KA PA INN HONG TUNG KHONGKHONG
By ~ Tombink Samuel
1996 kum lak vel ahi, i gam uh buaina
meipi in hon tuam dek in kisa lel hi. Ki kidnapped, kivuak, kithah chih
khong gen di om panpan ta hi. Nitak chiang in Amry te’n curfew puang sek
ua, khauh le a khauh pai mahmah uhi. Nitak khat curfew kipan dek
ahihman in mipi thawm le a dai panta hi. Kei leng lup a ihmut sawm
mahleng ka ihmu theikei a, ka lungsim a nuam thei mahmah kei;
KA PA’N innlum loulum hon zuan nailou ahihziak in. Naupang simlai
himahleng sia leh pha thei ka hita hi. Ta upa pen in Nu leh Pa itna ana
hau diak uh chih adik mahmah hi’n ka thei. Ka naute ihmu hithit ua, kei
ka ihmu ngamkei hi. Ka Pa inn hong tung nailou, ka lungsim ah suang
tuahna atam mahmah hi. Kholai khonga buaina hon tuak a innlum loulum lam
hon zuan theilou ahi diam ? A lawmte inn khong a curfew in alap man dek
ziak a hong giah sawm ahi diam ? chih khong, akhen chiang in lampi a
hong pai a inn hong tung dek dekta in ka ngaihtuah sek hi.
Ka inn bang ua sanapi (wall clock) ki
khoih a gin ngaih diak in ka thei a, dak 9:00 lah ging mahmah di
hita,curfew ngei leng dak 9:00 a kipan mah ahi. Ka Nu leng huchi bang
mah in ana ihmu tuankei a, kei mah leng ka Pa ahong tun louh ziak a
ihmut san ngamlou ka hi chih a haih kei. Load shedding ahi a, innkong a
mial depdup hi. Ka Nu toh vazon ka ut mai ua, lupna a om muang theilou
in, innkong lam khong ah ka vakhodak zel hi. Kei le lungnuam lou pi in
lupna tung ah ka lum khemkhem a, ngaimah dih ! Khe pai ging keuhkeuh ka
za, a hong ngaih tial-tial a, ka kong khak uh awl in hong kihong hi.
Kuamah dang ahikei; ka Pa vai hong tung di ka na ngakngak pen ahi ! Ka
lung a muang tel huai tak in chuh, ka kipahna in a tawp a sun hi. Ka
Nuu vathou a, a ann neek di vabawlsak hi. Kei le ka vathou sam a, ka Pa
ka va-en nilouh hi. Gen di ka thei tuankei. Ka lung a muang in a muan
thoh mai hi. Innkuan kim a lup theih ahita. Lupna tung apat ka Nu leh ka
Pa annek kawm a kihoulim tiptip uh ka ngaikhia hi. Ka khasiattha bang a
suak zawzen hi. A sawtlou in kei le awlmoh dang nei hetlou in mittui
vung pelpul kawm in ihmut limtak in ka nak ging dar-dar ta hi.
HAPPY FATHER’s DAY !!!!
©Siamsinna leh Vakiangbu
Comments
Post a Comment