LUNGNOP KISIN MAITA NING E

By ~ AchillesLal Yatze Fdgg

 

Writer’s note : [Based on a true story himahleh Min hong kizangte pen bulhtawm maimai ahi chih thei masa ni]

Hiai leitung ah hinkhua zang sapsap di’n mi vangse penpen te lak a khat in ka kithei. Ahih hang in ka Toupa ma ah vuithei ka hikei.Laisiangthou a kigen bang in mihing damsung kum 70 pen kei a dimah in kibulh taleng ka khangdawng lai hun leh ka pallai nite tulkuan ahita.Innkuan khosak haksa tak apan khangkhia ka hi ua, ka Pa’n solkar buhpang a sawkkhak zek apan kou unau tamsim tak ahon vak liailiai hi. Kou unau a numei thum phate lak ah kei a milai na ka hi.

Ka neulai hunte uh bang ka ngaih tuah kik zel chiang in ka Nu tawl didan ka thei a ka zahna leh ka itna alian semsem. Kou unaute ahon buaipihna lam in ahun loupi in ka Nu sam te akaang a, amit bang ahat nawnlouh loh hial hi. Ka Nu hoihtak in kem nuam mahleng kei migenthei adi’n hihtheih a omkei. Ka panpih zohlouh hang in ka Nu’n ahon itna abei tuankei; ka Nu hon itna thupi hina tel e. .!

Ka Pa leng ka Nu ka it bang in ka it, ka damsung adia ka mi ngaihsang pen ahi. A loh tawmchikte apan kou unaute skul ahon kaisak a, laisim thei leh gelh thei in ka omvek uhi. A kikhualsiam na te thupha kasa. Mi’n solkar buhpang sawk chi a amuan mahmah lai ua amau muanbang a apanpih zohlouh ka mohsa kei. Kou unaute ahon khualna ziak bek hi.

Ka Nu-le-Pa lungkhamna hihkhak di ka lau mahmah hi. Amau omkei le uh kei hiaitan tung thei lou di hi ingh. Tu’n bel pasal le ka nei khinta a, ta bangleng ka nei khinta. Pawl sawm ka zoh in Bible college ah ka kai. College ka kaima a ka hinkhua kei adia ka kipah hunpen ahimai. Bible college k’ong kai hun apat ka hinkhua ahong kikhengta. Vangsiatna leh gentheihna ahong kipanta. Bible ka zir ziak a huaite ka tung a hong tung chu ahikei hi.

College k’ong kaihial chiang in kei leng piching huntawk thou a kingaihtuah in ka kinungak sak mahmah samta hi. Ngaihzawng lam bel ka nei tadih kei; itna thu hon gen omlou bel ahi samkei hi. Mel et leh piandan et in leng mite lungsim luahzou khop ka hi tei hi.

Hun hong pai zel in ka graduate khiak na di kum khat chauh in ahon samta hi. Huai hun in ken leng pasal khat U Thang chi a ka sap kiang ah ka itna ka na pethuk ta hi. Aman bel college ka kai tung apat ahon deihsa him ahi a, ken leng gin-om tak sa a ka na piak ahi. Ka tunung hinkhua di theikhol lengbel ana it thuk di’n ka kiging kei.

Ka kingaihsung un ah kinak siatluat hun ka nei ngei mang kei uhi. Nikhat, ka U Thang ka inn uah ahong pawt a kei leng kei chauh a ka om ni toh akituak kha hi. Houlim khawm a ka omlai uh ka U Thang in hiai thu ahon genta:

“Ching, ka hon itna na thei. Nang adia ka gin-om na te leng na theih ngei lam-en ingh. Nanglou hiai leitung ah tel didang ka nei kei. Ka hinkhua sukipaktu na hi Ching aw. Hehpihtak in na loubang tulpih di’n n’on pom thei diam Ching? Nang adia pasal muanhuai, nang hon kemtu hoih leh nang hon taisan lou ding in ka kichiam. Hon pomsak maive maw Ching? Chi in kamsiam leh awneem tak in ahon chikhe hiat-hiat hi.

Ka U Thang in huchi bang a ahong paukhiat hial chiang in lamdang ka sa petmah a ka kipak petmah hi. “U Thang khatvei bek hon gen thak dih ka za nuam lawlai” chih bang ka ut hial hi. Kei lengmuang law petmah ka hihman in ka Nu-le-Pa leng dong masa se tuanlou in hichi’n ka hon dawngta hi:

“U Thang n’on thilgen a kipah huailuat ziak in ka manglam bang ka sa dek zezen. .! Nang loubang tulpih dia n’on tel leh kei leltak in bangchi’n ka hon nialtheita dia. .! U Thang nang adi’n gin-om tak in ka om dia, ka muanhuai den di U Thang. K’on ngai lawtel. .”

Huai ka chih khit in ka U in hon kawibelh phei in ahon tawp a ken leng ka na thukpah hi. Himahleh ka U Thang in tuate kia hun asakei. Nupa hihna chiamtehna zatpih ahon sawmta. Dik ka sa kei a ka U kiang ah, “Uu. . .hehpihtak in hiaitan ah khawl ni. Nupa i hihma zaw kidek laini Uu. . .dik ka sa theikei. Maw hehpihtak in??” chi in ka ngen ngutngut a dawnna bangmah ka mu kei. Ka nung leh ka angnemte ahon khoihsak a atawp in kei leng ka kidektheihna a omzou non kei. Ka U ka muan mahmah ahihman in ka tunung hinkhua ding ngaihtuah nonse lou in ka pumpi amah adi’n ka kipekheta hi.

Khabang zah hiam nung in kei mah ah kiselna di a omthei nawnkei, vuaktang nawnlou ka hih ziak in. Poi chu ka sa pumpi kei, hilehleng mite’n hon theikhe le uh bang ahon chimuh di ua ? Bible zir hi zawmah, huai in ka lungtanga hon kam mahmah hi. Kei kia bek minsia hileng adan om , himahleh ka sungte, ka omna khua leh ka college ngei leng minse di uh ahi chih ka thei hi. Ka sung a naungek bangmah thei nailou vasukkiat di lah lem ka sa theikei, tualthahna toh kibang ahihman in. Ka maban abing mahmah a, lam-etna di himhim om in ka thei nawnkei hi. Ka teel di omsun bel ka UThang kiang belh ahimai, zum-le-zah khual nawnlou in.Huchi’n ka hong kitengta ngei ua, ta leng ka hon neikheta uhi. Ka ta neih nung khakhat ahih in innkuan khat in ka inn uah naungek piang khinphet ahong pe mawk uhi. Lamdang ka sa a, gen di ka thei zou kei. Ka theih thakthak leh ka UThang in keitoh ka kipolh khitnung ua numei dang khat toh mah ana khial nawn ahi uhi. Ta ahon neihphet ua a naungek hong pia ahi uhi. Ka lunggim leh ka gentheih di kipan ahita maive.

Khatvei thu a kei ta leh midang ta k’on kep kei adi’n a buaihuai mahmah. Nawitui leng a nih ua ka piak ngai ahihman in ka nawi langnih tuak atep uh kisam hi. Ta khat lel neite’n leng a gimpih mahmah lai ua ken ta nih k’on kep hial chiang in ka gimna akhep in a kibehlap hi. Deihsak tuam nei a om lah ka ut sam kei a. Pathian in keimah hihzoh dia ahon gawt hinteh haksa mahmah leh leng pang teitei di’n ka kihanchiam zel hi.Haksa tak a ka ta neute gel k’on keptouh chiang in ka damtheihna in ahon lel hiaihiai ta. Mibang a khosakna nuamsa a kihihlouh toh kikepna di damdawi nangawn ka nei zoukei hi. Ka pasal in kiloh tawm geigei a hon vak ahih toh ka sum muh sunsun teng uh leng ann-le-meh leina di leh naute ki-etkolna di’n ka zang bei tawmtawm uhi. Hiaite ziak in kei kikep na di genkhak ngam ahikei.

Kei ka hong ki-et kol zohlouh chiang in ka taksa mahmah in le ahon lel hiaihiai ta hi. Ka ta tegel ka etkol lah khawlsan mawk thei ka hi kei hi. Huchiin k’ong om touhtouh chiang in ka taksa lou ka lungsim mahmah le ahon subuai phata. Ka gimna leh khosak haksatna ziak a ka lungngaihna mahmah inle hon chausak hi. Huchi’n a tawp in ka lungsim ahong bukim nawnkei, venglouhna khat ka hon neita hi. Ka vangtahna a hong ombeh semsem hi.

Mi ka hong bat nawnlouh chiah ka ta neuchikte le enkol thei di ka hi takei. A zatna di himhim om nawnlou tuk ka hi ta. Ka hong huchih chiang in ka pasal apan gentheihna k’on tuak toutou ta. Ka haksatna hon panpih di mi a omkei. A tawp in ka pasal in ahon koihkhe zomah hi.

Kei a di’n hiai leitung ah lam-etna ding himhim om nawnlou ahita. Ka tate toh lah kikhen hita. . .!!Kuamah ka mohsa kei. Keimah pilvang zohlouh ziak vek hi.Ka Toupa ma ah kun a ngaihdam nget ka hih theihsun ahita. Lungnop kisin maita ning e. . .!!

~ßeita~

©Siamsinna leh Vakiangbu