KHALAANG AHI THEI DIAM????
By ~ Nasri Jona Tawmbing TxNâ
THU MAPI: Hiai group
member te kei ana muhdan maimai in 80% vel in chu love story i lunglut
pih pe’n un ka thei, thutak i ngai poimoh kei ka chihna hilou in, i
kipahpih lawmlawm lou uh hi’n ka thei. Huchih lai in; hiai ka thugelhte
dan khah mi bangzah in i kipahpih in i buaipih dia aw,,,,,,,! Chih bel
ka theih mauh kei. Bangteng hileh group huangsung a ta di’n ka gingta
tei ngot a, midang adia huat di bangmah a om kei bok a. Group vaihawmtu
lamte’n le a remove hial uh ka gingta kei. Min kizangte ahihleh alem ahi
chih kon-gen tel lai hamham di….lol.
Huai chiah, Kei mihmal ngaihdan
maimai in, thugelhtute theih di leh zuih dia hoih ka sak mahmah chu(h); i
thugelh di athupi fel tak in koih chetchet thei le hang, baan ah
ahithei tantan in hawrop (word) ah pilvang tak in gelh thei le hang, i
laimal a telkhalou ‘x, y, q, telawi kha zang kei thei bok le, kisinna
ahia, comma, fullstop etc, om naang leh gelhzop di leh zoplouh di khong
ah chu kuamah siamlua i om tuankei a, kisintou zel dia; siamtou zel di’n
ngai bok le hang. Tua tamlou ka hon gente i zuihtheih in chu a simtute
adi’n le’ng phurna naktak a hon piak ngei ka gingta. Thu hoih taktak
himahleh i laimal i pong gelhsual nak luat chiang in leh; laimal beven
(Eg: kOn NgAiLuA) te, i zat nak luat chiang in, mi khenkhat in sim gina
peih taktak lou uh ahi chih thei le hang. Admin lamte gen dia kilawm tak
himahleh, “a tangthu asau louh toh”, chi’n thumapi kon nei tehduah a, I
thupi ah lutta ni.
Khosung leh vengsung mun tuamtuam ah;
sihna mulkimhuai leh thiltung lamdang deuh om leh mite muanmoh leh
etkhiak masak pen ahi gige a, aziak bel Tuangpu gamtat utdan leh a
khosak dan mihing pangngai khosakdan hilou in, amah panpihtu khat om dia
miteng in gintakna aneih ziak uh ahi. Himahleh huai thil hihtu “Tuangpu
ahi”, chih bel kuaman genchiang ngam tuansam lou uhi.
Tuangpu’n bike lui deuhmai khat a nei a;
kholai ah sun nilengleng in a vialtai kualkual sek hi. “Tangval om
maimai”, chi’n kuaman a soisel ngam kei uhi. A ziak bel mihing pangngai
sang a lamdanna nei zaw hia a theih ziak uh ahi. Himahleh Tuangpu bel
mite muhdan leh theihdan ah buailou in, amah om-om in; Samson bang mai a
samsau, a mukmul leh khabemulte lah Mosolman kulmut taktak te leh Sikh
paliante mah bang a hoisau in, a kallak a kang phiuh pheuhte’n a sakmel
mulkim huaina behlap mahmah hi. A van silhte lah khangkhatlian vengveng
tui leh sahbon mulou chih haihvual louh a niin ahi hi. Huchih ziak in
miteng kihtak leng alawh hial hi. Himahleh lawmpa a thuzawh mahmah khat
Pu Nang (miteng sapdan) kichi toh bel a kingaina un; niteng hun teng in
a kithuah den uhi. A niteng nasep uh ahihleh Tuangpu Rx100 bike a
khodung khovai a kipuak kualkual leh nungak inn om te hel khong ahi mai
hi.
Miteng in Tuangpu omdan a et-et chiang
un; amah kemtu/panpihtu, khat om dia gintakna lianpi nei uh ahihman in,
khotang makai lamte’n leng; “i vengsung a hiaibang thil a om zenzen leh
minsiat huai law di ahi,,,,,”, chi’n agu-k a enkhe ding in tangval
honkhat sepkhe hial uhi. Aziak bel Tuangpu in thil hong tung di theih
kholhna anei a, zingkal hong hi a; sun lam a khosunga thil tung di
tengteng genkhol thei vek mawk hi. Huai athil gente a tangtung geihgeih
a. Himahleh ama ut mong a agen ahih kei leh kuaman thil hong tung di
dongkhe zou tuanlou uhi. Huai ziak tak in mipite muhdan in le’ng dawi
zawl hidia muanmohna hong lian mahmah ta hi. A khente’n; “Zawlnei”, chi
khong a sam in, a gu-k in chiamnuih bawl na’n zang sek uhi.
Amah Tuangpu khel lua a gen di hikei
mahleh amel leh puamte kuaman ngainaa theilou uh ahihman in; nupi,
naupangte bang in lauh chih petmah in alau ua, kholak khong ah mukha le
uh, a taisiat san zel uhi. Naupang kap khemnang in; “na top kei leh,
Tuangpu hon mansak di,,,,,”, chih khong nupite paukam zat tampen ahi
hial hi. Naupang khase tak a kap keuhkeuh lai; huai paukam a zak phet
chiang un tawpngal vengveng mai uhi.
Huchi’n; mite’n lau in kihta chimah le
uh, amah Pu Nang toh bel a kingai un, a ki-itsiam mahmah mai ua, Pu Nang
ahihleh mibanglou ahia, lungsim lam a venlouh mai ban ah apau leng
theih haksa mahmah hi .
Nidang a ahih ngeina dan bang un, nikhat
chu Pu Nang toh veng khung lam a, Pu Nang ngaihzawngnu hel ding in;
nungakte innlam manawh in Rx100 in hat huntok tak in hong kikhohkhe nawn
uhi. Nungak helna ah bangbang hiam gen in; Tuangpu in leng vengsung
nungak melhoih leh fel mahmah Pu Nang in a ngaizawng mok pen; a numei in
deihlou di chih thei chiang mah leh, Pu Nang ahehpihna ziak in a
vapawtpi zel hi. Pu Nang zong huai nungak mel amuh chiang in kipahna’n
pumdim sek hi. Nungak nu’n leng lawh didan tuan theilou ahihman in; hoih
taktak a houpih a, ana pawlzel hi. Sawt simtak a tut nung un Tuangpu te
lawmta leng; pu Nang te innlam ah, su’n ann ne di’n nungakte inn a
potsan nawn ua. Pu Nang te inn a phakma deuh un lamkoi ah; motor lian
dangtoh kituakkha in, Tuangpu’n le kiphukha di thouthou, chi’n lamkhang
ah lengkhiak sukpih hi. Himahleh Pu Nang ahihleh bangmah liamna a nei
kei, amah in hong thoukhe thei pah hi. Himahleh a sakhau a athil kuah
hihmang kha ahi chihbel chiang tak in a thei. Huaiziak ahi ngei di chu; a
lawmpa Tuangpu khophoklou a om le’ng ngaihsak manmlou hial in, athil
sukmang a zong den hi. Huchih lai in Tuangpu bel khua le phoklou in a om
a; sawt kuam tak khua le phoklou a a om nung in, khua hon phokta a,
himahleh kuamah abuaipih ngam omlou uh ahihman in amun ah naa sa in
ngaih taktak in a kikou vongvong hi. Himahleh a kikou ging za te’n,
panpih naaksang in lau in a taisan zel ua, a tawp in Pu Nang in a lawmpa
Tuangpu aw zaa in; kintak in a naihphei a, Tuangpu a vakaikhia a, a
innlam uah etkol di’n a pawmtou hi.
Tuangpu damsuah zoulou di chih miteng in a
thei man un, a lau ua; a sih nung di ngaihtuah in mipi mangbang tak in
koih zou hial hi. Aziak bel, a dam hoih lai a agamtat dan te leh; a
accident lai a kuaman ahutkhiak utlouh khong uh gen in, “ka sih nung
chiang in ka kha in phuba a la dia, nuamsa tak in ka hon koih kei
di,,,,,,”, chi kawm in akiang a amah enkolte khong vau in, amel khong
kibawlsiat khum zialzial hi. Sawtlou nung in Tuangpu leng a hong sita. A
lawmpa Pu Nang bel lungleng in; koimah a le diang peihlou in hun
sawttak inn sung ah kibukhum hial a, athuak luat ziak in, amalam a teng
sang in leng Pu Nang in hai belhsah mahmah a, midangte houpihnate le
ginatak a dawng lou in, a lawmpa Tuangpu min lou in kapkap maimah hi.
Himahleh mi tam zaw te’n bel Tuangpu khaa nasep hidi’n gingta tinten mai
uhi.
Tuangpu, a damlai a le khosung mipite
lauh leh kihtak mahmah hong si ahihman in khodung khovang ah thuthang
tuamtuam, zaak ding ahong tam mahmah mai hi. A khente’n; “Tuangpu khaa
laang ahi,,,a accident na mun uah ka mu/za,,,,,,asih maa a akikou bang a
kikou ging ka za,,,,,,” chipawl toh,,,,,,: a pum in apum buai maimah
uhi. Khosung ah numei, naupang genlouh; papi leh tangvalte nasan amau
kia a kholak vak ngamlou in; mahni inn pawtsan di ahih ua leh mi thum
leh li chiang beek kizui in kuankhe zel uhi.
“Hichi tel a khosung hon hihbuaitu om ”
chi’n vengsung makai lam te’n Tuangpu khaa siansuah ahon sawm uhi.
Himahleh huai bang hih ding in kuamah hangsan a om kei ua; a gengen hang
un, hih piching zoulou in, vuaitampi ana tawpsanta uhi. Miteng in lau
mah le uh Pu Nang in bel lauhna nengkhachik le’ng anei kei. A khen
chiang bang in, “Tuangpu,,,,,,,,,”, chia kikou in; kholai ah haat taktak
a vialtai a, a buai thei mahmah mai hi. Mite’n Tuangpu tanchin dong le
ulah, “zan nitak in ka kipawl uh, tuzan le huai mun ah ka kimu nawn dek
uh,,,,,,”, chi’n pau chianglou tak in gen namnam zel hi. Huai a thugen
zaa in, Tangval pawl khenkhatte’n enzui sek mah le uh bangmah amu ngei
himhim kei uhi.
Tuangpu tanchin lah kigen nak deuhdeuh
ahihman in, khotang heutu lam in le’ng; duty kiseh a, chang ahon sawmta
uh hi. Ahi tak in sikha changsawm chih a kithei ua, lohsam di chih leng
chiangtak in a kithei uhhi. Tuangpu sih nung a thawmzak a neihna un,
natna thuak a thum huthut ging, panpihtu ngai a kap gingte ana zakzak na
uh; Tuangpu accident na mun vel chang di’n hong kisata uhi. “Zan teng a
chaan di ” chimah le uh, kalkhat sung achaan nung un bangmah thawm zak
a neikei ua, “bangmah thawm kiza tuanlou” chi’n chaang kei le uh, huai
a chanlouh zan chiang un thawm hong om geihgeih zel hi.
Atawp in, tangval honkhat in thupu’kna
hiai bang in hon bawlta uhi. “Changlou dandan in a kiang nai inn
tuamtuam ah i om di ua, thawm hong om phet chiang in kintak in i
kinaihkhom ding uh, akhen in saklam apat in, akhen in khanglam apat in ”
chi’n, vai hon hawmta uhi. Kha leng vak sim philh phelh ahihman in,
muhngei leh mat ngei kilamen tak in tangval hon leng om uhi. Zan dak 12
lam hong gin tak in, akhen ihmut hong suak a, akhen lusu in, akhen bel
ihmu ngamlou in pilvang tak in thawm ngaikhe den uhi.
Nidanga thawm azak ngeilouh dan tak un,
huai zan in mihing phun-ging bulbul thawm ahong om a, thawm azak phet
un, lusute phawng in, kin leh buang in; huai athawm zakna uh hon naih
pheita ua. Ama a ana gensa vek uh ahihman in buaina om hetlou in thawm
omna a uum kimvelta uhi. Thawm bel dai tuanlou ahihman in tangvalhawn
leng matngei kilam-en tak in achang ua, ama a ana genkholhsa mah bang
un, a lak ua upa pen hong (signal) khuh a; thakhat thu in, taisiat theih
nang lampi om hetlou in hon naih khom ua, loupa kawm apat in ngaihtak
in pu Nang kiguih leh lau hong kikoukhia hi. Sikha mu dia a kigintak vek
lai ua, Pu Nang lau leh mangbang mel tak a om amuh un kuamah kisum zou
omlou in hong nui khe ek-ek ua. Amau leng thangpai kisa in Pu Nang aman
ua, thu dot chiang ding in lampi ah pikhetou uhi.
Pu Nang in hichi’n hon gen hi,,,,,,”ka
ngaihzawng nu’n (a accident ma ua a nungak hel uh) aktui pumhuan ahon
pia a, Tuangpu hon nget di ka lauh ziak in kuamah omlouh chiang a ka
nek di chi’n ka sakhau ah ka kuah hoih hi. Himahleh ka nek maa in hiai
mun ah Tuangpu’n hon tailiampih a, huai ah ka mangsak kha a, iit lua ka
hihman in a zong di’n niteng phial in ka kuankhia hi. Himahleh ka zong
chiang in tangvalhawn in hong chang zel na hihman un kuamah omlouh lai
suam a nitak chiang a zongzel ka hi. Ka nungaknu’n lah “ka aktui pumhuan
kon piak na muhkiik kei leh ka hon ngaizawng ut nawn kei di ” ahon chi
a, ken leng muh teitei sawm a zong ka hi,,,,, ” chi’n gen hi.
“Mi bang ngelloute’n nungak a ngaih ua,
aktui pumhuan apiak ua leh ngaihsak nuam nawnlou uh ahi” chih thei a
huai nungaknu’n le Pu Nang ana pia chu ahi ngei dia, Pu Nang in lah
mangsak zaw mah……..bang a chizel di ua ?????? A ngaihtuah peihte adi’n
!!!!
©Siamsinna leh Vakiangbu
Comments
Post a Comment