PHAVANG KHITUI
By ~ Hazz Tejay
Kum bangzah hiam paikhinsa in khua khat
ah Lianpu kichi valnou khat a om a.Amah bel nu-le-pa mawltak laisim
theilou insung a khangkhia ahi hi. Himahleh haksatna chiteng kal ah pawl
sawm tan ahon sim touta hi. Lamdangtak mai in hiai kum in akhua ua teng
sam nungaknou melhoih mahmah Kimboi kichi
khat toh akal uah nan vuallouh itna haichi a hong dawn kheta mai hi.Hiai
itna haichi hong dawnkhia in tuh a tung lam in akal ua kipahna bangtan
hiam tun mahleh hun sawtlou nung in khitui luanna kia in a tung uah vai
ahon hawmta hi.A ziak bel,Lianpu pen Kimboi te toh teh ding in insung
niamtak mai, nektawm ding muh leh nek, muhkei leh ngolh himai ana hihna
ah Kimboi nu-le-pate a ding in etlahhuai loupi a suak hi.Hiai in a kal
uah haksatna tampi mihing kam a leng gen vuallou khat ahon tunta hi.
A tangpi a et in Kimboi inkuante bel mi
kiliansak tak leh mahni hindan sang a sang zaw a hing hamhamte ahih ziak
un pau leh ham zatdan tangpi ah genkhe phelphel te ana hi uhi.
Huchibang khop a mitsang ahihdan uh khokim khokiangte’n a hon theih
khiak tak un hiai nungak nou melhoihtak hel ding in niteng in puansilh
nalh taktakte silh in tangvalte khuai vaitung mah a bang zungzung mai
uhi. Ahihziak in,nungaknou Kimboi bel huchi khop a nu-le-pate bang a
mite hauhsaknate khawng khelah lua ana hikei vanglak a,a ittak valnou
Lianpu a ding in a itna a kembit tinten hi.Himahleh Lianpu tuh huchi
bang a Kimboi nu leh pate mitsangtak tanu ji a neizou ding in a kilamen
zou mahmah kei hi. Bang teng hileh mahni phulou tantan a kiletsak luatna
in bangtan a tun hiam chih i gentou zek lai ding.
Hunte a hong paitou zel a, Kimboi nu leh
pate’n tuh a tanu hel a hong hohte kivatdan khawng ahon khelahta ua,
aban ban in tangvalte tuh a tanu pasal ding in a hon zawlzawlta mai uh
hi. Lianpu leng kipasalsak sam ahi ding a, zum kawm pipi in Kimboi te
inn ah taptung khawng ah mite mitmei vengdan siamkawm tak in a vatu
khinkhian zel hi. Huchi kawm pipi in leng Kimboi nu-le-pa’n Lianpu tuh
Ui ek khu mah abang sak thouthou uhi. Hehpihhuai tak Lianpu’n Kimboi
neih teitei sawm leh zaw, Kimboi in a nial kholkei maithei. Himahleh
itna ziak lel a thil suk buchin mawk a, it leh ngaihtak gentheitak a
hintouhpih ding Lianpu in a ngaituah chiang in lungsim piching tak in zi
neih hial a ut ngeikei hi. Huchi bang a Nurse Kimboi nu leh pate hun
kisa mahmah leh mit Himalaya tang dawn sang a leng sang zaw a,ahah
vengvong lai un Kimboi tuh sepaih khat Juhai mahmah khat in ahon gu
kheta a, computerise a annek tum hial a mit sang hah tak Kimboi nu leh
pate makpa tuh sepaih rifleman juhai khat ahong suakta hi. I bible un,
kilian sakte hihniam in a om ding ua, kineusakte tuh tawisang in a om
ding a chih a tangtung ngial veh.
Note : Kilawp lokha,a tawpna va gen masa kha i hi, simtute.
I gen taak sa mah bang in, Lianpu leng a
dinmun niam kisak luatna ziak in Kimboi tuh zi a nei ngamlou ahihdan
siangthou tak in a hong kitheikhe thakthak a, nikhat tuh haksa pipi in
hun lem ahon zongta hi. Hiai hunlai bel phavang lai,nasep silbawl awllen
lai a hi a, Lianpu in Kimboi samkhia in gamlak mun siangthou tak leh
huih khisiang, phavang huih khisiangte nung hialhial lak ah tuh hun hon
zang khawm in, ki it tak mai in a hong kipawlta uhi. Kimboi leng kipak
lua hi napi a biang ah theih khawl hileh kilawm tak in khitui ahong pawt
mawk a, Lianpu in a khennang thu gen sawm himahleh ahong kidek sim nawn
hi. Bangteng hileh, ka ittak Kimboi gen lou theilou ka hi ta a, hon
ngaisiam in aw , chin a ngen masa a, hiai toh kiton in,tuni i damsung a
ding a nang toh kipolh tawpna ahita, Kimboi na tun leh zua lung a atup
lungpil houlungte toh nibang a luun von zatam tawi in Zolei tang bang
hong damta un aw. Kei a din zaw phulou vang ngaih lai ah naa e ! Ngaih
aw nang zaw nibang lun chia chi in thutop a hon pawkhe tamai hi. Kimnou
in hiai thu za ding in a kilam en kei mah ding maw??
Writer’s Note :Hiai tangthu paidan ahithei tan a tom theipen dia kon gelh theih hichi tan ahi hi
© Siamsinna leh Vakiangbu
Comments
Post a Comment