LENHEISA
By ~ Sang Quptong
Zoudawn Lou neihna dan a Lou halzoh a, mangvom lai (Mangtom hun) tak
7th. April,1992 in Zouhuih kon diik panta hi. Zogam siatluatna pen ka
theih ziak le ahikei di, ka pian phetphet in ka kap pah chenchen ngal hi
(Source: Nu leh Pa). Ka pian hun pen MANGVOM lai ahihmah bang in, ka
NGOU hetkei a, ka Vom gimgem lel hi. Khenkhat in, ‘Mivomte i ngaihkhak
leh ek teh zen a kingai’ a chi ua, ka kipak veve.
Ka tunnu nawitui ne in a anglum a ihmu
hithit in kong khang deuhdeuh a, Kum 3 Ka hih in C-kul kai kon panta hi.
A to Z te’ Capital letter a gelhthei hizenpi in Small letter in ka gelh
siam mahmah kei taget a, a haksa khopmai. Kum 4 ka phak a, Blackboard a
Maths Solve dia hong kisawl, huai le ’5′ ma (Before) a bang a? Chih
hileltak na in cin, kithei zou mahmah lou, ka miss nu un ka nung hon zep
ekh ka thei lailai mawk a akinui vervur sek aka. Huailai a zaw kituike
nuih veivuai hi a..!
Kum 4 ka phak khawng apan ka Tuunu’n
Zalkhuntung a maimit sing dia ka zal chiang un hon khimna dan in Bible
sung apan Tangthu tuamtuam te hon hilh sek a, akhen chiang in Bible
chang bang hon zilpih zel hi. Senlehkik thei leng zaw, ka senlai hun
ngai hi nang e. . . Ka nu anglum a lungkhamna om hetlou a ka zaallai
nite mubang ngai in, huiva bang ka maumau a, akhen chiang a, miim vabang
a ka thuum huthut hun a tam mahmah hi.
Kum 1997 April kha in Kum 5 ka pha
hi. Hiai kum i genkhak chiang in Zomi-Kuki Gal i chi hiam a, ahihkei leh
Thadou gal i chi uhi. Ahitak in zaw hiai Unau melhaih khak zual in thil
sau a sukha mahmah mai..! A Neep tawp a gen in ka Puanpi uh bangzah
hiam leikawm ah ka seelmuat hiilheel uhi. Naupangluat ziak le ahi dia
hiai gaal pen lauh di’n le ka na koihkei a, akhenchiang in
Khokiim-khokiangte khawng hong tai zungzung ua, Ken leng ka nu leh pa
kiang a, ”Ei bang chikcia gaaltai di” ka chih lamtak ka theilai hi.
Galtai khawng nop a nop didan a kingaihtuah mai ana ki hi dan eive..
Makaite hahpan ziak leh Pathian
lemgel siamna ziak in, Unau mel kihaih kha zualte i kihaih nawnkei pah
ua, anuam mahmah mai, aziak ahihleh Lou nasem a khua apan gamla pipi a
lougiak a nasem a ki-om thei siausiau ahihman in. Kum 7 ka hih in ka nu
leh pa Lou nasepna ka zui panta hi. Nalh ka sak mahmah khat ahihleh, Lou
giahna a nitak ann kinehak sek hiven, ann kon nek tak un, ka pa’n
Maiteh tui lim ei, chi a a hawp zatzat leh ka Muja/Shock hon hawpkha dom
hi. Ka pa’n le ‘i mehtui uh nik/chiik ka chih mah ahi’ chi in ka nui
zaizai uhi.
Khovel Pumpi kipei pen lah khawllou a
akipei kawm a ni kiimvel a paipai ahihman in, Ni leh khate hong bei zel
in Kumte hong pailiam zel a, Kum 2000 a Khovel bei di ahi a cih khawng
uh ka na mumang theih milmial hi. Kum 2000 in kei Kum 8 a naupang ka
hita a, Computer Age a piangkha hileng chu ka theihna a sang ta mahmah
di. 20th leh 21st Century zangkha chu kihi peuhmah phot chih di ahi.
Kum 10 khawng i hong ching hial
chiang a chu, lawmte toh gamlak a tempawng toh vaak ahi penmai di e, hun
awl zatna. Huaile bangdang ziak hilou in, ‘Kangtalai’ bawlna sing di,
Solfang tuai hoih koilam ah om dia chi a kizui kawikawi ana kihilim hi.
Heutu/Lawi upa bang a kinei sam a, gamlapi apan Inn a van banghiam la
dia hon sawl chiang un,’ Bangzah hon pe di e?’ chihte a om vet kei, kin
akin a tai himai dan ahi.
Kangtalai bawlsiam veekvuuk hikei
mahleng, Pate siikdaal khawng lakguksak in a loukuan kal un Kangtalai ka
na bawl nekhnekh sek hi. A taihatna dia, a Zaawl bang nuh di chih
hinawn. A khen chiang in Baal meh khawng a kinuh a, akhen chiang in,
vokthau khawng kinuh tawk zezu maimah hi. Neulai zaw nuam lua hi a, tua
lah..?
Kangtalai Stage in hon khengtou a, Thaulem Stage i hong tungtou nawnta
bang zaw nuam nainai sam eive. Thaulem sing di lakna di’n Gamlak mah zot
ngai nawn. Thaulem bangzah hiam sui in Group tuamtuam bawl. Sepaih lem
kineih chu ahi peuhmah mai. A khen chiang bang a Group tuamtuam kidou
zel, thaukap chu a kisiam khopmai, langlamte i muhnak leh a ngaihthei
tawp a ‘THaNKK’ chi a i muhte min i gen leh si chetchet dan uh ahi. A
kuulmut pawl ka na hita geet a, kei ngial bang Laisim kawm a Pistol lem,
sing a kisui tawm khawng, kawng a vom chitchet peih ka na hi zomah ve…!
Thaulem Stage khawng i hon palsuah
chiang in chu Kum 15 khawng kipha theita hi. Lou nasep di toh Laisim di
toh chi in, Kum 16 ka hih in Thaulemte kei apan kon hemkhe thei
khongkhong ta hi. Lou nasep di chih ziak a, asem pipen a pang a kihikei
a, nu leh pa Tha-lang a pang theita chih ziak a Nu leh pa Dawn zangkhai
theih dandan a panpihna piak utna lungsim i khuak a hong belh ziak hipen
mai hi.
Naupan zawk zek lai in, lian leng
lungnuam ding kisa’ng. Himahleh, i hong let lele lungnopna omtuan lou
zel. A teekte’n le lungnopna nei tuanlou in, dah leh lungzuan toh sih
ding manoh ngen kihi maimah hi.
Neulai khawng in Sumhaute bang i na
eng mahmah mai a, ahihziak in hauhsakna in lungnopna hon petuankei. A
hauhsakna uh ihmut louh pih uh ana hi leltak ve. Akhente ngial Duhduh le
netheilou in om maimah uhi.
Lungkhamnate phawklouh lai, Gua bang a
khanlai ngaihhuai hina maizen e. . . ! Tu’n lah Gaw leek, leilam nga a
kuisuk ngiungiau bangmai in, LENHEISA ngai ing e…..
–Kakipak–
©Siamsinna leh Vakiangbu
Comments
Post a Comment