TOUPA THUMNA

By ~ Muana Guite

KA PA UH, VAN A OM.
~Eiiih.
-Hey, kuamah kithum lai in a huchi om kei uh, na uang lua.
-Ka uang sam a, non sam hilou maw??
-Kon sam mawk di hia…thumna nei kei voi…..mihai…hong pawtkhia oh.
-Na sap, Na Pathian, van a om pen ka hi. Thum zel oh, ka na ngaikhe di.
-A chih leh aw.

NA MIN KIZAHTAK HEN.
-Ana khawl dih, na min kizahtat hen na chi a, nang le na zahtak a hia?? Na thilhih khelhte selna ding leh, mite hon muh hoihna ding in maw ka MIN na zat, chih taktak in la na chi ngei kei a. Sunzom zel phot oh, na gen di a tam lai si a.

NA GAM HON TUNG HEN.
Koi ah e??
-Aaaaa….ka thei chiah kei. Huai kha hidaihmai ! Kon hilh chian di. A masa pen in nang mah ah ka gam a tun ka deih a. Duh-amna gam, kichapou sakna gam leh a dangdang te ah ka gam na tun sak ahi ka deih. Huai gamte dou di’n ana kisa inla, ka gam tun sak sawm in.
-Ka theisiam lua, hilele a hak mah di??
-Hak e, himahleh….hattak leh hangsantak in om inla, nang panpih dia mansa ka hi.
-Kon tum himhim di.

NA DEIHLAM VAN A AKIHIH BANG IN LEI AH LENG KIHIH HEN.
-Na thei diklua.
-Bang e??
Na thei diklua ka chi a hi. Van ah chu ka deihlam hih di leh ninglou a hon pahtawi di sim senglouh in a om uh….Himahleh nang na om kei leh a kim thei kei. Ka lung a kim thei kei a, nang a din sih le ka tel zaw ahih kha.
-Huchidan in Ka na ngaihtuah ngei khol sam a, Lei a mihingte’n hih mai uh heh.
Lei a mi chih ah nang le na tel a ka.
-A mak awm belbual ve. Aw le, hong thum nawn ta oh, ka na ngaikhe nawn di.

NITENG A KA NEK KHOP DI UH ANN HON PIA IN.
Khaih khaih……non ngen tawm deuh hilou maw? Huai teng chauh hon pen leng na lung a kim na diam?
-A chih leh la….huai sang a tam zaw himai heh leh.Aw le aw le……
-Na deih leh na poimohte chu nang sang in ka thei chiang zaw aka. Ngetna chang le na theilouh tantan uh eive kon piak zel. Nang leh nang na ki-etna dia kon chih maimai hi…..na thumna hon sunzom nawn ta oh le..

KA TUNG A KHIALTE KA NGAIHDAM BANG UN, NANG LENG KA KHELHNA UH HON NGAIDAM IN.
Na awl gen deuh dan apan in hiai lak chu nang leh nang na ki thei deuh in ka thei.
-A dik lua Toupa, hiai lak ah chu ka ching kei.
-Hi e, kei lou in chu bangmah na hih thei kei. Na thuhilh thei di.

KHEMNA AH HON PIILUT KEN LA, GILOU LAK AH HON HUM ZAW IN.
Huai di mah eikha, na hatlouhnate na thei a, ka panpihna non nget di mah ahi.
-Toupa, tuni a ka thum chu ka phattuam pih lua.Na ma ah ka zakta petmah ahi.Kei leh kei a thil hoih hih ka sawm te bangmahlou mai ahihdan ka theikhia a.Tua pat in chu na panpihna chauh ka muang ta di.

Ana khol dih, huai lak tak ah na theih di poimoh tak a om. Nang chu ka panpih theih di leh kon kipolhpih thei dia na om poimoh ahi. Huai din chu ka aw na zak theih na di mun khong ah na om a poimoh ahi. Huailou in, ka mite thumna dawng di a tam mahmah ziak in tua dan in i kihou thei gige kei ding hi. Huai ziak in ka thutak om na BIBLE ana sim gige inla……..aban a na gen di teng le ka thei khol vek. Mi lungsim taktak toh hong thum chiang un ka kipak mahmah hi. Lungsim taktak toh nong kithum chiah nang a di’n le hatna ahi dia, Setan in le hon khem zou kei ding hi. Aw le……kon subuai nawn kei ding. Na thumna chu hon gen zou oh le.

GAM LEH SILBAWL THEIHNA LEH THUPINA, TANGTAWN IN NANG A AHIH ZIAK IN,  AMEN.

©Siamsinna leh Vakiangbu