KHALAM KUM 100 VALTA!!!

By ~ Lianzamang Tonsing

Writer’s  note : Better late than never vachih zawzen na dan lah omkei ven  Khatvei mawngmawng k’on sermon di )

Salam thil a ngaihtuah in eilawi hi piangvangtah i kisa maithei, vangleng vangtah mah hang. Himahleh, salam sang a hoihzaw leh thupi zaw, khalam ah nakpitak a hampha hihang. Salam thilte’ sang in khalam thilte’ lah nakpitak in a manpha zaw ngal a. (Rome-te 8:6-8)

Khalam ah nakpitak in i hampha ua, Tangthupha vaak in i gammial a hon taanvak nung kum 100 vingveng bang a valta. Eikhang(tu khang/generation) chiangchiang a houh nuam leh thovengtak a Pathian bethei kia hilou, i piankhiat a kipan Kristian, vangam a dia i sit di ana ki-reserve sa ngen ahi! Hampha! Hiai Tangthupha in i niamna leh tuantualna ua kipan hon hunkhia in hon domsang a, i lam-et batlouh mun-le-mual, neih-le-lam, pilna-siamna leh kong bangkim ah hon piikai in, mite’ neih bangbang hon neisak hi. I pu-pate’n hiai bang dinmun a ding diing in hon koih uh a lam-et huai kei. E’n leng ipu-pate’ sulnung zui a, singbul-suangbul, dawi-le-kau te ana be-tou ngiitngeet lai hile hiai bang dinmun i tungkei hial ding uhi. “Tangthuhoih ka kipahna, Tangthupha kei dia damna”. Tangthupha hon tun tute’ khe kilawm hina tel e!.

Ahi, salam ah i upa ua; khalam ngei ah leng i naupang law lawmlawm nawn thahah kei uh. Upa tuakta hang! Huaiziak in, hiai tan honpii tu Pathian min i phat ahi. Himahleh i upat u’toh kimil in i piching uhia?. Ann gum hilou, nawitui maw i kiphatmawh teitei laitel uh! ( Hebrute 5: 12-14). Neuchik, tuisik i hih ua kipan hon kem a; hon khoilian a, khalam ah kum 100 val vingveng bang honmusaktu’ meel i lak ah maw a taang zohlouh tel! Thuneihna leh lalnate delh a, hon khoiliantu taisan ni louhlouh laitel di i d’uh maw??

Laphuaktu’n, “Sih ding kihta ka hikei, khamangthang khatbeek piilou a Hondampa’ meel muh diing kihta ka hi zaw” a chih kha ngaih ka sa mahmah. Huaiziak in, Hondampa’ meel muh diing i kihtaak louhna diing in hun i neihsung un a tamtheilam semni. Khamangthang khat beek piikei mahleh(?) hiai laa phuaktu bang chuh a en-huai ahi lai, sih diing kihta lou ahih man in. I lak ah sih diing kihta lou bangzah i om dia? Sih khamuanna nei!!?

I chihsa mahbang in i pian a kipan Kristian ina hi ua, Pathianthu i zakthoh mai kia hilou in i heisuk-heitouhna ah A thu i sim in i mu selsol. “Hotdamna Chialpi/Camp” ahihlouh chia “Halhthakna/Revival” chih ahi zel. Huaiziak a, pianthakbang chu dawm pianthaklou, zongsangtop, 4/5 khawng piangthak! Nawizu hilou a ann gum ne dia kilawm hinapi’n ann gum i ne kei ua, nawi i ngawl kei nilouh uh! A thu a genthoh na-na-na chuh i zei ua, the taw mek mah i bang zee-zuu uh. Himahleh, Pathian gam zaw kamhaat thu a tan ahi zenzen kei diing. (I Kor. 4:20)

Na piangthak kei va kichi thahah lelah nak pianthaklua, pianthak zahvei sim di hile khutzung leh khezung teng in le daihnawnlou di hial khop a piangthak! Himahleh, eilawi hi i pianthak chiang ua le i chiin dan lui hoihloute nasan u’leng tawpsan tuanlou a piangthak. Piangthak ringot, kikhekna himhim om tuanlou! Hilele, piangthak diktak! Khalam hilou a, salam a Khris toh kizom. “Huchi ahih ziakin, kuapeuh Kris a a om leh, thilsiamthak a hong hi a; thilluite a mangta a; ngai un, a hongthak ta uhi” (2 Korinth-te 5:17). Salam beek a kikhekna om thei ngal di’n piangthak beek le chu…Pathian thu chuh i nak theihlua ua himahleh i zuikei uh. Heutupa Damkhothang in, “Kou Bible zilte’ tung a Pathian in a lam-et dia ka gintak ahih leh Bible ka zil ua, a zilloute’ sang a neuchik ka na theihzawk pen uh ka zuih ua, ka hinpih uh lam-en hi di ahi. Ka zuihkei ua, ka kitheih mohbawl teitei lai ua leh huntawpni chiah a zilloute’ sang in ka thuak u’leh maituah d’uh a sahzaw mai d’aw?” achih kha gintak huai ka sa mahmah hi. Thei gegu a zuihlouh chuh khelhna thupitak ahi.

Ahihleh, en Pathian thu i piankhiat a kipan za hang a, huchipi a le polam kilawmna maimai dia zanglai di i diam? I hinkhua hon pitu leh makaihtu dia bang chikchia zatsawm i hia? Huntawpni chiah Pathian mai ah bang i gen dia, tua khalam a kum 100 valte’n.

Kipan thakni.

Thouni  innlam ni.

***Nu, Ka Kipak !***

©Siamsinna leh Vakiangbu