ZANNITAK A THIL LAMDANG KA TUAH
By ~ Muante Tangpua
( on Monday, June 24, 2013 at 8:30pm )
Zan dak 11 bang ahong gingta a, lum d’in
k’ong kisata hi. Ka roommate pa bel lum pahpah mite ahi a, zalmang gam
ah a tuallenna sawtta mahmah d’in ka gingta hi. Vuah a zu nelhnelh a,
huih zong a nung hiauhiau hi. Awngphah bawl dia ka kisak laitak in mei a
hong mit guih a, ka laptop shutdown nailou ka hih chiang in, a vak ka
kisalsak a, ka awngphah bawllai bawlkhin manlou in ah,”Mei pai ngak di,
hong mitsawt kei na in teh.” chi in ka boksuk zual hi. Gintak sang in
hong painawn hak sim ahi hia ? ahihk’eh ihmut ana suaklawman hizaw hia,
ka na ihmusuk man hi.
Hun bangtan hiam nung in ka kongkhak uh
kikiu ging dandeuh in ahon phawnghalh hi. Ka room uh a sunglam apat kalh
gige ka hi a, ihmu in ihmu kei lengle ka kalh gige mah ahi. Ka khanglou
a, light ana ki-on sa a (mei mitlai a off mangngilh kha) ka phone ka
mek hing a, sana ka et leh dak 11:26 ana ging a, dakkal lang vel ana
ihmu man dan ka hi. Kongkhak kikiu gingpen ka hungaih a, ka mumang
zakkhelh hia ka chihsim man in, himahleh a hong kikiu thak nawn a, kou
room kongkhak mah ahi chih ka chet tak in ka thoukhia a, kong ka vahong
hi. Ka classmate te khat ana hi Hi. “I go to my home now, Muan!” a hong
chi a, a khut a hon doh a, ka kichibai ua, khua a siat ziak ahidiam ah a
khut a vot in a vot a, ka kichibai zoh un ken leng,”Ok, safe journey.
Have a great week ahead ! Bye!” chi in sangkilh ah ka kikhakhia uhi.
Room lam ah ka kiheikik a, ihmut suak a
hong reh sim thak a, himahleh lup hoih ka sawm hi. Ka laptop sleep mode
ah ana om a, hoihtak in ka shutdown a, huchi’in ka awngphah bawlzohlouh
ka bawlkhin a, lumd’in k’ong kisata hi. Thumna ka nei a, huchia ka
neihlai in ka lungsim ah ka lawmpa toh sun a ka pawtkhawm uh ka lungsim
ah hong kilang a, ka ngaih tuahtuah leh hostel ka tunkik uh nitaklam dak
5:30 ahi a, inlam pai ngal dia kisaktum ahihdan a gen ka phawkkhe guih
hi. Ka lungsim ah,”Eh! Lawmpa le dak 6am vel a pawtkhe di hi awmtak,
nitak 11:30 vel in inn ka tung di chi ka sak leh, tua a kipankhe dek
panpan.” ka chi a, ka thumna neih le ka ngaihtuah kha nawnkei dek zawzen
hi. Lamdang ka sa lawthak a, hileleng bus a lemtanlouh ziak hiam,
ahihk’eh vuah ziak hiam h’inteh ka chizel a, ka thumna ah ka lutkik thak
a, ka thumzoh in ka lumsuk a, ka mit ka si a, ka lungsim ah ka lawmpa
mah a hong kilang nawn thouthou hi.
Tua ka lawmpa gen, amin Ramesh ahi. Ka
kaina University ah ka lawmhoih mahmah ahi hi. Unau Thadou/Kuki, Simte,
Mizo, Vaiphei, ahihk’eh eimi mahmah te sang in le ka kithuahpih tamzaw
hi. Aziak bel ka subject lak uh a kibang a, ei singtangmi ka subject lak
bangbang la, kuamah ka kaina uah, kei chihlouh midang a omkei hi. A
gammi te ahi a, himahleh khopi apatte ahikei a, khota apatte ahi hi.
Classmate dangte teng sang inle amah hi ka poimahna teng ah ka sap gige
ahi a, pawtna di hiam, vanlei di ka nei hiam aw, ahihk’eh bank ah ka
hohdek hiam khong chiang in ka zawn gige hi.
Mipawlhnop petmah ahi a, frank leng a frank mahmah hi. A gammi leh vai dangte sang a amah ka ngaihna ziak bang dang ahikei a, University ah ka luttung lam un ah, amah leh a lawmdangte, a close friends te 4 vel toh ka kizuikha deuh gige ua, ka kineel panta uh ka chihchiang in a lawmdangte’n eimi lamte i tawndan uh khong hong dong ua, kungfu siam di khong in hon koih ua, hon engbawl pau sim tak un ka lungsim a naa mahmah a, himahleh aman huchidan lungsim naa thei di a hon genlang himhim kei hi. Tuaban ah, a lawm dang khat mah a nin a nin huai khol diak a om a, huaipa pen ahihleh a huntawk theilou, laptop ah facebook a khoih leh amah a mah bang, en i lehngetkik khong ngai. Tua Ramesh bel a huchi hetkei hi. Laptop i khoih lai a hon tuah leh munkhat ah ana tu khiinkhian dia, ei kilehsuanglah in amah kiah, laptop na zang ut hia chi a i dot ngai, huchia i dot lele zang utlou a kichih hun tamzaw hizomah.
Midangte teng sang in amah toh ka
kithuahthei zaw tham ua, huaiziak mah in ah lawmta a thil hihna di hiam a
om chiang in, cricket kimawl di khong ka neih chiang un ah Ramesh a hon
zawnsak sese sek ua, aman a hon zot hial chiang in kei leng peihlou
pipi in a thu mangtak in ka kuanzel a, ama pai nana ka zuizel hi. Ka
mizia a thei mahmah mai a, ka lungkimlouh ni, ka dah ni, ka heh ni
chihte khong in bel aman leng hih di/pawtna di chihte ah a hon zawn
teitei ngamkei a, a hon zahtak mahmah in leng ka thei a, huaiziak tak in
leng Ramesh hi ka ngaina mahmah hi.
Lai ka simpeihlouh ni in amah ka room ah a
hong om di a, ka roommate zong hilou na pi in lai ka sim a deihluat man
in,”Let’s have discussion.” khong chi in lai simkhawm a hun a hon
zatkhoppih hun leng a tam mahmah hi. Lai siamthei petmah mi ahi tuankei
a, himahleh kei sang in thil a chiamteh in a mansiam baihzaw himhim hi.
Ka damlouh ka chinat ni chiang in a hon
awlmoh thei mahmah mai a, a damlou zaw hi awmtak khong in,”Let’s go to
the Health Centre.” chi in a hon zawn masa sek hi. Damdoi ka neihlouh
leh a hon zonsak a, a lei dia ka kuan peihlouh leh aman a hon leisak zel
hi. Khatvei lai teng ka khuh nasa mahmah a, damdoi ka nek le zong
phatuam mahmah lou, huaitak in Ramesh in,”Have this. Very good village
medicine plant. One time taken and your illness will be gone” a hon chi
a, ken leng bang ahi peuhmah dia aw, chi a ka velhchet leh, buhhum
bangbang, huai restaurant khong ah nektheih i nekzawh chia nektheih i
neknawn sek te un, mouth freshener te dandan, himahleh huaite dandan
sang a neuzaw thamtham, om siuhseuh ana hi a, ka chiap cheuh leh a taste
kha Vicks/Eucalyptus toh kibang petmah hi.”What’s this???” ka chi a,
Ramesh in,”It’s called Wama (ka zakdan ahi). Very powerful” achih toh
kithuah in a khut in hon thil tawi a ham a, a khutpekte gel kal ah a hon
nuai cheuh a, ka khut ah a hon pia hi.”Eat all!” a hon chi hi. Ken le
vicks toh kibanglua ahihchia a gim kha, kha tiamtuam zawmah ahihtoh, ka
ne lin mahmah a, hilele thumang tak in ka bak suk a, ka hai nuaunuau a,
val chu a haksa mahmah mai hi. A zingchiang in bel a gen mah bang in ka
khuh a reh tuan mahmah a, a hon thilpiak phatuam ahi peuhmah di a, ka va
neksak beh hi.
University campus ah Lake lian huntawk
mahmah nih om hiven, huai khong ah lawm dangte toh Ramesh tel in ngakuai
khai khong in ka hohkhawm sek ua, nga ka mat bangbang uh ka nekhawm
nainai sek uh hi. Ramesh a hoh utlouh chiang hiam, manlouhna khong a
neih chiang in a hon zawn zou ngeikei uh hi lawm dang te’n. Theihai kung
a tamna khong a thei ua, theihai a min mama in ka vaveh sek uh hi.
Kumkhat lel omkhawm pan himahle ung, Ramesh toh ka kingaihnatna uh hi a
lian tuak mahmah a, holiday tomchik sung inlam a pai di teng in ka room
ah a hon muh keh a hon call dia, mangpha a hon khak gige hi.
Huchibang khong ahi a ka hun zatkhop dan
uh, huaite tengteng ka ngaihtuah laitak in ka room kongkhak uh a hong
kikiu nawn a,”A kua le a ta zel a ?!!!” ka chi a, sana ka en a, zinglam
dak 1am a naih mahmah ta hi. Thoupeih nawnlou ka hihman in ka ki-ihmut
khem bawl dek leh kong hong kikiu nawn a,”Muan! Please open! It’s me
Shiva!” a hon chi hi. Shiva ahihleh Ramesh roommate ahi hi. Ka
vathoukhia a, kongkhak ka hong a, dah mel pu deuh in Shiva in,”Did you
know Ramesh is gone?” a hon chi phut a, ken le sappau siamlou ahihtoh a
gen utpen genkhalou a genkhial kha a dia aw ka chi a, ka dongkik pah
a,”What do you mean ‘gone’ ?” ka chi a, aman leng,”He was died in Bus
accident today night (‘tonight’ achihna di uah, ‘today night’ chizel uh,
nuihzat huai sim) when he was gone to his home.” a hon chita maimah hi.
Ka kiguih zawzen a,”Around what time did the accident occur ?” chi in
ka dongkik nawn a, aman,”He was gone out around 7 pm from the station
here and just before he was reaching his village around 11:30 pm, the
accident happened.” chi in hon dawng hi.
[Phuahtawm Tangthu ahi. Ka kipak]
©Siamsinna leh Vakiangbu
Comments
Post a Comment