NOU, PATE AW NA TATE UH HIH THANGPAI KEI UN.

By ~ Gin Muanlal

Bible siam a Bible pansan a thugen sawm hikei mahleng hiai thu in Pate tamkhop a sukha ngeiding hi. Pa innsung ading a lupen, tulai dan in a boss pen ahihman in innsung amah thu a pai a amahthu pen thutawp hiding in ingaihtuah hi. Pa tuh innsung a thuneipen ding mah ahi. Pa thugen a zi in a selding leeng ahikei a taten leeng asim moh ding uh ahikei. Ahihziak in huai thuneihna pen communist hiam Capitalist leh president rule dan hizawlou in Democracy kivaipuakna dan zui a pa in thu agen a vai ahawm ding hong hizel hi.

Pa khenkhat in a thuneihna uh veto power dan a ngai in innsung ah vai a hawm ua innsung a thuneipen ahihziak un azi leh taten athuzui in innsung ah buaina a om kei hi. Tate' nu leh pa a akingak laisiah uh banhmah a siatna a omlam kilang hetlou hi. Ta khenkhat in pan thuneitak a innsung a vai a hawm ahidingmah a koih in hoihleng a hoihpih uhi. Ahihziak in ta ngaihdan tuam deuh neileh mahni a kitoudelh lung gulhna pianpih te ading in huchibang thuneihna a vaihawm pen hoihna a neilou in amau leh amau kikhut dot theih ahong hih chiang un innsung buruak hong chidam lou pan hi.

Keimah hinkhua ah kalungsim hon khoih theizel khat tuh naupang ngaina leh paakta himhim kahihziak in ka tate keilou a khosa theilou bangkhop in om uhi. Hong pautheih ua a nu nawitui a hon ngolh ua kipan a nu sangmah in kei a hon ngaizaw uhi. A khenchiang in abuaihuai hun atam a zinleh vaak khiatna neih hun in tate ngaihtuah vungvung hun atam hi. Zinkhiat ni nitak apan "pa nang chikchia hong tungding.. Hong paita in.." chi in hon phone den uhi. Ka gen utpen ka tate hon ngaihdan hilou in kata utapen hong khanglian hiaihiai a ka kal uh gap om hiaihiai hi in kathei hi. Neuchik ahihlai in nin huaikhop in hon ngai a thagim thatawl hun in a nin huai mahmah hi. Khat veivei bang anu kiang ah nana zolbawl keilua a keikia hon naih ahi chibang a ki chih hun hong om zel hi. Innsung ngaihtuahna ziak a tawl vungvung a omhun in khenkhat chiang in tai ek in hon ngai mahmah hinapi kilau sak in kikoih khazel hi. Haiban ah thu hon manlouh hun chiang in thumanglou chi a vuak hun bang hong om zel a huaite ziak in ka hehkhak ding lau in ka om in thumang lou ngamlou hi. A hihziak in kei omlouh hun a ana thumanlouh hun tamzaw in a nun hon report zel a huaihun chiang in heh mahmah in katai a thumang ding in kaki chiam sak zel hi. Ka thuzohna ah phattuamna ka muthei a himahleh kum 10 lel hipan mahleh kum 8/9 a phaklai bang a hon neel nawnlou abang hi. Ka ngaihtuah zel a hong pildeuh a anaute om ahihziak a amah kidang koih hi in ka ngaihtuah a ahihziak in kata kum 10 toh ka kal ua gap om a katheih leh kum 5 hong pailai leh bang chia a gap hong omding ahia chih ngaih ngam huailou hi.

Ka tanu siatna a lut a thil guk hihdin a neulai a a thil hih hoihlouh ziak a nidang bang a hon neel lou hidin ka koih kei.. A naute amahsang a et kol zawk ding a omziak a ki daang koih leeng ahimai ding himahleh a siatna ziak hilou napi a anaute angvan naziak a ka kal uh nidang a kaki neelna uh a tawmdeuh pen keileh ka tanu kal a asam om hilou ding adiam... Atung a kagen,thumang ding athuhilhna a katai na teleh a khenchiang a kavuaknate ziak a hon neel ngeibang a hon neel zounawnlou/hon neel ngam nawnlou ana hihle tuh kei lou a amahleh amah a kikhutdot theih hun in kei thudot in hon neidiam chih dotna liantak hong suak hi.

Innsung khenkhat ka mu a atate uh tangval in nungak mah le uh a nu apate utoh thuthang tuamtuam kihoulim leh nuihzaak huai pipi gen in lawmta mah bang in anuikhawm uhi. Huchibang innsung innsung kituaklou chih a om vaang mahmah hi. Khenkhat innsung lah innsung kithutuak tak bangmah le uh thupoi moh lou a houlim a anuihkhawm lam uh aki.muvang hi. Innsung siatna zen a kihou theilou hikei mahle uh mun khenkhat ah tuh a paiding dan a pailou ahihdan ahong kilat hun om veve zel hi.

Hiai innsung chinihte lak a igen masakpen bang a ka innsung ho.g om theihkei leh tuh innsung nopna kimkhat leeng neilou kahi ding hi. Ka taten Pa a hon nei ua kuamah kiang a agenkhiat ngamlouh keikiang a hon genkhiat ngam keiletuh katate adia pa kahihna amau khan khiatsak lel ana himai mahding hi. Pa ihihna itate kipah hun a kipahpih masa pen ding leh i tate dah hun a adahpih masa pen ihih poimoh hi. Gendan dang in genle itate kipahna leh dahna apate kiang ua hon tut nasakpen dingkhop ua itate muantaak pa ihihding a kisam leh poimoh mahmah ahi hi.

Ta neuchikchik nei kahihdan kahon genkhin a kata upa pen kum 10 lel in duh leh deih aneih a hon ngetding kisuanglah tak a om pen kei ading a kingaihtuah nading khop thuguk om hi. Naupang in nu leh pa dinmun thei hetlou in a deihdeih uh leiding in a nu hiam apa hiam a ngen pahpah uhi. Kei tanu inleng huchibang in a pan a deihdeih leisak zouding a hon ngaihtuah in adeihteng leisak ding in hon ngenzel a neih leh lam kichinlouh ziak leh akhenchia lungtom nideuh bang in "deihteng leitheih sa maw" chi in ka taizel hi. Huchibang taina atuahmun ziak a adeihluat hon ngen ngam pahlou a kisuang lahtak a hon ngenzel ahihdan kahaih kei hi. Katai ding alauhziak a apa kiang a adeih hon ngetngam pahlouh kei ading a thoveng himahleh katanu in apa hon gamlaat ahimai hi. Hon ngetmun ziak a zongsat saklouh sawm a tuban huchia na om nawnlouh ding/huchia na deihteng nagen nawnleh hon zeploh ding kahi/nang gengen keilechin ken na taaksap theilua kahi chi a ka salh ek ek pen kilausak kana hilel hi. Taten nu leh pa alauh ding ahikei. A zahtaak zawk ding uh ahi. Zahtaak chih in laubziak a zahtaakna hilou in ideihsakna ziak khawng i itna ziak khawng a tate ki zahtak sak ding ahi. I itluat ziak leh i deihsak luatziak a ahon zahtaak ding uh hizaw hi. Amau ading a itha gimdan leh i sep peuh amau ading a sem ihihdan theidia itate tung a kampau leh omdan chidamtak izat ding hi.

I thupi ah pa in tate thangpaih saklouh ding ahihdan agen a ngaihtuah maimai in tuh tate aw na nuleh napa thangpai sak ken chih zawk dia kilawm tak ahi. A hihziak a Bible in paten tate thangpaih saklouh ding chi ahihman in tate thangpaihna bang hiding hiam chih dotna liantak hong hinawn hi. Tate choubawl a thangpaihsak louhding gen hileh natate uh chou kei un chin akigelh ding hi. Tate engbawl in suheh kei un honchi hiding inleeng ikoih theikei..

Atunglam a kagen bang in ka tanu in muang mahmah a adeihteng leisak dia hon nget kahihsak louh katanu suthang pai kahi mai hi. Huchia a deih leisaklouh suk thangpaihna ahihleh mizawng ten atate uh suthangpai gige lou ding uh adiam ichi ding. Zawnziak a ileisak zohlouh ziak a thangpai hilou in ileisak theihlouh ziak itbeihsiam sakzoh louh ziak ua suthangpai ihi uhi. "bawi hiaite khawng ilei leileh isum beidia i nekding lei zoulou ding ihi" chi a ka hilh chet chiang in atheisiam a amah.leng lungnuam a keileng kalung a nuam hi. Ahihziak in naupang chik ahihman in zan a katheih siamsaksa himahleh adeihluat ziak in ahon ngen nawn a kei ading in kagensa thei mahmah kahihman in kaheh hongsuak a gen nawnlou dia thuhilh leh vau kathuah a atheihsiamna sang in a thangpaihna lian zaw ana himai hi. Thangpaih dan zilsak kana hi a kei apa mahmah thangpaih dingdan katate sinsak kahi hi.

Lungsim sia leh thu im neilou a igensa leh itheih siamsaksa hon ngen thak nawn ahihman un heh huaibang mahleh hehna koihkhia a hilhnawn in tate thangpaih ding dal ahihman in pa ihih a tate etton ding pa dinmun ineih theihna ding in pa ading a lampi omsun chih lungduaina ahi lel hi.

Tate suk thangpaihna ichih tate toh kitawng a tate toh kisel ahikei a ta neuchikchikte theihsiam ding a igen gen utlouhna ahi hi.
©Siamsinna leh Vakiangbu