban in lou denden a, Pathian kiang ah kou a ding in thungetna hon ngeisak gige hi. Sunday chiang a kikhop louh ding ka nu’n hon phal kei himhim a, amah sinsakna ziak in kikhopna leh Pathian thu ah lunglutna lianpi ka nei hi. Sunday skul kai kim prize tam veipi ka na lakha a, ban ah Honours certificate leng tamveipi ka na lakha hi.

Unau tam ka hihman un ka nu le pate a ding in Skul kaina ah haksatna lianpi ka tuak uhi. Fee ding khong haksa theilua a, ka bat hun uh tam petmah hi. Kumtawp chiang a louma a piang buhte khong fee ding in ka pe toihtoih maita uhi. Kum 8 ka hih in class-II sim ding in chomna ka mu kha a, ka nu leh pa kiang ah om ut mah leng khosakna haksat ziak toh, mundang a skul kai ding in kong om khia hi. Mundang a ka om khiak in ka nu ka ngaihna a lian mahmah a, nute khong toh inn khat a omkhom nuam hina maizen e chih kon phawksuahta hi. Kinaupang law mahmah lai a, khomui chiang khong in a guk in ka kap zel hi. Ka mang chiang bang in ka nu ka mu pahpah a, huaiziak mah ahi ding a, ka neu apat milungleng thei ka hong hi maimah hi.

Skul ka kai nana ah ka theihtheih na hat mahmah in, lai ka siamthei mahmah a, teacher te deihsakna ka tang thei mahmah hi. Class topper te bang in ka na pang tou gige hi. Holiday ka pai chiang in ka nu’n ah”Bawi aw kon na lungngaih theilua” hon chi a,ken leng ka omna a ka nu ngaitheilua ka hihman in ka mit tui bang luang hial hi. Holiday chiang in ka nu hihhih ka hih piha, na a sepna na ah ka seppih hi. Ka nu kiang a om mah nuam ka sa pen hi. Summer vacation bang tom ka sa thei mahmah a, holiday te hong bei pahpah a, zing hong ngai zel hi. Ka nu/pa in hon zinpih in hong kha zel ua, hon paisan chiang ni chet uh bang a thuak a haksa diak hi. Ka mittui luang lou vual ding ahikei. Ka naupang lawlai mahmah a, nu leh pa kiang a omlou a mundang a om zaw gentheih huai ka sa mahmah hi.

Kum nih ka om khiak zoh in class III kon zouta. Neulai a nute ngaihna zaw lian lawtel eive maw !! Holiday ka paichiang in ka nute kiang ah, Nu kei zin ut nonlou, nou kiang ah ka om ut ta, kon ngai thei lua ka chi zel hi. Unau kitam a, ka nu leh pate a dia haksa lua ahihman in, ka nu’n bawi aw, na vakai non dia holiday chiah nong paipah ding hon chi zel hi. Ka unau ua milai pen ka hi a, ka unau un skul ka kaivek lai ua, ka nu leh pate a ding in haksa mahmah ding hi.

Class iii kon zouta a, class-IV sin ding in konzin nonta hi. Huai kum April kha bul in ka pa hong zin a, ka kiang hong pha hi. Ken leng ka pa kiang ah” Pa innlam na paiciah kon zui ding, kholam ah ka kai di, nou kiang ah ka om ut ta” ka chi a, ka pa’n leng hon hehpih mahmah in ka thei a, naupang lawlai ka hihman in, honzui mai ve leh hon chi a, ka kipak mahmah a, kipak tak in ka kholam ua, ka pa ka zuisukta hi. Ka khua ua Class iv a ding seat khat na awng chenchen a, huai ah admission kon bawl ua , kong kaita hi. Lai ka na siamthei mahmah a, April kha bul a vakai pan himah leng, class topper khong in kong pang tou ngal hi. Tua chu ka nute kiang a om ta ka hihman in ka lung a muang mahmah a. Ka nu ka itna a lian semsem in ka thei hi. Ka nu kiangkiang ah ka om ut a, a nasep nana ah ka zui gige a, amah chauh a lou a kuan ding khong ka phal kei a, holiday ka neih nak uleh ka zui gige hi. Ka sanggamte leng ngaihnat huai mahmah ua, a biktakin ka naupa bang a ngaihnat huai bik hi.

Ka nu kiang a om kha nonta, ka lungmuam petmahta hi. Nitak chiang in ka nu’n lai hon simpih gige a, ka theih louhte ka nu ka dong thei a, kei a ding in class topper khong haksa hetlou hi. Lai ka sim chiang in ka nu ka kiang ah hong tu ding a Bible hong sim in, ka sim tanten hon tutpih gige hi. Abiktak in Hindi leh Manipuri bang ka nu’n hon simpih thei a, kei a ding in haksalua a suak kei hi. Sun chiang a Loukuan a nitum dong a nasem , nitak chiang a ka laisim taktak hon tutpih ka nu hon it na lian hina tel e chih khong ka phawk khe thakthak hi. Nu na gim leh hon na lupsan mai ve, ka chih chaing in le bawi hon sim mengmeng inla , kon na ngak ding hon chizel hi.

Skul kon na kaitung apat Class xii dong in ka nu ziak in lohchinna sang taktak kon na ngah a, Awards leng tampi kon na sangkha hi. Ka Nu bel a damthei kei mahmah a, khosakna lah haksa ahihman in nasem lou thei di vual ahikei hi. Class VI, VII ka hih lai khong un ka Nu a gil nana sek hi. Khosakna haksa ahihman in kou leh kou ka kikem zel ua, khopi lam kizuan zou mahmah lou hi. Ahihhang in ka nu’n skul kailouh ding hon phal mahmah lou hi. Nu tuni zaw na damlouh toh , ka lungsim a nuam keilua a, kon ompih mai ding i chih chiang in le” Bawi aw, skul vakai inla, na tawp chiang un hong paipah in, bangmah hon na chilou na ding ka hi” hon ci zel a, skul kailou ding hon phal kei himhim hi. Class khong a lungnuamlou simpi in ka nu bang ana chi dia aw, chih khong kingaihtuah in om nuam hetlou hun tam mahmah hi. Recess chiang bang in teacher te kiang ah kingen in, ka nu damlou a, inn ka vapha zual ding chi khong in ka kingen a, ka nu ka vahoupih zual a, kin deuh in skul tan ka tai tung kik zel hi. Skul kai tawp chiang in kin a kin in innlam a zuan pah chenchen zel hi.

Nikhat ka nu damlou in skul ka kaisan ua, ka pi toh chauh ana om uhi. Lungnuam lou simpi in class a ka vatu hi. Nitak lam last 2nd period in misi dak hong ging mawk a, ka lau petmah a, ka nu’n hon bei san hitel ding maw chih ka ngaituah man hial hi. Vangphat huai tak in ka nu ana hikei a, midang ana hi vanglak hi. Tawp phet innlam ka zuan pah chenchen a, ka nu kiang ah ka vatu pah hi.

Kum khat ngail houh ka khua ua mi si om mun petmah hi. Huai kum in class VII ka hi. Kum bei kuan lam ahita a, kha khat sung bang kal teng phial a misi om mawk hi. Ka nu leng a gilpi paat in gil nana in om a, khosik zawmah hi. Huchiin khopi lam zuan in ki-ensak ding in hon zinsanta hi. Ka khua ua leng khosik hii leng ahi a, khosik toh typhoid kithuah hi in ka thei hi. Mi va ki-ensak a zinte leng dam zoulou a si khong in hong kipua ua, kei leng ka lung a nuam het kei hi. A sia lam bang ka kipiak hun a tam mahmah a, Pathian kaing ah ka thumthum mai hi.”Pa aw, ka nu hinna hong hih sau sak lai inla, dam in hon kimusak non in, ka nu ngai law petmah ka hi” chi khong in ka thum zel hi. Thumnate Pathian in hong dawng a, damtak in ka nu innlumte hong tung kik non hi. Toupa phat in om hen!!

Skul a exam dek chiang in Exam patni leh zohni in ka nu’n thumna hon neisak gige hi. Hiaiziak khong in vualzawlna dong in, lohchinna ka na ngah toutou uhi. Khualzin na khong in neih chiang in leng ka nu’n thumna in hon kha khia a, inn lum i tung kik chiang in leng Pathian kiang ah kipahthugenna hon neihpih gige hi. Birth Day ni khong leh Result suah chiang in kipahthugenna Pathian kiang ah ka neizel ua, Pastor/upate ka chial ua, ka lu tung ua khutnga in thumna hon neihsak zel uhi. Khualzin i tung chiang bang in ka nu’n hon na gal et pah a, hon delhpah in, i vante hon doppih pah a, lungdam huai mahmah hi. Ka nu om louh a khualzin tung bang chu a thawmhau huai zawzen hi.

Nitak pawt i paihak ding hon phallou a, pawt i pai matan ana ngak nginget hi. Hon na ihmutsan ngam kei hi. Zingkal chiang in ka nu dak 4 khong in bel tak in thou gige a, Biak inn a thumna vanei zel hi. Kei leng hon phawng zel a, tamveipi ka va thum hi. Kum 8 lel ka hih apat ka nu kiang a omlou a, mundang a skul kai a omkhia ka hih ziak in ka nu ka itna leng a liang khol a, tuni tan in ka nu ka ngai khol diak hi. Nute ngaih huai dan ka na thei mahmah hi.

Kawlgam vaigam a ka om hang in ka nu niteng in kei a ding in hon na thum gige hi. Lohchinnate ka ngah chaing a kipak pen ka nu hi a,lohsapna leh minsiatna ka tuah chaing a lungkham pen ka nu mah hizel hi. Hon hanthawn leh hon hasuan gige ka nu mah hizel hi. Haksatna tawpkhok ka tuah chiang in le KA NU THUMNA ziak in ka mualsuah zou zel hi. Leitung a hici tel a hon it , hon khotuah gige ka nu ahi. Koi mun peuh ah ka om zong in KEI HON IT PENPEN KA NU HI chih ka phawk gige hi.

Ka nu’n tuni tan hon dampihlai a, Pathian tung ah kipahthu ka gen hi. Ka nu’n hon itna ka damsung in ka dinzou kei ding, a deihna bang a om a, nikhat ni chiang a alungkhamnate mangngilhsak ding, amah mittui luangsaktu hilou a, amah mittui nulsaktu hih ding chih ka tuppi pen hi gige hi.

Simtute tengteng Nute hon itna phawk thak chiat ding leh nu leh pate kinepna tate i hi chih phawk thak chiat ding in Pathian in hon vualzawl hen!!

Kipak ing…

Happy Mother’s Day 2014 in advance……

©Siamsinna leh Vakiangbu