IITNA TAK ANA PELOU MAH AHI DIAM?
By ~ Hauzel Muan
Writer’s Note : (Love story non gelhgelh ua ken le khat kon gelh tei mai di.)
Aw Lun kon iitna theisiam lechin zaw aw, nang bang a ka ngaih ding
hiai simlei ah omlou ding eive cihkan Muanpu a ding in gen di omlou hi
Muanpu leh Luni, nungak tangval ki-it ngeina bang in ana ki-it in
kingai uhi. Luni bel mi fel mahmah ahi a, khotang leh saptuam vai a
kinak zat mahmah hi. Mi paunuam, maitai ahihman in aneu-alian,
numei-pasal cih khen tuamlou in houpih thei vek hi. Ahucih ziak mah in
min pakta thei mahmah ua tangvalte bang inle enlah thei mahmah uhi. A
sungkuante mahmah inle kisak theihpih tham mahmah uhi. Muanpu ahihleh mi
pautamlou, neuchik a hih apat tagah, a nu sihsan ahi. Neih leh lam ale
mi bang in nei zoulou ahihman un lawm leh vual lak ale vual lel mahmah
sek hi.
Muanpu leh Luni te bel neuchik ahih lai un innveng ana hi ngei uhi.
Muanpu in Luni iit mahmah ahihman in duat mahmah mai a, Luni thil gen
peuhmah sel ngeilou hi. Muanpu bel kiloh tawm a nasem mi ahi a, Luni
ahihleh siamsin a maban hoih tak nei ahi. Muanpu in ngailua ahihman in
nitak lam nasem zou innlam apai chiang inle gim leh tawl khok sa lou in
Luni kiang vapai masa teitei hi.
Muanpu itna leh duatnate Luni in theisiam lou nak khem a achang in
Muanpu pen neep bawl kha sek zel hi. Luni bel mipau nuam leh lawm pawl
thei mi ahihman in tangval tuamtuam toh le kihou sek uhi. A hucih ciang
in Muanpu in nuam ana salou in Luni kiang ah awl in huci ken, kei adia
nuamlou ahih ban a min na theihlou kal a hon maingal gawp thei ahi chi
in deihsakna toh hilh sek a, Luni in a chang in theisiam lou sek in
Muanpu hehsan mai sek hi. Luni lah gen gim lah nam khollou sek , bil
vuhlouh a cihte uh bang mai sek hi. Ahihhang in Luni bel misia a mi halh
cih zaw ahi tuan kei. Paak le apak lutlai hun tak a khuai tampi in a zu
tawp dia boh souhsouh sek mah hiven. Muanpu in lungkim louhna a neihte a
gen chiang in Luni in Muanpu hehsan a Muanpu sang mahmah inle ana heh
zaw zel mai hi. Muanpu lah midang numei khat leh nih khong toh a kihou
khak zual chiang in Luni in hehsan in tangtel sihtan bang mai sek hi.
Nidang ciah hon theihsiam hun hong om mai in teh chi in Muanpu in
theihsiamna bawm ah khe zel mai hi.
Muanpu in itlua ahihman in Luni nu kiang ah le a itdan thu gensuk mai
hi. Tangval tung panpan a ding in nungakte nu kiang a atanu a itna
vakup ding zaw thil baihlam ahi het kei ding. Luni in poimohna aneih nak
leh a zot mama in Muanpu vatung sek a, a chang in apawtnate bang ah
vazui sek hi. Mun khenkhat a Luni alawmte toh bang hiam hih a om Muanpu
in lung himoh lua ahihman in koi hiam a omna di lem ngellou in nisa nuai
khong a ana ngak mai sek hi. Luni in a chang in a lawmte toh vai dang a
sawm ciang bang in Muanpu kiang ah bang dia nana ngak eita ? mihai
khong chi in alawnte toh pawtsan mai sek hi. A chang in houh Luni in a
lawm leh vual leh mi khenkhat in Muanpu thu a dot chiang un ka lawm
maimai ahi chi sek zomah lai hi. Aw Muanpu ading in chuh a zak a nuam
het kei hial ding. Ahih hang in Muanpu in bel Luni a muanna bei tuan
hetlou hi.
Hucia bang tan hiam hong kingaih touh chiang un, haksatna khenkhat
hon tuak zel sam uhi. Ahihhang in itna om nak leh haksaknate itna kipsem
theihna dia kalbi poimoh mahmah suak thei thou hi. Luni in bel haksatna
a omchiang in Muanpu kiang ah thu tawp gen suk pahpah mai sek hi.
Muanpu in Luni toh akal thu uh nidang bang nonlou ahi chih theina
chiang hon neita alah bang chi dan a chi in Luni kiang ah kan ngam
tuanlou hi. Hucia anuam sang a haksat hun tamzaw hon tuak touhtouh
laitak un nikhat Luni in Muanpu kiang a uMuan, eigel kal thu zaw hiai
tan in kholsak phot mai in chita mawk hi. Muanpu in lamdangsa lua in a
ziak ding akan chiang in Luni in ka nu te’n hon hal uh ahi cih tan chauh
gen lel hi. Muanpu ngaihdan in bel hon iit taktak hileh sungkuante’n
bang teng gen mah le uh hal zou tuan ding in a koih kei. Muanpu in thil
paidan hoih sak sawm in banglou teng in pang mah leh Luni in hi thei
nonlou bilbel chi mai hi. Muanpu a ding in apuak hak tel di, nidang a a
hun tamzaw Luni adia apiakte khong hon ngaihtuah ciang in haksa sa
mahmah mai hi. A itpen leh a muan mahmah Luni in lah taisanta mai mah.
Muanpu in bel a itna tengteng leh alungsim tengteng Luni a dia apiak
ahih lai in sungte deihsak louh cih ziak lel a Muanpu khen a om ahihdan a
ngaihtuah chiang in Luni in itna tak a hon na itlou mai mah a diam ?
Bang chi bang lel a hon koih ahi dia aw ? Cih teng khong toh Muanpu
lungsim nat toh dotna amah leh amah kidong in theihsiam haksa asa mahmah
hi. A lawm leh vualte’n Muanpu kiang ah, hichi tuk a hon bawl aman le
nuam asa tuan kei ding ngaihsak non ken peuh chi a ahehnep chiang un
Muanpu in bel mawkmawk kipaktak leh lungkimtak a Luni a omleh kei le ka
kipak, hiai bang a haksa ka tuah Luni thuak ding ka phal mahmah kei ,
chi in dawng lel hi. Muanpu a ding in bel a zohna leh a khitna ding om
sun chu HON NA IIT TAKTAK LOU AHI DIAM ? Cih kan a om kei.
Beita Beita
©Siamsinna leh Vakiangbu
Comments
Post a Comment