ZAALMANG HI LEH

By ~ Dizz Guite

Thupatna: Hiai tangthu tom leh etsakna hoih tak bak ah khangnou hun lai zat siamloute adin phattuampih theih khak lametna in ka hon gelh ahi.

Ka pianna khua ah Christmas mang din ka vapai a, Christmas hun hoih leh kilawmtak, khua hun leh nisa eng kilawmtak ka hon muh in kipahna in ka dim a, lawmte toh Christmas ni nitak lam a sa nek ding sem in nuamsa leh lungtai tak in sa ka hon sem ua, neulai thu leh la, thu vantang teng kon ban gen kawm un sa sem kon zouta uhi. Sa semna ah nungak tuitawi leh ka sep uh hong huh bang zah hiam a om te, melhoih thei mahmah a hihman in kon thoh kawm cheuhcheuh zel uh hi. Mipite nek ding sameh kon bawl ua, thuk thum leh li bang in belpi khap kua ngen in kon huan teptup my uh hi. Singtang khua chih mah tak mehbel veng chu tuanvaite leh Ui gilkial a sa bak kia ngakte ka hi mai ua.. Kua mah hin lam leng kiphawklou sa bel bul ah ui hawl in ka buai thei mahmah ua, lawmte bang in Hiai uipi le a ngoi zan ut a hi hia ? chi’n a na hawl kongkong sek uhi.

Tuanvaite hong huh a tui leh van poimawh dangte hon ngaihvenpih nungak khat hoih ka hon sa a, meh tok kawmkawm in ka hon melh cheuh zel a, lawmpa khat in hon na zetheihpah in meh huan zoh chiah kisil d non ngak di aw lui ah I vakisil ding chin hon gen a, keng leng awle ken na inn uah kon zawn ding ka chi pah a, meh ka huan zoh un lui ah kisil din ka hong kuanta uhi.

Kisil kawm in lawmpa’n tuni huai na melh bawlnu vahel le hoih di hi veh aw, fel le fel mel ahi, nungakte lak ah et theih huai mahmah, mel lah selou hon chi a ken leng lungtung tak in awle, chi’n kisil zou innlam kon zuanta uhi. Lawmpa’n na inn uah hon na ngak in aw , I vapawt zual di chi’n hon vaikhak a, awle hon zawn le chi’n kon na ngak di chi’n kong kikhenta uh.

Lawmpa hon gen bang in ka vapawt ua, innkhat ah lut in an kam lim nang tamlou dawn ni chi’n ka dawn pah ua khamsim milmel in sa phual lam ka hon zuanta uhi.

Meh hawm in ka zukham milmel toh am sim viviai in kong kipei fitfit a, nungak hoih ka sakte inn kuan bang meh ka vapia mun zawzen hi’n ka thei. Annek zoh in meh huanna belte silsiang in tuanvai teng mah kong kipumpei ua, huai kawm kal ah khosung tangval zukham khenkhat kiphasak hun tawkte’n tuanvaiten meh hon tom piak lua uh chi bang in hong kikou leklak ua, lawmpa nagihdan ana hi hetlou ahi ding a, hong kisel mawk uhi. Kei leng ka lawmpa mah panpih ka hih chia kisel tuah in, khamsim tuak ka hihna uah kong kisual kha maimah uhi. Huchia kong kisual khak chiang un makaite’n vai hon hawm ua ngaihdam ka hong kingen kik ua vai a hong veng non pah vanglak hi.

Christmas zoh nithum khit in ka pianna Khua nusia in ZOGAM khuapi Lamka ah ka hong kikta hi. Mipi kipunkhomna leh lawmta annek khawm chihte ka ngaihnat leh nuam ka sak ahihman in, hichi bang hun ah tel mun leh lawmte toh nekhawm dawnkhawm in ka om ua , zu ka hon hai mahmah ta hi. Nikhat lawmte numei/pasal ka vek un picnic nei in muntuam ah ka paikhia ua, sa bawl kilunglut hiven sa mah ka vabawl non a, lawmte sa bawl na a tellou pawl in Zu ka dawn ding uh tam tak vala in, annek kuan in numei pasal chih omlou in kon dawn khomta ua, kham chiat ka hi ding ua, a kopkop in kong kikhenta uhi. Hun lem zangh theite’n nungakte toh omkhawm in hichi bang in lawmte a hong om ka muhchiang in keng leng ka lawm numeite hon tonpih khat ka na tutpih a, ka khamsim ziak hia ahih kei leh a mah le ut ahi diam ? Nupa nopsakna/thangtatna ka hon neita uhi.

Hichi bang ka hon zat zoh un chu ka kham a hong veng hiai-hiai a, zakta sim mah leng lawmte lak ah bel bangmah theilou bang in ka hong om tuak uhi. Nitak an nekkhit in vante khom in innlam ka hon zuan ua, ka kithuahpih nu’n nitak pawtkhawm din hon zot ziak in lawmte toh ka vapawt uhi. Hun bangtan hiam ka kithuah tak un nitak teng in kong kimu ua, hunlem la in ka hong lumkhom cheuhcheuh ta ua, himahleh kingaihna thu bel kigen nailou ka hi uhi. Hun hong pai zel in tawpsan mai d ka diam , den chiang in hoihlou leh zahlak tak a ka om ma in, skul naupang ka hih lai toh chi’n ka tawp sawm zel a, himahleh ka kisak nilouh kal in ka lawm kithuahpih nu’n nau ahon pai (pregnant) ta mawk hi.

Kei ut thu a lah nau sukkhiat di hong hi theilou, amah a ut kei leh, Sungkuan nu leh pate theipih bak ah, lawm leh vual mai ah zawlgai pa, chi a minse di ka hong hita.. Kei leng lawmnu kiang ah hoh in bangteng hi leh naungek sukmang ding dan ngaihtuah ni ka chih chiang in sukelou ding , ei a mah ahi. Midang a hilou hon chih san maimah a, ka hinkhua ding ka ngaihtuah chiang in haksa ka sapet mah hi. Sepna bang mah neilou, sum leh pai neihsa himhim omlou, nek leh taak bangchi zon ding ka hia ? chih leng ngaihtuah a nei ngeilou pa khat in Zi nei ding ka hong hi maimah a, ka hinkhua aw, , , , , , Ka ZAALMANG HI LEH chi’n khangthei lou nuam veng aw.. chi’n kei leh kei lungkham kigua ka hong hi ta hi. Tu’n zaw khovel haksatna phut kipan ka hi ta. Skul naupang ka hih lai in, hunhoih ka neihlai in bang dia ut leh dah a om ka hia ? Numei leh pasal kal khiaklah man in maw ? Ka maban zaw a bing tel mai…!!!!!

©Siamsinna leh Vakiangbu