SIAN LEMGEEL LOUH HINTE MAW???

By ~ Za Ching Paite

Ka sungte’n hih d poimoh a neih ziak un a hon pawtsan vek ua, kei kia in-ngak in ka om kha hi. Ka sep d teng ka zoh in varendah ah tu in hun paisa khong ka ngaihtuah a ka lungleng mahmah hi. Huchia lungleng tak a ka omlai thakhat in ka fone hong ging a ka kiguih zawzen hi. Ken leng ka etleh unknown number ana hi a , kua a hi de aw ? Bang thu poimoh om a hi de aw ? , chi kawm a ka lak leh maizen ka lamet phak hetlou Muamuan ana hi. Ching damzel maw ? a hon chi a ken leng dam zel mah ing uMuan. Nang koi a om ta ? Bang hihta e ? Lamet louhpi in non houpih zenzen a, chi`n ka dawng hi. Aman leng nang bang chik lai peuh a i hon houpih ut gige mah nei vele chi`n anui a, sepna neita a vaigam a om a hihdan leh ka vengte uh a seppihte khat kiang a ka contact number ana la ahihdan khong hon hilh hi. (a mah hi kum10 bang paita a Class-X ka simlai a ka classmate ahi a, huai lai in ka na kithuah thei mahmah ua , hilele pawl 10 bang i hon zoh chiang in college kaina leh om na khong a tuamtak ziak a kihoukha nonlou ka hi uh hi.) Lamdang bang ka sa a, chikmah a kithuzak kha dia le ka kikoih nonlouh nung a tua kihou kha mawk . . . Ka school kailai thu khong gen in, a khenchiang in ka nui ek-ek ua , nuam ka sa mahmah ua sawtpi bang ka kihou kha zawzen uhi

Huchi’n ni a hong tum a lite pailouh nitak ahihtoh sep-le-bawl d le om tuanlou chi in ka lumpah hi. Sun a Muamuan toh ka kihouna uh khong ngaihtuah in kipahgukna tak khat nei in leng ka kithei hi. Hun paisa a ka kithuahdante uh khong ka phawk khe thakthak a, chikmah a kihoukha ngei non dia ka kilamet louh nung a hon call mawk chihkhong ka ngaihtuah chiang in lamdang bang ka sa a bang chi ngaihtuah kha ka diam ah ka lungsim in vei in ka vei mawk hi. A khenchiah hai bang ka kisa thethup a kei kia in buai in ka na buai mawk hi. Huchia lupnatung a bangbang hiam ngaihtuah a ka omlai in , a hon msg. a, thu tuamtuam khong gen in nuam ka sa mahmah uh. Huai ni apat in ka kihou gige ua, ahih d bangkim khong hon hilh zel in hon fone manlouh chiang in leng hon msg. khial ngeikei hi. Hunte hong paizel a nikhat Muamuan in hon fone a . Ching hun sawtpek apat ka lungsim a om gige kon gen khiak ngam ngeilouh tun kon gen d ka hon na ngai petmah a , ka zahkai luat ziak in kon gen ngam ngei kei a ; hileleng tun zaw ka imm zou non kei, hehpih tak in ka itna hon na sansak ve maw ? hon chi a , ka kipaak petmah a lamdang bang ka sa hial hi. Ka dawnna d bang thei pahlou in ka daai kha dedu zezen hi. Ching bang chi e ? Na lungsim lou lam genkha ka hihleh hon ngaisiam in aw. Hon chi non a, huaitak in ken leng uMuan huchidan hi kei . Hichi bang a itna thu hon gen din kon na gingta ngeikei a , lamdang sa a hon dawng kha pahlou zezen ka hi . Hon ngaisiam in aw. Ken leng hun sawtpek apat in ka itna kon na pekhinta. Ka theihlouh kaal a hon na ngai gawp khinta ka hi, umuan . Kon ngailua ka chihleh kipak petmah ahi dia hon dong thakthak zezen hi.

Huai zan tuh kipahna in ka kidim a , ihmut leng ka ihmu thei kei zezen hi. Nidang a school ka kaikhom lai pek un leng kou geel ka kithuah theih luat ziak un lawmte bang in leng hon na demdem sek ahi uhi. Kou tegel in leng kingaihnatna tuam deuh neh hi’n leng ka kithei a, hileleng a kigen ngam zaw sam ka omlouh ziak ua hichia ana omkha ka hi uh. Hunte hong pai zel a Muamuan toh ka ki itna uh niteng in a pung hulhul hi. Munkhat a omkhomlou himahle ung ka kimuang tuak mahmah ua , haksatna leh lungkhamna ka tuah hun bang un leng ka kihilh tuah ua ka kihehnem tuah zel uhi. A khenciang bang in ka ki-it luat ziak un ka kisuheh kha zel ua hileleng sawt nuak zou zaw sam omlou in ka kisulungkim pahpah zel uhi. Innlam hong pai kaal bang a ngaklah thei mahmah a , ka kiang a om a, a hon itna thu gengen mai bang a ut dan khong hon hilh zel hi. Kei leng nungak khat ka hihsam chiang in hon ngai d bang ana om zelzel sam a, himahleh ka itna Muamuan pekhin ka hih chiang in amah a dia ka ginom theih tawp suah in , hon ngai a hong hohte bang kamsiam tak in ka na nawlkhin zel a , huai thu khöng bang Muamuan in a theih chiang in a kipak mahmah a ahon it semsem hi.

Ni te khate hong bei zel in khatvei tuh Muamuan in suti hon mu thei khongkhon a ka kithalawp tuak mahmah uh. Kei bang ngial houh ka itpen meel muta d chi in ka kipak lua a ka om didan bang theilou zezen in kei kia bang ka nuinui kha a ka sungte bang in hon ciamnuih nuih uhi. A hong tungta ngei a ka kimuh masak ni pen bang un tuh gen di le theilou kizahtak tuah in ka om heuhau kha zezen uhi. Hun awl a neihteng in ka inn uah om den chih di ahimai, ka sepsep bang a hon seppih a lawm dang leng pawl lou in hohna di poimoh om leh lah amah kia toh kizui. Kou geel kia in nuam sak in ka sa ua amah bang in hon duat petmah a ka lungsim a hihnat khak di bang a laupet mah hi. Ka ngaihtuah chiang in hiai bang a pasal hon it leh hon ngai ka tuah khak bang hampha kisa in ka lung a kim mahmah a ameel bang hoih ka sa deuhdeuh a ka ngaipet mah hi.

Ka sungte bang inle hon deihsak mahmah ua kituak bang hon sa in hon kipahpih mahmah ua a nuam tuam mahmah hi. Kideih thoh tak mai a kuamah leng phawk phalou hial a hun ka zatkhom lai un Muamuan a sepna lam ah a pai hong hun non maimah hi. A pai di a lin petmah a ka gen khak chiang bang in leng hon dawng ut kei hi. A pai di ma ni in sun nitum in ka kiang ah a om den a , nguai in a nguai maimah hi. A khen chiang in hon zui suk mai in kiteng mai ni kei kia in ka pai ut kei khong hon chi zel a , ken leng hilou e uMuan omkhom hun bang omzel dia kikhen hun bang leng om zel d eivoi . Nang kia in na vapai non phot dia ka chih patpat leh nang hon ngailou maw , ching ? kei kia a pai dia non sawl chi in hon na pautuh a, ken leng kon ngai mah kei dia. Kiteng luat di zaw himah e . Hileleng nu le pa theihpih in Pathian deihdan in i kiteng kei dia ! Kua hon daal om lah hilou a , ka cih leh aman leng hi a sa mahmah zel hi. A hitak in zaw a hon paisan ding amah sang in ken ka lin zaw tham hi . Hileleng ka kitheisak ut hetkei a, a lungsim noplouh luat di ka lauh man in a kipah theihtheih na di bang ka gen pihpih a ahong lungkim thei khong hi. Ni bang le hong tum dek hialta ahihman in ‘Ching ka vapai phot dia, nitak chiang in kong hoh non pah dia i pawt maimai di aw’ chi in hon paisanta hi.

Nitak hon hi a kha bang a vak hoih mahmah hi. Huchin Muamuan leng a hong hohta a sun a ka gensa bang un pawt din ka kizui kheta uhi. Dawr a kuva khong hai in a gamla a le pawt tuan lou in ka innkong ua park neucik khat om ah ka vatu ua Muamuan in polythene lian sim khat atawi hon lakhia in teddy bear khat hon pia hi. ‘Ching hia teddy bear i nau dia kon piak ahi. Hoih tak in ana kem inla na na suk khasiat hehlouh d na na duat mahmah d ahi o , chi in hon chiamnuih a huai zoh in sana khi hon lakhe non a hiai pen ahihleh kon itna latsakna ding leh kei a na hi cih latsakna dia kon piak ahi. Na hon it lai sung teng na ngawng ah na ok gige ding chi in ka ngawng ah hon ok sak hi. Ka kipah luat ziak in ka mittui hong pawt a, “uMuan ka hon itlua bang mah in nang a kipan hon khen zou kei ding, ka sihma teng nang a hi gige di ka hi chih ana thei in aw ” ka chi a a ang ah ka belh pheita hi. Aman leng it tak leh duat tak in hon na pom a ka khabe a hon dom tou in ka muk ah deihthoh tak in hon tawp tonton hi. Ching omkhom thei nailou phot i hih chiang in ka vapai dia ginom tak in om ni o. Ken le kon itlua…ka hihna peuh ah nang a d kia a hing gige ding ka hi thil bangkim ah nang le ana kikem hoih in aw , hon chi hiat-hiat a. A hon paisan di ka ngaihtuah chiah ka phal mahmah kei a , hileleng amah thazoi saktu ka hih khak d ka lauh man in ka kidek teitei hi. Huchi in zan leng sawt simta ahihziak in kikhelah pipi in ka kikhen uh a ngai maimah ta hi.

In ka tun in ka sungte le ana lumkhin vekta ua kei leng ka lum suak ngal hi. Hileleng ka ihmu thei het kei a Muamuan ka ngaihtha bang a suak deuhdeuh hi. Zing khua hong vak lelah ka itpen in mun gamlapi a hon paisa ta d bang chi’n ka om zou mahmah de o,,, cihkhong in ka ngaihtuah a zui kha maileng zaw ka chi thethup zel hi. Huchia ihmu theilou ka kiheihei sung in khua hong vak petmah a , Muamuan vakhak utsim mahleng khual gam a pai d khong lungleng tak a khitui toh kikhak chih khong hoih ka sak louh man in inn ah ka om zawta hi. Amah leng buai ahi dia airport a tung in hon houpih man pan a , ka ki itna thu uh gen in mangpha kikhak in aman hon leng mangsanta hi. Huai sun tuh ka lungleng in ka thawmhau mahmah mai a, bang mah leng hih peihlou in lupnatung ah ka lum a , ahon thuzak non d ngak in ka teddy bear ka kawi a, ka kihehnem maimah hi. Nitak lam in a omna mun tungta ahihdan leh buai vengvung lai ahih toh hon houpih man pahlou d ahihdan hon hilh a , ka lungmuang mahmah hi.

Hunte hong paizel a mahni buai chiat a kibuai ahihman in ka kihou vaang thei mahmah ua hileleng lungsim noplouhna in leng ka koih tuan kei a ka theisiam mahmah hi. A khenchiang bang in ka ngaihluat ziak in non ngaihsak ut kei chi peuh in ka kinuaksak zel a huai chiang in office a sep d hau lua ahih ziak a hon houpih man pahpah lou ahihdan leh a lungsim a om gige ahihdan khong hon hilh chiang in ka lungkim mahmah hi.

Himahleh Pathian nisun khat kikhop tawp in ka chim petmah a ka fone leh ka lamet hetlouh in numei khat in hon dawng a lamdang ka sa mahmah mai a ka ngaihtuahna bang a paisau law man hial hi. Huai numei in Nenem ka hi a, kua a na houpih ut ? chi in hon dong a, ken le uMuan houpih ut ka hi ka chih leh bathroom ah om chi in hon dawng non a , ken leng thusau dong ngam non tuanlou in den chia awl a houpih thak mai d chi in ka koihta hi. Ka lungsim a buai mahmah mai a chikmah a ka kiang a numei thu genkha ngeile hilou tua inkhat a numei khat toh om chih mawk chi in ka muanmoh tha bang a suak a akhen chiang in a hoih lambang ka kipe zel a a khenchiah a selam bang ka ngaihtuah zel a ka buai mahmah hi. Huchia ka omlai in aman hon fone a ken leng huai numei nu tungtang ka dong pah hi.

Aman leng a office ua vasem thak khat kikhop tawp a inn a hong bang ahihdan leh muanmoh huai hetlou ahihdan uh hoithtak in hon hilh a huchi in ka kilungmuang sakta hi. Hileleng uMuan hong pilvang in aw, ei a gal a om a dia thu hoihlou zak chih khong nuamlou lua ahi, ka hon itna hon theisiam mahmah inla midang zaw hon sai san mahmah ken aw chi in ka ngen a , aman leng kei lou midang ngaih neilou leh kei a d kia a ginom d ahihdan hon hilh thakthak hi. Huchi in ka kipak mahmah mai a ka itna bang pung hulhul hi. Huaini a kipat in amah leng a pilvang mahmah ta a ahih ding thil bangkim hon theisak pahpah hi.

Hileleng huai nung ka lung a muang thei non taktak kei a ka dot theina teng kiang khong ah ka dong gige mai hi. Niteng a huai a seppih thak nu toh kizui gige uh chih bang ka zak chiang in ka lungsim a naa mahmah mai a amah kiang a ka gen chiang in lah migen teng gingtak d le ahi khol dia hia ? hon chi zel a huai chiang in ka mit a vamulou ka hih chiang in ka daih a ngai maimah zel hi. A omdan ulah niteng a kiza gige ahihchiang in ka lungsim a naa thei mahmah a ka houpih dek sunsun chiang in lah ka buailai khong hon chih san zel a huchi lou kal in lah non houpih mun poimoh ka sak leh ken kon houpih na d khong hon chihsan zel hi. Ka maban di ka ngaihtuah chiang in thuak ngap huai ka sa het kei a midang hon ngaihsan bang a na hi leh bang ka chi om mahmah de aw ? chihpeuh ka ngaihtuah a hileleng a tawp chiang in midang hon ngaihsan hial ken teh, ken leng ka muangmoh bawl lawkha pahpah a ahehtha suak hi’n teh chih bang in a hoih lamlam bang ka kipe zel hi.

A hon houpih khak sunsun chiang bang in ka kipak petmah a ka sukheh khak d bang lau in a lungkim na d zong in ka buai thei mahmah hi. Nidang khong a zaw aman kei hon suk nat khak d lau a ka kipahna dia haksa chiteng leng thuak ngap d khop a om hiven, tu’n lah a omdan leh a kampau khempeuh ka lungtang hon su naa tu a suak maimah ta. Ka ngaihtuah zel a mihingte kipahna in zaw sawt a daihkei tel mai. A lawmnu toh lah nupa bang a om uh hita mai bang chik chiang in zawlta hon nei de aw ? chih khong migen pen a hita. Miten bangteng gen le uh leng ka it luat ziak in huai teng leng ka ngaidam ngap lai hi. Ka ginomna hon theih chiang in khatvei tei hong kibawlhoih na d ahi ka chi teitei lai hi.

Nitak khat, kha a hoih vak mahmah a ihmu theilou in ka thoukhia a, apai dek nizan a ka vatut khomna uh , park ah keikia in thawmhau tak in ka vatu hi. Huaizan a ka omdan uh khong ka mitkha in hong kilang dundun mai a , ka theihlouh kal in ka biang ah khitui khaam vuallouh in hong luang suk hi. Huai lai a ka vatutkhom lai uh toh teh in a mun leng a kilamdanna nengchik leng a om nai kei . Huihvotte nung hiauhiau in kha a vak hoih mahmah a, ka lunglen hon behlap tuan mahmah hi. Huchia ka omlai tak in hon fone a nidang teng sang a leng kamsiam zaw a hon houpih hi in ka thei. Ka omna mun khong a theih chiang in hon hehpih mahmah a hichituk a hon suk lunggim khak khong a kisik mahmah a ka tung a ahihkhelh teng khong ngaihdam hon ngen in a hon it dan thu hun bangtan hiam ka zak nonlouh nung in tu’n a hon gen nonta hi. Hon it tawntung ding leh chiklai peuh a hon mangngilh ngeilou ding ahihdan khong hon gen hi. Ching nang ka hon sulunggim kha ka kisak lua a, kei mahmah leng lunggimna kiguan ka na hi maimah. Poi ka sa law petmah . Thilteng lah a kikhelta . Bawl thak theih vual ding a hinonta kei . Hon ngaidam mahmah in aw hon chimawk hi. Ken leng thil omdan theisiamlou in ka dong thak non a , hon hilh ngam non pah kei, hileleng ka hah dot luat ziak in, Ching hiai thu ziak in hon mudah tuan het ken aw. Na hon itna leh na hon muannate zangkhial kha in ka ut dandan in ka na gamtang kha a, ka lawmnu’n nau hon paai mawk in, tu in ka sungte thu lah nialvual ahihlouh man in ut leh utlou a ka kiteng uh a ngai maimahta. Hun lemchang masa pen ah innlam hong pai ding ka hi uh” chi a hon gen bang zaw aw. . . . . a naa tel mai. Ka dawnna d leng ka thei zou kei . Kei kua ka hia ? Koi mun a om ka hia ? chih leng ka thei zou non kei. Ka ngaihtuahna ah bangmah leng om theilou in , kap leng ka kap thei zezen kei hi.

Huchia bangtan hiam ka om nung in ka ding khia a inlam zuan in ka paita hi. Awl a insung lut in ka lupnatung kidenna in a hon itna thilpiak ka teddy bear ka koi tonton maimah hi. Aw . ihmut ka poimoh tel mai, himahleh tawldam tak a ihmut theihna d vual ahi kei. Hunluite ka mai a screen lianpi a hong suak mah bang in a hong kilang dundun a a thuak a hak ngei ! Amah a dia theihtawp suah a ka panlakna teng a thawn hita mai maw ! Hichi bang thil hong tung d saleng zaw bang dia hon zui in a chihlai a ana nial kha sese ka hi de aw ! chi in, kei leh kei bang ka kimohsa a, hileleng thil teng a kikhelta. Khatvei tei a nupa un a hong pai ngei d ua, huai hun chiang a kei bang chi om a, koi lam enta d ka hia? Ka sungte leh lawm leh vual lak a ken bang genta ding? chih dotna aw ka lungsim ah hong gingging mai hi. Himahleh, a dawnna d ka ngaihtuahkhe zou mahmah kei. A haksa tel !! Huai zan chu ihmu het lou in khitui toh ka khovakta hi. Ka sungte hon theih khak d ka lauh man in peihlou sasa in ka thoukhia a ka sep ngei teng thazawi ngoihngaih in ka vasemta hi. Kipah ka sawm a, himahleh a hithei mahmah kei. Thilteng in leng hon thuakpih uh hileh kilawm in ka mu a, ka etna lamlam bang a mial dundun mai hi.

Ka nu kiang ah ka om a nuam kei a ka lum non mai d chi in ka lupna ka zuan nawn mai hi. Ann leng nelou in ka chau mahmah mai a, ka lukham teng lah khitui a kawt vek mai, uMuan hichi bang teng thuak di’n maw non phal tel . Na ki-oi lua, chi in ka kapkap mai hi. Kholak thuthang vengvung khong ka nu’n a na za kha ahi dia , a hon theisiam in hon thuakpih mahmah hi. Ka nu hi ka nu kia leng hilou in ka lawmhoih pen leng a na hi gige a ngaihzawng ka neih chiang bang in ka hilh pahpah zel hi. Ahih theih dandan in hon hehnem zel a, hiai khong ziak a kitha zawisak d hilou Pathian kiang ah thum le chin a hoih zaw bang le hong om thei ahi. Pathian in gawm dia hon na sehlouh hi d ahi, chi in hon thuhilh zel hi. Ann lah nelou , tui lah dawnlou a ka om chiang in ka nu a lungsim nuamlou ahi dia glucose bang hon khai thepthup zel ua lah a phatuam himhim khat leng a om kei . Ka lungsim naa ahi pen mai.

Nidang a hon msg hun hong tun ciang bang in ka fone ka enkha nak a hilele bangmah ana omtuan kei, a number bang delete zel mah leng ka lungsim in nak theih lawtel a hihciang in a phatuam himhim a omkei. Kei le kei kikhem bang ka hi maimah zel hi. A khenciang in ka kining tha asuak a ut dandan a numei hoihloute bang a om mai bang ka ut hun om a hileleng ka nu le pa hon itna leh hon awlmohnate ka ngaihtuah ciah ka ngam kei zel hi. Pathian kiang bang ah ka thum a bang dia ka tankhak louh d it theihna hon na pe sese na hia ? chih bang in ka mohsa kha thepthup hi. Hucia hun haksa tak zang a ka omlai in ka nu hon thumsaknate Pathian in dawng ahi ngei dia nikhat ka ngaihtuahna hong kikhek mawk hi. Huai a hithei nonlou ding ngaihtuah a ka kilungkham saksak a phattuamna omkei, ka kihatsak ding a kei nopsakna d leh kipahna d ka zongta ding chi in ka lungsim bang hong nuam mahmah mawk hi. Anu pa ua amel uh muh d ka ngaingam mahmah louh ziak in ka pa kiang ah ka vapai a mundang a zinkhia a septheih bawltheih omleh zong a , zil theihtheih zil dia kipan thak ut ka hih dan ka gen leh hon kipahpih mahmah a, hon lemsak pih pah hi. Huchi in ka ticket d bang hon laksak pah in Muamuan te hong tung ma ngeingei a zinkhe din ka kisa nasa mahmah ta hi.

Ka zin ni d hong hong tung petmah d ahita a kei leng ka kilawp mahmah a bazar ah a poimoh khong lei di’n ka nu toh ka kuan uhi. Deih bang ka hau a hilele ka nu’n ka kipahna ahih nak leh chi in sel hetlou in hon hih sak vek hi. Inn bang tunghak kha sim in ka gim mahmah mai a , kihah siang in ka van d te khong bawl in ka buai mahmah hi. Huchia lungsim thoveng tak leh kipaktak a ka om lai in unknown number khat in hon call a ka lak leh Muamuan ana hi a, ken leng ngai law lai mah leng kimanghilh sak sawm teitei in paulou in ka koih san hi. Hileleng msg hon khak a hong tungta uh ahidan leh hon mu ut ahidan hon gen a, ken le ngaihsak tuanlou in ka thil hih ka sunzom thouthou hi. A diktak in zaw ka ngai law petmah a, a aw ka zak lel leleng dam hulhul mah ka bang hi. Muh leng ka ut a amah a dia ka gin-om dan leh amah ziak a ka lungkham dan khong ka hilh ut mahmah mai. Hileleng ka vangaihsak a kei a dia a hoihna d omlou, ka lungkhamna hon behlap tu hizaw d chih ka theih luat man in ka lungtang ka khauhsak teitei hi.

A vangkim in ka fone ging zel mah leh kiphawk lou sak teitei in ka kibuai sak mahmah hi. Hucia ka poimoh bang omlai de o cia ka room ka et kual leh ka lupna tung a kil khat ah ka Teddy bear in khasiat ci tak in hon na en kilkel a, ken leng vapom pah in ka khasiat hong suak suk pah zel hi. Hiai bang cih d a hi de aw ? cia ka ngaihtuah lai in a hon pe tupa piak kik mai hoih kon sa zawta hi. Huchi in khelah tak mai in ka pom a, bawi hon it law mah leng hiai a na om a kon muhmuh kei a ding a hoihlou ahihziak in na omna d diktak ah hon kemtu ding kei sang a muanhuai zaw omta hiven paimai in aw chi in ka kap khum ek-ek maimah hi. Hucih lai in ka ngawng a sana khi kon phawk khe zel a lungsim a naa ngei mai. Hiaite a hon piak lai a ka kipah dan leh tua ka omdan a kikhe ngei mai. Kei leng kidek teitei in Lehkha toh pen ka lakhia a hichi in lehkha kon gelhta hi

Lehkha neuchik la khia in hichi in kon gelh ta hi…

Umuan,
Hihchi bang a haksa thuak dia non bawl ding ka na ngaihtuah kha ngei het kei a, ka hon muan ngamna leh kilametna a thawn hong suah sak in midang ang non zalsanta. Chik mah a theisiam thei di’n hon gingta ken aw. A na kilamen sang lua leng ka hikha mai thei a, na ngaihdamna kon ngen hi. Hiai ah non thilpiak Teddy bear kem ut law mah leng kei a dia lungimna lel hong suak d ahihman in nang hon na kep khel phot le chin chi’n kon pekik mai hi. Ban ah hiai KHI leng nang a ka hih etsakna dia non piak ahi a, chiklai peuh in ka ok gige a hileleng tua nang a hi nonlou ka hih ciang in ka kepna ding thu om in ka thei non kei hi. Ka thakhektu na zi ngawng ah akikhai thil kilawm zaw hi a ka theih man in hiai leng ka hon pekhia hi. Umuan na ginomna a na suah kha le chin zaw maw….Hilele thil teng a kikhelta. Thuakdan siam ka na zil mai ding aw. SIAN LEMGEL LOUH i hi a hinteh ! Na maban ah hong lohcing tou zel inla hinkhua nuam leh kipah huai zang thei di’n Pathian in hon vualzawl hen. Nupa nuamsa leh lohcing nong hih uh kon deihsak.

Huai teng ka gelh zoh in hoihtak a khep in parcel bawm sung khat ah a vek in ka guang a a Teddybear guang masa in a ngawng ah a khi ka ok sak hi. Hoih tak a tun in a pe di’n ka kuan sawmta hi. A khen ciang in piaklouh mai di hia ka chi thak zel hi. Ka tawpkik thak zel a, hilele a tawptawp a pe d ci in ka kuan kheta hi. Amau inn leh kou inn kigamla sim mah leh poi leng sazoulou in ka pai zel hi. Zan sawt simta ahihman in kholak a dai mahmah a mimuh ding leng a vang mahmah hi. Hileleng ka lungsim a ka ngaihtuanna paisau lua ahihman in lauh ding lam himhim leng ka phawk tuan kei hi.

Bang tan hiam ka pai nung in a inn uh ka tung a , amau leng ana lumkhin vek uh ahi dia, a dai sipsip uh hi. A inn kong ua om ka hihlam hon thei leh zaw hong pai ut law d hiven hileleng kithei sak sese lou in ; ka van tawi a varendah ua koih in ka paisanta hi. Inn ka tung non tak in ka hih d teng hih zouta chi in ka lum a sun a ka pawtna khong toh gimsim ka hi dia ka ihmu pah hi. Huchi in zingkal baihtak in ka nu’n hong phawng a ‘Ching hong thouta in na kisak hunta hong chi a ahimah ve maw chi in ka thoukhe pah hi. Ka ngaihtuahna ah Muamuan hong kilanglang mawk a, hon sutha zoi mahmah in leng ka thei hi. Khovel a amah ka itpen hingal a khatvei leng a mel mulou a zinkhiak ding ka lin mahmah thak a amel muh ka ut petmah hileleng thil teng a zekaita. Kisa mengmeng in ka kuan kheta hi. Lampi bang a ana om mawkmawk d bang sa in ka dakdak mai a, hileleng a meel muh din a om himhim kei. Ka fone ka en zel a ka zin dek lam ka hilh mai de aw ka chisim zel a, hileleng ka houpih ngam kei zel hi. Ka lungleng lawpet mah ahi dia ka theihlouh kal in ka mittui hong luang in ka na guk nulnul mai hi. Huchi in airport ka tung tak un ka nu leh pa toh mangpha kikhak in ka kikhenta uhi. Kei deihtelna a zin dek himahleng a kimlou om bang in ka thei a, thazoi ngoihngoih in ka paina ding lenna hong tungta ahiman in ka lutta hi. Huchi in khovel a ka itpen ka uMuan mel mukha lou in damsung a kikhen den d ka hi uh hia chih leng theihzoh vual d hilou in ka maban d leh nopsak zawkna d ka khualna in khopi lam zuan in ka leng tum vengveng ta hi.

©Siamsinna leh Vakiangbu