KA JAIL BANG ZUUT

By ~ Gøuläl Hangshing Ozil 

Kum 18 mi tangvalnou ka hi a, ka kitheihlouh kal in drugs addict ka na hi maimah hi. Nikhat in pills 5 tan bek ka nek keileh ka hithei nawn kei hi. Kei le ka kingaih tuahtuah a , hiai Lamka a khamtheih chiteng kimna a ka om om leh den chia  ka utlouh pen No.4 tan tung thei ka hi chih kithei in vaigam a vazinkhia  in va ki om leh kidek thei deuh din ka kigintak ziak in Chennai ah hotel a sem din kong zinkheta hi.

Vaigam ah kong om ta a , ka khamtheih duhna in hon pha nawnta  hi. Om theilou ka hih ziak in pharmacy ah baihlam tak in pills kon leithei a , kiman ka sa mahmah a tampi kon la pah hi. Lamka apat ka zinkhiak dek a ka lungsim a khamtheih kidek sawm pen bang chu ka ngaihtuah kha vet nawn kei hi. A ziak ahihleh baihlamtak leh kimantak a kimuthei mawk ahih chiang a. Hun bangtan hiam nung in pharmacy te toh kong kimaingalkha loh zezen hi.

Ka nasepna a kaloh teng ne gai tawmtawm a om in ka theihlouh kal in vaigam ah kum 3 bang ka na om man ta mawk hi. Ka dose hong sang hiaihiai in ka lohte kidaih zoutalou in pharmacy te toh ka kitheih ziak in a bat in ka latheita hi. Himahleh ka dose a sang luat ziak in ka bat hong tam gop a,  ka pezou  nawkei hi.

Ka nasepnate’n leng ka khamtheih hihlam hon theikhia ua, hon hawlkhe zawmah uh hi. Beidong tak a belh ding neilou a vaigam ah kong vakvaita mai hi. Ka khamtheih hih lah  tawpthei nawnlou ka nasepna di lah mulou ka hih chiang in Vaite gang khat kon zawm tei hi. Tua gang te lak ah khakhat khong kong om zoh nung in ka sum batnate’n police kiang a  report in nikhat ka paituahna uah police te’n ana man khata uhi.

Tun bel ka utlouh pen No.4 addict sang in leng damsung jail bang zuut ding in thutan khum in kong omta hi. Ka jail bang zuut lam ka inkuante’n theilou in a mang a si  hon sa in, inlam ah si vuina dan in hun ana zang zaw mah uhi. Tun bei kei jail bang zuut phetlou misi ka na hi maimah hi.

Note : Ka na zakdan in.

©Siamsinna leh Vakiangbu