KA NA THILTUAH KHAKTEI ( Nute Vaidawn a kuanna)
By ~ Lkpau Tombing
Note : A taktak
( Nute Vaidawn a kuanna )
Zan, 2 am vel in ka inn uh SDO Quarter,
Block veng, Thanlon bangmah le ngaihsak khollou in ka paitou hi. SDC
office kong ka tun in mikhat hong sukpai ka mu a, kei le kizekaisak in
culvert mun ah ka na ngakbawl hi. Ka kiang hon naih simtak in lamsak
lampang a neh hiaihiai a, guamkom ah mangtou mok hi. Huai guam lah
kul-a-kul hingal, nahpateh khong bek ling ngal leh kilawm hia ! Lamdang
sa sim in ka va en hoih kha zawzen. Paisan
di chi in ka kinunghei a, thakhat in tui luang mah bang in hong ging
zoizoi a ka lau sim thak hi. Taimok di lah ka inn uh naichik hita.
Kihangsan sak in ka pai thoh teitei hi. Ka deksam hong thou sungsung a,
ka biang bang bawk theeithuai in ka thei hial hi. Ka kalsuan bang kin
theilou mah abang mai hi. Inn kongkhak ana kisung kalh zomah lai.
Nunglam le nga ngam nawnlou. Kong hong hon uh, khesil, puan suah chih te
om nawn vetlou, ka nu’n bang hong chi e ? chia hon kan, zingkal chiah
chih san geih. Lum pah, bang mah lah ngaihtuah theilou, ka chi khong vot
sungsung hi’n ka thei a, khosik mah ka bang hi. Nidang a ka nute lupna
toh kinaih lua ka kichih hia…!
Buai veng pan phet ahih chiang in Thanlon
khua a kial mahmah hi. Niteng in sahbon, chii leh vannen pua in ka nu
Hanship ah ann zong in kuan hi. Pawl nga ka sim kum ahi a, nikhat ka
nu’n School kai na tawp phet chiah nong dawn di aw chi in hon vaikhak a,
ken le nitaklam football pek lunggulh ngoihngoih pi’n ka nu ka nial
ngamlouh man in nam leh ippi khat sakhau a kuah in nitaklam dak 3 lak
khong in Bukpi lampi zui in ka kuankhia hi. Thanlon gam kheng, Bukpi gam
ka tun in zaw ka hat pai non kei. Ka nu ana ngak di’n lah a vanpuak lel
a hong bah lua ahihkhak di ka lau a, ka khawl ngam kei hi. Dak 5pm bang
hong gin hial chiang in kei le ka chimoh simta hi. Tutan kituak khalou,
ka nu Hanship a hong nituang ahi de aw ! chia ngaihtuah kawm in maban
ka suan zel hi.
Thanlon apan Hanship kigamla khollou,
pasal thahatte dakkal 6 khong paitheihna ahi hi. Bukpi ahihleh lamkim
khong lel ahi di. Bukpi toh Thanlon kigam gitna mun ah kawl thupi mahmah
“Putek kawl om a, huai putek kawl pen dawite kulhpi thupi mahmah ahi a
chi uhi. Nidang in Thanlon ah Dawi toh kizawl pitek khat om a, tua pitek
in putek kawl va hahsiang zel hi. Aman a genna ah dawite kumpi lian
mahmah khat om a, Vot (leech) sialpi chiachia nih in a veng uh chi hi.
Hiai kawl toh kizomtou in Khuaikawl kichi om hi. Hiai kawlte gel kikal
ah Bukpi lampi paitou hi. Hiai lampi hah touh lua mahmah, nupi, “Helvei”
kichi khat pai kaitou zoulou in a tonpih pasalpa’ kiang ah “hon pua
kaitou inla na ut-ut hon loh in” chi’n kipaw kaitou sak a, huai ziak in
amah min tam in hiai lamtou kha “Helvei tou” kichi hi.
Kei le Bukpi khua bang va lut hial ding
ka hih tak chiang in lungkia in Thanlon lam zuan in ka kinunghei nawn
mai hi. Ni lah tum hi ta, nunglam nga kawm in ka paizel a Bukpi mi
vaipaite toh ka kituak zel ua, hon kan chiang un Thanlon zuan ding ka
hihdan ka gen zel hi. Naupang khomuizul a gam hiaitan pai ding hon
muangmoh mahmah mai ahi ding ua, Bukpi a giak a zingkal chiang a pai
ding in hahzot in hon zawn zel uhi. Kei lah ka ut dek kei. Mi vai hong
paite’ thomging khong ka zak chiang in ka na kibu zaw mah hi.
Khua mial khe ding ahita. Pucca Road apan
Helvei lampi manoh a kong kal khiak touh tak in chuh ka thomhau mahmah
ta hi. Bukpi lam a kik mai di ahi de aw ! chih bang ka ngaihtuah a, Kik
hileng le mial thouthou ding, kuate’ inn va naih mok ding ? Bangziak a
vaipaite’n hon zotlai ua ana mang khalou ka hi de aw ! chia kingaihtuah
kawmkawm toh, ka nu bang ka hehsan tha a suak mahmah mai hi. Chimohlua
kap kawm in thumna bang ka nei zel hi. Lamtung a vasa giak dite bang ka
phong kha zel a, huai chiang in ka lauhna hon behlap law mahmah, tai in
ka tai thoh zel hi. Ka sakzek ah sakhi a hong hawk zomah hi. Chikmah a
hichituk a nai a Sakhi hawk ka zak ngeilouh hia.
A tawp in chuh Mualvum (kileen zaakna ka
chih uh) ka tungtou khawng hi. Huih a hat mahmah mai a, Sakhi hawk in
lah hon naih deuhdeuh a bang a, tunglam lah vuahzu dia kisa in mei a
kaai ngoingoi mai hi. Ka paisukna di “Helvei tou” ka en a, kawlse lak,
sing lian pipi nuai mial in a mial suk ngem-ngom mai hi. Thomging bang
zak di a tam mahmah mai hi. Sawtlou nung in ka khang ah mi hong kikou om
a, lawm nei di chi in ka lung a muang mahmah a, kinemtak in ka na ngak
hi. A hong kikoutou zel a, hon naih simtak in mihing aw di a bang nawn
kei. Hon kheeng duldul hial in ka thei. Lamdang ka sa lua a, ka na kibu
hi. A hong tungtou a, mi hia, saa hia? chih ka muchiang kei, a lian
mahmah chih ka thei. Taangdung zui in ka pai louhna di lam ah apai
mangtou hi. Ka lau law petmah a, khawl thei ka hinawn takei. Ka paisukna
di lah ka ngam mahmah kei zel. Ka chii khong hong ling singsing a, ka
sam neelteng thoukhia hi’n ka thei hi. Nidang a ka inn kiang ua ka sikha
muh ka lauh luat chuh a neepte hita mai. “Toupa aw, hon taisan mahmah
ken aw,” chia mittui luang hithit kawm in ka sakhau ka kawng a hoih deuh
a khihkip in ka paisukta hi.
Khatvei ka pu toh Lou a kipan in ka
zanpai kha ngei ua, lampi ah suang khong in lamkhang khawng ka deng hi.
Ka pu’n, “Zaan a suang lot theihlouh, gamsa, Sahang, Vompi suk heh theih
ahi” hon chih ka phokkhia hi. Ka paina lah khoubaang bang a keen,
khomial toh sikna di lah kimu theilou, suangsi lak hizomah lai. Munkhat i
sik chiang in suang khong a tolh noinoi hi. Lamkhang khong ah ka
tolhkhe zel a, Sahang khong ana om khak di ka lau mahmah hi. A khen
chiah suang lian pipi nuai ah ka paikha zel a, baak lian pipi khong hong
leng khopkhop zel ua, dip a kisai litlit mai a, chiltui bang omlou khop
in dang a hul mahmah hi. A khen chiah singluang khong kaan ngai khawn
ana om mawk hi. Ka lampi zuih kha zui kha nawnlou ka na hi maimah hi.
Kik non di lah ka nung di ka thei zou nawnkei. Lamkhang a tolhkhe kha ka
hi deh aw ! aihkei leh lamkawina a paisuak kha ka hi diam aw ? chia
ngaihtuah in lau leh mangbang se lua singluang tung ah ka tu kha velval
zezen hi. Huchia ka khawl lai in hiai Helvei tou a thiltung a gen
zeuhzeuh uh ka ngaihtuah khe zungzung mai hi.
Kum bangzah hiam paita in Hanship a kipan
naupang damlou hon pua ua, hiai lamsuk hong tun un nupi khat lamkhang a
singluang tung a naupom a kap a mu ua, a damlou puak uh gimlua ahihman
in ngaihsak manlou in hon taisan ua, a nung a hong paite’n bang mah hon
tuaklou uh chih khong ngaihtuahna ah hong kilang dundun a, ka lauhna
hong kibehlap deuhdeuh hi. Hiai singluang ngei a tutna hi di’n ka um
zomah hi. Ka tumuang thei non kei. Koi lam manohta di? Nuailam manoh in
tholh in ka kitholhsuk mai hi. Munzang deuh ka tun in lampi lam deuh hi
dia ka gintakna lam ka naih bawl hi. Thom neng kha a daih zek chiang in
ngaihtuahna hong kipan nawn zel.
Nidang in, ka pute khat hiai lamtou
kipatna a tun in a liang ah mikhat va tuang a, mualvum a tun in kumkhia
chih ka phokkhe nawn hi. Hiai ka ngaihtuah leh ka chii hong gik a bang
a, ka ding tang thei nawn kei a vak in ka vak thoh mai hi. Vangphat
huaitak in ka paam a luiguam lak ah mi pauging ka za hi. Ken le mi
sing-aat a gamgiakte hi di’n ka um a, ka va naih bawl hi. Luiguam a
mipauna mun ka tun in bangmah muh di a omta kei. Ka lauhdan tuh gen thei
ahi nawn kei. Vuah in hon pha zomah lai. Kek kia in van khawng a ging
dumdum hi. Kawl hong phiat chiang in hong vak >phuaa< zel a hon
muthei khong om di sa in ka kiselbawl zomah hi.Luiguam ka zuisuk a
saulou nung in lampi ka tungsuk hi.
Thanlon gam ahi ta a, lampi phei in a
nuam mahmah a vuah le theuta ahihman in tai in ka tai mai hi. Ka lung a
muang sawt mahmah ta hi. Helvei tou toh ka kigamla mahmah ta ua, nidang a
Loukuan gamlak vak a ka pai gige na mun uh tungta ka ahihman in ka lung
a muang mahmah ta mai hi. Ka maa ah saangsim in vaksim pempuam khat a
leng a, Pathian in ka thumna hon dawng a, Suahlam mipilte aksi a api
bang a kei le Pathian in vak a honpi eive chi’n ka zui a, ka makhelh
khak chiang bang in ka na ngak zel hi. Saukhop tak ka zuih nung in
huaivak pen nih leh thum bang hong kisuah thei mok a, lamdang sakna leh
lauhna in hon tuam nawn hi. Nidang a ka pate’ thugen ka theikhia thak
nawn hi. “Gamkaupi” a chihte uh ana hi a, lau in ka tai non zel hi.
Ahihang in kawl a ka kitholh lai a ka khuk ka tah khakna hong naa
deuhdeuh a ka taihat thei nawn mang kei. Gamkau inle hon zui nawnlou a
ka theih man in ka pai zoh dandan in ka paithoh ta mai hi.
Dak 9 chih khong ahi ta di, ka gil a kial
mahmah ta, ka vuah thuakna toh ka tha a tawl law petmah ta hi. Khua le
ka tung dekta a, meipi kai le theng hita ahihman in a vak hiuhiau hi.
Awl a ka pailai in ka nung ah hon kai om hi’n ka thei hi. Kinung hei a
ka etleh lah bangmah muh di a omkei. Thomging di himhim le omlou ahihman
in ka gimluat ziak hi ding in ka um hi. Himahleh, ka khetul natan hong
kisui hi’n ka thei hi. Nihvei bang hong hichih hial chiang in chuh
lungsim a nuam nawn kei. Mi’ houlim ka zak khak ngeina ah, “Sikha khetul
sui” a chihte uh ahi chih ka phokkhia hi. Hiaite kha, nang masa aw chia
lampi i ot leh om nonlou a chih uh ka theikhe thak hi. Himahleh, awn
himok leng le ken sikha nungzuih hi di, maban a bang tuaktou di ka hia
chih kitheilou. Buai lawtel, awn mai dia ka kisak dek chet in ka gal ah
ka uute kei hong zong dia hong kuan in hon sap uh ka za a, HOIII! chia
kikou in delh in ka delh mai hi.
Inn ka tun un dak 10 a ging phialta hi.
Ei khosakna phokphalou in, Bangdia hon hichi paihak tel e chi in hon tai
zomah lai uhi. Kahmai louh chuh hihtheih omlou himai. Ka nu kiang ah.
“Nu, tuban zaw gim in tawl mah lechin, nang dawn a kuan ka ut nawn kei,”
Ka chih leh ka nu’n, “Pau, ken zum leh zah khuallou, ka gim ka tawl
genlou a i nek di uh zong ing a, nang hon huchih tel di maw?” Hon chi
tuh, ka gil kial, ka tha tawl toh, ka kahkahna kongkaw in ka sihloh
dektak hi. A khonung a ka theihthak leh ka nu Hanship lam a kuanlou in
Zoutung lam a kuan ana hi a, mi hon thukhahte’n a gen uh ka zaak
chianglouh man ana hi maimah.
©Siamsinna leh Vakiangbu
Comments
Post a Comment