KUA A??

By ~ Hauzel Muan

Nungak melhoih mahmah ahih ban ah a duang le ching a hih zawk mah ziak in etlawm mahmah mai hi. Mitampi in hoihsa thei mahmah ua , lun mahmah hi. Amaute lak a keile khat ka na hisam a himahleh hoih na e hiai nu chih tan in ka na beisak zel mai hi. Hiai mi nu KUA A ? Bang chi bang mi a chihle ka thei tuan sese kei a, theih le ka na sawm tuan kei hi. Amah etmai amuh theih chuh a hoih na leh mi changkang mahmah ahi chih tan kimu thei hi. A kichei dante a kheng val lua hiam chih in zaw om kei a mawltak in kichei sek a amah toh etlawm mahmah suk zel mai hi.

College khat a kaikhawm ka hi ua, ka kai namun uah ei singtang mi om zek mah leh kou tegel kia ka subject lak u kibang kha hi. Hoih ka sak sim man in class laklai khong in kamelh gu zel a hong kihei phei khak chiang in a enlou dandan in ka kihei zat zel a , dip bang kisai dipdip mai hi. Nikhat vangphat huai tak in bang chidan hiam a kihou khakna di hong om a, amasa pen na ding in kong kihou khata uhi. Huai apat kinel sim panta in break khong a le kong kipawl thei panpan ta uhi. Mi khenkhat in bang hon tong/dem sek ua kei lah a guk tak a ana nuam khinkhian. Ahi tak alah kou kilawm maimai ka hi uhi.

Sawt sim kong kaikhom chiang un phone No. khong kong kipetuah uhi. Akal lak a ki sms cheuh, ki call cheuhte kon panta uhi. Class lak chiang in leng bench khat ah ka tukhom zelta uhi. Akal lak in houh suty ni inle kholak khong kong pawtkhawm kha cheuhcheuh thei uhi.

Hichia ka kipolh touhthou chiang un kingaihnatna lian tak ka kal uah hong kisiamta hi. Kou tegel di mah ka hih ziak uh hia? ittna thu kigen luat lam le theih louh phial in kong kingai tou kha mawk ua, theih louh kal mah in ka zi hong hi mawk ta hi. Zankhat thu a thiltung di mah a bang a, lamdang ka sa mahmah mai a lah ka kipak mahmah mai hi.

Paite pau malkhat le theilou himahleh hun tomchik sung in hon zil pah a hong pau makmak samta hi. Amah le siampah a ut ziak in English in hon houpih tam ken la noupau in hon houpih tam zaw in hon chi sek hi.

Nikhat ka kiang ah innlam le vapai le hilou maw ? Papa toh nunu bang le muh nuam huai lua uh , hon chi bang chu kipahna alian tel mai. Amah hi mi fel, kingainiam tak mi ahi. Huchi in ken le neihleh neihlou genlou in ka zi in hon sawm nana chu chi in ticket ka valapah hi.

Innlam kong pai tak uh sungkuante’n hon na welcome mahmah ua ka zi bang le apakta mahmah uhi. Afel dan te phone a ka kihou chiang ua gen kha sek ka hihman in. Ka sungkuante bang amah sungkuan bang bawl theipah in Paite pau siamlou sasa in houpih suk pah makmak mai a, sungte bang a nuih uh khong za deksim maimah amah lah zum tuan samlou hi.

Innlam nop a sa mahmah a, om det theih hileh chih a ut thu kia gengen tamai hi. Ka nu bang in duat in hawm thoh mahmah mai hi. Na asep zek chiang in na gimlua di va tu maimai phot in chi in na semsak manlou phial sek hi. Zingkal khat ka thoh in ka nu toh ann huan inn lam a ana buai lingling uhi. A kampau ka zak chitchiat zel khat chuh nu nou meh huan dan lim ka sa a, ka huan thei ut hon zilsak inla hileh huai lam ka tung ciang unle kou a di ka huanhuan theihna din a chih ka zak in nuam ka sa mahmah mai hi.

Suty hong beita in ka kik uh hong hun nawnta hi. Ka zi ngial in houh kik nawn di a lin mahmah mai hi. Ka pai di ni uh a hong tungta a, alit luat man adiam azia bang hong kai mahmah mai hi.  Nidang a fel thou ka sak hi a tuni bang chi dan ale ?? Ka flight ulah 11:45 hi si ken chu ka laplouh ding uh ka na guk lauh sim mahmah hi. Ka pai di ni uh Pathian ni hikha chet ahi a ka zekai zek sim uh toh biakinn dak ging in hon lap man a dak hong ging vengveng ta hi. Hucih lai tak in ka bil gei ah le bang hiam hong ging vengveng a, ka mobile a alarm ging vengveng ana hi a huchi in keile ka imutna apat thakhat in ka khanglou a zingkal thoh hun ahita. Ka mang ana hi maimah.

Ka muh tung a hiai minu KUA A ? chi a ka theih zohlouh Zingkal ka thoh nung leh tu tanpha in le KUA A? chih ka thei zou tuan het kei.

©Siamsinna leh Vakiangbu