KA HON MUANNA

By ~ Muante Tangpua

  

Part – I

29th August 2010, Pathianni in Zamuan in phone call dong hi. “UMuan, na kiang ah kong giak thei diam tu Sepnawnni nitak chiah?” chi in kisuanglah deuh in a UMuan a call a, a UMuan in zong ana lunggulh gige lah a zot ngam ngeilouh ana hi a, hun lemtang mu kisa in kamsiamtak in,”Na ut nak leh chu poi ka sa kei, Ching.” chi in dawng pah hi. Anih un Hyderabad ah laisin in om ua, nidang a kitheingei zong hilou, kawlgam-vaigam ah om, minam kibang ahihna uah kimeltheih tawm uhi.

Zamuan in B.Sc. 2nd year a zil laitak ahi a, Chingboi pen B.A. 1st year hi panpan ahi hi. Chingboi Hyderabad ah a om dek tung in ah a kaina ding mun ah theihngei zong neilou in, inlam apat mi a kan kualkual chiang un a lawmte khat in Zamuan kichi om ahihdan kawkmuh thei a, huchi in phone tungtawn in Zamuan toh hong kitheita uhi. Maban sunzom ding in July kha 2009 in Hyderabad a hong tungta ngei hi. Aman zong Zamuan contact pah in,”Ummmm, Zamuan na hi hia ? Chingboi ka hi, huai Lamka apat hong paithak pen.” “Himah ing ei. Aw, tua koi ah om e nang?” “Kei maw, ummm, main gate ah ka ding, ka paina di, ka zawtna di lam ka thei kei” “Eh, ahoih ve. Hong tungbaih na vanglak chia. Huchi’n honna ngak oh. Minute 3 sung in k’ong tungphei dia, a zoh na giahna di lam, ka lawmte Naga numei khat kiah ka na gensa ahi a, a fel a fel ahi. Huai ah k’on drop ngal di” chi in a phone uh a koihta uhi.

Zamuan ahihleh, mi fel mahmah, laisiam leh mite a dia kingakna taak mahmah khat ahi. A fel dungzui in kamsiam a, lawm leh vual zong, a mei a pa, hau mahmah hi. A bike vom in hostel apat Zamuan tuh Chingboi kianglam zuan in hong taita a, a gen mah bang in minute 3 sung in Chingboi toh hong kimuta uhi. Chingboi in zummel deuh mai in tua singtangmi mel-pu pen ana gal muh in, Zamuan hingei dia gingta in a khut ana lik hi. Zamuan in zong Chingboi ahi ngei ding tua nu chih lungsim ah nei in a vanaih a, Chingboi in,”Nang himah te maw? Hehe” chi in nuikawm in ana dong a, Zamuan in zong,”He, kei ka hi” chi in dawng hi. Kichibai ua, huaikhit in a pau zawsam omlou in bike ah hong kipawta uhi. Numei hostel lam zuan in hong tai ua, Chingboi in admission bawl nailou ahihchiang in, hostel zong tang nailou in, huchi in Zamuan in a lawmnu, a denlam a a gen pen, kiang ah vakha in,”Ching, hiai ka lawmnu Arei ahi, and Arei, this is Ching, the one who i told you about.” chi in a nih un mellahna nei a, kichibai sak hi. “Non poimoh hunhun in kisuanglah lou hial lin hong call nawn mai in aw ! ” chi a paisan tum a, Chingboi in,”Ummm, manmoh maw ? Na manmoh k’eh ana ngak ve. Ka vante k’on koihkhe dia azoh dawr ah sahbon khong, halou khong hon leipih ve ” chi in ngen hi. Zamuan in zong,”Awle, na tawldam masak ut khak leh ka chi a hi,” chi in “kon na ngak di, manmoh koh.” chi hi. Vante kingakhia in, dawr ah a niteng vanzat poimohte a valei khit un hong kikhakik nawn ua, Zamuan in ama hostel lam zotsanta hi.

Chingboi in Zamuan kipiakzohdan thupi sa in ngaisang a, STAR pah ngal hi. Nitak in Zamuan in a phone ah message dong a, a et leh Chingboi hi a,“Ka kamsiam kei lua, kiphthu genna chang le ka theikkei, 2ni kha. Kipaklua k hi aw. ” chi in message ah kigelh mu a, aman zong thukkik pah in,“Eh, y khng gen ngailou p, gamdng ah wm i hih chia, nngle junior d no’ng nei dia, na maban aka. Hax3″ chi in chiamnuih thutak in gen hi. Hong kichat  zom zel ua Zamuan in,”Ching, na lawmte’n hon bangchi sap uh?”chi in a dong a,”Chingboi chi in ka mummy leh ka lawmte’n hon sam uh…”chi a,”Eh kenle nang kon dong, Na lawmte hon sapdan bang a?” chi in Zamuan a hon dongkik a, Zamuan in,”A tangpi in k lawmte’n Zamuan hon chi in hon sam ua, but ka sungte’n chu Muan chi in a hon sam uh” chi hi. Chingboi in zong,”Ok, huchi aihleh tua pat Umuan kon chita di. A poi diam? ” chi in dongkik leuleu a, Zamuan in zong,”Nooo… problem, numei in chu sang a upa zaw pasalte khong ‘U’ na chihtheih uleh kamsiam suak himai neive uai… Nungak fel chihna himai ”  chi in dawng hi. Tuadan in hong ki chat zom zel ua, ngaihzawng neituak ahihdan khong uh hong kihilh tuaktuak ua, huchi in  huai nitak hun a hon zangbei uhi. Tua zan apat Chingboi leh a Umuan tangthu kipan pah hi nailou hi.

A zingchiang in Chingboi in Zamuan call a,”Tuni admission hon bawlpih ve Umuan, nang ana omsa, a hih di dan teng khong le na thei zaw di kei sang in.” chi in sam hi. Admission hong saifel ua, hostel a di toh admission tengteng saifel in huchi in hong kikhen nawnta uhi. Chingboi in zong a room thak ah kisuanpah ngal a, huchi in nithum nung in session hong kipanta a, class hong la panta ua, amau buai tuaktuak in hong buai tuakta uhi. Himahleh a man hunhun un a ki message zel ua, hun lemtang a neih chiang un, a campus uah singpi khong, cold drinks khong dawn in kimu gige uhi.

Zankhat tuh Chingboi in Zamuan call a, phone apat in hong kap a,”Umuan, a haksalua ka hinkhua. Ka ngaihzawng pa’n midang toh hon zuausan, midang toh hon na kop, ka lawmnu’n hon hilh vek.”chi in a khasiat thu leh a luankhi nulna ding leh hehnemtu ding in Zamuan kiang ah thu hon tutta hi. Zamuan in leng  hehnep theihtawp in hehnem a,”Ching, pasalte zaw kihuchi mah ahi. Khat kinei in chin, midang le va kilunggulh kha nak khem. Na ngaih taktak leh a khatnu khen di’n sawl inla, aman nang ahon ngaih taktak leh a khen dia, a hon ngaih k’eh khen ngamlou di ahi” chi in a hih di dan khong Chingboi hilh hi. “Hostel sawngtung ah ka paitou dia, ka kitawmkhe dia, ka hinna ka kilak mai di UMuan… A naa lua…” chi in a kap ngoihngoih a. Zamuan in zong pilvangtak in,”Tu’n amah ziak in na hinna kilak lechin na sungkuante mualphou law du, milak a le a hak ngamkei du. Na sungkuante bek khual in. Ching, Pathian in lampi hon kawkmuh zel na di ahi.” chidan khong a hon gen chiang in Chingboi zong khamuang tuan kisa mahmah a, lungmuang tuan mahmah hi. Zamuan hilhdan teng in hih tum a, himahleh a khasiatna di ngen Chingboi in hon muhlawh nilouh hi. Khanih – khathum bang lunggimtak in a hinkhua Chingboi in a hon zangtou a, a laisimna zong bahloh hial thei khop in a hinkhua hon zangkha hi. October kha in Chingboi in zong hi sa mahmah nawnlou in a itpen kiah khen ding simthu hong lelta hi. Zamuan kiah thil bangkim hilh vek a,”Umuan, pasal himhim ka muang ngam nawnkei. Ngaihzawng le ka nei nawn kei di” chi hial khop in Zamuan kiang ah hon gen hi. Zamuan in bel,”Het, huchia chihlouh di. Nang a di hong om law mahmah di ahi. Tuapa sang a hoihzaw, gin-om leh muanhuai leh kingakna tak zaw mu mahmah na di na hi.” chi in hehnep theih dandan in hehnem hi.

Zamuan in ana theihlouh ahihleh, Chingboi’ ngaihzawngpa’n amah (Zamuan) toh Chingboi thu ana gal zak a, ana muangmoh a, huaiziak in ngaihzanwg dang ana neihsan ana hi hi. Chingboi in Zamuan muang mahmah a, sanggam bang a en hial ahihman in, ki close petmah uh a, tuaziak mah hi ding hi Chingboi’ ngaihzawngpa’n ana muanmohna ziak. Tua ban ah Chingboi in ana theihlouh bel, a guk tak in Zamuan in ana ngai petmah a, a ngaihzawngnu toh ana kikhen a na tum nilouh a, a khenzoh chiang in Chingboi pen ‘try’ tum ana hi hi.

Hunte hong paizel a, October 26th-31st sung College Week, games and sports leh activities tuamtuam zatna hun a college uah hong om hi. Huai hun in Zamuan toh Chingboi in hun hon zangkhawm mun mahmah ua, hong kinaih semsem uhi. College Week bei di ni, Rose and Chocolate Day, ni in Zamuan in leng Chingboi kiang ah rose-pak san vape ngei hi. Huai ni tuh Chingboi a dia gawtmun ah hun bangtan hiam a zatnung a suakta mah a bang phial a, kipak petmah a, himahleh Zamuan in ngaihzawng nei ahihlam thei ahihchia, lungsim guk tak in a kipahna a tawp tung zoulou hi. Zamuan in zong huaini nitaklam in Chingboi kiang ah,”Ching, nang k’on muh tung apat in ka lungtang na luahzou mahmah a, na melhoihna leh na aw nemte mahmah in hon zou petmah hi.” chi in Chingboi kiang ah gen a,”Hehpihtak in ka hon itna simthu hon sangsak ve. I love you Ching ! “ chi in a hon genta hi. Chingboi in thulaklouh ! chih san zawzen  hi. Gintakna chiang bel nei, himahleh sang utlou in,”Ngaihzawng na nei vele. Hilele ka kipaklua rose khong non pia a.” chi in kamsiamtak in nawlkhin hi. Chingboi thugen pen a lungsim taktak ana hilou a, Zamuan thugen sang ut mah leh mi nih kikal subuaitu hih utlou in, haksa sa kawm pipi in Zamuan ana nawlkhin hi.

Huaini apat in Zamuan zong , ‘ bul panta vanglak pangsuak di ‘ chih ngaihtuahna nei in niteng, zing leh nitak, a sun a zan chih omlou phial in SMS a kithot chiang un a itna thu gen gige hi. Huchih kawmkawm in tulel a a ngaihzawng lam apat zong kihepsiang tum nilouh lai a, nikhat tuh a ngaihzawngnu aziak gen di dang le thei tuan mahmah lou in,”Nang lah huai ah om, kei lah hiai ah om. Kum 2 val bang pha di hita i kimuhnawnlouh nung. A haksa lua.” chi in Chingboi a deihluat man hi zenpi in hon khenta hi. Chingboi kiang ah bel thu bangmah hilhlou a, hilh hileh Chingboi in amah ziak a khen ahi ana chih a,  a na hehsan khak ding lehlauh ahihman in, thu bangmah hilhlou hi. Tua Chingboi in lah dawnna hoihtak leh kichiantak pepahlou ahihchia, January khabul 2011 in Zamuan in ngaihzawng dang, Vaigam mundang ah laisim a om, a hon neita hi. Himahleh Chingboi bel a lungtang ah a omden a, Chingboi kiang ah,”Kon it in, kon ngailua Ching. Na kiman hunhun in ka hon itna thu hon sang le chin, tua ka kingaihpihnu ka khen ngam di. Amah sang in nang ka hon it zaw thamtham.” khong chi in Chingboi tawpsan thei mahmahlou ahihdan khong Chingboi kiah gen zel hi.

Hun hong pai zel a, session khat bang hong beinawnta a, a nih tuaktuak un hong lohching tuaktuak uhi. Session hong kipanthak nawnta ua,  hinkhua a ngeina bang in, class la zel in hun hon zang pannawnta uhi. Nidang sang in Chingboi leh Zamuan in hun khawng hon zangkhawm mun zawta ua, nitaklam class lakzoh teng in hih di neilou in campus ah vakkual maimai zel ua, khua a mialsiamta chih chiang in kikha zel uhi. A itna thu Zamuan in gen zel a, Chingboi in,”Ka sanggam taktak dan a kon muh ahi a, nang hiaimun ah ana omkei le chin kei bangchi phet di ka hia Umuan? Na ngaihzawngnu’n thei leh a heh law kei dia. Hehe” chi a chiamnuih-thutak a gen chiang in Zamuan in a genbeh ding theilou hi. Muang mahmah in, Chingboi in Zamuan suang mahmah a, kisaktheihpih zong kisaktheihpih mahmah hi. Zamuan in a theihlouh bel, Chingboi in ah Zamuan tanchin a sungkuante, a biktak in a naunu’ kiang khong ah ana gen gige ana hi hi.

Session kiphatthak nung sawt lawmlawmlou in Hostel Freshers’ party chihte khong hong om dek panpan ta a, Chingboi te hostel ah 31st August nitak a zat sawm uh a, Chingboi kihel utlou ahihman in giahkhiatna di dang zong thei tuanlou in Zamuan hong call ta a,”UMuan, na kiang ah kong giak thei diam tu Sepnawnni nitak chiah ? Ka hostel uah Freshers’ Party omdek a ka tel utkei lua… A poina di a om kei leh kong giak mai aw?” chi in ngen hi. A bultung a i gentak sa mah bang in Zamuan in ana lunggulh guk gige ana hi a, vazot mawk di la kilawmlou ahihchia, lungsim guk tak in ana phur petmah a,”Na ut nak leh poi ka sa kei, Ching.” chi in dawng hi. “Hilele i kikal ah inchi  khat bek gap a om ngai eikhah aw, hahaha…” chi in chiamnuih thutak in Chingboi in gen a,”Hi zenzen e. Sual ah ka giak na di.” chi in a chance khahsuah utlou in a muantheih na di dandan in Zamuan in Chingboi kiang ah hon genta hi. 31st August a hong tungta a, laptop ah movies khong en in, Facebook khong a lawmte khong toh chat in huai nitak lupma hun hon zang uhi. Zannung dak 2 bang ging di hita, lup di vai hon sai panta ua, Zamuan in sual ah a lupna di a hon bawl dek leh, Chingboi in phallou a,”Nang hu’ah lum k’oh, kei ka lum di suallai ah.” chi a, Zamuan zong ut tuan samlou in,”Nang a numei zawzaw sual ah na lup in…” chi in dawng kik hi. Huchi ahihleh chi in Zamuan lupna neuchik tung ah lumkhawm ding in hong kithukimta ua, hong lum panta uhi.

Hong kilehngat ua, Chingboi in,”Umuan…” chi in Zamuan lam ah hong kiheiphei in hon samta a,”hiailam hon nga ve” a chi hi. Zamuan bel pilvang siam mahmah a, Chingboi zong kidekzou tuan samlou di ahi chih lungsim a nei in Chingboi in a muanna a tung a a neihte mansuah ut tuanlou ahihchia Chingboi zia ngak a, Chingboi in huchidan a a gen phetphet in awlawl in Chingboi lam hon ngaphei a, a khut in a hon kawi phei ngal in. Chingboi taksalum hithit a hon hetkhak tak in, Chingboi zong hichi bang ana tuakkha ngei nailou ahihchiang in, a sa utna hong suak a, liingdek zou phial in kithei hi. “Chingboi in hon panta hiven” chih ngaihtuahna nei in Zamuan in zong a lu Chingboi lu toh hon sunaihta a, a muk uh hon sutuahta uhi.

Part – II

Zing khua a hong vakta a, thohkhiat kal a ngaklah zawsam kuamah a omkei uhi. A numei zaw ahihna ah Chingboi a hong thoukhe masa zaw a,”Na electric ketli hoih mah maw UMuan?” chi in singpi bawl di’n hong kisa hi. Zamuan in,”Eh, singpi bawltum maw? Kalmasa apat ka bawngnoi bei hita eive, ka lei kha ngeikei a, tea-bag chu ka neilai. Chini le huai ah dawhkan tung ah om di ahi.” chi in a dawhkan tunglam kawk a, buangnai bawm ah a beidek geigei chini omna kawk hi. Singpi khong hon dawnta ua, huchin sun nileng in laptop ah bangbang hiam khoih in sun hun hon zang bei ua, sunnung hong hita hi. “Sunnung bang hita, kon khata di hia ?” chi a Zamuan in Chingboi a dot leh,”Ka ihmut suaklua zannitak i haksawtlua a, kon ihmu zual phot di.” chi kawm in Chingboi tuh lupna ah hon lumsukta hi. Zamuan in zong Chingboi lupna di awn in ana kihemkhia a, a laptop ah Facebook khoih in tu hi. Minute nih ding vel nung in a ngaihtuahna a hong paisauta a, zannitak a a omdante uh Zamuan in a hon ngaihtuahkhe thakta a, nuam salua a lakloh sa in kipatthak taktak hon lunggulhta hi. Chingboi lup nung minute nih di vel in Zamuan zong a laptop khup zok in a hong lum panta a, Chingboi taksa zuut toh hon thuahta hi. Chingboi zong a sa-utna hong suak a, himahleh kidek hamham a, Zamuan bel kidek haksa sa in a pasal hihna hong dokkhia a, Chingboi hon khoihsakta hi. Awlawl in, zeitak leh dohzoutak in Zamuan in Chingboi a kidekzohlouh tan a sukphur a guktak in hon sawmta a,”Kidekzou nawnkei in teh!” a chih tak in Chingboi’ kithawpna a nuailam pen hon kaisukta hi. Chingboi zong lungnuamlou hong kisa panta a, himahleh aman le Zamuan ana it teita ahihman in bangmah a genkei a, ahihhang in nupa bang a kipolhpih taktak Zamuan in a hon sawm tak in,”UMuan, hih dah mai ni. Hehpihtak in ! Please ! Hih dah mai oh !” chi in Chingboi in Zamuan kiah thum ngutngut hi. Himahleh Zamuan in hiaitan tungta a vatawpkik di, min-se di ta vanglak chi kawm in, a sa-utna a kidekzoh nawnlouh toh zum leh zah khuallou in Chingboi’ pak etlawm chu a hon louta hi !

Hun tomchik sung lel ahi. Himahleh Chingboi a di’n ngaihtuahna a paisau mahmah mai hi. A bangteng hileh hiai ni apat ahi Chingboi leh a UMuan tangthu taktak a kipatna. Thiltampi leh saupi ngaihtuah a hingei ding a, Chingboi in naa sakawm leh a thil ngaihtuahte ziak in hong kidik keuhkeuh ta hi. A UMuan in,”Hon ngaidam in aw Ching, ka kidek zoukei a ahi. Kon ngailua. Kap nawn ke’n. Kon paisan ngeikei dia, nang a ding in ka muanhuai gige tawntung ding!” chi in Chingboi’ mittui nulsak kawm in hon hehnem hi. Chingboi in zong a mittui nulkawm in, a gillak teng naa sa in kidawm kawm in bathroom lam zuan a, zuntha di dan a kisa a a tutsuk leh a zunthakna ah sisan ana om mawk a, lauthawng in lunghimawh petmah hi. “UMuan, na towel hon tawi dih” chi in a UMuan a sam a, a UMuan in zong,”Bang di e ?” chi in dong hi. A UMuan in kikhailup khong sawm ahi dia aw chih khawng ngaihtuah in pe nuam pahlou a, towel a ngetna ziak a dotdot chiang a lah Chingboi in a gen di zum ahihchia gen ngamlou in, a khonung in a UMuan in zong,”Hiai ka romol kon pe dek, bathroom kong hon hawng oh.” chi in a romol a kinulsiangna di’n pia hi. Sawtlou nung in Chingboi bathroom apat hong pawt a,”UMuan, tuni le kong giaklai mai di, ka gillak teng a naa a.” chi in lupna lam hon zuan nawnta a, a UMuan in zong poisalou ahihdan gen hi.

“Ching… Chingboi, hon ngaidam in aw, ka na kidek zoukei a ahi. Kon ngailua.” chikawm in Chingboi biang ah a khutpek taklam nga i, Chingboi a hon tawp a, Chingboi in zong a  UMuan kiang ah a khatveina ding in,”Ken le kon ngailua UMuan.” hon chitei ta hi. Chingboi’ ngaihtuahna a paisau thei mahmah a, a UMuan in ngaihzawng dang nei ahihlam a theihpihsa ahi a amangngilh kei hial hi. Himahleh hiaitan tungta ahihchiang un a UMuan in amah tel zaw taktak ahi achi a, a lungmuang mahmah a, lehlamtak ah ahinkhua a dia a thil hihkhelh thupipen ahi dia aw ! a chisek a, a kingaih tuahtuah mai hi. A zannihna nitak bel a lungsim uh a nopkei tuak, a kihoupih lawmlawm kei ua, a lumpah uhi. Zan a hong rehta a, a UMuan ihmu theilou in a ngaihtuahna a hong paisau nawnta a, a sa-utna a hong suak nawnta a,  tu sun a ahih bangbang uh a kiphallou tuam omlou in a hon hih nawnta uhi.

Hiaibang a hun a zatkhop nung uh a ni li ni in a UMuan message a hon khak a,”UMuan, ngaihzawng dang na nei chih ka thei. Hilele nang toh kei hiaitan kitungta ahihchiang in, na khen ngai d ahi. Na khen ngamlouh leh 1veilam a nang mahmah in ka kiang ah na gen mah bang in, kei na hon it taktak kei, na hon ngai taktak kei chihna ” chi in message a thonta hi. A UMuan a lungbuai mahmah a, khatnu toh kha 8 bang kingai manta uh, kip panpan ta, khen kei leh lah Chingboi i chih mi kingaisebaih ahihchiang a, nikum lam a leng kithah mai ut ahihlam a haihkei a, lauhthawnna ziak leh Chingboi a hehpihna ziak in haksa sa kawm pipi in a ngaihzawngnu a khenta hi.”Ching, lungmuangtak in omta in. Na msg ka muh phetphet in ka call ngal a, ka kikhenta uh. I kal ah kuamah a om nawnkei. Lungmuangtak in ana lum inla, ana ihmu hithiat in aw. Mangpha. Kon ngailua! :* ” chi in message Chingboi kiah a UMuan in khakkik hi. Chingboi zong lungmuangtak in hong omta hi.

Ni hong liam zel a, lungmuangtak in leh kipaktak in a hinkhua uh hon zangkhawm zel uhi. Nupa bang a a kipawlhna uh zong a hong uang semsem a, Chingboi in bel a UMuan in hon taisan mahmah lou ding ahi chi a muang petmah in a taksa zong sit hetlou in kipekhe zel hi. Kalkhat in li vei ahihk’eh nga vei bek a sun a zan khentuam selou in hun lemtang a muh teng un hong lumkhawm zelta uhi. Winter break a hong hita a, a UMuan in project nei ahihziak in inlam paikik theilou a, Chingboi bel a sungte’n sam teitei ahihman un inlam a winter zang ding in kik hi. A kimuh gige bang un a kimuthei nawnta kei ua, thawmhau a kisa mahmah tuak uhi. Chingboi in a UMuan a ngai petmah a, a UMuan thugen teng khempeuh mang in, ama a dia poi di hia, poi phalou di khuallou in mitdel bang mai in zui hi. Winter break sung taksa a la omkhawm theilou uh, mel bek le kimutheilou ahihna uah, nikhat tuh a UMuan in Chingboi kiang ah,”Ching, vuaktang in lim hon kila inla, Facebook ah inbox in hon thonve. Kon miss lawta, kon mu utlua. kon ngai lawta, hong pai meng ou ” chi a message a thot chiang in Chingboi in utlou kawm pipi in a UMuan a suk dah ding a lauh man in a UMuan chih bangbang in lim hong kilata hi. Tuplouh a a leak sak khak di lah lau, lah a UMuan kiang ah bangmah gen ngamlou, a UMuan kipahna di ahihnak leh chi in niteng phial in limlak thak a UMuan in a nget chiang in thon zel a, daily routine hong bang phialta hi. Himahleh a UMuan muang mahmah ahih chih hiai apat kichian tak in a  theihtheih lel hi.

Winter break hong beita a, Chingboi in zong a zilna lam, a itpen leh a ngaihpen omna siang hon zuan nawnta hi. “Gate ah kon na ngak, koi tan hong tungta e Ching?” chi in Chingboi tunkal ngaklah tak in message a hon khak a,”Kong tung dek geigei ta, minute 5 sung in kong tung taak ka gingta.” chi in Chingboi in thukkik hi. A hong tungta ngei a, a mel uah kipahna ngen a dim a, kintak in cab apat vante lakhia in bike vom ah hong kipua ua, Chingboi room lam hon zuanta uhi. A UMuan mahmah in kidek haksa a sa a, a lungsim ngeingei pu ahihchiang in Chingboi vamaiphei pah a, kisilsiang zong kisilsiang sak manlou in a hih sekte uh hon hih pah lawlaw uhi. Chingboi’ roommate inlam pai, hostel tungkik nawn nailou ahihchiang in ana lemtang mahmah hi. A sa-utna uh a suk buchin zoh un Chingboi kisilsiang ding in hong kisata hi,”A na om in aw, kong kisil zual di UMuan.” a chi a, bathroom sung a lutsanta hi. Hun tomchik sung in a UMuan ana ihmu man a, gimsim ahihchiang in, bathroom apat a hong pawtkhiak nawn tak in a UMuan houpih but di vual hilou in limtak in ana ihmu hi. Lupna tung a et leh a UMuan phone a vak leplep a, silent a kikoih ahihziak in a gingkhe kei a, aman le ngaihsak lou in a dongte hon silh hi. Phone call a hong mit a, a puante a silhzoh in call hong paithak nawn a, aman le,”A kua le a mahmah dia aw?” chi in phone a va et leh,’Sweetheart’ chih a kigelh a, a call tu number kha a UMuan in Sweetheart chi a ana save ana hi hi. Winter zangzou tungkik phet vakihehsan leh vakinuaksan a utkei a, mangngilh a sawm a, a UMuan phone lupnatung ah koihkhekik in, pick-up zong pick-up lou in huchin nusia hi. A lungtang naa a sa petmah a, message khong a check ut sim a, himahleh LOCK CODE om ahih chiang in check theilou hi.

A UMuan a hong thou a,”Eh!  ana ihmu kha keive maw… Sawt ka na ihmu hia ?” chih toh thuah in a phone a en a,”Ching, ka hih di poimoh om, ka na pai phot mai di aw.” chi in pai hon tum ngal hi. Chingboi in zong,”Awle, byebye. Kon ngailua UMuan.” a chi a, a UMuan a room kongkhak tan a zui a,”Ken le kon ngailua Ching.” chih toh a muk uh sutuah in a UMuan in ana paisanta hi. Huai zan apat Chingboi a ngaih a muang thei nawnkei. A kal uah kuahiam kigolh hi din a muangmoh tinten ta a, theihsuah a tum sek a, himahleh huai a theihsuah utna sang in a UMuan a itna a lian zaw a, a kitheih mohbawl gige hi.

Nikhat tuh holiday a nei ua, hun a hon zangkhawm nawn uhi. Huai ni zong Chingboi kidekzou nawnlou in a kal ua kigolh theihsuah a utna hong suak phut a,”UMuan na phone hon la dih, a chimhuai lua game kong kimawl” chi in a  ngen a,”Ana khawl cheuh oh.” chih toh thuah in a phone ah bangbang hiam mekkual teteuh in a khonung sawtlou in a UMuan in Chingboi kiang ah a phone a peta hi. Chingboi zong bangtan hiam game kimawl masa a, himahleh a nung sawtlou in Inbox a check a, Inbox folder a hong leh bangmah a mukei a, a lungke sim mahmah hi. Huaitak in a internet browser hong a, facebook ah a lut leh a UMuan account ki-logout lou a, huaitak in inbox message te en suksuk a, a sim suksuk leh a zawllui nu toh ana ki contact gige uh ahihlam hon theisuahta hi. Kin a kin in a hand-bag a la a, Chingboi tuh khase petmah in a UMuan room apat a hong taipawtta hi. Kidek chenchen in ama hostel lam a hon zuan a, a room a tuntak in zaw a kidek zou nawn mahmah kei a, a kapkhe ngoihngoih mai hi. A puaknatna ziak bang dang hilou in a UMuan in a zawllui nu toh kigawmkhawm kik ana sawm ua, amah (Chingboi) apat kihepkhiak a UMuan in ana sawm chihthu vasim kha chitchiat se hi.

Huai zan tuh amah a ding in a sawt mahmah hi. Ann zong nelou in kap zankhua phial hi. A UMuan in a call a, a pick-up utkei, message a thon a reply utkei. Naa a sa petmah a, kingaisia in a khutngawng tuh blade in hon aat a, si a luang a, a en a, a kap keuhkeuh hi.”Bang ding a honna muanglua ka hiam ? Ka hon muanna maw kei a dia ka gentheihna… UMuan, hon ngailua kei ve ! Bangziak a ka hon itna hiai bang lel a hon thukkik na hiam ? Nang a ding in ka taksa, ka pumpi tan in ka kipekhia a, ka hon muang a… Himahleh hiai lel ahi maw ka tantawk !” chi in kahtam lou in a kapkap mai hi.

Writer’s Note : Phuahtawm tangthu ahi a, MIN a kibatpih neikhate tung ah na ngaihsiam uh kon ngen hi. Tua ban ah nupa bang a kipawlhna hong kigelhkha tam sim a, huai a zathadah i om leh na ngaihsiamna uh kon ngen bok a, tup pentak ahihleh tulai khangnoute dinmun toh kisai a thil omtheite genlatna ahi hi. 

Kipak

©Siamsinna  leh Vakiangbu