THEIH NAILOUH ZIAK AHI ZAW

By ~ Hauzel Muan

Lamka khopi a piang a khangkhia, mun/gam dang ale om kha ngeilou himhim te ading in Vaipau, Meitei pau ban ah ei singtang mi pau dang tuamtuam theih na di chu om hetlou mah hi. Mundang leh vaigam khong a I hong om chiang in pau leh ham, gamtat dan ah ei singtang mite kibuai pah sese hi. Ken le hiai ah tamlou ka na buai khak nate kon gelh di.

Kum 6 vel paita in Delhi lam zuan in mi 3 ~ lawmte 2 toh kei, kong kipankhia uhi. Kou mi 3 lak ah Imphal sang a gamla zaw ah khualzin ka om naikei himhim uhi. Bus a tuang in Guwahati tunma chu pau-le-ham lam ah buaina ka tuak naikei uhi . A ziak ahihleh eimi tampi toh bus a kipaikhom zaizai hiven . Amau nungnung zui in ka pai uhi. A poimoh hun a lampi a i lei ut te vakok thoh zatzat ale kileithei lawlai ahih ziak in. Huchi in Guwahati kong tung uh chu pau theihlouh ziak in buaina kon tuak panta uhi. Lamka guest house a tung in nitak ann nekhin kuva lei ding chi in lawm tegel toh ka kizui pawt uhi. Kuva zuak nu in sappau thei mahmah lou. En vaipau malkhat leh nih I theih sunsun te kuva leina dia kizang thei talou. Sumpi chiamnuih a agen dan a, ” unau nih sa asin alung lei dek gen theilou a a gei ua Mizo pau thei zek khat in A THINLUNG ” a vachih sak a a kilei theih hamham dan un kou le action toh bang lou teng toh thuah in ka vakilei thei hamham uhi.

Ni 2 zoh in Delhi kong tungta ua buaina di hong tam sim panpan ta hi. Kholak hon pawtpih ua bus ah hon tuanpih chiang ua hohna di lam manoh a kitai hiven. Inn paikik lam chiah le I kuan a I manoh nalam mah a tai mah bang . I taina lamlam lah chu manoh nalam kibang gige mah bang in buaihuai mahmah sam. Delhi Cantt a om kihi ahih chia sungte’n na pawt chia bus apat nakumna di chi a hon hilh dan u chu hiai dai (fencing) san (red) na tun chia bus stand masa penpen a kum di chih ahi.

Nikhat lawmpa toh biakinn a kimukha in a omna uh Hari Nagar a pawt dia hon zawn in ken le vazui. Ka kiklam a bus stand tan hon kha, huai apat amah paikik ta. Ka bus ngak hong pai ngei talou in khua hong mial panta hi. Ken le a tawp in bus hong tai khat boh mawk in a sung atuangte kiang a vaipau a Munirka pai d hia chih kan/dong dan a kikoih in ” YEH MUNIRKA CHALLEGA?? ” ka chih leh hai sak chi deuh a hon en heuhou zaw mah ua, bus sung a mikhat in ana theisiam a, ” pai d ” chih hon gen. Munirka ka tung in lampi kan a bus dang ka laknawn ngai ahihman in khua mial toh 10 minutes mahmah bus stand kiim ah ka mang suk nawn malam lai hi.

Pawtna di hong om panpan ta a, auto dawp kon panta hi. Auto dawp dan le maimai lou hilai. Paina di tan/mun gen chet (Munirka, Bersarai ,etc) in a ut uh le kitna ?? Higeih mai. Ei ngapna zah hon gen uleh pautam lou a tuang. A tam zaw hon gen uleh vaipau siamlua mah bang a “ARE YARRR ” chi suk in hiai tan a vaipau theih bei geih in dai vengveng geih mai.

College kong kai panta a, nikhat college kai kuan bus dim sim ahihman in tutna ka tangkei a munkhat khaam bawl in ka ding hi. Ka dinna mun a tu pa hong kum dek a chihleh ka pam a vai papi khat in tutna hon tuh ek a, tutna a tu ding in hong kisa mawk a , kei le heh kisa sim in gen didan tuan theilou I hih maimah chia ka theih louh kal a vatawpek kha laizang . Heh chih tak a heh in , hon hankhum zialzial a kei le kisuanglah sim lah gen didan tuan theilou ka hih maimah chiang a phone toh earphone lakhia in laa ngaihsan heuhhauh mai. Hun dang khat taget a lah papi khat in sum hon khaktou in bus pass one day pass te hon lak in chi vaipau a hon gen. Ken le zachianglou in ka dot thak leh vaipau mah a hon gen a, ken le ka theih dandan a conductor kiang a ” BHAIYA PANCH WALLA (RS 5) PANCH TICKET chisuk in ticket cheng 5 mante nga laksak neihnoi mai. Huaipa le kipak tuan hetlou.

Kha bangzah hiam ka hong om chiang in chu Vaipau thuakna di khop kon theita hi. College kai chiang in bus a ticket laklouh a staff chih zatzat kon panta hi. Nikhat ka lawmte 2 toh ka staff uleh, Delhi Police te bang zah hiam toh tuangkhom kha ka na hi maimah ua, bus apat hon kaikhia in hon man ngal uhi.

Nikhat ann huan dia kisak leh ai-eng ana bei in dawr a leidia kuan suk. Dawr ka vatung tak a ai-eng vaipau a agen didan theilou ana hi maimah leltak. Dawr ngakpa kia meh lak a kisohte chih gen dek chia , ” SABJI ” chih tan chauh vaipau pawt aban pawt nonlou ahih maimah chia leilou a lehkik thak mai ngai.

Hichi dan a buaina hou chikchik la bang, ahun tak a buaihuai mahmah thilte tukhonung a I ngaihtuah khak chiah nuihna di tam sim mahmah a , lawmte toh omkhom a, I gen khom chiang in bang topic nuam mahmah khong hong hi maimah zel aka.

Writer’s Note : Nou le hon kum zek sam ve ua. 

©Siamsinna leh Vakiangbu