KA KIPUANKHIAKNA

By ~ Greeny Lun Paite

Ka Gamdang zin masakna a ka thil tuahte:

(1). Lenna/flight a ka tuang masakna pen ding in, Imphal Tulihal Airport apat Delhi IGI Airport zuan in kong leng uhi. Kingfisher ah ka tuang hi. Vanlaizawl a ka leng lai un , ka tuangpihte zuntha-ektha in toilet a hohhoh uhi. Kei leng thiltheihna kawm hiding chi in eksuak le hikholloupi khat toilet ah ka valut tei hi. Kong ka kalh thei zat pah hi. Ka daileng yoh tak a , pawtkhiak ka sawm non leh, kong honna di muzoulou, buai sim in ka om hi. Mirror lianpi khat om a, ka ki-en thakthak zawzen hi. Chimoh dek sim man in ka om a, a kongkhak hoih tak a ka check thakthak leh mek (press) di khat ana om a, ka mek leh hong kihong a, ka pawtkhe thei khong hi. Toilet sung a kitaang dektak !!

(2). Lenna sung a phone zat phallouh ahi. Lenkhiakma deuh in “hih ding leh hihlouh ding” teng Air Hostess te’n action in hon show zatzat ua, tv toh. Phone switch off ding in hon sawl vek uhi. Vanlaizawl ka tuntak un a guk in ka phone ka switch on a, bang a chi himhim hiam chi a ka et leh no signal kici zeih…. Off non pah geih!!

(3). Delhi ka tung ua, salaw petmah hi. Thuak haksa ka sa mahmah a, vuaktang khong a om gige na ding in hoih ka sa mahmah hi. Pu Adam leh Pi Evi te bang ka mohsak tha hong suak sim maimah hi. A bultung apat a, singgah ana ne kei un Pathian in a cihcih lai in , a na ne sese kei le uh tua vuaktang ngen a ki-om dia, nak nop law di hi a, vot deuh ding hi a cih peuh ka lungsim ah hong suak mawkmawk hi !!

(4). Punjab (Jalandhar) a college kai ding a kuan a, Delhi tung masa ka hi. College ka tung uh leh ana thupi law mahmah a, campus sung bang ale kimang dekdek hi. Hostel sawng 9 na ah ka om kha a, thupi law zezen a ka lungke tops ! Ka inn sawng sang kal khak na pen hilai !!

(5). Delhi apat Punjab a ka kuanlam in bel ka pite’n College ah hong kha uhi. Mikhat a bus fare 350 ahi. Kei kia a Punjab (Jalandhar) khopi apat Delhi zuan a kong pakik leh, bus fare 700 hon la geih, vaipau lah kitheilou ahih chiang a, ka pi call ing a conductor pa toh kibeisak ziahziah, phone apat ! Ka Balance teng kichai dektak !! Conductor pa’n munkhat a hon kumsak mawk, ka vanteng hon lakkhiak sak a, a gen uh lah kitheilou, hon taisan geih uh. Lungkham huai sim, ka pi ka call leh pick-up lou zaw mah !! Lampi junction mun ahi a, lampi mun 4 in kak hi .Amritsar chih kigelh ka mu a, huailam a paidek ahi di ka ci thoh hi. Lampi ka cross a, bus khat hong tai hon na kham ek, vaipau theih sunsun a,”KAHA JAIGA ??”ka chih leh bangbang hiam gen, Delhi khong le chikha, tuang pah, lampi a gim lawtel, ihmut nak suahlua hi’n maw… ihmu ngam tuan teuh lou, siphial in Delhi zaw kitung khong sam !!

(6). Ken bel English/Negro cihte khong mu ut se ka hi. Khatvei innnuaipa toh bazaar a vahoh, English te numei nih le ka dawr hohna ua hong lut uh, van hong lei dek uh. Ken bel a kihouna uh za ut lua, a English zatdan uh khong, a guk a ka va ngaihngaih leh.. hon en hek-hawk mawk uh, kei le kisuanglah hetloupi khat kisuanglah mel deuh mai a paikhiak san geih..!!

(7). Delhi a INA market (Leinuai Bazaar) ka hoh masakna pen ua, aisa (crab) te lian sa thei law mahmah ing a, tuisuahgiat a amat uh hinteh maw chi a ka hohpihte kia dong zeih !!.(8).Sarojini Naidu Bazaar a khatvei ka hoh ua, kifelsak deuh a na tuam pai, dawr tuamtuam a, naupang khat pom kawm a van na ban et-et leh tonpihte muzou nonlou, zong nilouh leh a tawp a muzou khong. Huai nung kipilvang mahmahta khah hi’n maw… !!

(9). KFC a ka hoh ua chicken fry te kha limlua in chin, a guhte keih ek-ek dia chak huai a na salua ka hi. Ka pite’n ka keih di hon phallou ua, pammaih kisa gusim aihbang !!

(10). Delhi a chimhuai theilua. 2010 kum ahi a, Internet khoih man dakkal khat a Rs 10 chauh ahi . Internet vakhoih deuh gige, facebook chih migen zakha, account khat ka mawk try leh bawl thei vanglak, tunitan zangtou denlai. Tua ka facebook account pen Delhi a Munirka Cyber Cafe khat a ka bawl ahi aw…hehe. A Original deuh chi ing a, account dang lunggulh tuan teuh lou..!!

(11). Vasant vihar a park/firm/garden dandeuh om a, zawngtah neute nihvei vagu zeih !!

(12). Nitak khat kei kia a sathu valei dia kuan, lampi haih gop, inntung kik thei zoklou, Munirka sung a ka sathu lei na mun khong lehtunkik thepthup zel, beidong sim mahmah, a tawp a gintaklouhna lamlam a ka pai leh inn mai chet a suakkhe kha thepthup zawzen !!

(13). Wednesday market a chi uhia? Huai a nihvei vakai kha. Vaite’n ek a ut nana a tha uh bang, munteng a ek om, ek tamlua nuam mahmah lou… waak!!

(14). November kha hong hita, apple tam petmah, kiman zawmah, innlam a a mawnmawn a thot khiak dia ke’n ana enlah zeih !!

(15). JNU, Delhi ah ka lawmpa Sangdoo Naulakk kai hi. Khatvei ka om na ah hong hoh a, a college campus uah hon pilutta hi. JNU campus bel lian mahmah a, forest a batna mun tam mahmah hi. Ka lawmpa kiang ah ka complain den hi. Forest a om mah kibang di, thoukang tam chi lua hivaw… ka chichi hi. Damtheih huai kei lawngal khong chi’n ka phun den hi. Amah bel pautam khollou in Canteen ah hon paipih a, trop na e ka chilai hi. Cih leh coffee hon treat geih, kiphun ngam non vet lou. Lawmpa’n phunchiak hon sa sim a, kam hukna dia coffee hon treat hi di chih ngaihtuah kha phut ing a, kisuanglah thak sim !!

(16). EBC Tuailai Day a kikhom tawp paidek mahmah, bus ki start ta, bus window a i dakkhiak thah leh , nidang a classmate te khat Kamung Ngaihte in hon galmuh in hon delh chenchen, a poimoh lua om di sa ken le. Ka kiang hong tungtak a” Lun ,nang le Delhi zin maw?, kei le zin” hong chi a taikik non chenchen a numei tonpihte kiah !! ka nuih za zawzen !!

(17). India Gate ah ka lawmpa toh ka vahoh uhi. Kei buaina bel hong tuam nonta. India Gate a thil kigelhte sim sawm teitei. “ To those who are dead in the First World War…..” a ban simthei mahmah lou…. Mood bang flop dek tops !!

(18). Lotus temple a vahoh masakna a, a sung a valut, phalbi lai hivaw, khuavot mahmah hi. Thumna inn ahi a, eilam biakinn dante in tutna ngen kikoih hi. Khevuak a lut a kihi a, tutna(bench) a ka khe ka suikha a, naa petmah !! Khuavot lua a, tuni tan kimangngilh nailou…!! Qutub Minar a hoh sawm. Lotus Temple kiang apat metro a tuang ung a, lamhaih gawp. Sun nitum phial a, Lotus Temple to Qutub Minar kikal a metro a tuang nitum kha dek, kivial lehleh, Metro kikham zeih, kilaw dek tak !! Metro station apat paikhia, Qutub Minar zong chenchen, a tawp a, a tung dawk mu, hisap thoh a ka zongzong uleh muzou khong. Qutub Minar tung toh kiton a khua mui geih !! Hon lut phallou dek tak ua, ticket nget ek-ek leh hon pe khong ua, tomchik va om kha man !!

(19). Elevator/Escalator a ka tuang masakna pen a hon kaipai dektak !! Lift a ka tuang uh leh ka lung-am (dizzy) zeih !!

(20). Nidang khong a India thupi law di ana kisa, Delhi tung leh thring sa sim. Gintak sang a thupi lou zaw tham, Punjab, Shillong khong le huci thou. New York City dan deuh di khong ana kisa kha mawk dan hi’n maw. TV khong a i muhmuhte dan a na hikei veh aw, cih sim a om… Ka lawmte khat le Gujarat lam apat hong pa in chin, Delhi a kimukha , aman le a mite khong thring sa lua in chin Gujarat lamte..” People in thring chi zeih …!!”

Kichai e ! Kichai…!!

©Siamsinna leh Vakiangbu