A TAK IITNA
By ~ Chin K Vualnam Paite
(PART-I)
Khokhal huihkhite hong laang hiauhiau in
mualdawn ah nisa leng tum khe petmah ding in hong omta hi huchihlai in
Chinpu leng a lungdeih pen Chingnou te inlam a pawt ding in hong kisa ta
hi. Lampi ah hong paina ah Chingnou lawmnu Kimbawi toh hong kituak kha
uh hi. Kimbawi in le Uchin koilam ah pawt na sawm a??? chih toh nuihmai
tak in a houpih hi. Chinpu in leng na lawm Chingnou kiang lou mundang
hohna di lah kitheilou a amah kiang ka va hoh di ci in mangpha kikhak in
hong kipai khengta uh hi.
Huchi a lampi a Chinpu leng a iitpen
kiang a hawh ding a kilawptak a apai lai in Thangnou te lawmta toh hong
kituak uh hi. Thangnou in Chinpu kiang ah Chingnou kiang hawh ding na
hia, Chin??? chi in hon dong ta hi. Chinpu in leng dawng ding a a
kisaklai in Thangnou lawmte lak a kiphasak deuh khat in Chingnou tawpsan
in Thangnou a dia ka gen ding uh ahi na thuak nopkei leh ngaihsak nawn
ken chi in vau hilh in hon paisanta uh hi.
Huchi in Chinpu leng lungnuamloupi in
Chingnou te inn hong tungta a, Chingnou te a hih leh mi neizou leh mi
zahtak huaitak ahihman un a lut ding kihta kawmpi in hong lut teitei ta
hi. Chingnou inle amel amuh in a nuihmai toh Uchin hong pawt maw ? hong
tu aw chi in ana angvaan pah hi.
Huchi a nuamsa leh kingaitak a a omlai un
dak in amau lungtuak nihgel nopsatak a omte phawkpha lou hileh kilawm
in hong pai liam zungzung hi. Huchi in Chinpu in leng Chingnou kiang ah
“Ching zansawt lawta ka na pai phot di aw ” chi in inkong lam manawh in
hong kizuikheta uh hi.
Chinpu mel ah a lungsim a avei Thangnou
te lawmta thugen ging mang theilou in Chinpu in leng Chingnou kawiphei
in “Ching kei di’n gin om gige in aw” hon chi hi. Chingnou inle, ‘Uchin,
i kaal sihna loungal in hon khenzou kei ding ” chi in a Uchin ang ah a
belh thinthen ta hi.
Huchi a om a a kingaihtuah tuah kal in
theihlouh kal in zingkhua vak ding kisata, ak-masate hong khuang
ngelngel tuh Chinpu a ding in zing ninou kilawmtak te leh vasate
kipaktak a a siamtu Pathian phat a omte khong etlawm leh kipahhuai a
hihlam mangngilh zou khop in Chingnou kia a lungsim ah om in tomcik bek
imu ding chi in kikhamuan theih dandan a kikhamuan in hong mitsi ta hi.
Tomcik ihmu pan a kichih in a upa Lianpu
in a hon call hi. Chinpu in leng ihmut suah mel tak a pick-up in,
hello..! a hon chikhe nunup hi. A Ulianpu ahihleh mundang a laisim a om
ahi a, inlam a utdan leh nu leh pa thu a om ding a hihdan phone in
Chinpu a hon hilh hi. Chinpu leng ihmu thei nawnlou in hong thoukhia hi.
Hun hong pai zel a ni leh khate hong
kidang hiaihiai in Chingnou nu leh pate kiang ah Thangnoute lawmta in
Chinpu thuzuaupi in va hek in, va dem uh hi. Chingnou in Thangnou te
lawmta omdan ana en vengveng a, akaal uh sukbuai sawm a hihdan uh a haih
kei hi.
—————–
—————–
(Part – II)
Hunte hong kihei in Chingnou pa le
Thangnou te thuzoh in hong om ta hi. Chingnou leng Chinpu toh a kimuh
ding uh phallou in a inkong natawm kaan phallou phial in hong om hi.
Chinpu in leng thu omdan hon thei toutou ta ahihman in a iit Chingnou
mel muh utlua ahihman in amuh na didan lampi ngaihtuah in hong diangkhe
ta hi.
Lampi a Chingnou bang chi leh ka mu thei
de o? chi a lungbuai tak a ngaihtuah a hong pailai in a lamet louhpi in
lampi ah Chingnou bazar hoh ding a a gari a hong tai toh hong kituak uh
hi. Huchi a hong kituah un gen di thei masa zaw sam omlou in a om kha
niloh zezen uh hi. Huci a kimu a kihoupih masa ngam omlou a a om lai un
Thangnou te lawmta in hong tuak kha citciat ta ua, Thangnou in leng
Chinpu kiang ah Chingnou toh na kimuh ding uh leng hon phallouh pi uh,
bangziak a na kimuh teitei uh a chi in Chinpu hon vuak sawm uh hi.
Chinpu leng a iitpen a tang zoh na’ng in a pan theih dandan in hong pang
a, himahleh panpihtu di neilou Chinpu in Thangnou te lawmta nang zoulou
in leilak.ah puksuk ta hi. Chingnou leng kidek zoulou in a iit Chinpu,
Thangnou te khut apan humbit sawm in Chinpu va pumkoi in Thangnou te
suheh deuhdeuh lai dep hi.
Huchia Chinpu leng a thuaknate naa sa sim
ahihman in pawtkhe ngaplou in inn ah lum in a om a, himahleh a lungsim
ah Chingnou muh a ut gige chih a mel ah a kilang mahmah hi. Chinpu nu’n
“bawi huai Thangnou i chihte khawng mi hausa ta a deihdeih uh nei zou te
khong toh ei niteng nektawm zong te khong ngaih kituh a om innsak,
inkhangte hon nuihsanna ahi lel diam maw ? “chi in liangvai leh gumtu
ding bei kisa in Chinpu lupna a lum tuh a va kah khum maimah hi. Chinpu
leng kipaksak in a nu kiang ah ‘A TAK IITNA’ in zaw sum leh pai neih leh
lam in a enkei, achi a, a nu a hehnemta hi. Chingnou tuh a iitpen
Chinpu thuaknate a mitkha a bei theilou in asun, azan in a hon ngaihtuah
a ann leng duhlou a bahsia a puk mai ding bang in hong om ta hi. Huchi a
hong om anu leh pa’n a theih un Thangnou a sam ua thu omdan a hilh ua, a
kin theilam a amah toh Chingnou gawm ding in thupukna a hon la ta uhi.
Zing ninou kilawmtakte’n Chinpu pindan
sung hon taanvak kiukiau a, Chinpu leng a natnate dam deuhta ahihman in
hong thoukhia in kihahsiang a, a kihah zoh in a niteng nek muhna ding
zong in hong pawtkheta hi.
—————————
—————————
(PART III)
Chingnou in leng a nute Si inn a
lengkhawm di ahihman un, a lengkhop sung uh a theihlouh kar ua pawthei
zual di ahihdan a UChin hilhpah hi. Huchih chiang in, Chinpu thumu kisa
in inn lam ah va pai zual a, anu leh pa kiang ah pawt zual dek ahihdan
va theisak hi.
Huai nitak kho omdan mi lungzuang theite a
di’n a lungzuanhuai biik se bang hi. Lungtuak nihgelte’n itna simthu
khawng kikumkhawm in, kuamah englou in om uhi. Kha de panpan ahi a, huai
nitak leng kha neuchik a kimu a, himahleh a vakna neng chik in leitung
ah vakna a pezek a khawmial adan omdeuh hi. Hun tomchik paipan asak kar
un, dak.8 bang ana gingman a, lengkhawmte ana tawpman uhi. Chingnou a
di’n inn pai di a huphulh huai khopmai. Innngak dia a nute’n a koih uh,
inn pawkalh a pawtkhia ahihman in. Chingnou in ahihleh, Inn ah paileh a
tuah di teng theisa ahihman in, a Uchin zuihsuak mai leng khawk salou
hi. A Uchin in bang lunggel nei adiam chih a theikei. Himahleh a lungsim
etna di’n, ‘Uchin, na anglum ka ngai gawp, hon pi tamai ve?’ a chi hi.
Himahleh, Chingnou nute’n Chinpu deihlou lua uh ahi chih, Chinpu’n a
theihsa ahi a; Tu’n inn pai leh Chingnou mukha nawn di’n kikoihlou hi.
Chinpu’n le Chingnou tonpih mai di’n lung hon gelta hi.Chingnou te inn
bel apate’n a kalhsiat mai uh a ngai ding hi. A ziak ahihleh, Chingnou
in Chabitawi ahihman in. Chingnou hong kisakdan chu a Uchin zuihsawm ana
hi ngei hi.
Chinpu’n inn a anute Phone in, lawm hon pilut di ahihdan zasak pah in, a
khawnung in a Itpen a Innsung uah hon tonpih lutta hi. Tuun leh zua hal
na kal ah, Nihgel itna mualsuah ahi mai uhi.
A ninawn zingkhua hong vak a, Chingnou
nute’n Chingnou in pasal nei ahihdan a theih un kaikhen di chi in hong
kuan uhi. Ut leh utlouh khuallou in atanu uh asam in hong kai hial uh
zaw, Chinpu a di’n a ethak khop mai. Ka tanu nang a dia ka vak leh
khoilet hilou ahi. Nang a dia phal hileng,Thothong toh ka kitengsak ta
di, khawng chih khum loiloi maimah uhi.
Huchi a lungtuak nihgeel a kaal uh hihbei
leh a kimuh theih nawn uh gintak huailou khop in Chingnou pate leh
Thangnou te lawmta in a enzui zou den uhi. Hunte hong mualliam zel in
nikhat Chinpu leng a iitpen Chingnouin a iitna latsakna ding a athilpiak
puan-ak chik mah ale a mawk silh ngamlouh hon silh khia in, maban
khosakna di ngaihtuah na toh sepna di zong in hong pawtkhe ta hi.
Sepna a zonna ah mi a bang in hoih mu
zoukei mah leh company khat ah sepna hon mu in kipaktak in a inkuante
hilh pah hi. Himahleh, a melsuah ah a kipahna bukimlou ahihdan etmai in
leng a kithei mahmah hi.
Huchi a asepna ah gin omtak in hon sem in
a khosakna uh lungsim a nei kawm a sem ahihman in nidang sang in a
khosak uh a nuam zaw chih a kilang hi.
A lohchin dan leh a hong kilamdang touh
dan Thangnou te lawmta in a hon thei ua, bang chi leh a khosakna sukniam
theih di a chih ngaihtuah in a buai mahmah ta uh hi.b
———————-
———————-
(PART IV)
Thangnou te lawmta in Chinpu khosakna
sukbuai hon sawm in panmun hon ngaihtuah pan ta uh hi. Huchi a pan hon
lak lam uh Chingnou lawm hoih mahmah Kimbawi in ana thei citchiat
ahihman in Chinpu kiang a kin thei bangpen in va hilh ding in a gari toh
hong taipawt ta hi. Lampi ah Chinpu office lam manawh a a hong tai
vengveng lai in Chinpu nu tawh hong kituak kha ta uh a Kimbawi in leng
anu kiang gen mai ding chi in a gari hon sumit in hotel ah a lutpihta a,
Chinpu nu kiang ah thu om dan teng hon gen in Thangnou te lawmta in
amah (Chinpu nu) pimang a sum tampi a tatsak ding sawm uh ahihdan hon
gen kawm in pilvang tak a om ding leh Chinpu kiang a hilhpah ding in
vaikhak in hong kikhenta uh hi.
Hun hong paizel in Chingnou in leng a
Uchin mu ut lua ahihman in a guk in hong taipawt thei zenzen hi. Huchi a
Chinpu te inlam manawh a hong pai vengveng in Chinpu in chikmah a mu
kha nawnlou ding a akikoih lai in kong hong kikiu ging keuhkeuh a hon za
ta hi. Kua hi peuhmah ding hiam tuzingkhang pi a, chi in lungbuai kawm
pi leh thazoi mel putak a kong a va hong leh a iitpen Chingnou a na ding
a hon mu a, bangmah le gen masa lou in a hong kikawi pah chenchen uhi.
Huchi a hun nuam a neih sunsun uh aam tak
in hon zang ua hun tomchik paipan a sak kal un sunnisa leng hong niam
hiaihiai ta ahihman in Chingnou in a Uchin kiang ah, Uchin nang a ding
in gentheih haksatna ka thuak zong in A TAK IITNA ka hon piaksa lakik
thei ding ka hi nawnkei. Bang teng ka tung ah tung zaw heh chi.in khelah
tak in a Uchin aang ah belh thinthen in a mit apan in nan zawhlouh di
khop in mittui hong taak khe keuhkeuh hi.
————————–
————————–
(PART-V)
Kikhelak tak in Chinpu leh Chingnou te om
mah le uh hun in ngaklou ahihman in hong kikhen phot uh hi. Chingnou
ngei leng inn apai ding haksa sa mahmah kawm in a khituite nulhul in a
gari a hon start a, a Uchin kiang mangpha khak in hong tai liam vungvung
ta hi.
Huchih lai in Thangnou te lawmta leng
Chinpu nu pimang ding in hong kuan ua, inn apan Chinpu nu pikhe dia hong
kisak lai un Chinpu nu leng chimawh kisa in a aw neih tawp in Chinpu a
hon sam hi. A aw za in inkiim-inpaam a ten hon delh kheukhou uh ahihman
in Thangnou te lawmta in a plan bawl uh lawhsam ding thouthou chi in
Chinpu nu tuh a thau tawi un hon kap ua leilak ah Chinpu nu hong
kipuksuk in gim mahmah in hong om hi. Inkiim-inkiangte’n leng Thangnou
te lawmta mantang in a thau uh hon laksak ua vuak in hon vua uh hi.
Huchi a Chinpu leng a nu kiang mangbang leh beidot chi tak a a omlai in
mi phatuam ngai bangzah hiamte’n lam etna a omlai khak leh chih na tawh
Chinpu nu damdawi inn ah hon taipih pah uhi.
Damdawi inn ah doctor leh nurse te’n zong
ana kithuahpih pah in Chinpu nu leng a sapum apat in thau a akapna tang
uh lakkhiak in hong om a, ani-ani in hoihlam nawt in hong om hi. Chinpu
in a veng a paam ua mi phatuam ngaite’n anu hinna humbitsak uh a hi
chih a ngaihtuah chiang in kipaklua in gen ding pen theilou in amit apan
mittui hong taak khe keuhkeuh a.
Hiai thu Chingnou in a hon zak chiang in
lungphawng kisa in a om didan theilou in Chinpu te nuta kiang hawhnuam
leh kithuahpih utlua hi. Himahleh apa’n apawt ding a phallouh man in a
room kong kalhkhum ahihman in a lupna ah Chinpu te nuta a di’n thu ana
ngetsak den hi.
Zing ninou vak kilawmtakte hong suak in
nisa leng nidang sang mah in a vaak kilawm zaw bang hial in leh tung
leeng vasate’n kipaktak a abawl tupa phat a aham ging ciauciau te un
Chinpu lungkham leh beidong a om pen thathak hon guan in hon kipaksak ta
hi. Amah leng zing hong thou a, hih di teng a hon hih zoh in, anu omna
damdawi inn lam manawh in hong pai vengveng ta hi. Huchi a kinawh sim a
hong pai lai in Chingnou pate leng min a thuguk sai theikhe ding uh chih
lau ahihman un Chinpu nu veh ding in hong pawt uh hi. Chinpu in leng a
hong pawtna ziak uh a theilou a hi zenzen kei hi. Chingnou pa’n Chinpu
nu kiang ah ka hong vehna ding un bang kon hihsak na ut a ? chi in
kamsiam khem kibawl in thu hon dot leh a kineplouh dan leh milak ah
mualphou dimdem in Chinpu nu’n nang leh na kithuahpih Thangnou te lawmta
damsung suangkulh taang ding in police te kiang case kon bulhkhum nuam,
a hon chi khe mai hi. Hiai thu a zak un heh kisa in gen ding theilou in
inn lam zuan in hong pai vengveng ta uhi.
Lampi ah Chingnou pa’n a thil zak a
lungsim ah ngaihtuah den ahihman in Thangno te kiang ah Chinpu leh amah
tanu deihthawh ngoihngoih kuamah hing hawi lou a, that mai ding in
thupuukna hon pekhe ta hi.
——————-
——————-
(PART VI)
Zodam hiuhkhi siangte hong nung hiauhiau
in ni leng mualdawn ah tum ding in vak kiukiau ta hi. Chinpu leng anu
liamnamate hahsak in inn ah om hi. Huchi a a om laitak un a phone hong
ging a, a hon et leh a iitpen Chingnou lawmnu Kimbawi ana hi hi. Chinpu
in leng phone hon pick-up in bang poimawh om zenzen a hia KIM??? a hon
chih patpat leh amah lungsimlou lam in thu hong paita hi. Kimbawi in
Chingnou pa’n amau that ding a Thangnou te lawmta hon sawl ahihdan hon
genta hi.
Huchi a Chinpu leng lungbuai tak leh
Chingnou koi a bang chi leh humbit thei ding a hiam chi a a ngaihtuah
lai in, a inn paamlam uah mi kiselbuai leh thawm lauhhuaipi a hon za ta
a, aman leng bang hi peuhmah ding hiam chi a ava guk et leh Thangnou te
lawmta leh vengsung mipite kisubuai in vengsung mipite’n Thangnou te
lawmta ana man uh ahihdan hon mu hi. Chinpu leng a kin thei bang pen in
buaina lam ah tai vengveng in Thangnou kiang ah hichi in mipi lak
ahihlam le khual nawn se lou in va chi ta hi “Thangnou, nang ka gou leh
ka iitpen na deihman a ka kaal uh hon sukbuai sawm nana hi maw?? Kou
Chingnou toh ka ki-itna uh khenzoh ding ka hi nawn kei ua, ka ki iitna
uh zaw ATAK IITNA a hi “a hon chi ta hi.
Huai thu Thangnou in a hon zak chiang in
maizum leh nuamsalou in a hong om a, himahleh Chingnou pa thubawl
ahihdan Chinpu kiang ah hon genkhe khong hi.Chinpu in zong thu omdan
theita ahihman in pautam hetlou in kihepkhiatsan dia a kisak lai in a
veng pih Pasal hawnte’n Thangboi te bang lawh ding chi in kan souhsouh
leh Thangnou te lawmta tung ah khutkha nuam tettet ahihman un Chinpu
dawnna ngak man nawnlou in a hon soisata uh hi.
Chinpu in leng Chingnou pa kimuahpih nuam
tenten ahihman in Chingnou te inn hon zuan vengveng ta hi. Chingnou te
kelkong a hong tun chiang in Chingnou pa leng a kong uah a zi toh khua
lumlua ahihman in ana tukhia uh hi. A kelkong ua pat Chinpu in Chingnou
pa a hon sam a “na hon deihlouh a ka sih ding tanpha uh thupukna bawl na
hih leh tu mahmah in hong that in” chi in hong kikou khiat loiloi leh
Chingnou pa’n leng mi theih ding lau chih dan in a kiang nai ah va pai
in “nang bang kisa na hia ? Ka ta nu nang leltak toh kiteng ding in ka
phal kei veng mipi’n hon theih ma in a kinlam in ka muhna apat kihemkhia
in” a hon chi hi.
Huai phet in Chinpu in leng a iitpen
Chingnou a gal apat a hon sam a Chingnou in leng a iitpen aw za ahihman
in a nu leh pate’n bang hon loh ding uh chih khual pha nawnlou in a room
apat in hong tai pawtta a…CHINGNOU pate’n mattaang sawm in ana daal mah
le uh veng mite’n a thawmging uh za ahihman un hong kipunkhawm ua
Chingnou a pate’n a mattaang uh hon ngen in hong kikou souhsouh ta uh
hi.
A lak ua upa khat in “nang mi huham na
tanu in a damsung adia a tulpih dia a tel toh kigawm ding na phallouhna
leng kingaihtuah thak in, tua na iitpen na kiang a om na zi leng na kaal
uh na nu, na pate’n nang hal bang in hon hal hi le uh bang chi in na om
dia??” chi a hong kikoukhiat uleh Chingnou pa leng heh leh maizum kisak
ziak in innsung ah lut in daitak a va om nilouh a.
Chingnou leng a iitpen Chinpu lam manawh a
tai phei in a ang ah kaihkhiat zohlouh ding bangmai in a belh thinthen
ta a, a nih un amit ua pan mittui hong luang khetuak in kap kawm in
Chinpu in Chingnou kiang ah, A TAK IITNA hon na pelou ka hih khak ding
ka lau ngei chih toh apomkip semsem ta hi.
~~BEITA~~
©Siamsinna leh Vakiangbu
Comments
Post a Comment